ཉེ་སྔོན་རྒྱ་ནག་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་འཛིན་ལྷན་ཚོགས་ཀྱི་ཚོགས་ཁོངས་རྒྱལ་ཁབ་ཏུ་བདམས་པར་བརྟེན། ཨ་རི་དང་ཧྥ་རན་སི་ཚུད་པའི་འཛམ་གླིང་རྒྱལ་ཁབ་ ༥༡ གིས་སྐྱོན་བརྗོད་བྱས་པ་མ་ཟད། ཤར་ཏུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནད་དོན་ཐེར་འདོན་བྱས་འདུག
ཟླ་འདིའི་ཕྱི་ཚེས་ ༡༨ ཉིན་ཨ་རི་དང་དབྱིན་ཡུལ་ཚུད་པའི་རྒྱལ་ཁབ་ ༥༡ གིས་བསྒྲགས་གཏམ་སྤེལ་བའི་ནང་། རྒྱ་ནག་གིས་ཤར་ཏུར་ཀི་སི་ཐན་ནང་གི་ཡུ་གུར་བའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་ཚབས་ཆེན་གཏོང་བཞིན་ཡོད་པའི་གནད་དོན་ཐོག་སེམས་འཚབ་ཡོད་པ་དང་། ཁུལ་དེའི་ཡུ་གུར་མི་རིགས་གཙོས་ཁ་ཆེའི་གྲངས་ཉུང་མི་རིགས་རྣམས་ཀྱིས་མུ་མཐུད་དུ་དཀའ་སྡུག་ཚད་མེད་མྱངས་དང་མྱོང་མུས་ཡིན་སྐོར་དང་། ཡུ་གུར་བ་དང་ཁ་ཆེའི་བུད་མེད་མང་པོ་ཞིག་བཙོན་འཇུག་བྱས་ཏེ་སྡུག་སྦྱོང་མནར་གཏོང་བཞིན་ཡོད་སྐོར། དེ་བཞིན་ཆོས་ལུགས་དང་རིག་གཞུང་ཉམས་ལེན་བྱེད་པར་དམ་དྲག་དང་། ཆོས་ལུགས་བྱེད་སྒོ་སྤེལ་ཡུལ་གཏོར་བཤིག་གཏོང་གི་ཡོད་སྐོར་སོགས་བཀོད་འདུག
ད་དུང་བསྒྲགས་གཏམ་དེའི་ནང་། འདས་ལོའི་ཕྱི་ཟླ་ ༨ པའི་ནང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གིས། རྒྱ་ནག་གིས་ཤར་ཏུར་ཀི་སི་ཐན་ནང་གི་ཡུ་གུར་མི་རིགས་གཙོས་པའི་ཁ་ཆེའི་མི་རིགས་མང་པོ་བཀག་ཉར་བྱས་པ་ནི་རྒྱལ་སྤྱིའི་ཁྲིམས་ལུགས་དང་འགལ་ཡོད་སྲིད་པའི་སྙན་ཐོ་བཏོན་པ་དེའི་ཐོག་ལ་ལན་འདེབས་གསལ་བཤད་དགོས་པའི་འབོད་སྐུལ་ཞུས་ཡོད་པ་རེད། ད་བར་སྙན་ཐོ་བཏོན་ནས་ལོ་ངོ་ ༡ ལྷག་ཕྱིན་ཡོད་ཀྱང་། ད་ལྟའང་རྒྱ་ནག་གཞུང་གིས་གནད་དོན་དེའི་ཐོག་ལན་འདེབས་གསལ་བཤད་གང་ཡང་བྱས་མེད་སྐོར་དང་། རྒྱ་ནག་གིས་ཤར་ཏུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཚམས་བཞག་དགོས་སྐོར་སོགས་བཀོད་འདུག
ཕྱི་ཟླ་ ༩ ཚེས་ ༡༡ ནས་ཟླ་ ༡༠ ཚེས་ ༡༣ བར་ཡུ་རོབ་རྒྱལ་ཁབ་སུད་སིའི་ཇི་ནི་ཝ་གྲོང་ཁྱེར་དུ་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༥༤ པ་འཚོགས་པའི་སྟེང་། ཨིན་ཌོ་ནེ་ཞི་ཡར་ (Indonesia) འོས་གྲངས་ ༡༨༦ དང་གོ་ཝེཊ་ (Kuwait) ལ་འོས་ ༡༨༣ ། དེ་བཞིན་ཉི་ཧོང་ལ་འོས་ ༡༧༥ ། རྒྱ་ནག་ལ་འོས་གྲངས་ ༡༥༤ བཅས་ཐོབ་སྟེ། རྒྱ་ནག་སླར་ཡང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཁོངས་རྒྱལ་ཁབ་ཏུ་འོས་འདེམས་བྱུང་ཡོད་པ་དང་། ད་རེས་ནི་རྒྱ་ནག་གཞུང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་ཀྱི་ཚོགས་ཁོངས་རྒྱལ་ཁབ་ཏུ་གྱུར་བ་ཐེངས་ ༦ པ་ཆགས་ཡོད་འདུག་ལ། ཕྱི་ལོ་ ༢༠༢༠ ལོའི་འོས་གྲངས་དང་བསྡུར་ཚེ་རྒྱ་ནག་ལ་ཐོབ་པའི་འོས་གྲངས་ཇེ་མང་དུ་ཕྱིན་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
