ཨོ་གླིང་གི་མེལ་བྷོན་གྲོང་ཁྱེར་དུ་ཉིན་གྲངས་གསུམ་རིང་གི་ལྷོ་ཤར་ཨེ་ཤ་ཡའི་མནའ་འབྲེལ་རྒྱལ་ཁབ་ཀྱི་དམིགས་བསལ་ལྷན་ཚོགས་འཚོག་བཞིན་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་ནས་ཕྱི་ཚེས་ ༦ བར་ཉིན་གྲངས་གསུམ་རིང་ཨོ་གླིང་གི་གྲོང་ཁྱེར་མེལ་བྷོན་ (Melbourne) དུ་ལྷོ་ཤར་ཨེ་ཤ་ཡའི་མནའ་འབྲེལ་རྒྱལ་ཁབ་ (Association of Southeast Asian Nations) ཀྱི་དམིགས་བསལ་ལྷན་ཚོགས་ཤིག་འཚོག་བཞིན་ཡོད་པ་དང་བསྟུན། ཕྱི་ལོ་ ༡༩༧༤ ལོར་ཨོ་གླིང་ནི་ཚོགས་པ་དེའི་མཐུན་གྲོགས་ཐོག་མར་ཆགས་ཏེ་ད་བར་མི་ལོ་ ༥༠ འཁོར་བའི་དུས་དྲན་ཡང་སྲུང་གཙི་ཞུ་བཞིན་ཡོད་འདུག
ལྷན་ཚོགས་དེའི་སྟེང་ཨོ་གླིང་གི་ཕྱི་སྲིད་བློན་ཆེན་ལྕམ་པེ་ནི་ཝོང་ (Penny Wong) གིས། ང་ཚོའི་ས་ཁུལ་དུ་ཡོད་པའི་རྒྱལ་ཁབ་དེ་དག་ལྷོ་རྒྱ་ནག་རྒྱ་མཚོ་ཚུད་པའི་རྒྱ་མཚོ་དང་རྒྱུག་ཆུ་མཚོ་སོགས་ལ་བརྟེན་ནས་འཚོ་བ་སྐྱེལ་གྱི་ཡོད་པ་རེད། ཅེས་དང་། ཨིན་ཌོ་ནེ་ཤི་ཡ་ (Indonesia) དང་མཱ་ལེ་ཤི་ཡ་ (Malaysia)། ཝི་ཐི་ནམ་ (Vietnam)། ཧྥི་ལི་པིན་སི་ (Philippines) རྒྱལ་ཁབ་ཀྱིས་མཚོའི་ཁུལ་གྱི་ས་མཚམས་དབྱེ་མཚམས་གཅོད་པར་འབད་བརྩོན་བྱས་པར་དགའ་བསུ་ཞུ་ཡི་ཡོད་སྐོར་དང་། ལྷོ་རྒྱ་ནག་རྒྱ་མཚོ་དང་ཐའེ་ཝན། དེ་བཞིན་རྫ་ཆུའི་ཁུལ་ (Mekong Subregion) དང་རྒྱ་གར་ཞི་བདེ་རྒྱ་མཚོའི་ཁུལ་དུ་གནད་དོན་ཅི་འདྲ་ཞིག་འབྱུང་རུང་། ང་ཚོར་ཤུགས་རྐྱེན་ཡོང་གི་ཡོད་པ་རེད། ཨོ་གླིང་གཞུང་གིས་རྒྱ་མཚོའི་ཁུལ་གྱི་བདེ་འཇགས་སླད་ཨ་སྒོར་ས་ཡ་ ༤༡།༨ ཡི་འགྲོ་གྲོན་གཏང་རྒྱུ་ཡིན་སྐོར་སོགས་བརྗོད་འདུག
ཉིན་གྲངས་གསུམ་རིང་གི་ལྷན་ཚོགས་མ་འཚོག་གོང་ལ་ཨོ་གླིང་གི་སྲིད་བློན་ཨེན་ཐོ་ནི་ཨལ་བྷེ་ནི་སི་ (Anthony Albanese) ལགས་ཀྱིས་བསྒྲགས་གཏམ་ཞིག་སྤེལ་བའི་ནང་། ཚོགས་འདུ་འདི་བརྒྱུད་ཨོ་གླིང་དང་དེའི་མཐུན་ཕྱོགས་རྒྱལ་ཁབ་ཕན་ཚུ་བར་གྱི་དཔལ་འབྱོར་གྱི་གནས་སྟངས་ཡར་རྒྱས་གཏང་རྒྱུ་དང་། རྒྱ་མཚོའི་ཁུལ་གྱི་བདེ་འཇགས་ཡར་རྒྱས་གཏང་རྒྱུ་སོགས་ལ་དམིགས་པ་ཞིག་ཡིན་སྐོར་སོགས་འགྲེལ་བརྗོད་གནང་ཡོད་འདུག
འདས་ལོའི་ཕྱི་ཟླ་ ༩ ཚེས་ ༢༣ ཉིན་ནས་ཉིན་གྲངས་ལྔའི་རིང་ཨིན་ཌོ་ནེ་ཤི་ཡའི་རྒྱལ་ཁབ་ཀྱི་གོ་སྒྲིག་འོག ལྷོ་ཤར་ཨེ་ཤ་ཡའི་མནའ་འབྲེལ་རྒྱལ་ཁབ་ཀྱི་ཚོགས་མི་རྒྱལ་ཁབ་བཅུ་ཡིས་མཉམ་འབྲེལ་གྱི་དམག་སྦྱོང་ཐེངས་དང་པོ་བྱས་ཡོད་འདུག
ཕྱི་ལོ་ ༡༩༦༧ ཟླ་ ༨ ཚེས་ ༨ ཉིན་ཐའེ་ལན་ཌིའི་རྒྱལ་ས་བྷན་ཀོག་ (Bangkok) ཏུ་ལྷོ་ཤར་ཨེ་ཤ་ཡའི་མནའ་འབྲེལ་རྒྱལ་ཁབ་ (Association of Southeast Asian Nations) ཅེས་པའི་ཚོགས་པ་གསར་འཛུགས་བྱས་ཡོད་པ་མ་ཟད། རྒྱལ་ཁབ་ཕན་ཚུན་བར་གྱི་དཔལ་འབྱོར་དང་བདེ་འཇགས་ཀྱི་གནས་སྟངས་ཡར་རྒྱས་གོང་འཕེལ་གཏོང་བར་དམིགས་པ་ཞིག་རེད་འདུག ཚོགས་པ་དེའི་ཚོགས་མི་རྣམས་ནི་ལྷོ་ཤར་ཨེ་ཤ་ཡའི་ཁུལ་དུ་ཡོད་པའི་རྒྱལ་ཁབ་བཅུ་ཡོད་པ་རེད། དེ་ཡང་ཚོགས་པ་དེའི་ཁོངས་སུ་ཨིན་ཌོ་ནེ་ཤི་ཡ་དང་མཱ་ལེ་ཤི་ཡ། ཧྥི་ལི་པིན་སི། སིང་གྷ་པོར། ཐའེ་ལན་ཌི། ཝི་ཐི་ནམ། བྷུ་རུ་ནའེ་ (Brunei)། འབར་མ། ཁེམ་བྷོ་ཌི་ཡ་ (Cambodia)། ལའོ་སི་ (Laos) བཅས་ཡིན་འདུག
གསར་འགོད་པ། བསྟན་འཛིན་ཕུར་བུ།
