བོད་དོན་ཁྲིམས་འཆར་ལ་སྤྱི་མོས་ངོས་ལེན་རྒྱབ་སྐྱོར་ཐོབ་པར་དགའ་བསུ་ཞུས།

ཁ་སང་ཕྱི་ཚེས་ ༢༩ ཉིན་ཨ་རིའི་ཕྱི་འབྲེལ་ལས་དོན་ཚོགས་ཆུང་གིས་བོད་རྒྱའི་དཀའ་རྙོག་སེལ་ཐབས་ཀྱི་བསྐྱར་བཅོས་ཁྲིམས་འཆར་ཐོག་ཉན་ཞིབ་གནང་སྟེ། སྤྱི་མོས་ཐོག་ནས་ངོས་ལེན་རྒྱབ་སྐྱོར་ཐོབ་ཡོད་པར་བརྟེན་བོད་མིའི་སྒྲིག་འཛུགས་ཀྱི་ངོས་ནས་དགའ་བསུ་ཞུས་ཡོད་འདུག

House Foreign Affairs Committee approves Tibet-China Conflict bill (Resolve Tibet Bill)

དེ་འབྲེལ་བོད་མིའི་སྒྲིག་འཛུགས་ཀྱི་དྲ་ཐོག་ཏུ་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གིས་སྤྱི་མོས་ངོས་ལེན་གནང་བའི་ཁྲིམས་འཆར་དེ་བརྒྱུད། ཨ་རིའི་གཞུང་འབྲེལ་གྱི་སྲིད་ཇུས་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་གི་དམིགས་བསལ་སྐུ་ཚབ་བམ་མང་གཙོའི་ལམ་ནས་འོས་འདེམས་བྱུང་བའི་བོད་མིའི་དབུ་ཁྲིད་དང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དཔོན་རིགས་དབར་སྔོན་འགྲོའི་ཆ་རྐྱེན་གང་ཡང་མེད་པར་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་རྒྱུར་རྒྱབ་སྐྱོར་ཡོད་པ་དང་། ཕྱི་ལོ་ ༢༠༡༠ ནས་རྒྱ་གཞུང་གིས་བོད་རྒྱའི་ཞི་མོལ་མཚམས་འཇོག་བྱས་ཡོད་པའི་སྐོར། རྒྱ་ནག་གིས་གནའ་ནས་བོད་དེ་རྒྱ་ནག་གི་ཆ་ཤས་ཡིན་ཚུལ་བཤད་པ་དེ་དག་ལོ་རྒྱུས་ཀྱི་ཐོག་ནས་དྲང་བདེན་མིན་པ་རྣམས་གསལ་སྟོན་བྱས་ཡོད་པ་མ་ཟད། བོད་རང་སྐྱོང་ལྗོངས་ཟེར་བ་དང་བོད་རིགས་རང་སྐྱོང་ཁུལ་ཟེར་བ་ཚང་མ་བོད་ཅེས་པའི་ཐ་སྙད་ཀྱི་ཁོངས་གཏོགས་ས་ཁུལ་ཡིན་པ་སོགས་གསལ་སྟོན་བྱས་འདུག་ལ། ཁྲིམས་འཆར་ནང་ད་དུང་རྒྱ་ནག་གིས་བོད་ཀྱི་ལོ་རྒྱུས་དང་རིག་གཞུང་། དགའ་ལྡན་ཕོ་བྲང་ཚུད་པའི་བོད་ཀྱི་སྒྲིག་འཛུགས་ཁག་གི་སྐོར་ལ་འཁྱོག་བརྗོད་དང་ལོག་འགྲེལ་བྱེད་མཚམས་འཇོག་དགོས་སྐོར་སོགས་བརྗོད་འདུག

འདི་ལོའི་ཕྱི་ཟླ་ ༡༠ ཚེས་ ༡༦ ནས་ ༢༠ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་རྒྱལ་ས་ཝ་ཤིང་ཊོན་ (Washington) དུ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་མདུན་སྐྱོད་ཡོང་ཐབས་སུ་ཆེད་ཕེབས་ཀྱིས། ཨ་རིའི་གྲོས་ཚོགས་སྐབས་ ༡༡༨ པའི་ཐོག་ཁྲིམས་འཆར་དེ་གཏན་འབེབས་ཡོང་རྒྱུའི་རེ་བ་ཆེན་པོ་ཡོད་སྐོར་གསུངས་འདུག ད་དུང་སྲིད་སྐྱོང་མཆོག་གིས། རྒྱ་ནག་གཞུང་གིས་བོད་དེ་རྒྱ་ནག་གི་ཆ་ཤས་ཡིན་ཚུལ་བཤད་པ་དེ་ལོ་རྒྱུས་ཀྱི་དཔང་རྟགས་གང་ཡང་མེད་པས་བདེན་པ་མ་རེད། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་འོག་ནས་ལོ་ངོ་བཅུ་ཕྲག་མང་པོའི་རིང་ང་ཚོ་བོད་མི་རྣམས་སྡུག་སྦྱོང་མནར་གཅོད་ཚད་མེད་མྱངས་ཡོད་ནའང་། ང་ཚོས་དུས་རྟག་ཏུ་འཚེ་བ་མེད་པ་དང་ཞི་བའི་གྲོས་མོལ་གྱི་ལམ་ནས་དཀའ་རྙོག་སེལ་ཐབས་སུ་འབད་བརྩོན་བྱེད་ཀྱི་ཡོད། ཅེས་གསུངས་ཡོད་འདུག

ཡང་སྲིད་སྐྱོང་སྤེན་པ་ཚེ་རིང་མཆོག་གིས། ཁྲིམས་འཆར་འདིས་ཨ་རིའི་གཞུང་ཕྱོགས་ནས་རྒྱ་ནག་གཞུང་ལ་བོད་རྒྱ་ཞི་མོལ་གནང་དགོས་པའི་སྐུལ་འདེད་བྱས་པ་དང་བསྟུན། བོད་མི་རྣམས་ནས་རང་གི་རྒྱལ་ཁབ་ཀྱི་བདག་དབང་རྩོད་དགོས་པའི་སྐུལ་མ་གཏོང་གི་ཡོད་ཅིང་། ཁྲིམས་འཆར་འདིས་བོད་དོན་ཐོག་ལ་ཕན་ཐོགས་པ་ཙམ་མིན་པར། འཛམ་གླིང་ཡོངས་ཀྱི་མང་གཙོ་དང་གྲོས་མོལ། ཞི་བདེའི་རྩ་དོན་ལ་རྒྱལ་ཁ་ཐོབ་པ་ཞིག་ཆགས་ཀྱི་ཡོད། དེར་བརྟེན། ཨ་རིའི་གྲོས་ཚོགས་གོང་འོག་གཉིས་ཀའི་ནང་གཏན་འབེབས་ཀྱིས་སྲིད་འཛིན་གྱི་མདུན་ལྕོག་སྟེང་བསླེབ་ཐུབ་པའི་གདེང་ཚོད་ཡོད། ཅེས་དང་། ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡི་ཀེལ་མེ་ཁོལ་ (Michael McCaul) ལགས་དང་། ཨ་རིའི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་གྷེ་རི་གྷོ་རི་མིག་སི་ (Gregory Meeks) ལགས་ཀྱི་གཙོས་ཚོགས་མི་རྣམས་ཀྱིས་བོད་དོན་ཁྲིམས་འཆར་ལ་ངོས་ལེན་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན་སྐོར་སོགས་གསུངས་འདུག

ཨ་རིའི་ཕྱི་འབྲེལ་ལས་དོན་ཚོགས་ཆུང་གིས་ངོས་ལེན་རྒྱབ་སྐྱོར་ཐོབ་པའི་ཁྲིམས་འཆར་དེའི་ནང་། ཨ་རིའི་གྲོས་ཚོགས་ཀྱི་གཟིགས་ཚུལ་དང་ཨ་རིའི་སྲིད་ཇུས། དགོངས་འཆར་བཅས་རིམ་པ་གསུམ་ཡོད་པའི་ཁྲོད། ཨ་རིའི་གྲོས་ཚོགས་ཀྱི་གཟིགས་ཚུལ་ནི། ༧གོང་ས་རྒྱལ་བ་རིན་པོ་ཆེ་མཆོག་གི་དམིགས་བསལ་སྐུ་ཚབ་དང་རྒྱ་ནག་གི་དཔོན་རིགས་ཚོའི་བར་ཆ་རྐྱེན་གང་ཡང་མེད་པའི་ཐོག་ནས་ཞི་བའི་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་དགོས་པ་དང་། ཕྱི་ལོ་ ༢༠༠༢ ནས་ ༢༠༡༠ བར་༧གོང་ས་མཆོག་གི་དམིགས་བསལ་སྐུ་ཚབ་དང་རྒྱ་ནག་གི་དཔོན་རིགས་དབར་གྲོས་མོལ་ཐེངས་ ༩ བྱས་ཡོད་ཀྱང་བོད་རྒྱའི་དཀའ་རྙོག་སེལ་ཐུབ་མེད་པ་མ་ཟད། ཕྱི་ལོ་ ༢༠༡༠ ཟླ་ ༡ པོ་ནས་བོད་རྒྱ་ཞི་མོལ་མཚམས་ཆད་ཡོད་པ། དེ་བཞིན་རྒྱ་ནག་གཞུང་གིས་བོད་དེ་ལོ་རྒྱུས་ཀྱི་ཐོག་ནས་རྒྱ་ནག་གི་ཆ་ཤས་ཡིན་ཚུལ་སོགས་ཆ་རྐྱེན་མང་པོ་བསྐྲུན་པ་དེ་དག་དྲང་བདེན་མིན་པ། རྒྱལ་སྤྱིའི་ཁྲིམས་ལུགས་གཞིར་བཟུང་མི་ཡོངས་ལ་ཆབ་སྲིད་གནས་བབ་ཀྱི་ཐོག་ནས་རང་ཐག་རང་གཅོད་ཀྱི་ཐོབ་ཐང་ཡོད་པ་མ་ཟད། དཔལ་འབྱོར་དང་། སྤྱི་ཚོགས། རིག་གཞུང་གོང་འཕེལ་གཏོང་བར་རང་དབང་ཡོད་པ། ད་དུང་ཨ་རིའི་གཞུང་ནས་བོད་དེ་གནའ་བོའི་ལོ་རྒྱུས་ཀྱི་ཐོག་ནས་རྒྱ་ནག་གི་ཆ་ཤས་མིན་པ་སོགས་གསལ་འདུག

མུ་མཐུད་དུ། ཕྱི་ལོ་ ༢༠༠༢ ལོར་གཏན་ལ་ཕབ་པའི་བོད་དོན་རྒྱབ་སྐྱོར་སྲིད་ཇུས་ཀྱི་ཁྲིམས་ཡིག་ལ་བསྐྱར་བཅོས་གནང་ནས་ཨ་རིའི་གཞུང་གིས་ཕྱི་ལོ་ ༢༠༢༠ ལོའི་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་འཆར་ནང་། བོད་ཀྱི་འགྲོ་བ་མིའི་ཐོབ་ཐང་དང་ཆོས་དད་རང་མོས། བོད་ཀྱི་སྐད་ཡིག་དང་རིག་གཞུང་། ལོ་རྒྱུས་ཀྱི་ངོ་བོ་སོགས་གོང་སྤེལ་གཏོང་བ་དང་། བོད་མི་རྣམས་ལ་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག། ལོ་རྒྱུས་ཀྱི་ངོ་བོ་སོགས་ཡོད་པར་ཁས་ལེན་པ། རྒྱ་ནག་གི་དཔོན་རིགས་ཀྱིས་བོད་མིའི་འགྲོ་བ་མིའི་ཐོབ་ཐང་དང་། ཆོས་དད་རང་དབང་ཐོག་དྲག་གནོན་ཤུགས་ཆེན་བྱེད་བཞིན་ཡོད་སྐོར་དང་། ཕྱི་ལོ་ ༢༠༠༢ ལོར་གཏན་ལ་ཕབ་པའི་བོད་དོན་རྒྱབ་སྐྱོར་སྲིད་ཇུས་ཀྱི་ཁྲིམས་ཡིག་ལ་བསྐྱར་བཅོས་གནང་སྟེ། ཨ་རིའི་གཞུང་གིས་ཕྱི་ལོ་ ༢༠༢༠ ལོའི་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་འཆར་ནང་བོད་རྒྱའི་དཀའ་རྙོག་སེལ་ཐབས་སུ་༧གོང་ས་མཆོག་གི་དམིགས་བསལ་སྐུ་ཚབ་དང་རྒྱ་ནག་གི་དཔོན་རིགས་དབར་ཞི་བའི་གྲོས་མོལ་ཡོང་བར་ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་ཡོད་སྐོར་སོགས་འཁོད་འདུག

ཨ་རིའི་སྲིད་ཇུས་ཀྱི་ཐོག་ནས་ངོས་འཛིན་ག་རེ་གནང་གི་ཡོད་པའི་སྐོར་ལ། བོད་མི་རྣམས་ལ་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ལོ་རྒྱུས་བཅས་ཡོད་པར་ངོས་འཛིན་བྱེད་པ་དང་། རྒྱལ་སྤྱིའི་ཁྲིམས་ལུགས་དང་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་གཞིར་བཟུང་། ཆ་རྐྱེན་གང་ཡང་མེད་པར་ཞི་བའི་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་དགོས་པ། རྒྱ་ནག་གཞུང་གིས་དགའ་ལྡན་ཕོ་བྲང་ཚུད་པའི་བོད་ཀྱི་ལོ་རྒྱུས་དང་། བོད་མི་དང་སྒྲིག་འཛུགས་ཁག་གི་སྐོར་ལ་འཁྱོག་བརྗོད་དང་ལོག་འགྲེལ་གྱི་དྲིལ་བསྒྲགས་མཚམས་འཇོག་བྱ་དགོས་པ། རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་སྤྱི་དམངས་དང་ཆབ་སྲིད་ཀྱི་ཐོབ་ཐང་། རྒྱལ་སྤྱིའི་དཔལ་འབྱོར་དང་སྤྱི་ཚོགས། རིག་གཞུང་བཅས་ཀྱི་ཐོབ་ཐང་གི་སྒྲིག་གཞིར་ཁས་ལེན་དམ་བཅས་པ་བཞིན་མདུན་སྐྱོད་ལག་བསྟར་བྱེད་པའི་སྐུལ་འདེད་གཏོང་བ། ཕྱི་ལོ་ ༢༠༢༠ ལོའི་བོད་དོན་སྲིད་ཇུས་དང་རྒྱབ་སྐྱོར་ཁྲིམས་འཆར་གཞིར་བཟུང་། རྒྱ་ནག་གཞུང་གིས་སྔོན་འགྲོའི་ཆ་རྐྱེན་གང་ཡང་མེད་པར་༧གོང་ས་མཆོག་གི་དམིགས་བསལ་སྐུ་ཚབ་དང་རྒྱ་ནག་གི་དཔོན་རིགས་དབར་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་རྒྱུའི་སྐུལ་མ་གཏོང་བ་དང་། གཞུང་གཞན་དང་མཉམ་འབྲེལ་གྱིས་གྲོས་མོལ་བྱས་ཏེ་བོད་རྒྱའི་དཀའ་རྙོག་སེལ་ཐབས་ཀྱི་དམིགས་ཡུལ་འགྲུབ་དགོས་པ། རྒྱ་ནག་གཞུང་གིས་བོད་མིའི་མངོན་འདོད་ལྟར་བོད་ཀྱི་ཐུན་མོང་མ་ཡིན་པའི་ལོ་རྒྱུས་དང་རིག་གཞུང་། ཆོས། སྐད་ཡིག་སོགས་ལ་བརྩི་མཐོང་བྱ་དགོས་པ་བཅས་ལ་ངོས་འཛིན་གྱི་ཡོད་པ་སོགས་འཁོད་འདུག

ཁྲིམས་འཆར་བསྐྱར་བཅོས་དེའི་ནང་འཁོད་པའི་ཨ་རིའི་གྲོས་ཚོགས་ཀྱི་དགོངས་འཆར་ཞེས་པའི་ནང་། ཁྲིམས་འདིའི་ནང་བོད་ཅེས་པའི་ཐ་སྙད་ཀྱི་ཁྱབ་ཁོངས་ས་ཁུལ་འདི་དག་ཡིན། གཅིག་བོད་རང་སྐྱོང་ལྗོངས་ (Tibetan Autonomous Region) ཟེར་བ་དང་། གཉིས་ཕྱི་ལོ་ ༢༠༡༨ ལོར་རྒྱ་ནག་གཞུང་གིས་བཏགས་པའི་བོད་རང་སྐྱོང་ (Tibetan Autonomous) ས་ཁུལ་ཟེར་བའི་འོག་ཏུ། ཀན་སུའུ་ཞིང་ཆེན་དུ་ཡོད་པའི་ཀན་ལྷོ་བོད་རིགས་རང་སྐྱོང་ཁུལ་དང་། དཔའ་རིས་བོད་རིགས་རང་སྐྱོང་རྫོང་། དེ་བཞིན་མཚོ་སྔོན་ཞིང་ཆེན་དུ་ཡོད་པའི་མགོ་ལོག་བོད་རིགས་རང་སྐྱོང་ཁུལ་དང་རྨ་ལྷོ་བོད་རིགས་རང་སྐྱོང་ཁུལ་ཟེར་བ། མཚོ་བྱང་བོད་རིགས་རང་སྐྱོང་ཁུལ། མཚོ་ལྷོ་བོད་རིགས་རང་སྐྱོང་ཁུལ། མཚོ་ནུབ་སོག་རིགས་བོད་རིགས་རང་སྐྱོང་ཁུལ། སྐྱེ་རྒུ་མདོ་ཡུལ་ཤུལ་བོད་རིགས་རང་སྐྱོང་ཁུལ་ཟེར་བ་བཅས་དང་། སི་ཁྲོན་ཞིང་ཆེན་དུ་ཡོད་པའི་དཀར་མཛེས་བོད་རིགས་རང་སྐྱོང་ཁུལ་དང་། རྔ་བ་བོད་རིགས་ཆང་རིགས་རང་སྐྱོང་ཁུལ། སྨི་ལི་བོད་རིགས་རང་སྐྱོང་རྫོང་ཟེར་བ། ཡུན་ནན་ཞིང་ཆེན་དུ་ཡོད་པའི་བདེ་ཆེན་བོད་རིགས་རང་སྐྱོང་ཁུལ་ཟེར་བ་བཅས་ལ་གོ་དགོས་ཡོད་ཅེས་གསལ་བོར་བརྗོད་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། སྐལ་བཟང་སྦྱིན་པ།