ཕྱི་ལོ་ ༢༠༢༣ ལོའི་ཨ་རིའི་རེན་ཌོལ་ཧྥི་མཐོ་སློབ་ཀྱི་ཕུལ་བྱུང་བུད་མེད་རྣམས་ལ་འབུལ་སྲོལ་ཡོད་པའི་གཟེངས་རྟགས་ཤིག་༧སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་ལ་འབུལ་གཏན་ཁེལ་འདུག
ཨ་རིའི་མངའ་སྡེ་ཝེར་ཇི་ནེ་ཡའི་རེན་ཌོལ་ཧྥི་ (Randolph) མཐོ་སློབ་ཀྱི་ཕྱི་ལོ་ ༢༠༢༣ ལོའི་(PEARL S. BUCK) ཞེས་པའི་གཟེངས་རྟགས་དེ་གངས་ཅན་བོད་ཀྱི་ཨ་མ་དང་༧སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་ལ་འབུལ་གཏན་ཁེལ་བ་ཡོངས་བསྒྲགས་གནང་འདུག་ལ། གཟེངས་རྟགས་དེ་ནི་འཛམ་གླིང་ནང་བསམ་བློའི་རིན་ཐང་ལྡན་ཞིང་མིག་དཔེར་ལྟ་འོས་པ། ཕུགས་བསམ་མངོན་འགྱུར་གྱི་ཆེད་དུ་བློས་གཏོང་གནང་མཁན་གྱི་བུད་མེད་རྣམས་ལ་ཕུལ་སྲོལ་ཡོད་ཅིང་། བཀའ་ཟུར་རྗེ་བཙུན་པདྨ་མཆོག་གིས་ཕྱི་ལོ་ ༡༩༦༤ ལོ་ནས་ ༢༠༠༦ བར་རེ་ཐག་ཆད་ཅིང་མགོན་མེད་སྐྱབས་མེད་ཀྱི་དྭ་ཕྲུག་མང་པོ་དང་བཙན་བྱོལ་བོད་མིའི་བོད་ཕྲུག་མང་པོ་བྱམས་བརྩེས་བསྐྱངས་གནང་བར་གཟེངས་བསྟོད་ངོས་འཛིན་མཚོན་སླད་ཕུལ་བ་ཞིག་ཡིན་འདུག
རེན་ཌོལ་ཧྥིའི་མཐོ་སློབ་ཀྱི་གཙོ་འཛིན་ཆེན་མོ་སྐུ་ཞབས་སོའུ་ཨོ་ཊི་རའོ་ལན་ཌི་སི་ (Sue Ott Rowlands) ལགས་ཀྱིས། རྗེ་བཙུན་པདྨ་མཆོག་གིས་བོད་ནས་ཡོང་བའི་ཕྲུ་གུ་མང་པོའི་བདེ་སྡུག་དང་དུ་བླངས་ནས་བྱམས་སྐྱོང་གནང་ཡོད་སྟབས། འདི་ལོའི་(Pearl S. Buck) གཟེངས་རྟགས་དེ་ཁོང་མོར་འབུལ་གཏན་ཁེལ་བར་དགའ་སྤོབས་བྱུང་། ཞེས་བརྗོད་འདུག
འཛམ་གླིང་ནང་འབུར་དུ་ཐོན་ཞིང་བྱས་རྗེས་ཅན་གྱི་བུད་མེད་རྣམས་ལ་ཆེད་དུ་དམིགས་པའི་གཟེངས་རྟགས་དེ་འབུལ་བཞེས་གནང་བའི་ཁྲོད། ད་ལན་བཀའ་ཟུར་རྗེ་བཙུན་པདྨ་མཆོག་ནི་གཟེངས་རྟགས་བཞེས་མཁན་བདུན་པ་དེ་ཆགས་ཀྱི་ཡོད་ཅིང་། ཕྱི་ལོ་ ༢༠༡༦ ལོར་ཨ་རིའི་བརྩམས་སྒྲུང་རྩོམ་པ་པོ་ (Maxine Hong Kingston) གཉིས་ལ་ཕུལ་མྱོང་བ་དང་། ཕྱི་ལོ་ ༢༠༠༤ ལོར་ཝི་ཏི་ནམ་གྱི་སྒྱུ་རྩལ་བ་མེ་ཡ་ལིན་ (Maya Lin) ལགས། ཕྱི་ལོ་ ༢༠༠༣ ལོར་ཨི་རན་ལན་ཌིའི་སྲིད་འཛིན་ཟུར་བ་མེ་རེ་རོ་བྷིན་སན་ (Mary Robinson) ལགས། ཕྱི་ལོ་ ༢༠༠༡ ལོར་ཨི་ཇབ་ཀྱི་སྐུ་ལྕམ་དང་པོ་ཇེ་ཧན་ (Jehan Sadat) ལགས། ཕྱི་ལོ་ ༢༠༠༠ ལོར་བྷང་ལ་ཌི་ཤིའི་སྲིད་བློན་ཟུར་བ་ཧ་སི་ནཱ་ (Sheikh Hasina) ལགས། ཕྱི་ལོ་ ༡༩༩༨ ལོར་ཧྥི་ལིན་ཕིན་གྱི་སྲིད་འཛིན་ཟུར་བ་ཁོ་ར་རྫོན་ (Corazon Aquino) ལགས་བཅས་སུ་ཕུལ་མྱོང་བ་རེད།
བཀའ་ཟུར་རྗེ་བཙུན་པདྨ་མཆོག་གི་སྤྱི་ཚོགས་ཞབས་ཞུ་དང་བོད་ཕྲུག་སྟོང་ཕྲག་མང་པོ་གཙོ་བྱས་པའི་བོད་སྤྱིའི་རྩ་དོན་སླད་སྐུ་ལས་བསྐྱོན་པའི་ཕྱག་རྗེས་ལ། བོད་ཚོ་བརྗོད་མི་དགོས་པར་རྒྱལ་སྤྱིའི་སྟེང་སིད་ཌན་གྱི་འཛམ་གླིང་བྱིས་པའི་གཟེངས་རྟགས་དང་། སྙིང་སྟོབས་ཅན་གྱི་བུད་མེད་གཟེངས་རྟགས། ཨི་ཌ་ལིའི་ (Maria Montessori) གཟེངས་རྟགས། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཤེས་ཡོན་དང་། ཚན་རྩལ་རིག་གཞུང་བཅས་ཀྱི་ལྷན་ཚོགས་ (UNESCO) ཀྱི་གཟེངས་རྟགས། དེ་བཞིན། སྙན་གྲགས་ཆེ་བའི་རྒྱ་གར་གྱི་ (Nari Shakti Puraskar) གཟེངས་རྟགས་སོགས་བཞེས་མྱོང་ཡོད།
བཀའ་ཟུར་རྗེ་བཙུན་པདྨ་མཆོག་ནི་ཕྱི་ལོ་ ༡༩༤༠ ཟླ་ ༧ ཚེས་ ༧ ཉིན་བོད་ཀྱི་རྒྱལ་ས་ལྷ་སར་སྐུ་འཁྲུངས། ཕྱི་ལོ་ ༡༩༥༠ ལོར་རྒྱ་གར་ཀ་ལོན་སྦུག་དང་རྡོ་རྗེ་གླིང་དུ་ཕེབས་ནས་དབྱིན་ཇིའི་སྐད་ཡིག་སློབ་སྦྱོང་གནང་སྟེ་ ༡༩༦༠ ལོར་ཐོན། ཕྱི་ལོ་ ༡༩༦༡ ལོར་སུད་སི་དང་དབྱིན་ཡུལ་དུ་ཕེབས་ནས་དེང་དུས་ཀྱི་ཤེས་ཡོན་སློབ་གཉེར་གནང༌། ཕྱི་ལོ་ ༡༩༦༤ ལོར་ཕྱིར་རྒྱ་གར་དུ་ལོག་སྟེ་ལོ་དེའི་ཟླ་ ༦ པ་ནས་བོད་ཕྲུག་ཁྱིམ་སྡེའི་དབུ་འཛིན་གྱི་འགན་བཞེས། ཞོར་དུ་ཕྱི་ལོ་ ༡༩༧༠ ལོར་བོད་ཀྱི་གཞོན་ནུ་ལྷན་ཚོགས་སྐབས་དང་པོའི་ཚོགས་གཙོ་གཞོན་པར་བདམས་ཐོན་བྱུང་བ་ལྟར་ཐུགས་འགན་བཞེས། བོད་ནང་གཟིགས་སྐོར་སྐུ་ཚབ་ཐེངས་གསུམ་པ་ཕེབས་པའི་ཚོགས་གཙོ་དང་ལྡི་ལི་བོད་ཁང་གི་འགན་འཛིན་ལྷན་ཚོགས་ཀྱི་ཚོགས་མི་སོགས་གནང༌། ཕྱི་ལོ་ ༡༩༨༥ ལོར་བོད་ཀྱི་བུད་མེད་ལྷན་ཚོགས་ཀྱི་སྐབས་དང་པོའི་དབུས་རྒྱུན་ལས་ཀྱི་སློབ་སྟོན་པའི་འགན་བཞེས། ཕྱི་ལོ་ ༡༩༩༠ ལོར་དམིགས་བསལ་ཚོགས་ཆེན་ནས་བཀའ་བློན་དུ་འདེམས་ཐོན་བྱུང་སྟེ་བོད་ཀྱི་ལོ་རྒྱུས་ཐོག་འདེམས་བསྐོ་བྱས་པའི་བུད་མེད་བཀའ་བློན་ཐོག་མ་དེར་གྱུར་ནས་ཤེས་རིག་དང་འཕྲོད་བསྟེན་བཀའ་བློན་གྱི་མཛད་ཁུར་བཞེས། ཕྱི་ལོ་ ༢༠༠༦ ཟླ་ ༨ ནང་བོད་ཁྱིམ་སྤྱི་ཁྱབ་དབུ་འཛིན་ནས་དགོངས་ཞུ་མཛད། བོད་མི་མང་སྤྱི་འཐུས་ལྷན་ཚོགས་ཀྱིས་གངས་ཅན་བོད་ཀྱི་ཨ་མ་ཞེས་པའི་མངོན་བསྟོད་གཟེངས་རྟགས་ཀྱང་ཕུལ་ཡོད། ཁོང་གིས། བོད། ངའི་ལོ་རྒྱུས་ཞེས་པའི་ཕྱག་དེབ་ཅིག་དབྱིན་ཡིག་ཐོག་ཕྱི་ལོ་ ༡༩༩༦ ལོར་བརྩམས་ཐོན་བྱུང་ཡོད་པ་དེ་ད་ལྟ་ཕྱི་རྒྱལ་གྱི་སྐད་ཡིག་མི་འདྲ་བ་བཅུ་ལྷག་ནང་ཕབ་སྒྱུར་བྱས་ཡོད།
གསར་འགོད་པ། སྐལ་བཟང་སྦྱིན་པ།
