༧གོང་ས་མཆོག་གིས་བོད་ལ་མིང་དོན་མཚུངས་བའི་རང་སྐྱོང་གཙང་མ་ཞིག་དགོས་བཤད་ཀྱི་ཡོད་པ་དེས་ག་ལེར་རྒྱ་རིགས་མང་པོ་ཕན་ཐོགས་ཡོང་སྲིད་པ་རེད་ཅེས་གསུངས་སོང་།
དེ་རིང་སྔ་དྲོ་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་མགོ་འཛིན་རྣམས་ལ་མཇལ་ཁ་དང་བཀའ་སློབ་བསྩལ། སྐབས་དེར༧གོང་ས་རྒྱལ་བ་རིན་པོ་ཆེ་མཆོག་གིས། འཛམ་གླིང་དུ་སྐྱབས་བཅོལ་བྱས་ཏེ་སྡོད་མཁན་མི་ཧ་ཅང་མང་པོ་ཡོད། བོད་པ་སྐྱབས་བཅོལ་བ་ཆགས་ཡོད་ཀྱང་སོ་སོའི་ཆོས་དང་རིག་གཞུང་ཉར་ཚགས་བྱས་ཡོད། ཆོས་དང་རིག་གཞུང་དེས་སེམས་ཅན་ཐམས་ཅད་ཀྱི་བདེ་བའི་ཆེད་དུ་རེད་མ་གཏོགས། ང་རང་བདེ་བོ་དང་སྐྱིད་པོ་ཤོག་ཟེར་གྱི་མེད་པ་རེད། ང་ཚོས་ནམ་རྒྱུན་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག་ཟེར་བསྡད་ཀྱི་ཡོད་པ་རེད། བསླབ་བྱ་དེ་ཧ་ཅང་ཡག་པོ་རེད། ཆོས་ཀྱི་སྐད་ཆ་མེད་པར་སེམས་ཅན་ཐམས་ཅད་ལ་བདེ་སྐྱིད་ལྡན་པ་དང་སྡུག་བསྔལ་མ་ཡོང་བའི་སྨོན་ལམ་རྒྱག་བཞིན་ཡོད་པ་ཧ་ཅང་ཡག་པོ་རེད།
ང་ཚོ་བོད་པ་སྐྱབས་བཅོལ་བ་འདྲ་འདྲའི་ནང་ནས་མི་འདྲ་བ་ཞིག་རེད། སྤྱིར་བོད་ལ་རིག་གཞུང་དང་གོམས་གཤིས་ཧ་ཅང་ཡག་པོ་ཞིག་ཡོད་ཅིང་། དེའི་སྤྱི་ཚོགས་ནང་དུ་མི་ཚང་མར་འཛུམ་ཤིག་ཤིག་བྱེད་པའི་མིག་དཔེ་ཡག་པོ་ཆགས་ཡོད། ངོས་ཀྱང་ད་དུང་བོད་མིའི་མགོ་འཁྲིད་ཀྱི་ཡོད། ངོས་ཀྱི་རྨི་ལམ་ལ་བརྟག་དཔྱད་བྱས་ཚེ། ངོས་རང་ལོ་བརྒྱ་དང་བཅུ་གྲངས་ཤིག་ལ་བསྡད་པའི་ཟོལ་འདུག ལོ་བཅུ་གྲངས་གཉིས་ལྷག་བསྡད་པའི་རིང་ངོས་རང་གིས་མགོ་འཁྲིད་དེ། མི་མང་ཚང་མས་སེམས་ཅན་ཐམས་ཅད་ཟེར་བཞིན་སྨོན་ལམ་འདེབས་ཀྱི་ཡོད་པ་ལྟར། ཁ་ཡོད་ལག་ཡོད་ཀྱི་ཐོག་ནས་ག་ཚོད་ཐུབ་ཐུབ་ཀྱིས་གཞན་ལ་ཕན་ཐོགས་རྒྱུ་གལ་ཆེན་པོ་འདུག ང་ཚོ་བོད་མི་སྐྱབས་བཅོལ་བ་འདྲ་འདྲའི་ནང་ནས་མ་འདྲ་བ་ཞིག་ཆགས་བསྡད་ཡོད་པ་དེ། ག་དུས་ཡིན་ཡང་གཞན་ཕན་གྱི་བསམ་བློ་ཡོད་པ་དང་འཛུམ་ཤིག་ཤིག་སྡོད་པའི་གོམས་གཤིས་ཆགས་ཡོད། འཛམ་བུ་གླིང་དུ་མིག་དཔེ་དེ་མུ་མཐུད་སྟོན་ཐུབ་པར་ཉར་དགོས། ད་ལྟ་འཛམ་གླིང་གི་མི་མང་པོས་ཆོས་ལུགས་དང་མ་འབྲེལ་བའི་བཟང་སྤྱོད་ལ་དགའ་བོ་བྱེད་བཞིན་ཡོད། ང་ཚོས་ཆོས་ལུགས་དང་མ་འབྲེལ་བའི་ཐོག་ནས་བཟང་སྤྱོད་མུ་མཐུད་བྱས་པ་ཡིན་ན། རྒྱ་ནག་གཞུང་གིས་ཆབ་སྲིད་ཀྱི་གནས་སྟངས་ཐོག་ནས་བོད་པ་བཙན་དབང་གིས་བཟུང་ཡོད་པ་མ་གཏོགས་རྒྱུ་མཚན་བཤད་རྒྱུ་མེད་པ་དང་། ཡ་རབས་སྤྱོད་བཟང་གི་ཐོག་ནས་གང་ཡང་བཤད་རྒྱུ་མེད་པ་རེད། ང་ཚོས་ཡ་རབས་སྤྱོད་བཟང་གི་ཐོག་ནས་མི་ཚང་མར་ཕན་ཐོགས་པའི་བསམ་བློ་གཏོང་བཞིན་ཡོད་པས། འཛམ་གླིང་སྤྱི་ཡོངས་ཀྱི་ཐོག་ནས་རང་བཞིན་གྱིས་བོད་པར་དགའ་བོ་བྱེད་ཀྱི་འདུག ཅེས་གསུངས་སོང་།
དེ་བཞིན་མགོན་པོ་གང་ཉིད་མཆོག་གིས། དེང་སང་འཛམ་གླིང་སྟེང་ངོས་ཀྱིས་སེམས་ཁམས་རིག་པའི་ཐོག་ནས་སེམས་བཟང་པོ་བྱ་རྒྱུ་དང་ག་བར་མི་སུ་དང་ཐུག་པ་ཡིན་ན་འཛུམ་ཤིག་ཤིག་བྱེད་བཞིན་པ་དེར། ཆོས་ཡོད་མེད་གཉིས་དང་། ཚན་རིག་པ། སེམས་ཁམས་རིག་པ་སོགས་མི་མང་པོས་དགའ་བོ་བྱེད་ཀྱི་འདུག ང་ཚོའི་སེམས་ཁམས་རིག་པ་དང་འབྲེལ་བའི་སེམས་བཟང་པོ་བྱ་རྒྱུ་དང་བྱམས་བརྩེ་སྒོམ་པ་སོགས་ལ་ནལེནྡྲའི་ཆོས་བརྒྱུད་ནས་བརྒྱུད་ཡོང་བའི་ནང་ཆོས་ལ་རྒྱུ་མཚན་གཏིང་ཟབ་ཡོད་པར་མི་མང་པོ་དགའ་བོ་བྱེད་ཀྱི་འདུག སེམས་ཁམས་རིག་པ་དང་འབྲེལ་བའི་སེམས་ཞི་བདེ་བྱེད་ཚུལ་དང་། བྱམས་བརྩེ་བྱ་རྒྱུ་ཡོད་པ་སོགས་ལ་མི་མང་པོས་དགའ་བོ་བྱེད་ཀྱི་འདུག ངོས་རང་གིས་བོད་ཀྱི་རིག་གཞུང་གི་ཚབ་བྱེད་ཀྱི་ཡོད་ལ། ངོས་རང་གི་ངོས་ནས་ཀྱང་བོད་ཀྱི་རིག་གཞུང་ལ་ཉམས་ལེན་བྱེད་ཀྱི་ཡོད། ངོས་ཀྱིས་ཉམས་ལེན་བྱས་པའི་འབྲས་བུས་སེམས་ལྷོད་ལྷོད་དང་གཉིད་སྐྱིད་པོ་ཁུགས་ཐུབ་ཀྱི་ཡོད། སེམས་སུ་དངངས་སྐྲག་སོགས་ཅི་ཡང་མེད་པར་ལྷོད་ལྷོད་སྡོད་ཀྱི་ཡོད། དེ་ནི་ང་ཚོ་བོད་པའི་རིག་གཞུང་རེད། ངོས་ཀྱི་སེམས་ཀྱི་ཞི་བདེ་ནང་བཞིན་རྒྱ་ནག་གི་དཔོན་པོ་ཡོང་རྒྱུ་ཁག་པོ་རེད། བོད་ཀྱི་ཆོས་དང་རིག་གཞུང་གིས་མིའི་སེམས་ལྷོད་ལྷོད་ཆགས་ཐུབ་ཀྱི་ཡོད། དེ་ནི་བོད་པའི་རིག་གཞུང་དང་གོམས་གཤིས་ཆགས་ཡོད་པ་རེད། སྐྱེ་བ་སྔ་ཕྱི་སོགས་གཏིང་ཟབ་པོ་བཤད་དགོས་པ་མ་རེད། ཚང་མས་ཉིན་རེ་བཞིན་ཞི་བདེ་དང་སེམས་ལྷོད་ལྷོད་ཡོང་བར་སེམས་སུ་འཇོག་རོགས། ལྷོད་ལྷོད་བྱས་ནས་སྡོད་ཨ།
བཟའ་ཚང་ནང་ཁུལ་དུ་འཁྲུག་པ་སོགས་བྱུང་སྐབས། ཏཱ་ལ་བླ་མའི་གདོང་དེ་དྲན་པ་བགྱིས་དང་། དེ་ནས་ལྷོད་ལྷོད་ཆགས་ཡོང་གི་རེད། ཆོས་བྱེད་མིན་སོ་སོའི་འདོད་མོས་རེད། གང་ལྟར་མི་ལུས་ཤིག་ཐོབ་ནས་ཡོད་དུས། སེམས་ལྷོད་ལྷོད་དང་ཞི་བདེ་ཧ་ཅང་གལ་ཆེན་པོ་རེད། ངོས་ཀྱིས་བོད་ལ་མིང་དོན་མཚུངས་བའི་རང་སྐྱོང་གཙང་མ་ཞིག་དགོས་བཤད་ཀྱི་ཡོད། དེ་ནི་ག་ལེར་ག་ལེར་རྒྱ་རིགས་མང་པོ་ཞིག་ལའང་ཕན་ཐོགས་ཡོང་སྲིད་པ་རེད། ཀྲུང་ཧྭ་མི་མང་སྤྱི་མཐུན་རྒྱལ་ཁབ་ཀྱི་ཁོངས་སུ་བསྡད་དེ། བོད་པས་རང་ཉིད་ཀྱི་ཆོས་དང་རིག་གཞུང་བདག་པོ་བརྒྱབ་སྟེ་ཡག་པོ་ཟིན་ཐུབ་པ་དང་། དེས་རྒྱ་མི་ལའང་ཤུགས་རྐྱེན་ཐེབས་ཐུབ་པ་ཞིག་བྱེད་དགོས། ང་ཚོས་ཕུགས་རྒྱང་རིང་པོའི་སྟེང་དུ་བསམ་བློ་གུ་ཡངས་གཏོང་དགོས། ང་ཚོ་བོད་པར་སྙིང་སྟོབས་དང་། སེམས་ཤུགས་ཡོད། ཚང་མས་སེམས་སྐྱིད་པོ་བྱས་ཏེ་ཧུར་ཐག་བྱེད་རོགས། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
