རྒྱ་ནག་རྒྱལ་ཡོངས་སྐབས་བཅུ་བཞི་པའི་དགུན་དུས་ལུས་རྩལ་འགྲན་བསྡུར་ཁྲོད་བོད་ཀྱི་ལུས་རྩལ་པ་བཀྲ་ཤིས་བསྟན་སྒྲོལ་དང་ཀུན་བཟང་རྣམ་རྒྱལ། གཡུ་སྒྲོན་ལྷ་མོ་གསུམ་ལ་གསེར་གྱི་གཟེངས་རྟགས་ཐོབ་ཡོད་པ་དང་། བོད་ཀྱི་ལུས་རྩལ་པ་ཚེ་བརྟན་གཡུ་སྒྲོན་ལ་དངུལ་གྱི་གཟེངས་རྟགས་ཐོབ་ཡོད་འདུག
ཕྱི་ཟླ་ ༡ ཚེས་ ༣༠ ནས་ཕྱི་ཟླ་ ༢ ཚེས་ ༡ བར་ལྷོ་སོག་གི་ལུང་ཧྲན་རི་བོ་རུ། རྒྱ་ནག་རྒྱལ་ཡོངས་སྐབས་བཅུ་བཞི་པའི་དགུན་དུས་ལུས་རྩལ་འགྲན་ཚོགས་ཀྱི་གངས་ཤུད་རི་འཛེགས་ཀྱི་འགྲན་བསྡུར་ཁག་བྱས་ཡོད་ཅིང་། སྐབས་དེའི་འགྲན་བསྡུར་ནང་བོད་ཀྱི་ལུས་རྩལ་པ་བཀྲ་ཤིས་བསྟན་སྒྲོལ་དང་ཀུན་བཟང་རྣམ་རྒྱལ། གཡུ་སྒྲོན་ལྷ་མོ་གསུམ་ལ་གསེར་གྱི་གཟེངས་རྟགས་ཐོབ་ཡོད་པ་དང་། བོད་ཀྱི་ལུས་རྩལ་པ་ཚེ་བརྟན་གཡུ་སྒྲོན་ལ་དངུལ་གྱི་གཟེངས་རྟགས་ཐོབ་ཡོད་འདུག
དགུན་དུས་ལུས་རྩལ་འགྲན་ཚོགས་ཀྱི་ཕོ་མོ་མཉམ་བསྲེས་ཀྱི་རྟིང་རྩོད་གངས་ཤུད་འགྲན་བསྡུར་ནང་རུ་ཁག་ ༨ འགྲན་ཞུགས་བྱས་ཡོད་ཅིང་། བོད་རང་སྐྱོང་ལྗོངས་ཀྱི་ཚོགས་ཆུང་ཟེར་བའི་རྩེད་འགྲན་པ་གསུམ་འགྲན་ཞུགས་བྱས་ཡོད་པའི་ནང་། བོད་ཀྱི་ལུས་རྩལ་པ་བཀྲ་ཤིས་བསྟན་སྒྲོལ་དང་། ཀུན་བཟང་རྣམ་རྒྱལ་གཉིས་ལ་གསེར་གྱི་རྟགས་མ་ཐོབ་པ་དང་། ཚེ་བརྟན་གཡུ་སྒྲོན་ལ་དངུལ་གྱི་རྟགས་མ་ཐོབ་ཡོད་འདུག
སྐབས་དེར་བོད་ཀྱི་ལུས་རྩལ་པ་ཀུན་བཟང་རྣམ་རྒྱལ་གྱིས། ངའི་དེ་རིང་གི་འགྲན་ཞུགས་ཚོར་སྣང་ཧ་ཅང་ཡག་པོ་འདུག་ལ། རུ་མི་ཚོས་ཀྱང་ང་ལ་གཞོགས་འདེགས་ཡག་པོ་གནང་བྱུང་། བྱ་དགའ་ཨང་དང་པོ་ཐོབ་དུས། སེམས་པ་ཧ་ཅང་སྐྱིད་པོ་བྱུང་། ཕྱིས་སུ་ད་དུང་འགྲན་བསྡུར་མང་པོ་ཞིག་ཡོད་པས། ཡུལ་དུ་ལོག་རྗེས་མུ་མཐུད་འབད་བརྩོན་བྱས་ནས། འགྲན་བསྡུར་ཚང་མར་གྲ་སྒྲིག་ཡག་པོ་བྱ་རྒྱུ་ཡིན་ཞེས་བརྗོད་འདུག བོད་ཀྱི་ལུས་རྩལ་པ་ཚེ་བརྟན་གཡུ་སྒྲོན་གྱིས། ང་ཧ་ཅང་དགའ་པོ་བྱུང་། ང་ཚོ་བོད་ལྗོངས་རུ་ཁག་ལ་གྲུབ་འབྲས་ཡག་པོ་ཐོབ་ཡོད། ངས་མུ་མཐུད་དུ་འབད་བརྩོན་བྱས་ཏེ་ཐེངས་རྗེས་མར་ཡང་གྲུབ་འབྲས་ཡག་པོ་ཐོབ་ཐུབ་པ་བྱ་རྒྱུ་ཡིན་ཞེས་བརྗོད་འདུག
བཀྲ་ཤིས་བསྟན་སྒྲོལ་ནི་ཐེངས་འདིར་བོད་ཀྱི་གངས་ཤུད་ལུས་རྩལ་པའི་ཁྲོད་མི་སྒེར་གྱི་རྟིང་རྩོད་གངས་ཤུད་འགྲན་རྒྱུག་དང་ཕོ་མོ་མཉམ་བསྲེས་ཀྱི་བསྟར་རྒྱུག་གངས་ཤུད་འགྲན་རྒྱུག་ནང་འགྲན་ཞུགས་བྱེད་མཁན་གཅིག་པུ་དེ་ཡིན་པ་མ་ཟད། ཕོ་མོ་མཉམ་བསྲེས་ཀྱི་འགྲན་བསྡུར་ནང་གསེར་གྱི་རྟགས་མ་ཐོབ་ཡོད་འདུག བཀྲ་ཤིས་བསྟན་སྒྲོལ་གྱིས། དེ་རིང་ཨང་དང་པོ་ཐོབ་པས་སེམས་པ་ཧ་ཅང་སྐྱིད་པོ་བྱུང་། ཁ་སང་མཐའ་བསྡུར་ནང་མ་ཚུད་པའི་དབང་གིས་བློ་ཕམ་ཆེན་པོ་སྐྱེས་བྱུང་། དེ་རིང་ངས་གོ་སྐབས་དམ་འཛིན་བྱས་ཏེ་བརྒྱུད་རིམ་ཧྲིལ་པོར་ནུས་ཤུགས་ཡོད་རྒུ་བཏོན་པ་ཡིན་ཞེས་བརྗོད་འདུག
དེ་བཞིན་བུད་མེད་ཀྱི་རྒྱང་ཐག་ཐུང་བའི་རྟིང་རྩོད་གངས་ཤུད་འགྲན་བསྡུར་ཁྲོད་བོད་ཀྱི་ལུས་རྩལ་པ་གཡུ་སྒྲོན་ལྷ་མོས་སྐར་མ་ ༣ དང་སྐར་ཆ་ ༩ ། གྲངས་ཆུང་ ༨ ཀྱི་གྲུབ་འབྲས་བླངས་ཏེ། ཐེངས་འདིའི་དགུན་དུས་གངས་ཤུད་འགྲན་བསྡུར་ནང་གསེར་གྱི་རྟགས་མ་ཐོབ་ཡོད་འདུག འདས་ལོའི་ཕྱི་ཟླ་ ༡༡ ནང་སི་པན་རྒྱལ་ཁབ་ཏུ་འཚོགས་པའི་འཛམ་གླིང་གངས་ཤུད་གཟེངས་རྟགས་འགྲན་བསྡུར་ཁྲོད། བོད་ཀྱི་ལུས་རྩལ་བ་གཡུ་སྒྲོན་ལྷ་མོར་བུད་མེད་ཀྱི་རྒྱང་ཐག་ཐུང་བའི་གསེར་གྱི་རྟགས་མའང་ཐོབ་ཡོད་འདུག
འདི་ལོའི་ཕྱི་ཟླ་ ༢ ཚེས་ ༡༧ ནས་ཉིན་བཅུའི་རིང་ལྷོ་སོག་ཏུ། རྒྱ་ནག་རྒྱལ་ཡོངས་དགུན་དུས་ལུས་རྩལ་འགྲན་ཚོགས་ཀྱི་གངས་ཤུད་འགྲན་བསྡུར་གྱི་རྩལ་རིགས་ཁག་ཅིག་འགྲན་བསྡུར་བྱེད་ཀྱི་ཡོད་པའི་ནང་། རྒྱ་ནག་རྒྱལ་ཡོངས་ནས་གངས་ཤུད་ལུས་རྩལ་པ་ ༣༣ འགྲན་ཞུགས་བྱེད་ཀྱི་ཡོད་པ་དང་། དེའི་ཁྲོད་ཀྱི་ལུས་རྩལ་པ་ ༡༡ བོད་དང་ཡུ་གུར་ནས་ཡོང་བའི་འགྲན་ཞུགས་པ་ཡིན་འདུག
གསར་འགོད་པ། བྱམས་པ་ཚེ་རིང་།
