རྒྱ་གཞུང་གིས་བོད་ཁྲི་འདུ་རྫོང་ཁོངས་ཀྱི་སྡོམ་མདའ་ཞང་རྫ་དམར་སྡེ་བའི་ཁྲ་ཁའི་འཛམ་གླིང་ལ་རྒྱུད་དུ་གཏེར་ཁ་སྔོག་འདོན་བྱས་ནས་ཟླ་དྲུག་ལྷག་ཕྱིན་འདུག
རྒྱ་ནག་གཞུང་གིས་དབྱེ་འགོས་བྱས་པའི་མཚོ་སྔོན་ཞིང་ཆེན་ཡུལ་ཤུལ་ཁུལ་ཁྲི་འདུ་རྫོང་ཁོངས་ཀྱི་སྡོམ་མདའ་ཞང་རྫ་དམར་སྡེ་བའི་ཁྲ་ཁའི་འཛམ་གླིང་ལ་རྒྱུད་དུ་རྒྱ་ནག་གཞུང་གི་གཏེར་འདོན་ཚོང་གཉེར་ཁང་(中国能源建设股份有限公司) ཟེར་བས་གཏེར་ཁ་སྔོག་འདོན་བྱས་ཏེ་ཟླ་དྲུག་ལྷག་ཕྱིན་ཡོད་འདུག
འདི་གའི་གསར་འགོད་པར་བོད་ནང་གི་བོད་མི་ཞིག་གིས། གཏེར་ཁ་སྔོག་འདོན་བྱེད་ཡུལ་ཁྲ་ཁའི་འཛམ་གླིང་ལ་ནི་རྫ་དམར་སྡེ་བའི་ས་གནས་འབྲོག་མི་སྐལ་རྣམ་གྱི་དབྱར་འཚེར་དུ་ཁེལ་ཡོད་པ་དང་། སྐལ་རྣམ་ཚང་གིས་གཏེར་ཁ་སྔོག་འདོན་གྱི་ལས་གཞི་དེ་ཕྱིར་འཐེན་བྱེད་དགོས་པའི་རེ་ཞུ་ཡང་ཡང་བྱས་ཀྱང་། གཏེར་འདོན་ཚན་པ་དེ་དང་གཞུང་ལམ་གསར་བཟོ་ལས་ཁུངས་གཉིས་ཀྱིས་སྲིད་གཞུང་བར་ལག་འབྲེལ་བྱས་ཡོད་སྟབས། ཁོང་གིས་ཞུ་གཏུག་ལ་དོན་འབྲས་མ་སོན་པར་ལས་གཞི་དངོས་སུ་མགོ་འཛུགས་བྱས་ཡོད་པ་དང་། ཁྲ་ཁའི་འཛམ་གླིང་ལ་ནས་རྡོ་ནག་གི་གཏེར་ཁ་སྔོག་འདོན་བྱེད་ཀྱི་ཡོད་སྐོར་སོགས་བརྗོད་བྱུང་ལ། ད་ལྟ་རྒྱ་ནག་གིས་ཁྲ་ཁའི་འཛམ་གླིང་ལ་ལ་(བ་ཡན་ལ་ཁྲ)ཞེས་རྒྱ་ཡིག་ནང་བསྒྱུར་ཡོད་འདུག
གནས་ཚུལ་མཁོ་སྤྲོད་པས་འགྲེལ་བརྗོད་གནང་བ་ལྟར་ན། ཕྱི་ལོ་ ༢༠༢༣ ཟླ་ ༣ ནང་རྫ་དམར་སྡེ་བའི་ཉེ་འཁྲིས་སྤྱི་ལེ་ ༡༧ མཚམས་ཀྱི་གཞུང་ལམ་ལ་གས་སྐྱོན་བྱུང་སྟབས། རྒྱ་ནག་གི་གཞུང་ལམ་འཛུགས་སྐྲུན་བཟོ་གྲྭས། གཞུང་ལམ་ཨང་(G214)ཞེས་པ་དེར་བཟོ་བཅོས་བྱེད་མགོ་བརྩམས་པ་དང་། གཞུང་ལམ་བཟོ་བཅོས་དེའི་ཆེད་ས་དང་བྱེ་རྡོ་སོགས་རྫ་དམར་སུམ་མདོ་ནས་སྔོག་འདོན་བྱས་ཏེ་འབོར་འདྲེན་བྱེད་སྐབས། རྡོ་ནག་མང་པོ་ཐོན་པ་ལ་བརྟེན་ནས། རྫ་དམར་སྡེ་བའི་ཁྲ་ཁའི་འཛམ་གླིང་ལ་རྒྱུད་དུ་རྡོག་ནག་གི་གཏེར་ཁ་ཡོད་པ་ཤེས་རྟོགས་བྱུང་བ་ཞིག་ཡིན་འདུག
དེ་རྗེས་རྒྱ་ནག་གི་གཏེར་འདོན་ཚོང་གཉེར་ཁང་(中国能源建设股份有限公司ཟེར་བ་ཞིག་གིས། འདས་པའི་དྲུག་ལྷག་གི་རིང་ས་ཁུལ་དེར་གཏེར་ཁ་སྔོག་འདོན་བྱས་ཡོད་པ་དང་ད་ལྟའི་ཆར་བོད་དུ་གནམ་གཤིས་གྲང་མོ་ཡོད་པ་ལ་བརྟེན་ནས་རྡོ་ནག་གི་གཏེར་ཁ་སྔོག་འདོན་དེ་གནས་སྐབས་མཚམས་འཇོག་བྱས་ཡོད་པ་དང་། གནས་ཚུལ་མཁོ་སྤྲོད་པས་དཔྱིད་མགོ་ཚུགས་པ་དང་རྒྱ་ནག་གིས་མུ་མཐུད་རྫ་དམར་སྡེ་བའི་ཁུལ་དུ་རྡོ་ནག་གི་གཏེར་ཁ་སྔོག་འདོན་གཏན་གཏན་བྱ་རྒྱུ་ཡིན་པ་དང་། རྒྱ་ནག་གི་གཏེར་འདོན་ཚན་པ་དེ་འདྲ་དེང་སང་བོད་ཀྱི་ས་གནས་གང་སར་ཡོད་པ་མ་ཟད། ཁོ་ཚོར་སྲིད་གཞུང་གི་མགོ་འཁྲིད་ཚོས་ཅི་གང་ཡང་མི་བརྗོད་པར་འཇོག་གི་ཡོད་པས། ག་ལེར་བོད་ས་ཡོངས་ཕྱེ་ཐང་ཆེན་པོ་ཞིག་དུ་འགྱུར་རྒྱུ་རེད་ཟེར་ནས་སེམས་ཁྲལ་ཆེན་པོ་བྱེད་བཞིན་འདུག
