དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐེངས་ ༡༢ པའི་ཐོག་འཛམ་གླིང་རྒྱལ་ཁབ་ ༤༠ ཙམ་ནས་གློག་བརྙན་ ༩༢ སྟོན་འཆར་ཡོད་འདུག
དེ་རིང་ཉིན་གུང་ཆུ་ཚོད་ ༡༢།༤༠ ཐོག་དྷ་རམ་ས་ལའི་ཀ་ཅཱ་རི་རྫོང་དཔོན་ལས་ཁུངས་ཀྱི་ཚོགས་ཁང་དུ། ཁྲུང་ཁྲུང་དཀར་མོ་སྒྱུ་རྩལ་ཐེབས་རྩ་ཁང་གི་འགན་འཛིན་བསྟན་འཛིན་བསོད་ནམས་ལགས་དང་། ཁོང་གི་བཟའ་ཟླ་རི་ཏུ་ས་རིན་(Ritu Sarin)ལགས་གཉིས་ཀྱིས། ཟླ་འདིའི་ཕྱི་ཚེས་ ༤ ནས་ ༧ བར་ཉིན་བཞིའི་རིང་དྷ་སྟེང་བོད་ཕྲུག་ཁྱིམ་སྡེ་རུ། ཕྱི་ལོ་ ༢༠༢༣ ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་(DIFF) ཐེངས་ ༡༢ པ་འཚོག་རྒྱུ་ཡིན་པའི་གསལ་བསྒྲགས་གནང་སོང་བ་དང་། ཐེངས་འདིའི་གློག་བརྙན་དུས་སྟོན་ཐོག་རྒྱ་གར་གྱི་གློག་བརྙན་བཟོ་སྐྲུན་པ་ ༥༠ ལྷག་མཉམ་ཞུགས་གནང་གི་ཡོད་པ་དང་། འཛམ་གླིང་རྒྱལ་ཁབ་འདྲ་མིན་ ༤༠ ལྷག་ནས་ཐོན་པའི་གློག་བརྙན་རིང་གྲས་དང་ཐུང་གྲས་ཁྱོན་བསྡོམས་ ༩༢ སྟོན་འཆར་ཡོད་འདུག
འདི་གའི་གསར་འགོད་པས་ཐེངས་འདིའི་གློག་བརྙན་དུས་སྟོན་སྐོར་དྲིས་པར་དུས་སྟོན་གོ་སྒྲིག་པ་བསྟན་འཛིན་བསོད་ནམས་ལགས་ཀྱིས། ད་ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་དྷ་སྟེང་བོད་ཕྲུག་ཁྱིམ་སྡེ་རུ་འཚོག་རྒྱུ་ཡིན། དེ་རུ་འཚོག་དགོས་པའི་རྒྱུ་མཚན་ནི་དྷ་སྟེང་བོད་ཕྲུག་ཁྱིམ་སྡེར་ས་ཆ་ཆེན་པོ་ཡོད་པ་དང་། ད་ལོ་ང་ཚོས་གློག་བརྙན་སྟོན་སའི་ཚོགས་ཁང་བཞི་གོ་སྒྲིག་ཞུ་བཞིན་ཡོད། སྔོན་མ་དང་བསྡུར་ཚེ་གློག་བརྙན་མང་པོ་ཆགས་ཀྱི་ཡོད། ད་ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐོག་འཛམ་གླིང་རྒྱལ་ཁབ་འདྲ་མིན་ ༤༠ ལྷག་ནས་ཐོན་པའི་གློག་བརྙན་རིང་གྲས་དང་ཐུང་གྲས་ཁྱོན་བསྡོམས་ ༩༢ སྟོན་རྒྱུ་ཡིན་ཞིང་། གློག་བརྙན་བཟོ་སྐྲུན་པ་ ༥༠ ལྷག་མཉམ་ཞུགས་གནང་གི་ཡོད་ལ། དེའི་ཁྲོད་ཀྱི་མང་ཆེ་ཤོས་རྒྱ་གར་ནས་ཡོང་གི་ཡོད་ཅེས་འགྲེལ་བརྗོད་གནང་སོང་།
གསར་འགོད་པས་ཐེངས་འདིའི་དུས་སྟོན་ཐོག་བོད་ཀྱི་གློག་བརྙན་ཅི་ཙམ་ཡོད་མེད་དྲིས་པར་བསྟན་འཛིན་བསོད་ནམས་ལགས་ཀྱིས། ད་ལོའི་གློག་བརྙན་དུས་སྟོན་ཐོག་བོད་ཀྱི་གློག་བརྙན་གཅིག་ཀྱང་མེད། ཐེངས་འདིར་བོད་ཀྱི་གློག་བརྙན་མེད་པའི་རྒྱུ་མཚན་ནི་སྤྱིར་བོད་ཀྱི་གློག་བརྙན་གསར་བ་སླེབས་མི་འདུག ང་ཚོའི་གོ་སྒྲིག་ཚོགས་ཆུང་ལ་འབྲེལ་བ་བྱེད་མཁན་བྱུང་མ་སོང་། བོད་དོན་དང་འབྲེལ་བ་ཡོད་པའི་གློག་བརྙན་གཅིག་ཀྱང་མེད། ཡིན་ནའང་ཧི་མ་ལ་ཡའི་རི་རྒྱུད་ནས་བཟོ་སྐྲུན་བྱས་པའི་གློག་བརྙན་ཁག་ཅིག་ཡོད་ཅིང་། དེ་དག་ནི་ལ་དྭགས་དང་ཧི་མ་ཅལ་སོགས་ནས་བཟོས་པའི་གློག་བརྙན་ཁག་ཅིག་སྟོན་རྒྱུ་ཡིན་ཞེས་བརྗོད་སོང་།
ཡང་ཐེངས་འདིའི་དུས་སྟོན་ཐོག་བོད་ནང་བཟོ་སྐྲུན་བྱས་པའི་གློག་བརྙན་ཡོད་མེད་དྲིས་པར་ཁོང་གིས། ད་ལོའི་གློག་བརྙན་དུས་སྟོན་ཐོག་བོད་ནང་གི་གློག་བརྙན་བཟོ་སྐྲུན་པ་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་སྟོན་རྒྱུ་གལ་ཆེན་པོ་རེད་བསམས་ཏེ། འདས་པོ་ཁོང་གི་གློག་བརྙན་ཚོང་འབྲེལ་བྱེད་མཁན་གྱི་ཚོགས་པར་འབྲེལ་བ་མང་པོ་བྱས་ཀྱང་། ད་ལོ་ང་ཚོར་གློག་བརྙན་སྟོན་ཆོག་པའི་ཆོག་མཆན་སྤྲད་མ་སོང་། དེ་ནི་གློག་བརྙན་དུས་སྟོན་འཚོགས་ས་དྷ་རམ་ས་ལ་ཡིན་པ་དང་། གློག་བརྙན་གསའ་གསར་བ་ཡིན་པས་ཆོག་མཆན་མ་སྤྲད་པ་སོགས་ཅི་ཡིན་ཤེས་མ་སོང་། སྤྱིར་འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་ཧ་ཅང་ཡག་པོ་བཟོས་འདུག ཐེངས་འདིའི་གློག་བརྙན་དུས་སྟོན་ཐོག་སྟོན་ཐུབ་ན་བསམ་ཡང་བསྟན་ཐུབ་མ་སོང་། ཞེས་འགྲེལ་བརྗོད་གནང་སོང་།
གློག་བརྙན་དུས་སྟོན་གྱི་གལ་གནད་སྐོར་ལ་ཁོང་གིས། གློག་བརྙན་དུས་སྟོན་འདི་བོད་དང་དམིགས་བསལ་འབྲེལ་བ་མེད་ཀྱང་། བོད་དོན་ལ་གལ་ཆེན་པོ་མཐོང་གི་འདུག གློག་བརྙན་དུས་སྟོན་ཐོག་རྒྱ་གར་རྒྱལ་ཡོངས་ནས་གློག་བརྙན་བཟོ་སྐྲུན་མཁན་དང་ལྟད་མོ་བ་མང་པོ་མཉམ་ཞུགས་གནང་གི་ཡོད་པ་རེད། དེའི་ཁྲོད་ཀྱི་མང་ཆེ་ཤོས་ལ་བོད་དོན་འཐབ་རྩོད་དང་བོད་པའི་སྤྱི་ཚོགས་སྐོར་ལ་ཤེས་རྟོགས་ཡོད་པ་མ་རེད། ད་ལོ་དྷ་སྟེང་བོད་ཕྲུག་ཁྱིམ་སྡེ་རུ་འཚོག་པ་ཡིན་ན་མང་པོ་ཞིག་ལ་བོད་དོན་ཐོག་གོ་རྟོགས་སླེབས་ཡོང་གི་རེད། འདི་འདྲ་འཚོགས་ཐུབ་པ་ཡང་བོད་དོན་ལ་གལ་ཆེན་པོ་རེད། དམིགས་བསལ་བོད་ཀྱི་གློག་བརྙན་སྟོན་རྒྱུ་མེད་ཀྱང་། གློག་བརྙན་དུས་སྟོན་ཐོག་ཏུ་སླེབས་པ་ཙམ་གྱིས་བོད་དོན་དང་འབྲེལ་བ་ཡོད་པ་རེད། ཐེངས་འདིར་༧གོང་ས་རྒྱལ་བ་རིན་པོ་ཆེ་མཆོག་གི་གློག་བརྙན་བཟོ་མཁན་ཁག་ཅིག་ཕེབས་འཆར་ཡོད། དེ་དག་གིས་ཀྱང་བོད་དོན་ཐོག་གོ་རྟོགས་སྤེལ་བར་ཁྱད་པར་ཆེན་པོ་མཐོང་གི་འདུག ཅེས་བརྗོད་སོང་།
མཇུག་ཏུ་ཁོང་གིས་འདས་བའི་ལོ་འདི་དག་གི་རིང་བོད་དང་། ཧི་མ་ལ་ཡའི་རི་རྒྱུད་ཀྱི་འབྲུག་དང་། བལ་ཡུལ། ལ་དྭགས་སོགས་སུ་གློག་བརྙན་བཟོ་མཁན་མང་དུ་འགྲོ་བཞིན་འདུག རྒྱལ་སྤྱིའི་སྡིངས་ཆའི་ཐོག་ཏུ་གློག་བརྙན་སྟོན་པའི་གོ་སྐབས་ཐོབ་དུས་འཛམ་གླིང་མི་མང་གིས་དམིགས་བསལ་དོ་སྣང་ཆེ་རུ་འགྲོ་བཞིན་འདུག་ཅེས་དང་། དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐོག་སྟོན་བཞིན་པའི་གློག་བརྙན་རྣམས་ཚོང་ལས་དང་འབྲེལ་བ་མེད་པ་དང་། རང་དབང་ཅན་གྱི་གློག་བརྙན་རིགས་རེད། གློག་བརྙན་འདི་དག་ལ་ལྟ་སྐབས་སྤྱིར་འཛམ་གླིང་དང་། ཁོར་ཡུག་སོགས་ཀྱི་ཐོག་ཏུ་དོ་སྣང་བྱ་རྒྱུ་གལ་ཆེན་པོ་རེད། དམིགས་བསལ་བོད་པའི་གཞོན་སྐྱེས་གློག་བརྙན་བཟོ་བར་དབྱིངས་ཡོད་པ་རྣམས་ཀྱིས་གློག་བརྙན་འདིའི་རིགས་ལ་གཟིགས་ཏེ་དོ་སྣང་བྱེད་རོགས། གློག་བརྙན་ལས་རིགས་ཀྱི་ལས་ཀར་ཕན་ཐོགས་ཆེན་པོ་ཡོད་པ་རེད། ཅེས་འགྲེལ་བརྗོད་གནང་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
