ཨེ་རི་ལེན་ཌིའི་སྲིད་བློན་ཝ་ར་ཌི་ཀར་ལགས་ཀྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་བློ་འཚབ་ཆེན་པོ་ཡོད་སྐོར་ནན་བརྗོད་གནང་ཡོད་འདུག
Chinese Premier Li Qiang, right, is greeted by Ireland’s Prime Minister Leo Varadkar at Farmleigh House on Wednesday, Jan. 17, 2024.Photo:INDEPENDENT
རྒྱ་ནག་གི་སྲིད་བློན་ལི་ཆང་གི་ཡུ་རོབ་ཁུལ་ཀྱི་སྐོར་སྐྱོད་དང་བསྟུན། ཟླ་འདིའི་ཕྱི་ཚེས ༡༦ ཉིན་ཡུ་རོབ་ཀྱི་ནུབ་བྱང་ཁུལ་དུ་ཆགས་པའི་ཨེ་རི་ལེན་ཌི་(Ireland) རྒྱལ་ཁབ་ཏུ་འབྱོར་ཡོད་ཅིང་། ཁ་སང་ཕྱི་ཚེས་ ༡༧ ཉིན་ཡུལ་དེའི་སྲིད་བློན་ཝ་ར་ཌི་ཀར་( Leo Varadkar) ལགས་ཀྱིས་ལི་ཆང་དང་ཐུག་འཕྲད་གནང་སྟེ། ཡུལ་དེའི་གཞུང་གྱིས་རྒྱ་ནག་གཞུང་གིས་ཡུ་གུར་དང་། བོད། ཧོང་ཀོང་། མེ་ཁའོ། ཧོང་ཀོང་གི་དམངས་གཙོ་དོན་གཉེར་བ་ཇི་མི་(Jimmy Lai) བཅས་ཀྱི་ཐོབ་ཐང་རྡོག་རོལ་བཏང་བར་བློ་འཚབ་བྱེད་ཀྱི་ཡོད་ལ། འགྲོ་བ་མིའི་ཐོབ་ཐང་གི་གནད་དོན་དེའི་ཐད་ང་ཚོས་མངོན་གསལ་དོད་པོས་གླེང་དགོས་ཏེ། རྒྱ་ནག་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་འཐུས་མི་དང་རྒྱལ་སྤྱིའི་འགན་དབང་ཡོད་པས་ཡིན། ཞེས་གསུངས་འདུག
ཡང་ཁོང་གིས། ང་ཚོས་རྒྱ་ནག་ལྷན་སྲ་བརྟན་དང་དོན་སྙིང་ལྡན་པའི་འབྲེལ་བ་ཞིག་ཡོང་རྒྱུར་རེ་བ་བྱེད་ཀྱི་ཡོད་ལ། ཡིད་ཆེས་དང་གུས་ཞབས་ཀྱི་ཐོག་ནས་ང་ཚོས་ཕན་ཚུན་གྱི་ཁེ་ཕན་དང་རིན་ཐང་སོགས་ལ་བརྩི་འཇོག་བྱེད་ཀྱི་ཡོད། ཅེས་གསུངས་འདུག་ལ། དེ་བཞིན་རེས་གཟའ་ལྷག་པའི་ཉིན་ཡུལ་དེའི་སྲིད་འཛིན་སྐུ་ཞབས་ཧིག་གྷིན་སི་(Michael D. Higgins) ལགས་དང་ཁོང་གི་བཟའ་ཟླ་ཚུད་པའི་གནད་ཡོད་མི་སྣ་ཁག་ཅིག་གིས་ཀྱང་། ལི་ཆང་ལ་རྒྱ་ནག་གཞུང་གིས་གྲངས་ཉུང་མི་རིགས་ཁག་གི་རང་སྐྱོང་ས་ཁུལ་ཚུད་པའི་འགྲོ་བ་མིའི་ཐོབ་ཐང་ལ་བརྩི་འཇོག་དང་། ཨུ་རུ་སུས་ཡུ་ཁེ་རིན་ལ་བཙན་འཇུལ། དེ་བཞིན་དཀྱིལ་ཤར་ཨེ་ཤ་ཡའི་ཟིང་འཁྲུག་ཞི་འཇམ་ཡོང་བར་འགན་ཁུར་དགོས་པ་སོགས་ནན་བརྗོད་གནང་ཡོད་འདུག
ད་ལན་གྱི་ཨེ་རི་ལེན་ཌི་དང་རྒྱ་ནག་གི་ཆེས་མཐོའི་མི་སྣ་ཐུག་འཕྲད་སྐབས། རྒྱལ་ཁབ་གཉིས་ཀྱི་རྒྱལ་སྲུང་དང་། ཚོང་འབྲེལ་ལས་དོན། དེ་བཞིན་མཉམ་ལས་ཀྱི་ཐོག་ནས་ཐོན་སྐྱེད་ཡར་སྐྱེད་གཏོང་བ། གོ་ལ་ལྗང་འགྱུར་གྱི་ལས་གཞི། རྒྱ་ནག་དང་ཡུ་རོབ་ཀྱི་འབྲེལ་ལམ། ཤེས་རིག་དང་དེང་རབས་འཕྲུལ་ལས་ཚུད་པའི་གཉིས་ཕན་གྱི་ལས་ཀ་བྱ་རྒྱུའི་ཐད་གྲོས་མོལ་བྱས་ཡོད་པ་མ་ཟད། རྒྱ་ནག་གིས་ཨེ་རི་ལེན་ཌི་དང་གླང་ཤ་འཚོང་འགྲེམས་ཀྱི་ཚོང་ལམ་སླར་ཡང་ཕྱེ་ནས། ཕྱོགས་གཉིས་ཀྱི་གླང་ཤའི་ཚོང་འབྲེལ་གང་མགྱོགས་སླར་གསོ་བྱ་རྒྱུ་ཡིན་པའི་མོས་མཐུན་བྱུང་ཡོད་འདུག
ཨེ་རི་ལེན་ཌི་ནི་ལི་ཆང་སྲིད་བློན་དུ་བསྐོས་རྗེས། ཡུ་རོབ་ཏུ་སྐོར་སྐྱོད་བྱ་སའི་རྒྱལ་ཁབ་གསུམ་པ་དེ་ཆགས་འདུག་ལ། དེ་ནི་ཕྱི་ལོ་ ༢༠༡༥ རྗེས་རྒྱ་ནག་གི་ཆེས་མཐོའི་དཔོན་རིགས་ཤིག་རྒྱལ་ཁབ་དེར་ཡོང་བ་ཐོག་མའང་ཆགས་ཡོད་འདུག ཐེངས་འདིར་རྒྱལ་ཁབ་གཉིས་ཀྱི་ཆེས་མཐོའི་དཔོན་རིགས་ཐུག་ཕྲད་བྱས་པ་བརྒྱུད། རྒྱ་ནག་གཞུང་གིས་རྒྱ་ནག་དང་ཡུ་རོབ་ཀྱི་མཉམ་སྤྱོད་ཀྱི་ཚོང་དོན་འབྲེལ་ལམ་ཟེར་བ་གོང་མཐོར་དང་། ཡུ་རོབ་རྒྱལ་ཁབ་ཁག་ཏུ་སྔར་ལས་ལྷག་པའི་འབྲེལ་ལམ་སྲ་བརྟན་བཙུགས་ནས། ཚོང་དོན་ཚུད་པའི་ལས་དོན་འཕེལ་རྒྱས་གཏང་རྒྱུར་མཉམ་ལས་བྱ་རྒྱུ་ཡིན་སྐོར་བསྒྲགས་འདུག
རྒྱ་ནག་གི་སྲིད་བློན་ལི་ཆང་རྒྱ་ནག་དང་སུད་སི་གཉིས་ཀྱི་ཚོང་འབྲེལ་གྲོས་ཆོད་རྒྱུན་སྐྱོང་དང་། ཕྱོགས་གཉིས་ཀྱི་ཚོང་དོན་གྱི་ནུས་པ་ཡར་སྐྱེད་ཡོང་ཐབས་སོགས་གཙོ་བོར་དམིགས་ནས་ཡུ་རོབ་ཁུལ་དུ་སྐོར་སྐྱོད་ལ་ཡོང་བ་ཞིག་ཡིན་པ་མ་ཟད། འདས་པའི་ལོ་ཤས་རིང་རྒྱ་ནག་ནང་དཔལ་འབྱོར་ཉམས་རྒུད་ཆེན་པོ་འགྲོ་མུས་ཡིན་སྟབས། རྒྱ་ནག་གིས་སླར་ཡང་ཡུ་རོབ་དང་ཚོང་འབྲེལ་ཇེ་ཆེར་གཏོང་ཐབས་བྱེད་ཀྱི་ཡོད་ཀྱང་། གནད་དོན་དབྱེ་ཞིབ་པ་ཁག་ཅིག་གིས། ཡུ་རོབ་རྒྱལ་ཁབ་ཁག་གིས་རྒྱ་ནག་གི་ཚོང་དོན་གྱི་ནུས་པ་ཇེ་ཆུང་དུ་གཏོང་སླད། རྒྱ་ནག་དང་ཚོང་གི་འབྲེལ་ལམ་ཉུང་དུ་གཏོང་ཉེན་ཡོད་པའི་ཚོད་དཔག་བྱེད་ཀྱི་འདུག
འདས་པའི་ལོ་ལྔ་ཙམ་རིང་རྒྱ་ནག་ནི་ཨེ་རི་ལེན་ཌི་རྒྱལ་ཁབ་ཀྱི་ཚོང་ཤག་ཆེ་ཤོས་བཞི་པ་དང་། ཅ་དངོས་ཚོང་འགྲེམས་བྱེད་མཁན་ཆེ་ཤོས་ལྔ་པ་དེ་ཡིན་འདུག་ལ། ཕྱོགས་གཉིས་ཀྱི་ཚོང་དོན་མཉམ་འབྲེལ་འོག་རྒྱ་ནག་གིས་རྒྱལ་ཁབ་དེས་ཡུལ་སྐོར་བ་རྣམས་ལ་ཐོངས་མཆན་རིན་མེད་སྤྲོད་ཀྱིན་ཡོད་པའི་ཁར། ཕྱི་ལོ་༢༠༡༩ ལོར་རྒྱལ་ཁབ་གཉིས་ཀྱི་ཕྱི་འབྲེལ་བཙུགས་ནས་མི་ལོ ༤༠ འཁོར་བའི་དུས་དྲན་སྲུང་གཙི་ཡང་བྱས་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
