བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་ནས་བོད་མི་དང་རྒྱ་ནག རྒྱལ་སྤྱི་བཅས་ལ་ཛ་དྲག་གི་དྲི་བ་གསུམ་གྱི་ཐོག་ནས་གཏམ་བཤད་གནང་སོང་།
དེ་རིང་ཕྱི་ཚེས་ ༢༧ ནས་ཕྱི་ཟླ་ ༣ ཚེས་ ༨ བར་བདུན་ཕྲག་གཉིས་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཕྱི་དྲིལ་བོད་ཀྱི་འགྲེམས་སྟོན་ཁང་གི་གོ་སྒྲིག་འོག ཛ་དྲག་གི་དྲི་བ་ཞེས་པའི་བརྗོད་གཞིའི་ཐོག་སྐོར་བསྐྱོད་འགྲེམས་སྟོན་ཞིག་བྱེད་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་ཕེབས་འདུག་ལ། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་དང་ལས་བྱེད། དེ་བཞིན་དྷ་ས་ཁུལ་གྱི་སེར་སྐྱ་མི་མང་དང་རྒྱ་གར་ཡུལ་སྐོར་བ་འཛོམས་འདུག
འདི་གའི་གསར་འགོད་པས་སྐོར་བསྐྱོད་འགྲེམས་སྟོན་གྱིས་བོད་དོན་དྲིལ་བསྒྲགས་ལ་ཕན་ཐོགས་ཡོད་མེད་དྲིས་པར་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས། འདི་བཞིན་བོད་ཀྱི་འགྲེམས་སྟོན་ཁང་གིས་བརྗོད་གཞི་མ་འདྲ་བ་བཅོ་ལྔའི་ཐོག་སྐོར་བསྐྱོད་འགྲེམས་སྟོན་ཞུས་ཡོད་ཅིང་། སྐོར་བསྐྱོད་འགྲེམས་སྟོན་ཧ་ལས་བའི་ཡག་པོ་བྱུང་སོང་། སྐོར་བསྐྱོད་འགྲེམས་སྟོན་བརྒྱུད་ནས་རྒྱ་གར་གྲོང་གསེབ་དང་། གྲོང་སྡེ་ཆེ་ཁག་ཏུ་ཕྱིན་ཏེ་བོད་དོན་དང་བོད་དོན་ཞུ་གཏུག་བྱེད་ཕྱོགས་སོགས་གོ་རྟོགས་སྤེལ་བ་ཡིན། འགྲེམས་སྟོན་གྱི་དངོས་པོ་ཚང་མ་འཁྱེར་བར་སྟབས་བདེ་བོ་ཡིན་པ་མ་ཟད། པར་དང་བརྙན་རིས་ལམ་ནས་ངོ་སྤྲོད་བྱེད་བཞིན་ཡོད་སྟབས། མི་མང་གིས་ལྟ་བདེ་ཞིང་ནང་དོན་ཡང་གསལ་བོ་ཆགས་ཀྱི་འདུག བོད་ཀྱི་འགྲེམས་སྟོན་ཁང་གིས་མི་ལོ་བཅོ་ལྔ་ལྷག་གི་རིང་སྐོར་བསྐྱོད་འགྲེམས་སྟོན་བྱས་ཡོད། མི་མང་ལ་ཐུགས་ཕན་གསོ་ཐུབ་ཀྱི་ཡོད་པར་བརྟེན། རྗེས་ཕྱོགས་ཀྱང་མུ་མཐུད་དུ་གཞིས་ཆགས་ཁག་སོགས་ལའང་སྐོར་བསྐྱོད་འགྲོ་འཆར་ཡོད། ཅེས་འགྲེལ་བརྗོད་གནང་བྱུང་།
བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། བོད་ཀྱི་འགྲེམས་སྟོན་ཁང་གིས་བོད་ནང་རང་ལུས་མེར་བསྲེགས་དང་འབྲེལ་བའི་ཛ་དྲག་གི་དྲི་བ་ཞིག་བཏང་ཡོད་པ་རེད། དྲི་བ་བོད་མི་ཚོས་རང་ལུས་མེར་བསྲེགས་གཏོང་དགོས་དོན་གང་ཡིན་པ་དེ་རེད། དེ་ནི་ཛ་དྲག་གི་དྲི་བ་ཞིག་ཆགས་ཡོད། དྲི་བ་འདི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་མགོ་ཁྲིད་རྣམས་ཆགས་བསྡད་ཡོད། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་བོད་བཅིངས་གྲོལ་བཏང་བ་དང་། སྤྱི་ཚོགས་རིང་ལུགས་ཀྱི་འོག་ཏུ་སྤྲོ་སྐྱིད་ལྡན་པའི་མི་ཚེ་སྐྱེལ་བཞིན་ཡོད་ཅེས་སྒྲོག་བཞིན་ཡོད་པ་རེད། སྤྲོ་སྐྱིད་ལྡན་པའི་མི་ཚེ་ཞིག་ཡོད་ན་བོད་མི་ཚོས་རང་ལུས་མེར་བསྲེགས་གཏོང་དགོས་པའི་རྒྱུ་མཚན་ཅི་རེད། དེའི་ལན་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་མགོ་ཁྲིད་ཚོས་རྒྱག་དགོས།ཅེས་གསུངས་སོང་།
ཡང་ཚོགས་གཞོན་མཚོག་གིས། དྲི་བ་གཉིས་པ་ནི་རྒྱལ་སྤྱིའི་སྤྱི་ཚོགས་ལ་ཆགས་ཀྱི་ཡོད། འཛམ་གླིང་གི་ལོ་རྒྱུས་སྟེང་དུ་ཆབ་སྲིད་ཀྱི་རང་དབང་དང་། ཆོས་ལུགས་ཀྱི་རིག་གཞུང་ཉར་ཚགས་བྱེད་ཆེད་རང་ལུུས་མེར་བསྲེགས་གཏོང་མཁན་བྱུང་མྱོང་ཡོད་ཀྱང་། ང་ཚོས་ཤེས་རྟོགས་བྱུང་ཡོད་པའི་བོད་མི་ ༡༥༧ གྱི་རང་ལུས་མེར་བསྲེགས་འདྲ་བའི་གྲངས་ཀ་མང་པོ་འཛམ་གླིང་ཁྱོན་ཡོངས་སུ་བྱུང་མྱོང་མེད། ༡༥༧ ནི་གྲངས་ཀ་ཞིག་མ་རེད། དེ་ཚོ་ཚང་མ་མིའི་ཚེ་སྲོག་རེད། རིན་ཆེན་ལྟ་བུའི་ཚེ་སྲོག་དེ་བློས་གཏོང་བྱས་ཡོད་དུས། ང་ཚོའི་དགོས་པ་ག་རེ་རེད་ཞུས་ན། བོད་ནང་དུ་རང་དབང་མེད་པར་འཛམ་གླིང་གི་བཙོན་ར་ཆེན་པོ་ཞིག་ཏུ་བསྒྱུར་ཡོད་པ་དང་། རང་ཉིད་ཀྱི་རྩ་བའི་བླ་མའི་སྐུ་པར་ཉར་ཡང་རྒྱལ་ཁབ་ཀྱི་བརྟན་བརླིང་དང་། བདེ་འཇགས་ལ་ཁ་གཡར་ནས་བཙོན་ཁང་དུ་འགྲོ་དགོས་ཀྱི་ཡོད། རྒྱ་ནག་གི་ནོར་འཁྲུལ་ཅན་གྱི་སྲིད་ཇུས་ལ་རང་དབང་གི་ཐོག་ནས་ཞུ་འབོད་བྱེད་ས་ཁྱོན་ནས་མེད་སྟབས། བོད་ནང་དུ་ཁྲ་ཁྲ་ཟང་ཟིང་ཇི་འདྲ་མཐོང་ཡང་། ཡིད་ཆེས་གཏན་ནས་མ་བྱེད་རོགས་ཞེས་བརྡ་ལེན་གཏོང་བཞིན་ཡོད། བརྡ་ལན་དེར་རྒྱལ་སྤྱིའི་སྤྱི་ཚོགས་ཀྱིས་ཡ་ལན་གང་འདྲ་རྒྱག་གི་འདུག རང་དབང་ཡོད་པའི་རྒྱལ་ཁབ་ཚང་མའི་རྩ་ཁྲིམས་ནང་དུ་བདེན་པ་དང་། འཚེ་བ་མེད་པ། རང་དབང་། ཞི་བདེ་སོགས་གསལ་བོ་ཡོད་ཀྱང་། རང་དབང་མེད་པའི་ལུང་པའི་ཆེད་དུ་བདེན་པའི་རྒྱབ་ལངས་བྱེད་ཀྱི་ཡོད་དམ། ཇི་ནི་ཝར་རྒྱལ་ཚོགས་ཀྱི་ཚོགས་འདུའི་སྐབས་འཛམ་གླིང་གི་རྒྱལ་ཁབ་ ༢༡ གི་བོད་དོན་ཐོག་རྒྱབ་སྐྱོར་ཐོབ་ཡོད་པ་རེད། འོན་ཀྱང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ནང་དུ་རྒྱལ་ཁབ་ཧ་ཅང་མང་པོ་རེད། རྒྱལ་སྤྱིའི་ཁྲིམས་ཀྱིས་ཟིན་པའི་རྒྱལ་ཁབ་ཚང་མས་བོད་དོན་ཆེད་བདེན་པར་བདེན་ལངས་ཀྱི་རྒྱབ་སྐྱོར་ཐོབ་ཐུབ་ཀྱི་ཡོད་པ་མ་རེད། དྲི་བ་དེ་ནི་རྒྱལ་སྤྱིའི་སྤྱི་ཚོགས་ལ་ཆགས་ཀྱི་ཡོད་པ་རེད། ཅེས་གསུངས་སོང་།
དེ་བཞིན་ཁོང་མོས། དྲི་བ་གསུམ་པ་ནི་བོད་མི་རྣམས་ལ་ཆགས་ཀྱི་ཡོད། རང་དབང་ལུང་པའི་བོད་མིར་དྲི་བ་གང་ཡིན་ཟེར་དུས། བོད་ནང་ཡོད་པའི་བོད་མི་ཚོས་རང་ཉིད་ཀྱི་རིན་ཆེན་སྲོག་ཀྱང་བོད་མི་རིགས་ཀྱི་རྩ་དོན་ཆེད་བློས་གཏོང་བྱེད་ཐུབ་ཀྱི་ཡོད་སྟབས། ང་ཚོས་བོད་ནང་གི་བོད་མི་ཚོའི་མགྲིན་ཚབ་བྱེད་ཐུབ་ཀྱི་ཡོད་དམ་མེད། བོད་པ་མི་རེ་ངོ་རེར་དྲི་བ་གཏོང་དགོས་པ་ཞིག་ཆགས་ཀྱི་ཡོད། བོད་ནང་གི་བོད་མི་ཚོའི་སྙིང་སྟོབས་དང་བློས་གཏོང་ལ་ད་ལྟའི་བར་ཡ་ལན་བྱས་མེད་ཚེ། མགོ་འཛུགས་བྱ་དགོས་པ་ཞིག་ཆགས་ཡོད། ཆེ་ས་བློས་བཏང་ནས་ཆུང་སར་འཐམས་ཏེ་ནང་ཁུལ་མ་འགྲིག་པ་རྒྱ་ཁྱབ་གཏོང་བཞིན་ཡོད་ཚེ། དེ་དག་ནི་མཚམས་འཇོག་དགོས་པའི་དུས་ཚོད་ཞིག་ཏུ་སླེབས་ཡོད། དེ་རིང་གོ་སྐབས་འདི་བརྒྱུད་ནས་བོད་མི་ཡོད་དོ་ཅོག་ས་ཆ་གང་དུ་ཡོད་ཀྱང་།་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་སྙིང་ལ་བཅངས་བའི་ཐོག་ནས། གཞིས་ལུས་བོད་རྒྱ་ཆེ་མི་མང་གི་བློས་གཏོང་ཆུད་ཟོས་མི་འགྲོ་བ་ཞིག་དང་། སྐད་ཡིག་གང་ཞིག་ཤེས་ཀྱི་ཡོད་པ་གོ་སྐབས་དམ་འཛིན་བྱས་ཏེ་བོད་དོན་གོ་རྟོགས་སྤེལ་རོགས་གནང་ཞེས་འབོད་སྐུལ་གནང་སོང་།
ཐེངས་འདིར་པར་རིས་ ༢༧ ལྷག་ཡོད་པའི་འགྲེམས་སྟོན་བྱེད་བཞིན་ཡོད་པའི་ཁྲོད། བོད་ནང་རང་ལུས་མེར་བསྲེགས་གཏོང་དགོས་དོན་དང་། རང་ལུས་མེར་བསྲེགས་ཀྱི་འབོད་སྒྲ། རྒྱ་གཞུང་གིས་བོད་ནང་གི་གདུག་རྩུབ་མནར་གཅོད་གཏོང་བཞིན་ཡོད་པ་སོགས་ཀྱི་གནད་དོན་རྣམས་བོད་ཡིག་དང་། དབྱིན་ཡིག ཧིན་དྷི་བཅས་ཀྱི་སྐད་ཡིག་ནང་ངོ་སྤྲོད་བྱེད་བཞིན་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
