དེ་རིང་གངས་ཅན་སྐྱིད་གཤོངས་ཀྱི་སྲི་བཟློག་མཆོད་རྟེན་གྱི་མདུན་ཐང་དུ། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་ལྷན་འཛོམས་ཐོག་རྒྱ་གར་སྤྱི་མཐུན་རྒྱལ་ཁབ་དབུ་བརྙེས་པའི་དམངས་གཙོའི་དུས་དྲན་ ༧༥ པ་གཞུང་འབྲེལ་སྲུང་གཙི་གནང་སོང་།
ལོ་ལྟར་ཕྱི་ཟླ་ ༡ ཚེས་ ༢༦ ཉིན་ནི་རྒྱ་གར་དམངས་གཙོ་ཉིན་མོར་སྲུང་གཙི་བྱེད་བཞིན་ཡོད་པ་ལྟར། དེ་རིང་ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༩ །༣༠ སྟེང་གངས་སྐྱིད་སྲི་བཟློག་མཆོད་རྟེན་གྱི་མདུན་ཐང་དུ། བོད་མིའི་སྒྲིག་འཛུགས་ཀྱི་སྲིད་ཚབ་ཤེས་རིག་བཀའ་བློན་ཐར་ལམ་སྒྲོལ་མ་མཆོག་གི་དབུས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ལྷན་ཁང་ཁག་གི་དྲུང་འཕར་དང་དྲུང་ཆེ་རྣམ་པ། བཀའ་དྲུང་ཡིག་ཚང་གི་སྲི་ཞུ་ལས་བྱེད་བཅས་ལྷན་འཛོམས་ཀྱིས། རྒྱ་གར་གྱི་རྒྱལ་གླུ་གྱེར་འདོན་དང་སྲིད་ཚབ་མཆོག་གིས་རྒྱ་གར་གྱི་རྒྱལ་དར་བསྒྲེངས་འཛུགས་གནང་སྟེ། རྒྱ་གར་གྱི་དམངས་གཙོ་དབུ་བརྙེས་ཏེ་མི་ལོ་ ༧༥ འཁོར་བའི་དུས་དྲན་ཉིན་མོ་སྲུང་གཙི་གནང་སོང་།
སྐབས་དེར་སྲིད་ཚབ་ཤེས་རིག་བཀའ་བློན་ཐར་ལམ་སྒྲོལ་མ་མཆོག་གིས། དེ་རིང་རྒྱ་གར་གྱི་དམངས་གཙོ་དུས་དྲན་ཐེངས་ ༧༥ སྲུང་གཙི་བྱེད་པའི་ཉིན་མོར་འདིར། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་བྱས་ཏེ། སྙིང་ཐག་པ་ནས་དགའ་བསུ་དང་བཀྲ་ཤིས་བདེ་ལེགས་ཞུ་རྒྱུ་ཡིན། རྒྱ་གར་གཞུང་མང་གཉིས་ནི་བཙན་བྱོལ་བོད་མི་རྣམས་ཧ་ཅང་བཀའ་དྲིན་ཆེན་པོ་རེད། བཀའ་དྲིན་ཆེན་པོ་ཡིན་པ་བོད་མིའི་སེམས་སུ་ཚོར་བ་ཤུགས་ཆེན་ཡིན་པ་དང་། བཀའ་དྲིན་ནམ་ཡང་བརྗེད་རྒྱུ་མེད་པ་དེ་ཡིན།ཞེས་གསུངས་སོང་།
རྒྱ་གར་སྤྱི་མཐུན་རྒྱལ་ཁབ་དབུ་བརྙེས་པའི་དུས་དྲན་དང་འབྲེལ་བོད་ཀྱི་དམངས་གཙོའི་སྐོར་ལ་སྲིད་ཚབ་མཆོག་གིས།
ཕྱི་ལོ་ ༡༩༥༠ ཟླ་ ༡ ཚེས་ ༢༦ ཉིན་ནས་བཟུང་རྒྱ་གར་དམངས་གཙོའི་ཉིན་མོ་སྲུང་གཙི་མགོ་ཚུགས་པ་རེད། དམངས་གཙོའི་ལམ་ལུགས་ནང་དུ་ཡག་ཤོས་ཤིག་ནི་མི་མང་ཚང་མར་ལས་འགན་དང་ཐོབ་ཐང་གཅིག་པ་ཡོད། ཐོབ་ཐང་ཡོད་པ་བཞིན་དུ་ལས་འགན་སྒྲུབ་དགོས་པའང་ཧ་ཅང་གལ་གནད་ཆེན་པོ་རེད། བོད་མི་རྣམས་རྒྱ་གར་དུ་སྐྱབས་བཅོལ་ལ་འབྱོར་བ་དང་།༧གོང་ས་རྒྱལ་བ་རིན་པོ་ཆེ་མཆོག་གིས་དམངས་གཙོའི་ལམ་ལུགས་གསོལ་རས་གནང་བ་རེད། འཛམ་གླིང་གི་ལོ་རྒྱུས་གང་དུ་བལྟས་ཀྱང་དམངས་གཙོའི་ལམ་ལུགས་ཐོབ་ཆེད་མི་མང་གི་དཀའ་ངལ་དང་འཐབ་རྩོད་མང་པོ་བྱས་ཡོད་པ་རེད། བོད་ཀྱི་ལོ་རྒྱུས་ལ་ཕྱིར་བལྟས་བྱས་ཚེ། ཕྱི་ལོ་ ༡༩༦༠ ལོ་ནས་བཟུང་བོད་ཀྱི་དམངས་གཙོའི་ལམ་ལུགས་ཀྱང་ཕྲུ་གུ་ཆུང་ཆུང་བཞིན་དུ། དང་པོ་གོམ་པ་རྒྱག་སྟངས་དང་། དེ་ནས་རྒྱུག་ཤར་བྱེད་སྟངས་སོགས་ཀྱི་ཐོག་༧གོང་ས་རྒྱལ་བ་རིན་པོ་མཆོག་གི་དབུས། སྐབས་དེའི་སྲི་ཞུ་བ་རྣམས་ཀྱིས་སྐུ་ངལ་མང་པོ་བསྐྱོན་པར་བརྟེན། ད་ལྟ་ང་ཚོའི་དམངས་གཙོའི་ལམ་ལུགས་ཚད་ལྡན་ཆགས་ཡོད་ལབ་ཚེ་མ་འགྲིག་པ་གང་ཡང་མེད། དམངས་གཙོའི་ལམ་ལུགས་ནང་དུ་ཐོབ་ཐང་ལེན་པ་དང་ལས་འགན་འཁུར་མ་ཤེས་ཚེ་ཏག་ཏག་ཅིག་ཁྱོན་ནས་བསྡད་ཀྱི་མེད་པ་རེད། བོད་པ་མི་རེ་ངོ་རེ་ནས་ལས་འགན་འཁུར་བ་ཡིན་ཚེ། ༧གོང་ས་མཆོག་ནས་གསོལ་རས་གནང་བའི་དམངས་གཙོའི་ལམ་ལུགས་ཀྱི་སྒྲོམ་གཞི་ཚད་ལྡན་ཞིག་ཡོང་གི་རེད། ཅེས་གསུངས་སོང་།
ཕྱི་ལོ་ ༡༩༤༧ ལོར་དབྱིན་ཇིའི་འོག་ནས་རྒྱ་གར་ལ་རང་བཙན་ཐོབ་སྟེ། ཕྱི་ལོ་ ༡༩༤༩ ལོའི་ཟླ་ ༡ ཚེས་ ༢༦ ཉིན་དམངས་གཙོའི་ལམ་ལུགས་ཀྱི་རྩ་ཁྲིམས་གཏན་འབེབ་དང་། ཕྱི་ལོ་ ༡༩༥༠ ལོའི་ཟླ་ ༡ ཚེས་ ༢༦ ཉིན་དངོས་སུ་ལག་བསྟར་བྱས་པ་ནས་བཟུང་། ལོ་ལྟར་ཕྱི་ཟླ་ ༡ ཚེས་ ༢༦ ཉིན་རྒྱ་གར་གྱིས་གཞུང་འབྲེལ་ཐོག་དམངས་གཙོ་དབུ་བརྙེས་པའི་ཉིན་མོར་སྲུང་གཙི་གནང་གི་ཡོད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
