བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་མཇུག་སྐྱོང་ཚོགས་དུས་ལ་འགྱུར་བ་གང་ཡང་མེད་པར་འདི་ལོའི་ཕྱི་ཟླ་ ༡༢ ཚེས་ ༢༥ ཉིན་ནས་འཚོག་རྒྱུ་ཡིན་འདུག
ཟླ་འདིའི་ཕྱི་ཚེས་ ༡༩ ཉིན་དབུས་གཙང་དང་མདོ་སྨད་སྤྱི་འཐུས་གྲངས་ ༡༦ དང་ཡུ་རོབ་ཀྱི་སྤྱི་འཐུས་གཉིས་བཅས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་མཇུག་སྐྱོང་ལས་རིམ་དེ་ཕྱི་ལོ་གསར་པའི་གྲོས་ཚོགས་ཚོགས་དུས་བདུན་པ་བར་འཕར་འགྱངས་བྱ་དགོས་པའི་སྙན་ཞུ་ཕུལ་ཡོད་པ་ལྟར། ཁ་སང་ཕྱི་ཚེས་ ༢༩ ཉིན་སྤྱི་འཐུས་ཚོགས་དྲུང་ལས་ཁུངས་ཀྱིས་སྙན་ཞུ་འབུལ་མཁན་གྱི་སྤྱི་འཐུས་རྣམས་ལ་བསྐུར་བའི་གསལ་བསྒྲགས་ནང་། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་མཇུག་སྐྱོང་གི་ཚོགས་དུས་དེར་ཕར་འགྱངས་གང་ཡང་མེད་པར་སྔར་བཞིན་འདི་ལོའི་ཕྱི་ཟླ་ ༡༢ ཚེས་ ༢༥ ཉིན་ནས་འཚོག་རྒྱུ་ཡིན་པ་དེའང་མང་མོས་ཐག་གཅོད་བྱུང་བ་ཞིག་ཡིན་སྐོར་སོགས་འཁོད་འདུག
སྤྱི་འཐུས་ཚོགས་དྲུང་ལས་ཁུངས་ཀྱིས་སྙན་ཞུ་འབུལ་མཁན་གྱི་སྤྱི་འཐུས་རྣམས་ལ་བསྐུར་བའི་འཕྲིན་ཡིག་ནང་། ཕྱི་ལོ་ ༢༠༢༣ ཟླ་ ༡༡ ཚེས་ ༢༠ འཁོད་ཚོགས་དུས་དྲུག་པའི་མཇུག་སྐྱོང་ཚོགས་དུས་དེ་བཞིན་ཕྱི་ལོའི་ཟླ་གསུམ་པའི་ནང་འཚོགས་ཐབས་ཡོང་བའི་ཡིག་ཐོག་སྙན་ཞུ་གནང་འབྱོར་བྱུང་བ་སྤྱི་འཐུས་རྒྱུན་ལས་ལྷན་ཚོགས་ཐེངས་ ༡༡༩ ཐོག་སྙན་སེང་ཞུས་པར། སྤྱི་འཐུས་རྣམ་པར་ཚོགས་གཙོ་སྦྲེལ་པོས་ཕྱོགས་ཡོངས་ཀྱི་གནས་སྟངས་ལ་བསམ་ཞིབ་ཀྱིས་འཛིན་སྐྱོང་མཉམ་གོ་བསྡུར་དང་། བཅའ་ཁྲིམས་དགོངས་དོན་སྤྱི་འཐུས་རྒྱུན་ལས་རྣམ་པར་གོ་བསྡུར་གྱིས་གྲོས་ཚོགས་ཚོགས་དུས་དྲུག་པ་མཇུག་སྐྱོང་ཚོགས་དུས་འཚོག་རྒྱུའི་ཐག་གཅོད་གཏན་འབེབས་གནང་བ་ཞིག་ཡིན་པས། གསལ་བསྒྲགས་སྔོན་སོང་ལྟར་རང་འཇགས་གནས་རྒྱུའི་མང་མོས་ཐག་གཅོད་གནང་སོང་ཞེས་ཕེབས་སོང་བ་དེ་དོན་དགོངས་མངའ་ཡོང་བ་ཞུ། ཞེས་འཁོད་ཡོད་འདུག
འདི་གའི་གསར་འགོད་པས་བོད་མི་མང་སྤྱི་འཐུས་མི་འགྱུར་རྡོ་རྗེ་ལགས་སུ་འདི་ལོའི་ཟླ ༠༩ ཚེས་ ༢༣ ཉིན་བཞུགས་མོལ་ཚོགས་འདུ་དང་འབྲེལ་བའི་གསར་འགོད་གསལ་བསྒྲགས་ཤིག་གི་ནང་། རྣམ་པ་ཚོས་གྲོས་ཚོགས་ནམ་ཚོགས་ཀྱི་ཚོགས་བརྡར་ངང་སྒུག་བྱེད་བཞིན་ཡོད་སྐོར་གསལ་འདུག་ཀྱང་། ད་ལན་ཕྱིར་འགྱངས་གནང་རོགས་ཞུ་དགོས་དོན་ག་རེ་ཡིན་མིན་སོགས་ཀྱི་ཐད་དྲིས་པར། ཁོང་གིས། དེ་སྔོན་ང་ཚོས་གྲོས་ཚོགས་ཚོགས་རྒྱུར་ཨང་གསར་ཡིན། གྲོས་ཚོགས་ཀྱི་ཚོགས་གཙོ་རྣམ་པས་ག་དུས་བརྡ་ཁྱབ་གནང་བ་ཡིན་ན། ང་ཚོ་བཅར་ཆོག་ཆོག་ཡོད་ཅེས་ཞུས་ཡོད་རེད། དེ་ག་རང་ལ་གསོན་གནས་རེད་མ་གཏོགས་དེ་ལ་འགྱུར་བ་གང་ཡང་ཡོད་པ་མ་རེད། ང་ཚོས་གྲོས་ཚོགས་འཚོགས་ཀྱི་མིན། གྲོས་ཚོགས་འཚོགས་ན་འགྲིག་གི་མི་འདུག་ཅེས་དུས་ནམ་ཡང་ཞུ་ཡི་ཡོད་མ་རེད། ད་ལྟ་གྲོས་ཚོགས་འཚོག་རྒྱུ་དེ་དུས་ཚོད་རན་པོ་ཞིག་མི་འདུག དུས་ཚོད་རན་པོ་མེད་པའི་རྐྱེན་བྱས་ནས་གཞུང་ལ་དཔལ་འབྱོར་གྱི་ཐོག་ནས་དོ་ཕོག་ཅིག་འཕྲད་ཡོང་གི་འདུག་ལ། དེ་སྲི་ཚགས་ལ་འགྲོ་ཡི་མི་འདུག་ཅེས་ཞུས་ཡོད། གང་ལ་ཟེར་ན། ད་ལན་ཚོགས་དུས་དྲུག་པ་དེ་མཇུག་སྐྱོང་གི་ཚོགས་དུས་ཤིག་ཆགས་ཀྱི་ཡོད། དེའི་ནང་ལས་སྡོམ་གྱི་སྐོར་དེ་སྤྱི་འཐུས་རྒྱུན་ལས་ཀྱིས་ཞིབ་ཅིང་ཚགས་པར་ཞིབ་འཇུག་གནང་ནས་དྲི་བ་བཟོས་ཏེ། ཆ་ཚང་འབྲེལ་ཡོད་ལས་ཁུངས་ཀྱི་བཀའ་བློན་ཚོས་བཀའ་ལན་གནང་གྲུབ་པ་ཡིན་པས། ལས་སྡོམ་རྒྱས་པ་འགྲོ་རྒྱུ་ཙམ་ཞིག་མ་གཏོགས། གལ་ཆེ་བ་དང་ཛ་དྲག་གལ་མི་འདུག་པས། གཞུང་གི་དཔལ་འབྱོར་ལ་སྲི་ཚགས་ཀྱི་དགོངས་པ་བཞེས་ནས། ད་ལན་གྱི་མཇུག་སྐྱོང་གི་ཚོགས་འདུ་དེ་ཕྱི་ཟླ་ ༣ པའི་སྔོན་རྩིས་ཚོགས་འདུའི་གོང་ལ་ཉིན་མ་ཁ་ཤས་ཀྱི་སྔོན་ལ་གནང་། དེ་ནས་ཉིན་མ་གཅིག་སྟོང་པ་བཞག དེ་ནས་གྲོས་ཚོགས་ཚོགས་དུས་བདུན་པ་དེར་ཕེབས་ན་ཡག་པོ་ཡོད་པས། དེ་འདྲ་ཞིག་གནང་རོགས་གནང་ཟེར་ནས་འབོད་སྐུལ་ཞུ་ཡི་ཡོད་རེད། ཅེས་གསུངས་བྱུང་།
ཡང་ཁོང་གིས། སྤྱིར་སྤྱི་འཐུས་རྣམས་ལ་གཞུང་གིས་འགྲོ་གྲོན་གནང་གི་ཡོད་ཀྱང་། ད་ལན་ཕྱི་ལོ་གསར་པ་དང་། ཡི་ཤུའི་འཁྲུངས་སྐར་སོགས་ཁེལ་ཡོད་སྟབས། ཕྱོགས་མཐའ་ཁག་ནས་ཕེབས་མཁན་རྣམས་ཀྱི་གནམ་གྲུའི་འགྲོ་གྲོན་མཐོ་བོར་གྱུར་ཡོད་པས། ཕྱོགས་ཡོངས་ནས་གཟིགས་ཏེ་ཚོགས་དུས་དེ་རེ་ཞིག་ཕར་འགྱངས་བྱས་ནས་ཡག་པོ་ཡོད་སྐོར་དང་། ལྷག་པར་ཕྱི་ཟླ་ ༡༢ ནང་༧གོང་ས་རྒྱལ་བ་རིན་པོ་ཆེ་མཆོག་གི་གནས་མཆོག་རྡོ་རྗེ་གདན་གྱི་མཛད་འཆར་ཁག་ལ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ཕེབས་དགོས་པ་སོགས་ཀྱི་གནད་དོན་མང་པོ་ཞིག་ལ་གཟིགས་ནས་དུས་འགྱངས་བྱ་དགོས་པའི་འབོད་སྐུལ་ཞུས་ཡོད་སྐོར་སོགས་གསུངས་བྱུང་།
གསར་འགོད་པ། དཔལ་ལྡན།
རྩོམ་སྒྲིག་པ། སྐལ་བཟང་སྦྱིན་པ།
