རྒྱ་ནག་གི་མགོ་ཁྲིད་ཅིག་ལ་ཚེ་བཙོན་གྱི་ཁྲིམས་ཐག་བཅད་འདུག

རྒྱ་ནག་གཞུང་གིས་མཚོ་སྔོན་ཞིང་ཆེན་མི་མང་འཐུས་ཚོགས་ཀྱི་མགོ་ཁྲིད་གཞོན་པ་ལི་ཅེ་ཞང་ཟེར་བ་ཞིག་གིས་རྒྱ་སྒོར་བྱེ་བ་ ༨ ལྷག་གི་ལྐོག་རྔན་བླངས་ཡོད་པའི་ནག་ཉེས་འོག་ཚེ་བཙོན་གྱི་ཁྲིམས་ཐག་བཅད་ཡོད་འདུག

 ཞི་ཅིན་ཕིན་གཞུང་གིས་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བའི་མིང་འོག་ནས་རྒྱ་ནག་དང་། རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག  ཡུ་གུར་སོགས་ཀྱི་དཔོན་རིགས་མང་པོ་ཞིག་ལ་ལྐོག་ཟ་རུལ་སུངས་དང་ལྐོག་རྔན་བླངས་བ། དམར་ཤོག་གཞུང་ལ་བློ་སེམས་མི་དཀར་བ་སོགས་ཀྱི་ནག་ཉེས་འོག་ཁྲིམས་ཆད་ཕོག་གི་ཡོད་པ་ལྟར། ཉེ་ཆར་རྒྱ་ནག་ཐེན་ཅིན་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གཉིས་པ་ཟེར་བས། མཚོ་སྔོན་ཞིང་ཆེན་མི་མང་འཐུས་ཚོགས་ཀྱི་དམར་ཤོག་ཚོགས་པའི་དྲུང་ཡིག་དང་།  མགོ་ཁྲིད་གཞོན་པ་ལི་ཅེ་ཞང་ཟེར་བས་ལྐོག་རྔན་རྒྱ་སྒོར་བྱེ་བ་ ༨ དང་ས་ཡ་༨ ལྷག་བླངས་བའི་ནག་ཉེས་བཙུགས་ཏེ་ཚེ་བཙོན་གྱི་ཁྲིམས་ཆད་དང་། མི་སྒེར་གྱི་རྒྱུ་ནོར་གཞུང་བཞེས་བཏང་ཡོད་འདུག

 དེའི་ཐད་རྒྱ་ནག་ཐེན་ཅིན་གྲོང་ཁྱེར་འབྲིང་རིམ་མི་མང་ཁྲིམས་ཁང་གཉིས་པས།  ལི་ཅེ་ཞང་གིས་ཕྱི་ལོ་ ༢༠༠༤ ནས་ཕྱི་ལོ་ ༢༠༢༡ ལོའི་བར་དུ་ནང་སོག་རང་སྐྱོང་ལྗོངས་ཟེར་བའི་ཐུའུ་མོ་ཐེ་གཡས་ཆི་དམར་ཤོག་ཚོགས་པའི་དྲུང་ཡིག་དང་།  པའོ་ཐོའུ་གྲོང་ཁྱེར་གྱི་སྤྱི་ཁྱབ་གཞོན་པ།  ཐུང་ལེའོ་གྲོང་ཁྱེར་གྱི་སྤྱི་ཁྱབ་གཞོན་པ།  ཧུའུ་ཧོ་ཧའོ་ཐེ་གྲོང་ཁྱེར་དམར་ཤོག་ཚོགས་པའི་དྲུང་ཡིག་གཞོན་པ་དང་གྲོང་ཁྱེར་སྤྱི་ཁྱབ་གཞོན་པ། ནང་སོག་ཧོ་ལིན་ཀེར་ཁུལ་གསར་དམར་ཤོག་ཚོགས་པའི་དྲུང་ཡིག ནང་སོག་རང་སྐྱོང་ལྗོངས་དམར་ཤོག་ཚོགས་པའི་རྒྱུན་ལས།  ཐུང་ལེའོ་གྲོང་ཁྱེར་གྱི་དམར་ཤོག་ཚོགས་པའི་དྲུང་ཡིག་སོགས་ཀྱི་ལས་གནས་གཉེར་སྐབས། མི་སྒེར་གྱི་ཁེ་ལས། ལས་གྲྭ་འགན་ལེན། གོ་གནས་སྤར་བ། ནོར་སྲིད་ཁ་གསབ་ལེན་པ་ཟེར་བ་སོགས་བྱས་ཡོད་སྐོར་དང་། ལྐོག་རྔན་ཁྱོན་རྒྱ་སྒོར་ཁྲི་ ༨༨༢༣ བླངས་ཡོད་ལུགས་ཀྱི་ནག་ཉེས་བཙུགས་འདུག

 ལི་ཅེ་ཞང་ནི་ཕྱི་ལོ་ ༡༩༦༤ ལོར་ལྷོ་སོག་ཏུ་སྐྱེས་ཡོད་ཅིང་།  ཕྱི་ལོ་ ༡༩༨༢ ནས་ ༡༩༨༥ བར་ལྷོ་སོག་པའོ་ཐོའུ་དགེ་འོས་རྒྱ་ཡིག་སྡེ་ཁག་ནས་སློབ་སྦྱོང་བྱས། ཕྱི་ལོ་ ༡༩༨༥ ལོར་ཟླ་ ༧ པར་རྒྱ་ནག་དམར་ཤོག་ཚོགས་པའི་ནང་དུ་ཞུགས་འདུག ཕྱི་ལོ་ ༡༩༨༦ ནས་བཟུང་ནང་སོག་རང་སྐྱོང་ལྗོངས་ཟེར་བའི་ནང་པའོ་ཐོའུ་གྲོང་ཁྱེར་གྱི་སྤྱི་ཁྱབ་གཞོན་པ་དང་། ཧོན་ལི་ཁྲིན་ལི་གྲོང་ཁྱེར་གྱི་སྤྱི་ཁྱབ་གཞོན་པ། ཧུའི་ཧི་ཀོ་ཐི་གྲོང་ཁྱེར་གྱི་དམར་ཤོག་དྲུང་ཡིག་གཞོན་པ། ནང་སོག་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་རྒྱུན་ལས་སོགས་བྱས་འདུག ཕྱི་ལོ་ ༢༠༡༩ ནས་ ༢༠༢༢ བར་མཚོ་སྔོན་ཞིང་ཆེན་སྲིད་གྲོས་ཀྱི་མགོ་ཁྲིད་གཞོན་པ་དང་། དམར་ཤོག་ཚོགས་པའི་དྲུང་ཡིག་གཞོན་པ། མཚོ་སྔོན་ཞིང་ཆེན་མི་མང་འཐུས་ཚོགས་ཀྱི་མགོ་ཁྲིད་གཞོན་པ་སོགས་བྱས་འདུག

གཞན་ཡང་། རྔ་བ་ཁུལ་འབར་ཁམས་གྲོང་ཁྱེར་དམར་ཤོག་ཚོགས་པའི་དྲུང་ཡིག་གཞོན་པ་དང་། གྲོང་ཁྱེར་གྱི་མགོ་འཛིན། རིམ་པ་གཉིས་པའི་སྐོར་ཞིབ་པ་འཇམ་དབྱངས་བློ་གསལ་གྱིས་ཁྲིམས་འགལ་ཚབས་ཆེན་བྱས་པ་དང་ལྐོག་རྔན་བླངས་བའི་དོགས་གཞི་འོག ཉེ་ཆར་རྔ་བ་ཁུལ་སྒྲིག་ཁྲིམས་ཞིབ་བཤེར་ལས་ཁུངས་ཀྱིས་འདྲི་ཞིབ་བྱས་པ་བརྒྱུད། མགོ་ཁྲིད་ཀྱི་གོ་གནས་བླངས་ཏེ་དམར་ཤོག་ཚོགས་པའི་ཚོགས་མི་ལས་ཕྱིར་ཕུད་བཏང་ཡོད་འདུག 

གསར་འགོད་པ། བྱམས་པ་ཚེ་རིང་།