དེ་རིང་རྒྱ་གར་གྱི་རྒྱལ་ས་ལྡི་ལིར་བོད་ཀྱི་མ་འོངས་དང་འབྲེལ་བའི་རྒྱ་གར་གྱི་སྲིད་ཇུས་ཞེས་པའི་ལྷན་ཚོགས་ཤིག་འཚོགས་ཏེ་བོད་ཀྱི་མ་འོངས་པའི་གནད་དོན་གྱི་ཐོག་ལ་གོ་བསྡུར་གནང་འདུག
དེ་རིང་ཕྱི་ཚེས་ ༣ ཉིན་རྒྱ་གར་གྱི་རྒྱལ་ས་ལྡི་ལི་གསར་པའི་རྒྱ་གར་རྒྱལ་སྤྱིའི་བསྟི་གནས་ཁང་(India International Centre ) དུ། བོད་དོན་ལས་འགུལ་དང་འཚེ་མེད་ཞི་བའི་སྦྱོང་བརྡར་བསྟི་གནས་ཁང་གཉིས་ཀྱི་གོ་སྒྲིག་འོག བོད་ཀྱི་མ་འོངས་དང་འབྲེལ་བའི་རྒྱ་གར་གྱི་སྲིད་ཇུས་ (India’s Strategic Role in Tibet’s Future) ཞེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་བསྡུས་ཡོད་ཅིང་། དེའི་ཐོག་ཧིན་དྷུ་གཙུག་ལག་སློབ་གཉེར་ཁང་གི་འཛིན་སྐྱོང་འགན་འཛིན་ཟུར་པ་ཊེན་ཌོན་(O P Tandon) ལགས་དང་། བོད་མི་མང་སྤྱི་འཐུས་བློ་བཟང་རྒྱ་མཚོ་སྲི་ཐར་ལགས། རི་མཐོ་ས་གཙང་གི་དྲ་རྒྱའི་འགན་འཛིན་བདེ་ཆེན་པདྨ་ལགས། རྒྱ་གར་གྱི་ཕྱི་སྲིད་དྲུང་ཆེ་ཟུར་པ་སྐུ་ཞབས་ཀན་ཝལ་སི་བྷལ་ (Kanwal Sibal) ལགས་གཙོས་ཧིན་བོད་གཉིས་ཀྱི་ན་གཞོན་ ༦༠ ལྷག་གིས་མཉམ་ཞུགས་གནང་ཡོད་འདུག
དེའི་ཐད་ལྷན་ཚོགས་གོ་སྒྲིག་ཚོགས་ཆུང་གི་ཚོགས་མི་བཀྲ་ཤིས་ལམ་བཟང་ལགས་ཀྱིས། ཕྱི་ལོ ༢༠༡༩ ཙམ་ནས་རྒྱལ་སྤྱིའི་ནང་ཆབ་སྲིད་ཀྱི་འགྱུར་བ་མང་པོ་ཞིག་འགྲོ་མུས་ཡིན་པའི་ཁར། ལྷག་པར་དུ་རྒྱ་ནག་ལས་མཆེད་པའི་རིམས་ནད་ཀྱི་རྐྱེན་གྱིས་རྒྱལ་སྤྱིའི་རྒྱལ་ཁབ་མང་པོས་རྒྱ་ནག་ལ་བཟུང་བའི་ལྟ་ཚུལ་ལ་འགྱུར་བ་ཆེན་པོ་ཞིག་འགྲོ་མུས་རེད་ལ། རྒྱ་ནག་ནང་དུ་འདས་པའི་ལོ་ཤས་རིང་འགྱུར་བ་འགྲོ་མུས་ཡིན་སྟབས། ད་ལན་གྱི་འདུ་འཛོམས་འདི་ནི་ཆབ་སྲིད་ཀྱི་རྒྱབ་ལྗོངས་ག་རེ་ཡིན་མིན་ལ་མ་ལྟོས་པར། མ་འོངས་པའི་བོད་ཀྱི་གནད་དོན་དེ་གང་འདྲ་ཞིག་ཏུ་འགྱུར་མིན་དང་། དེའི་ཐད་བོད་མི་ཚོས་གྲ་སྒྲིག་གང་འདྲ་བྱ་དགོས་མིན་སོགས་བགྲོ་གླེང་བྱ་སའི་རང་དབང་གི་གླེང་སྟེགས་ཤིག་ཡིན་པ་དང་། རང་དབང་གི་གླེང་སྟེགས་འདི་བརྒྱུད་ནས་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་བསྟུན། བོད་ཀྱི་མ་འོངས་པའི་ཆོས་རིག་དང་། ཆབ་སྲིད། དཔལ་འབྱོར། རིག་གཞུང་སོགས་ཀྱི་གནད་དོན་གྱི་ཐད་ལ་བསམ་ཚུལ་བརྗེ་ལེན་བྱས་ཡོད་སྐོར་སོགས་འགྲེལ་བརྗོད་གནང་བྱུང་།
ཡང་ཁོང་གིས། ད་ལན་གྱི་ལྷན་ཚོགས་དེ་རྒྱ་གར་དུ་བསྡུ་དོན་གཙོ་བོ་ནི། བཙན་བྱོལ་བོད་མིའི་བསྟི་གནས་དེ་རྒྱ་གར་ལ་ཆགས་ཡོད་ཅིང་། ལྷག་པར་དུ་རྒྱ་གར་རྒྱལ་ཁབ་དང་། མི་མང། ས་ཆ་སོགས་ཀྱི་ཐད་ནས་བོད་མིར་གནད་འགག་ཆེན་པོ་ཞིག་ཆགས་ཡོད་ལ། མ་འོངས་པར་རྒྱ་གར་གཞུང་གིས་བོད་མི་དང་བོད་ཀྱི་གནད་དོན་ལ་བཟུང་བའི་སྲིད་ཇུས་དེ་དག་ཧ་ཅང་གནད་འགག་ཅན་ཞིག་ཏུ་གྱུར་ཡོད་སྟབས། ད་ལན་རྒྱ་གར་གྱི་བོད་དོན་ལ་ཤེས་རྒྱ་དང་དོ་སྣང་ཡོད་མཁན་མང་དག་ཅིག་གདན་འདྲེན་ཞུས་ནས། མ་འོངས་པར་རྒྱ་གར་གཞུང་གིས་བོད་དོན་ལ་གཟིགས་ཕྱོགས་འགྱུར་བ་ཐེབས་སྲིད་མིན་གྱི་གནད་དོན་སོགས་ཀྱི་སྐོར་ལ་གོ་བསྡུར་དང་། རྒྱ་གར་གྱི་གནད་ཡོད་མི་སྣ་ཚོ་ལའང་བོད་པའི་གཞོན་སྐྱེས་གཙོས་བོད་མི་རྣམས་ཀྱི་བསམ་ཚུལ་དང་ལྟ་ཚུལ་སོགས་ཀྱི་ཐོག་ལ་བསམ་ཚུལ་བརྗེ་ལེན་དང་གོ་བསྡུར་བྱས་ཡོད་ཅིང་། ལྷན་ཚོགས་དེར་བོད་པའི་གཞོན་སྐྱེས་དང་རྒྱ་གར་གྱི་ཤེས་ལྡན་པ་བཅས་ཁྱོན་མི་གྲངས་ ༦༠ ལྷག་གིས་མཉམ་ཞུགས་གནང་ཡོད་སྐོར་སོགས་འགྲེལ་བརྗོད་གནང་བྱུང་།
བོད་དོན་མདུན་ལམ་ཞེས་པ་ནི་རྒྱ་གར་དང་། ཡུ་རོབ། ཨ་རི་སོགས་སུ་སློབ་གཉེར་བྱེད་མུས་ཡིན་པའི་བོད་ཀྱི་ན་གཞོན་ཤེས་ལྡན་པ་ཁག་ཅིག་གིས་གྲུབ་པའི་དང་བླངས་ཀྱི་རུ་ཁག་ཅིག་ཡིན་ཞིང་། བོད་ཀྱི་མདུན་ལམ་ཞེས་པའི་ལས་འགུལ་དེ་ཐོག་མར་ཕྱི་ལོ་ ༢༠༢༢ ཟླ་ ༤ ཚེས་ ༩ ནས་ ༡༠ ཉིན་གྲངས་གཉིས་རིང་ཨ་རིར་འཚོགས་ཡོད་པ་དང་། ཕྱི་ལོ་ ༢༠༢༢ ཟླ་ ༡༡ ཚེས་༢༥ ནས་ཉིན་གྲངས་གསུམ་རིང་ཧྥ་རན་སིའི་རྒྱལ་ས་པེ་རི་སིར་འཚོགས། ཟླ་འདིའི་ཕྱི་ཚེས་ ༦ ནས་ཉིན་གྲངས་ ༤ རིང་དྷ་སའི་ཨིམ་པི་རིལ་གསོལ་མགྲོན་ཁང་དུ་འཚོག་འཆར་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
