ཉིན་གྲངས་གཉིས་རིང་ཐའེ་ཝན་གྱི་གྲོང་ཁྱེར་ཐའེ་པའེ་རུ་ཐའེ་ཝན་སྐུ་ཚབ་དོན་ཁང་གི་གོ་སྒྲིག་འོག་ ༢༠༢༤ ལོའི་ཐུན་མོང་གི་གཞི་རྟེན་འཚོལ་བའི་རྒྱལ་སྤྱིའི་བོད་ཀྱི་བགྲོ་གླེང་ཚོགས་འདུ་འཚོགས་ཡོད་འདུག
ཁ་སང་ཕྱི་ཚེས་ ༡༤ ནས་ཉིན་གྲངས་གཉིས་རིང་ཐའེ་ཝན་གྱི་རྒྱལ་ས་ཐའེ་པའེ་རུ་ཡོད་པའི་ཧྥུ་ཧྭ་རྒྱལ་སྤྱིའི་རིག་གཞུང་ཚོགས་ཁང་ (Fuhua International Cultural hall) དུ། ། ཐའེ་ཝན་སྐུ་ཚབ་དོན་གཅོད་ཁང་གི་གོ་སྒྲིག་འོག གངས་ལྗོངས་གླེང་སྟེགས་ཆེན་མོ། ཐའེ་ཝན་མང་གཙོའི་ཆབ་སྲིད་ཀྱིས་རྒྱ་ནག་གི་ཆབ་སྲིད་འགྱུར་ལྡོག་ལ་ལམ་འཁྲིད་ཇི་ལྟར་བྱེད་དགོས་སྐོར་ ༢༠༢༤ ལོའི་ཐུན་མོང་གི་གཞི་རྟེན་འཚོལ་བའི་རྒྱལ་སྤྱིའི་བོད་ཀྱི་བགྲོ་གླེང་ཚོགས་འདུ་བསྡུས་ཡོད་པ་དང་། ཚོགས་འདུའི་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་དྲུང་ཆེ་ཟླ་བ་ཚེ་རིང་ལགས་དང་། ཉམས་ཞིབ་པ་ཚེ་དབང་རྡོ་རྗེ་ལགས། ཉམས་ཞིབ་པ་རིག་སྨོན་ཚེ་རིང་བསམ་གྲུབ་ལགས། ཉམས་ཞིབ་པ་བསྟན་འཛིན་ཕན་ཐོགས་ལགས་བཅས་ཐའེ་ཝན་དུ་གཞུང་འབྲེལ་ཕྱོགས་བསྐྱོད་གནང་སྟེ་གཏམ་བཤད་དང་དྲི་བ་དྲིས་ལན་བཅས་གནང་ཡོད་འདུག་ལ། ཐེངས་འདིའི་ཚོགས་འདུའི་སྟེང་བོད་དང་ཐའེ་ཝན། སོག་པོ། ཧོང་ཀོང་སོགས་རྒྱལ་ཁབ་འདྲ་མིན་ནས་སློབ་དཔོན་དང་ཉམས་ཞིབ་པ། དམངས་གཙོ་དོན་གཉེར་བ་ཁྱོན་མི་གྲངས་ ༢༥ ཙམ་མཉམ་ཞུགས་གནང་ཡོད་འདུག
དེ་རིང་ཕྱི་ཚེས་ ༡༥ ཉིན་གྱི་ཉིན་ཕྱེད་རིང་ཐའེ་པའེ་གྲོང་ཁྱེར་གྱི་ཌ་ཨན་ (Da’an District) རྫོང་དུ་ཡོད་པའི་ཧོ་ཝར་ཌི་གསོལ་མགྲོན་ཁང་ (Howard Hotel) གི་ཚོགས་ཁང་དུ། ཐའེ་ཝན་མི་མང་དང་བོད་མི། ཧོང་ཀོང་བ། མན་ཇུ་སོགས་ཀྱིས་དུས་རབས་གསར་པའི་ནང་འགྱུར་ལྡོག་ཕྱིན་པ་ལ་ཡ་ལན་ཇི་ལྟར་སྤྲོད་དགོས་པའི་སྐོར་ལ་གཏམ་བཤད་དང་གོ་བསྡུར་གནང་ཡོད་འདུག ཉིན་གུང་ཆུ་ཚོད་ ༡༡།༡༠ ནས་ ༡༢ བར་ཆབ་སྲིད་རིག་པའི་སློབ་དཔོན་ཤཱ་མིང་ (Xia Ming) ལགས་དང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་རྣམ་གཉིས་ཀྱིས་བརྗོད་གཞི་དེའི་ཐོག་མུ་མཐུད་དུ་བགྲོ་གླེང་གནང་ཡོད་འདུག
ཁ་སང་ཕྱི་ཚེས་ ༡༤ ཉིན་གྱི་སྔ་དྲོར་ཐའེ་ཝན་རྒྱལ་ཡོངས་མཐོ་རིམ་སློབ་གཉེར་ཁང་ (National Taiwan University) གི་སྲིད་དོན་ཚན་རིག་གི་སློབ་དཔོན་ཆེན་མོ་མིང་ཇུ་ཀྲང་ (Ming Juzheng) ལགས་དང་། ནེའུ་ཡོག་གཙུག་ལག་སློབ་ཐོན་པའི་ལྟེ་གནས་དང་མཚོ་གླིང་གི་མཐོ་རིམ་སློབ་གྲྭའི་ (City University of New York Graduate Center and College of Staten Island) ཆབ་སྲིད་རིག་པའི་སློབ་དཔོན་ཤཱ་མིང་ (Xia Ming)། པི་རིན་སི་ཊོན་རྒྱ་ནག་ཚོགས་པའི་ (Princeton China Society) འཛིན་སྐྱོང་འགན་འཛིན་ཁྲན་ཁུ་ཡི་ཌ་ (Chen Kuide)། སིཌ་ནི་རུ་རྟེན་གཞི་བྱས་པའི་འཕྲུལ་ལས་རིག་པའི་མཐོ་རིམ་སློག་གཉེར་ཁང་གི་རྒྱ་ཡིག་སློབ་དཔོན་ཧྥང་ཁྲོང་ཡི་ (Feng Chongyi)། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་བཅས་ཀྱིས་ཐའེ་ཝན་དམངས་གཙོའི་ཆབ་སྲིད་ཀྱིས་རྒྱ་ནག་གི་ཆབ་སྲིད་ལ་འགྱུར་ལྡོག་གི་ལམ་སྣེ་ཇི་ལྟར་གཏོད་དགོས་པའི་སྐོར་ལ་གཏམ་བཤད་གནང་སྟེ། དྲི་བ་དྲིས་ལན་སོགས་གནང་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
