བོད་ནང་གི་རྒྱ་དཔོན་གཉིས་ལ་ཞིབ་བཤེར་བྱེད་བཞིན་འདུག

བོད་མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་མགོ་འཁྲིད་ཁུང་ལིན་ཏུང་(孔令栋) དང་རྔ་བ་ཁུལ་གྱི་ལྟེ་གནས་གྲོང་ཁྱེར་འབར་ཁམས་ཀྱི་མགོ་འཁྲིད་གཞོན་པ་ཉི་ཡུང་གཉིས་ཀྱིས་ལྐོག་རྔན་བླངས་བའི་དོགས་གཞིའི་འོག་འདྲི་ཞིབ་བྱེད་བཞིན་འདུག

སྐབས་བཅུ་བཞི་བའི་མཚོ་སྔོན་ཞིང་ཆེན་སྒྲིག་ཁྲིམས་ལྷན་ཁང་གི་རྒྱུན་ལས་དང་། ཟི་ལིང་གྲོང་ཁྱེར་དམར་ཤོག་ཚོགས་པའི་དྲུང་ཡིག་གཞོན་པ། ཟི་ལིང་གྲོང་ཁྱེར་གྱི་སྤྱི་ཁྱབ་དཔོན་པོ། མཚོ་ཤར་གྲོང་ཁྱེར་གྱི་དཔོན་པོ་གཞོན་པ། ཟི་ལིང་དཔལ་འབྱོར་ལག་རྩལ་གསར་སྤེལ་བཟོ་ལས་ཁང་གི་འགན་འཛིན་ཁུང་ལིན་ཏུང་གིས། གཞུང་གི་གོ་གནས་བེད་སྤྱད་དེ་གཞན་གྱི་ཁེ་ཕན་བསྒྲུབས་པ་དང་། ཁྲིམས་འགལ་ཐོག་ལྐོག་རྔན་འབོར་ཆེན་བླངས་པའི་ཉེས་མིང་བཙུགས་ཡོད་འདུག

ཁུང་ལིན་ཏུང་ནི་ཕྱི་ལོ་ ༡༩༧༠ ལོར་ཀན་སུའུ་ཝུའུ་ཝེ་རུ་སྐྱེས་ཡོད་ཅིང་། ཕྱི་ལོ་ ༡༩༨༨ ནས་ ༡༩༩༠ ལོའི་བར་དུ་མཚོ་སྔོན་དགེ་འོས་སློབ་ཆེན་གྱི་རྒྱ་ཡིག་སྡེ་ཚན་དུ་སློབ་སྦྱོང་བྱས་ཡོད་པ་དང་། ཕྱི་ལོ་ ༢༠༠༠ ལོར་རྒྱ་ནག་དམར་ཤོག་ཚོགས་པའི་ཁོངས་སུ་ཞུགས། ཕྱི་ལོ་ ༢༠༡༦ ནས་ ༢༠༡༩ བར་དུ་མཚོ་ཤར་གྲོང་ཁྱེར་གྱི་དཔོན་པོ་གཞོན་པ་བྱས། ཕྱི་ལོ་ ༢༠༡༩ ནས་ ༢༠༢༣ བར་དུ་ཟིི་ལིང་གྲོང་ཁྱེར་དམར་ཤོག་ཚོགས་པའི་དྲུང་ཡིག་གཞོན་པ། ཟི་ལིང་གྲོང་ཁྱེར་གྱི་སྤྱི་ཁྱབ་དཔོན་པོ་བཅས་བྱས་ཡོད་འདུག

གཞན་ཡང་། རྔ་བ་ཁུལ་འབར་ཁམས་གྲོང་ཁྱེར་དམར་ཤོག་ཚོགས་པའི་ཚོགས་མི་དང་། གྲོང་ཁྱེར་གྱི་མགོ་འཛིན་གཞོན་པ། གྲོང་ཁྱེར་ཉེན་རྟོག་ཁང་གི་དྲུང་ཡིག ཉེན་རྟོག་དཔོན་པོ་ཉི་ཡུང་གིས་ཁྲིམས་འགལ་ཚབས་ཆེན་བྱས་པའི་དོགས་གཞིའི་འོག  ཉེ་ཆར་རྔ་བ་ཁུལ་སྒྲིག་ཁྲིམས་ཞིབ་བཤེར་ལས་ཁུངས་ཀྱིས་འདྲི་ཞིབ་བྱེད་བཞིན་ཡོད་འདུག

ཉི་ཡུང་ནི་ཕྱི་ལོ་ ༡༩༧༦ ལོར་ཨན་ཧེ་དུ་སྐྱེས་ཡོད་ཅིང་། ཕྱི་ལོ་ ༢༠༠༢ ལོར་རྒྱ་དམག་དམར་ཤོག་ཚོགས་པའི་ཁོངས་སུ་ཞུགས་ཡོད་པ་དང་། ཕྱི་ལོ་ ༢༠༡༥ ནས་ ༢༠༢༠ བར་གཟི་ཚ་སྡེ་དགུ་དང་འབར་ཁམས་སུ་རིམ་དང་པོའི་ཉེན་རྟོག་པའི་ལས་ཀ་བྱས་ཡོད་འདུག ཕྱི་ལོ་ ༢༠༢༠ ནས་ ༢༠༢༣ བར་ཁྱུང་ཆུ་རྫོང་གི་རྫོང་དཔོན་གཞོན་པ་དང་། ཉེན་རྟོག་རུ་དཔོན་བྱས།  ཕྱི་ལོ་ ༢༠༢༣ ཟླ་ ༤ ནས་འབར་ཁམས་གྲོང་ཁྱེར་གྱི་དཔོན་པོ་གཞོན་པ་དང་། གྲོང་ཁྱེར་ཉེན་རྟོག་རུ་དཔོན་བཅས་བྱས་ཡོད་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།