སྲིད་སྐྱོང་སྤེན་པ་ཚེ་རིང་མཆོག་གིས་ལཱ་ཏ་ཝི་ཡའི་རྒྱལ་ཡོངས་རླུང་འཕྲིན་ཁང་སོགས་ཀྱི་བཅར་འདྲི་ཆེད་ཕེབས་དང་རྒྱལ་ཁབ་དེའི་བོད་དོན་རྒྱབ་སྐྱོར་ཚོགས་པའི་ཚོགས་མི་གཙོས་གནད་ཡོད་མི་སྣ་སོགས་ལ་མཇལ་འཕྲད་གནང་དང་གནས་མུས་ཡིན་འདུག
ཟླ་འདིའི་ཕྱི་ཚེས་ ༢༢ ཉིན་ཕྱི་ཟླ་ ༢ པའི་ནང་བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྦལ་ཌིག་(Baltic States) རྒྱལ་ཁབ་གསུམ་དང་། ཧྥིན་ལེན་ཌི། དབྱིན་ཡུལ། སྦེལ་ཇམ་སོགས་སུ་གཞུང་འབྲེལ་སྐོར་སྐྱོད་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢༨ ཉིན་སྲིད་སྐྱོང་སྤེན་པ་ཚེ་རིང་མཆོག་ཡུ་རོབ་རྒྱལ་ཁབ་ལཱ་ཏ་ཝི་ཡའི་རི་ག་རུ་ཕེབས་འབྱོར་བྱུང་ཡོད་པ་དང་། གནམ་ཐང་དུ་ལཱ་ཏ་ཝི་ཡ་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Janis Marin Skuja ལགས་སོགས་ཕེབས་བསུར་བཅར་ཡོད་འདུག
ཟླ་འདིའི་ཕྱི་ཚེས་ ༢༩ ཉིན་སྲིད་སྐྱོང་སྤེན་པ་ཚེ་རིང་མཆོག་ནས་ཡུལ་དེའི་རྒྱལ་ཡོངས་རླུང་འཕྲིན་ཁང་གཙོས་གསར་ཁང་ཁག་ཅིག་གི་བཅར་འདྲི་ཞུས་ཡོད་པ་མ་ཟད། ཉིན་དེར་ཡུལ་དེའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་ཡོད་འདུག
སྲིད་སྐྱོང་མཆོག་གིས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་མཇལ་འཕྲད་གནང་སྐབས། རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་སོགས་ལ་རྡོག་རོལ་ཚབས་ཆེན་གཏོང་མུས་ཡིན་པའི་སྐོར་དང་། མ་འོངས་པར་ལཱ་ཏ་ཝི་ཡ་རྒྱལ་ཁབ་ཀྱིས་བོད་དོན་ཐད་རྒྱབ་སྐྱོར་གནང་ཐབས་སོགས་ཀྱི་ཐད་ལ་གླེང་སློང་གནང་ཡོད་པ་མ་ཟད། འདི་ལོའི་མཉམ་འབྲེལ་རྒྱལ་ཚོགས་རྒྱ་ནག་གི་འགྲོ་བ་མིའི་ཐོབ་ཐང་ཐད་ཐད་ཀྱི་དུས་བཀག་བསྐྱར་ཞིབ་ཁྲོད། རྒྱལ་ཁབ་དེས་བོད་ནང་གི་འགྲོ་བ་མིའི་ཐོང་ཐང་གི་གནས་བབ་དང་འབྲེལ་བའི་བོད་ནང་གི་དངོས་ཡོད་ཀྱི་གནས་སྟངས་ཐད་རྒྱབ་སྐྱོར་དང་རྒྱ་ནག་གཞུང་ལ་སྐྱོན་བརྗོད་བསྒྲགས་གཏམ་མ་སྤེལ་བར་བློ་ཕམ་ཡོད་སྐོར་སོགས་གསུངས་འདུག་ལ། སྲིད་སྐྱོང་མཆོག་བོད་ཀྱི་དཔའ་བོ་ (Tibetan Warrior) ཞེས་པའི་གློག་བརྙན་ཞིག་གཟིགས་འབུལ་ཞུས་པའང་མཉམ་ཞུགས་གནང་ཡོད་འདུག
ཟླ་འདིའི་ཕྱི་ཚེས་ ༢༨ ཉིན་ཡུལ་དེའི་རྒྱལ་སའི་ནང་རྒྱལ་ཁྲིམས་དང་། བཟང་སྤྱོད། ཚུལ་ཁྲིམས་ཞེས་པའི་བགྲོ་གླེང་དུ་ལྷན་ཞུགས་གནང་ཏེ། བོད་དོན་སྐོར་ལ་གསུང་བཤད་གནང་བ་དང་འབྲེལ། རྒྱལ་ཁབ་དེས་བོད་དོན་ལ་རྒྱབ་སྐྱོར་གནང་ཐབས་དང་། བོད་མིའི་སྒྲིག་འཛུགས་སོགས་ཀྱི་སྐོར་ལ་ངོ་སྤྲོད་གནང་ཡོད་པ་མ་ཟད། གསར་འགོད་པ་རྣམས་ཀྱི་དྲི་བར་ལན་འདེབས་སོགས་གནང་ཡོད་འདུག
ཟླ་འདིའི་ཕྱི་ཚེས་ ༢༦ ཉིན་སྲིད་སྐྱོང་སྤེན་པ་ཚེ་རིང་མཆོག་ཧྥིན་ལེན་ཌིའི་རྒྱལ་ས་ཧེལ་སིན་ཀི་རུ་ཕེབས་ཏེ་ཡུལ་དེའི་གཞུང་འབྲེལ་གནད་ཡོད་མི་སྣ་དང་། གྲོས་ཚོགས་འཐུས་མི་ལྕམ་ཨིན་ཀ་ (Inka Hopsu ) ལགས་དང་། གྲོས་ཚོགས་འཐུས་མི་ལྕམ་མཱ་རི་ཡ་(Maria Ohisalo ) ལགས་ཀྱི་གཙོས་ཚོགས་སྡེ་དང་འགྲོ་བ་མིའི་ཐོབ་ཐང་ཐད་ལས་ཀ་གཉེར་མཁན་དང་ཉམས་ཞིབ་པ་སོགས་སུ་མཇལ་མོལ་གནང་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
