བོད་རྒྱལ་ལོ་ ༢༡༥༠ ལོར་ས་གནས་གཞན་དུ་ཆིབས་བསྒྱུར་བསྐྱངས་ཏེ་ཆོས་འབྲེལ་མཛད་པ།

ལ་དྭགས་སུ་་དུས་ཡུན་ཉིན་གྲངས་ ༤༥ རིང་ཆོས་འབྲེལ་རྒྱ་ཆེན་བསྐྱངས།

ཕྱི་ལོ་ ༢༠༢༣ ཟླ་ ༧ ཚེས་ ༡༡ ཉིན་གྱི་ཆུ་ཚོད་  ༩ ཙམ་ལ་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་ཆུ་ཚོད་ ༡༠ །༣༠ ཡོལ་ནས་ལ་དྭགས་སུ་ཞབས་སོར་བདེ་བར་བཀོད་ཡོད་པ་དང་། སྐབས་དེར་༧གོང་ས་མཆོག་ནས་ཁྱོད་ཚོས་ང་མཐོང་ན་དགའ་བོ་ཡོད་པ་རེད། ངོས་ལ་ཆ་བཞག་ནའང་ཁྱོད་ཚོ་སེར་སྐྱ་ཚང་མས་དགའ་དད་སྤྲོ་གསུམ་ཤུགས་ཆེན་པོ་བྱེད་ཀྱི་འདུག་པས་འདིར་ཡོང་ནས་ཡུལ་མི་ཚོ་དང་དགེ་འདུན་པ་ཚོར་ཐུག་ན་ཧ་ཅང་དགའ་བོ་འདུག ཅེས་སོགས་བཀའ་སློབ་གནང་སོང་། ཕྱི་ཟླ་ ༧ ཚེས་ ༡༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་ཞི་བའི་ཚལ་ཕོ་བྲང་ནས་ལ་དྭགས་ཀྱི་རྒྱལ་ས་གླེའི་ཇོ་ཁང་དུ་ཆིབས་བསྒྱུར་གྱིས་ཇོ་བོ་ཐུགས་རྗེ་ཅན་གྱི་སྐུ་མདུན་དུ་ཐུགས་སྨོན་མཛད། ཕྱི་ཟླ་ ༧ ཚེས་ ༢༡ ཉིན་ནས་ཉིན་གསུམ་རིང་ལ་དྭགས་གླེའི་ཞི་བའི་ཚལ་གསུང་ཆོས་ར་བ་རུ། དད་ལྡན་མང་ཚོགས་ཁྲི་ཕྲག་འགར་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་བཀའ་ཆོས་དང་ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་བྱ་རྒྱུད་ལུགས་ཀྱི་བཀའ་དབང་བསྩལ། ཕྱི་ཟླ་ ༧ ཚེས་ ༢༤ ཉིན་ལ་དྭགས་ནང་པའི་ཚོགས་འདུ་དང་ལ་དྭགས་དགོན་པའི་ཚོགས་འདུ་གཙོས། ལ་དྭགས་སུ་གནས་སྡོད་བོད་མི་དང་དད་ལྡན་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས། ཕྱི་ཟླ་ ༧ ཚེས་ ༢༦ ཉིན་ལ་དྭགས་བོད་ཕྲུག་ཁྱིམ་སྡེའི་ཐང་ཆེན་དུ། ལ་དྭགས་བོད་རིགས་རྣམས་ལ་དམིགས་བསལ་བཀའ་སློབ་གནང་སྐབས། བོད་པའི་སྐད་ཡིག་དེ་གལ་ཆེན་པོ་ཞེ་དྲགས་རེད་འདུག དེ་རིང་ཁ་སང་ནང་པའི་ལྟ་གྲུབ་ཀྱི་ཐོག་ལ་འགྲེལ་བཤད་རྒྱག་པའི་སྐད་ཡག་ཤོས་དེ་བོད་སྐད་རེད་འདུག བྱས་ཙང་ཁྱེད་རང་ཚོ་སློབ་ཕྲུག་ཚང་མས་དོ་སྣང་བྱོས། ཞེས་བཀའ་སློབ་བསྩལ། དེ་བཞིན་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཚོགས་པའི་འཇམ་དབྱངས་བློ་འཕེལ་སློབ་གྲྭའི་སྐབས་དང་པོའི་མཐར་ཕྱིན་སློབ་མའི་ཤེས་ཡོན་ཉམས་གསོག་གི་དགེ་ལས་སློབ་ཕྲུག་རྣམས་ལ་མཇལ་ཁ་དང་བཀའ་སློབ་བསྩལ། ཕྱི་ཟླ་ ༧ ཚེས་ ༣༡ ཉིན་༸གོང་ས་རྒྱལ་བ་རིན་པོ་ཆེ་མཆོག་ཞི་བའི་ཚལ་གྱི་དུས་འཁོར་སྒྲུབ་མཆོད་ཀྱི་ཚོགས་མགོན་དུ་ཆིབས་བསྒྱུར་བསྐྱངས་བ་དང་།  དབུས་གཙང་ཆོལ་ཁའི་འགན་ལྷན་ཐེངས་བཅུ་དྲུག་པའི་ཚོགས་བཅར་བ་རྣམས་ལ་བཀའ་སློབ། དེ་བཞིན་ལ་དྭགས་ཏོག་ཡུལ་གྱི་སྟོན་པའི་སྐུ་བརྙན་ཆེན་མོར་མཆོད་མཇལ་དང་།  མི་མང་ལ་བཀའ་སློབ་བསྩལ་རྗེས་ཏོག་རྒྱལ་པོ་ཚང་གིས་གདན་ཞུས་ལྟར་ཆིབས་བསྒྱུར་བསྐྱངས་ཡོད་པ་རེད།

ཕྱི་ཟླ་ ༨ ཚེས་ ༡ ཉིན་ལ་དྭགས་གླེ་ཞི་བའི་ཚལ་ཕོ་བྲང་དུ།༸གོང་ས་རྒྱལ་བ་རིན་པོ་ཆེ་མཆོག་ནས་ལྷ་ས་ཁ་ཆེ་རྣམས་ལ་མཇལ་ཁ་དང་བཀའ་སློབ་བསྩལ་ཡོད་ཅིང་། ༧གོང་ས་མཆོག་ནས་ཁོང་སྐུ་ན་ཆུང་དུས་ཁ་ཆེའི་ཕྲུ་གུ་ཆུང་ཆུང་མཉམ་དུ་སྐུ་རྩེད་མང་པོ་གནང་གི་ཡོད་ལ་ལྷ་ས་ཁ་ཆེ་བ་རྣམས་ཀྱིས་བོད་མི་རིགས་ཀྱི་ལ་རྒྱ་དང་ཞེན་ཁོག་སེམས་སུ་བཅངས་ཡོད་པར་བཀའ་དྲིན་ཆེ་ཞེས་གསུངས་འདུག ཕྱི་ཟླ་ ༨ ཚེས་ ༢ ཉིན་ལ་དྭགས་གླེ་ཞི་བའི་ཕོ་བྲང་དུ། ཐའེ་ཝན་གྱི་དད་ལྡན་པ་ཁག་ཅིག་ལ་མཇལ་ཁ་དང་བཀའ་སློབ་བསྩལ། ཕྱི་ཟླ་ ༨ ཚེས་ ༧ ཉིན་ལ་དྭགས་གླེ་ལམ་སྒྲོན་དཔེ་གསར་སློབ་གྲྭའི་ལྔ་བཅུའི་དུས་དྲན་དང་ལམ་སྒྲོན་དབྱར་སྟོན་ཆེན་མོའི་སྐབས། ༧གོང་ས་རྒྱལ་བ་རིན་པོ་ཆེ་མཆོག་གིས་༸གོང་ས་ཏཱ་ལའི་བླ་མ་བཅུ་བཞི་པ་ཆེན་པོའི་རྩེད་ཐང་དང་། ལམ་སྒྲོན་གཞི་རིམ་འོག་མའི་ཀམ་པུ་ཊར་ལས་ཁང་དབུ་འབྱེད། འཇམ་དབྱངས་བསྟོད་པ་གང་བློ་མ། བློ་སྦྱོང་ཚིགས་བརྒྱད་མ་གཉིས་ཀྱི་བཤད་ལུང་བསྩལ། ཕྱི་ཟླ་ ༨ ཚེས་ ༡༠ ཉིན་ལ་དྭགས་ལྕོག་ལམ་སར་ཞི་བའི་ཚལ་ཕོ་བྲང་དུ། ༸གོང་ས་རྒྱལ་བ་རིན་པོ་ཆེ་མཆོག་ནས་ལ་དྭགས་དབུ་སྐྱོང་དང་ཨ་རུ་ན་ཅལ་སཱི་ཤེས་ཡོན་ལྷན་ཚོགས་ཀྱི་ཚོགས་མི་ཁག་ཅིག་ལ་དམིགས་བསལ་མཇལ་ཁ་བསྩལ། ཕྱི་ཟླ་ ༨ ཚེས་ ༡༢ ཉིན་ལ་དྭགས་ཁ་ཆེའི་ཆོས་ལུགས་ཞིས་འ་(Shia)དང་། སུན་ནི་(sunni)ཐུན་མོང་ནས་༧གོང་ས་རྒྱལ་བ་རིན་པོ་ཆེ་མཆོག་གདན་ཞུས་ལྟར། ཆུ་ཞོལ་འོག་མའི་ཨེ་མམ་བྷར་གྷ་(Imam Bargah)ཁ་ཆེའི་ཕྱག་ཁང་དུ་ཆིབས་བསྒྱུར་གྱིས་ཉིན་གུང་གསོལ་ཚིགས་ཕུལ།

ཕྱི་ཟླ་ ༨ ཚེས་ ༡༦ ཉིན་ལ་དྭགས་གླེ་སེང་གེ་གཙང་བོའི་འགྲམ་སིན་དུ་གྷ་ཊ་རུ། ལ་དྭགས་དབུས་འཛིན་སྐྱོང་མངའ་གཞུང་གི་གོ་སྒྲིག་ལྟར། ༧གོང་ས་རྒྱལ་བ་རིན་པོ་ཆེ་མཆོག་ཕེབས་སྐྱེལ་གསོལ་སྟོན་འདེགས་འབུལ་ཞུས་འདུག ཕྱི་ཟླ་ ༨ ཚེས་ ༡༨ ཉིན་ལ་དྭགས་ཀྱི་གཤམ་ལྗོངས་མཁར་རྩེའི་དད་ལྡན་སེར་སྐྱ་མི་མང་ནས་ཇི་ལྟར་གསོལ་འདེབས་ཞུས་པ་ལྟར། ༸གོང་ས་རྒྱལ་བ་རིན་པོ་ཆེ་མཆོག་གནམ་ལམ་བརྒྱུད་མཁར་རྩེ་རུ་ཞབས་སོར་བདེ་བར་བཀོད་དེ། ཟེར་ཐང་གསུང་ཆོས་ར་བ་དང་ཟེར་ཐང་རྒྱལ་བའི་ཕོ་བྲང་གསར་བཞེངས་དབུ་འབྱེད་མཛད་དེ་དད་ལྡན་སེར་སྐྱ་མི་མང་སྟོང་ཕྲག་མང་པོས་ཕེབས་བསུའི་དགའ་སྟོན་ཟབ་རྒྱས་ཞུས་ཡོད་པ་དང་། ཕྱི་ཟླ་ ༨ ཚེས་ ༡༩ ཉིན་མཁར་རྩེ་ཟེར་ཐང་གསུང་ཆོས་ར་བ་རུ། ༧གོང་ས་རྒྱལ་བ་རིན་པོ་ཆེ་མཆོག་གིས་ཐམས་ཅད་རྣལ་འབྱོར་གྱི་སེམས་བསྐྱེད་དང་། སྒྲོལ་དཀར་ཡིད་བཞིན་འཁོར་ལོའི་ཚེ་དབང་བསྩལ་གྲུབ་རྗེས། གཤམ་ལྗོངས་ཡུལ་ནས་ཐད་འཕུར་གནམ་གྲུར་བཞུགས་ཏེ་གླེའི་ཞི་བའི་ཚལ་གྱི་ཕོ་བྲང་དུ་ཞབས་སོར་བདེ་བོར་བཀོད། ཕྱི་ཟླ་ ༨ ཚེས་ ༢༡ ཉིན་ལ་དྭགས་ཞི་བའི་ཚལ་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་ལ་དྭགས་ནས་ཨ་རིའི་ཧ་ཝར་ཌི་གཙུག་ལག་སློབ་ཆེན་གྱི་སློབ་མ་ཁག་ཅིག་ལ་མཇལ་ཁ་བསྩལ། ཕྱི་ཟླ་ ༨ ཚེས་ ༢༣ ཉིན་ལ་དྭགས་གླེ་དཔེ་ཐུབ་དགོན་པའི་ཉེ་འགྲམ་རྨོ་རྨོའི་སྤང་དུ། ལ་དྭགས་དགོན་ཚོགས་དང་ནང་ཚོགས་གཉིས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ཕེབས་སྐྱེལ་གསོལ་ཚིགས་འདེགས་འབུལ་ཞུས་ཡོད་ཅིང་། སྐབས་དེར་༧གོང་ས་མཆོག་ནས་བོད་ལ་དཀའ་ངལ་ཞིག་འཕྲད་དེ་ངོས་རང་རྒྱ་གར་དུ་བཙན་བྱོལ་དུ་འབྱོར་བ་རེད། ཡིན་ནའང་། ས་ཁུལ་འདི་ནས་བཟུང་ཤར་མོན་བར་དུ་མི་མང་ཚོས་ངོས་ལ་སེམས་ཐག་ཉེ་པོ་བྱས་ཏེ་དགའ་པོ་བྱེད་པ་ལ་འགྱུར་བ་ཁྱོན་ནས་མེད་པ་དེ་ལྟར་རེད་ཅེས་བཀའ་སློབ་བསྩལ། ཕྱི་ཟླ་ ༨ ཚེས་ ༢༥ ཉིན་གླེ་ནས་མཁའ་ལམ་བརྒྱུད་ལྡི་ལིར་ཆིབས་ཞབས་བསྐྱངས་བ་དང་། ཕྱི་ཚེས་ ༢༨ ཉིན་བཞུགས་སྒར་དྷ་རམ་ས་ལར་ཞབས་སོར་བདེ་བར་བཀོད།

མི་ལོ་བཅོ་བརྒྱད་ཀྱི་རྗེས་སུ་འབྲས་མོ་ལྗོངས་སུ་ཆིབས་བསྒྱུར་བཀའ་དྲིན་བསྐྱངས་བ།

ཕྱི་ལོ་ ༢༠༢༣ ཟླ་ ༡༢ ཚེས་ ༡༡ ཉིན་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་ཆིབས་བསྒྱུར་བསྐྱངས་ཏེ། ༧སྐུའི་གཅེན་པོ་རྒྱལ་ལོ་དོན་གྲུབ་མཆོག་དང་། འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་པི་རེམ་སིང་རྟ་མང་ (Prem Singh Tamang) མཆོག འབྲས་ལྗོངས་མངའ་སྡེའི་གྲོས་ཚོགས་ཀྱི་དགེ་འདུན་པའི་འཐུས་མི་བླ་མ་བསོད་ནམས་ལགས། སྤྱི་ཁྱབ་དྲུང་ཆེ་པཱ་ཌག་ (V.B. Pathak) ལགས་སོགས་ཀྱིས་མཇལ་བཅར་ཞུས།  ཕྱི་ཟླ་ ༡༢ ཚེས་ ༡༢ ཉིན་འབྲས་ལྗོངས་ཀྱི་རྒྱལ་ས་སྒང་ཏོག་དཔལ་འབྱོར་རྩེད་ཐང་དུ། འབྲས་ལྗོངས་མངའ་སྡེ་གཞུང་ནས་ཇི་ལྟར་གསོལ་བ་བཏབ་པ་ལྟར། ༸གོང་ས་རྒྱལ་བ་རིན་པོ་ཆེ་མཆོག་ནས་ཁུལ་དེའི་སེར་སྐྱ་མི་མང་ཁྲི་ ༤ ལྷག་ལ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་དང་། འབྲས་ལྗོངས་མངའ་སྡེ་གཞུང་དང་སྒང་ཏོག་བོད་མིའི་ས་གནས་མགོ་འཛིན་ལས་ཁུངས་ནས་བརྟན་བཞུགས་བསྟར་འབུལ་ཞུས། བཀའ་ཆོས་སྐབས་༧གོང་ས་མཆོག་ནས་ཉེ་ཆར་འབྲས་ལྗོངས་ནང་ཆུ་ལོག་གི་གནོད་རྐྱེན་ཁྲོད་འདས་གྲོངས་སོང་བ་དང་ད་ལྟ་དཀའ་ངལ་འཕྲད་བཞིན་པའི་མི་མང་གི་ཆེད་དུ་དམིགས་བསལ་ཐུགས་སྨོན་མཛད་ཡོད་པ་དང་། ཕྱི་ཟླ་ ༡༢ ཚེས་ ༡༣ ཉིན་འབྲས་ལྗོངས་མངའ་སྡེའི་བློན་ཆེན་གྱི་ཚོགས་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་འབྲས་ལྗོངས་མངའ་སྡེ་གཞུང་ནས་ཆེ་བསྟོད་གསོལ་ཚིགས་འདེགས་འབུལ་ཞུས།

ཕྱི་ཟླ་ ༡༢ ཚེས་ ༡༤ ཉིན་གྱི་ཞོགས་པའི་ཆུ་ཚོད་ ༦།༤༥ ཐོག་འབྲས་ལྗོངས་སྒང་ཏོག་ནས་རྒྱ་གར་ནུབ་བྷང་གྷལ་ས་ལུ་སྒར་དུ་ཡོད་པའི་སྲད་རྒྱུད་གྲྭ་ཚང་དུ་ཆིབས་བསྒྱུར་བསྐྱངས་ཏེ། ༸གོང་ས་རྒྱལ་བ་རིན་པོ་ཆེ་མཆོག་ནས་སེམས་བསྐྱེད་ཀྱི་གསུང་ཆོས་བསྩལ་ཡོད་ཅིང་། སྐབས་དེར་༧གོང་ས་མཆོག་ནས་ངོས་རང་རྒྱ་གར་ཤར་ཕྱོགས་འབྲས་ལྗོངས་ཁུལ་དུ་ཕྱིན་པ་ཡིན། ཡུལ་མི་རྣམས་ལ་དངོས་གནས་དད་པ་འདུག ནང་པའི་ཆོས་ཟེར་དུས་ཞབས་བརྟན་བྱེད་པ་དང་། རྔ་བརྡུང་བ།སྦུགས་དཀྲོལ་བ་སོགས་མ་རེད། སངས་རྒྱས་ཀྱི་ཆོས་ཟེར་དུས་བསམ་བློ་བཏང་ནས་ཡོང་རྒྱུ་ཞིག་རེད། བློ་སྦྱངས་ཏེ་སེམས་ལ་མ་རུང་བ་བྱེད་མཁན་གྱི་ཉོན་མོངས་དུག་གསུམ་ངོ་ཤེས་དགོས་པ་དང་། ཉོན་མོངས་པའི་ལྡོག་ཕྱོགས་ཀྱི་བློ་ལ་རིམ་བཞིན་གོམས་ཏེ། ཉོན་མོངས་ཤུགས་ཆུང་དུ་གཏོང་བ་ནི་སངས་རྒྱས་ཆོས་ཀྱི་ཐུན་མོང་མ་ཡིན་པའི་འགྲོ་སྟངས་ཤིག་རེད། དེང་སང་འཛམ་གླིང་དུའང་ཕན་ཐོགས་ཀྱི་འདུག དེང་སྐབས་ཆོས་ལུགས་དང་མ་འབྲེལ་བའི་བཟང་སྤྱོད་ཟེར་བ་ཞིག་བཤད་ཀྱི་ཡོད། ང་ཚོ་མིའི་སྤྱི་ཚོགས་ནང་དུ་སྡོད་སྐབས་བརྩེ་བ་ཡོད་ན་ཕན་ཚུན་འཆམ་མཐུན་དང་། དཀའ་ངལ་སེལ་རོགས་བྱ་རྒྱུ་གལ་ཆེན་པོ་རེད། ངོས་ཀྱིས་རྟག་པར་ཆོས་ལུགས་དང་མ་འབྲེལ་བའི་བཟང་སྤྱོད་ཟེར་བ་དེ་བོད་པའི་སྤྱི་ཚོགས་གཅིག་པོའི་ནང་དུ་མིན་པར་རྒྱ་གར་དང་ཕྱི་རྒྱལ་ཁག་ཏུའང་དེ་ལྟར་བཤད་ཀྱི་ཡོད། ཆོས་དད་ཡོད་མེད་ལ་མ་བལྟས་པར་སེམས་པ་བཟང་པོ་བྱ་རྒྱུ་གལ་ཆེན་པོ་རེད། ཅེས་སོགས་བཀའ་སློབ་སྩལ་རྗེས་ཐམས་ཅད་རྣལ་འབྱོར་གྱི་ཆོས་འབྲེལ་དང་། མ་ཎིའི་ལྗགས་ལུང་བཀའ་ཆོས་བཀའ་དྲིན་བསྩལ་ཏེ། ཉིན་གུང་ལྗགས་སྨིན་གྲུབ་རྗེས་ཤྲི་ཀུ་རི་ལ་ཆིབས་བསྒྱུར་གྱིས་བཞུགས་ཞག་མཛད། 

གནས་མཆོག་རྡོ་རྗེ་གདན་དུ་དུས་ཡུན་ཟླ་གཅིག་ལྷག་རིང་ཆོས་འབྲེལ་མཛད་པ།

ཕྱི་ལོ་ ༢༠༢༣ ཟླ་ ༡༢ ཚེས་ ༡༥ ཉིན་གྱི་སྔ་དྲོར་༸གོང་ས་རྒྱལ་བ་རིན་པོ་ཆེ་མཆོག་ནུབ་བྷང་གྷལ་ཤྲི་ཀུ་རི་ནས་མཁའ་ལམ་བརྒྱུད་གནས་མཆོག་རྡོ་རྗེ་གདན་དུ་ཆིབས་བསྒྱུར་བཀའ་དྲིན་བསྐྱངས་ཏེ། ཕྱི་ཟླ་ ༡༢ ཚེས་ ༢༩ ནས་ཉིན་གྲངས་གསུམ་རིང་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བ་རུ། ༸གོང་ས་རྒྱལ་བ་རིན་པོ་ཆེན་པོ་མཆོག་ནས་མགོན་པོ་ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པའི་བཀའ་ཆོས་བསྩལ། ཕྱི་ཟླ་ ༡༢ ཚེས་ ༢༣ ཉིན་༸གོང་ས་རྒྱལ་བ་རིན་པོ་མཆོག་གནས་མཆོག་རྡོ་རྗེ་གདན་གྱི་མཆོད་རྟེན་རིན་པོ་ཆེའི་འགྲམ་དུ་འཚོགས་པའི་འཛམ་གླིང་ཞི་བདེའི་སྨོན་ལམ་གྱི་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས། ཕྱི་ཟླ་ ༡༢ ཚེས་ ༣༠ ཉིན་ནང་ཆོས་ངོ་སྤྲོད་དང་། ཆོས་དབྱིངས་བསྟོད་པའི་བསྡུས་དོན། ཐམས་ཅད་རྣལ་འབྱོར་གྱི་སེམས་བསྐྱེད་ཀྱི་ཆོས་འབྲེལ་བསྐྱངས། ཕྱི་ཚེས་ ༣༡ ཉིན་རྗེ་བཙུན་འཇམ་དཔལ་དབྱངས་ཀྱི་རྗེས་གནང་གི་བཀའ་དབང་བསྩལ་བ་དང་བསྟུན། སྟོན་པའི་གཟུངས་སྔགས་དང་། སྨན་ལྷའི་གཟུངས་སྔགས། དེ་བཞིན་བཛྲ་གུ་རུའི་གཟུངས་སྔགས་སོགས་ཀྱི་ལྗགས་ལུང་སྩལ་གནང་མཛད།

ཕྱི་ལོ་ ༢༠༢༣ ཟླ་ ༡༢ ཚེས་ ༢༠ ནས་ ༢༢ ཉིན་གྲངས་གསུམ་རིང་གནས་མཆོག་རྡོ་རྗེ་གདན་གྱི་རྒྱལ་སྤྱིའི་ཚོགས་འདུའི་ལྟེ་གནས་ཁང་དུ། དགའ་ལྡན་ཕོ་བྲང་ཡིག་ཚང་དང་། རྒྱལ་སྤྱིའི་ནང་པའི་མཐུན་ཚོགས། དགའ་ལྡན་ཕོ་བྲང་གི་ལྷོ་ཤར་ཨེ་ཤ་ཡའི་འབྲེལ་མཐུད་ལས་ཁུངས་སོགས་ཀྱི་གོ་སྒྲིག་འོག རྒྱལ་སྤྱིའི་དགེ་འདུན་པའི་གླེང་སྟེགས་ཐེངས་དང་པོ་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག་བོད་ཀྱི་བསྟན་བདག་བླ་ཆེན་རྣམ་པ་དང་། ལྷོ་ཤར་ཨེ་ཤ་ཡའི་རྒྱལ་ཁབ་ཁག་ ༣༣ ནས་ཕེབས་པའི་བླ་སྤྲུལ་མཁན་པོ་དང་། མཁས་དབང་། ཉམས་ཞིབ་པ་སོགས་ཚོགས་བཅར་བ་ ༢༠༠༠ ལྷག་མཉམ་ཞུགས་གནང་བཞིན་ཡོད་འདུག  སྐབས་དེར་༧གོང་ས་མཆོག་ནས་སེམས་ཁོང་ཁྲོའི་དབང་གིས་འདོད་ཆགས་ཀྱི་གཞན་དབང་དུ་ཕྱིན་ནས་ཁ་འདོན་དགེ་སྦྱོར་བྱས་ཀྱང་དེ་ཙམ་གྱིས་ནུས་པ་ཐོན་རྒྱུ་ཁག་པོ་ཡིན་པས་གཙོ་བོ་སེམས་རྒྱུད་འདུལ་བ་བྱ་རྒྱུ་ཧ་ཅང་གལ་ཆེན་པོ་ཡིན་སྐོར་བཀའ་སློབ་བསྩལ།

ཕྱི་ལོ་ ༢༠༢༤ ཟླ་  ༡ ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག  དགའ་ལྡན་ཁྲི་རིན་པོ་ཆེ་མཆོག་ནས་གདན་ས་གསུམ་དང་བཀྲ་ཤིས་ལྷུན་པོ། ར་སྟོད་གྲྭ་ཚང་བཅས་ཀྱི་དགེ་བཤེས་ལྷ་རམས་པའི་བསླབ་པ་མཐར་སོན་པ་དགེ་འདུན་པ་གྲངས་ ༤༡༣ ལ་ཕྱག་ཁྱེར་གནང་། ཕྱི་ཟླ་ ༡ ཚེས་ ༡༨ ཉིན་གྱི་སྔ་དྲོའི་ཆུ་ཚོད་ ༧།༥༠ ཙམ་ལ་༧གོང་ས་རྒྱལ་བ་རིན་པོ་ཆེ་མཆོག་སྔ་འགྱུར་རྙིང་མའི་སྨོན་ལམ་གྱི་ཚོགས་མགོན་དུ་ཆིབས་བསྒྱུར་བསྐྱངས་ཏེ། སྒེར་གྱི་ངོས་ནས་བཤད་ན་སྟོན་པ་ཐུབ་པའི་དབང་བའི་གནས་ཁྱད་པར་ཅན་འདིར་ང་ཚོ་ལྷན་འཛོམས་བྱུང་ནས་སྨོན་ལམ་རྒྱག་ཐུབ་པ་ཧ་ཅང་སྐལ་བ་བཟང་པོ་ཡིན། ཞེས་སོགས་བཀའ་སློབ་བསྩལ་ཡོད་པ་རེད།  ཕྱི་ཟླ་ ༡ ཚེས་ ༡༩ ཉིན་རྡོར་གདན་ནས་ལྡི་ལིར་ཆིབས་བསྒྱུར་བསྐྱངས་བ་དང་། ཕྱི་ཚེས་ ༢༢ ཉིན་བཞུགས་སྒར་དྷ་རམ་ས་ལར་ཞབས་སོར་བདེ་བར་བཀོད།

ཕྱི་ལོ་ ༢༠༢༤ ཟླ་ ༢ ཚེས་ ༡༢ ཉིན་བོད་ཀྱི་དུས་བབ་གསར་ཁང་གི་གསར་འགོད་པ་བྱམས་པ་ཚེ་རིང་གིས་ཕྱོགས་སྒྲིག་བྱས་ཏེ་སྤེལ།