ཧྥ་རན་སིའི་རྩ་ཁྲིམས་ལ་ལོ་རྒྱུས་ཀྱི་དོན་སྙིང་ལྡན་པའི་བསྐྱར་བཅོས་ཤིག་བཏང་།

ཡུ་རོབ་སྤྱི་འཐུས་ཐུབ་བསྟན་རྒྱ་མཚོ།

 ཕྱི་ལོ་ ༢༠༢༤ ཟླ་ ༣ ཚེས་ ༤ ཉིན་ཧྥ་རན་སིའི་རྩ་ཁྲིམས་ལ་ལོ་རྒྱུས་ཀྱི་དོན་སྙིང་ལྡན་པའི་བསྐྱར་བཅོས་ཤིག་བཏང་ཡོད་པ་རེད། ཧྥ་རན་སིའི་ཁྲིམས་ཡིག་ནང་སྔོན་མ་ནས་ཡོད་བཞིན་པའི་བུད་མེད་རྣམས་ཀྱི་ཕྲུ་གུ་བཙའ་འདོད་ཡོད་མེད་རང་མོས་ཐོབ་ཐང་དེ་རྩ་ཁྲིམས་ཀྱི་ངོ་བོར་བསྒྱུར་ཏེ་རྩ་ཁྲིམས་ཀྱི་དེབ་ནང་དུ་འགོད་ཐུབ་པ་བྱུང་ཡོད་པ་རེད། ཁ་སང་ཕྱི་ཟླ་ ༣ ཚེས་ ༤ ཉིན་ཧྥ་རན་སིའི་གྲོས་ཚོགས་གོང་འོག་གཉིས་ཀྱི་འཐུས་མི་རྣམས་ཚང་འཛོམས་ཚོགས་ཆེན་ Congrès de Versailles ལ་བསྡུས་ཏེ། གྲོས་ཚོགས་འཐུས་མི་ ༧༨༠ ཡིས་གོང་སྨོས་ཀྱི་ཁྲིམས་འཆར་ལ་རྒྱབ་སྐྱོར་བགྱིས་ཡོད། གྲོས་ཚོགས་འཐུས་མི་ ༧༢ ཙམ་གྱིས་རྩ་ཁྲིམས་བསྐྱར་བཅོས་ལ་འགག་པ་བརྒྱབས་ཡོད་འདུག རྩ་ཁྲིམས་བསྐྱར་བཅོས་བྱས་རྗེས་ཧྥ་རན་སིའི་བུད་མེད་རྣམས་ཀྱི་རང་མོས་ཕྲུ་གུ་སྐྱེས་འདོད་ཡོད་མེད་ཀྱི་ཐོབ་ཐང་དེ་ནི་རྩ་ཁྲིམས་ཀྱི་དོན་ཚན་ ༣༤ ནང་དུ་བཀོད་ཡོད་འདུག

ད་ནས་བཟུང་སྟེ་ཧྥ་རན་སིར་གནས་སྡོད་བུད་མེད་ཡོངས་ཀྱི་ཕྲུ་གུ་སྐྱེས་འདོད་ཡོད་མེད་ཀྱི་རང་དབང་དེ་རྩ་ཁྲིམས་རང་བཞིན་གྱི་རྩ་འཛིན་དང་ཐོབ་ཐང་ཞིག་ཏུ་གྱུར་ཡོད་འདུག་ལ།  ཕོ་མོ་འདྲ་མཉམ་གྱི་ཐོབ་ཐང་གི་ལྟ་གྲུབ་ཡོད་མཁན་ཚོ་དང་ཐོབ་ཐང་དེར་ནམ་རྒྱུན་དོ་སྣང་དང་འཐབ་རྩོད་གནང་མཁན་ཚང་མར་ཧ་ཅང་དགའ་ཚོར་ཆེན་པོ་བྱུང་དང་འབྱུང་མུས་རེད་འདུག རྒྱུ་མཚན་ཅིའི་ཕྱིར་བུད་མེད་ཀྱི་གཞི་རྩའི་ཐོབ་ཐང་བྱེ་བྲག་པ་ཞིག་རྩ་ཁྲིམས་ནང་འཁོད་དགོས་པ་བྱུང་ངམ་ཞེ་ན། འདས་པའི་ལོ་ཤས་ནས་བཟུང་སྟེ་ཨ་མི་རི་ཀ་གཙོས་པའི་རྒྱལ་ཁབ་མང་བོའི་ནང་དུ་གཡས་ཐལ་བའི་ཆབ་སྲིད་ཀྱི་ལྟ་གྲུབ་ཡུལ་ལུང་མང་པོའི་ནང་ཁྱབ་སྤེལ་བྱུང་ནས་ཕོ་མོ་འདྲ་མཉམ་གྱི་ཆེ་མཐོང་དང་ཐོབ་ཐང་ཁག་ལ་དོ་ཕོག་གང་འཚམ་བཏང་དང་གཏོང་བཞིན་པ་སྟེ། དཔེར་ན་ཨ་མི་རི་ཀའི་ Dakota མངའ་སྡེའི་ཆེས་མཐོའི་ཁྲིམས་ཁང་ཞིག་གིས། ཕྱི་ལོ་ ༢༠༢༣ ཟླ་བ་ ༤ ནང་བཅད་ཁྲ་ཞིག་བརྒྱུད་ནས་བུད་མེད་རྣམས་ཀྱིས་མངལ་འགོག་སྨན་རྫས་བསྟེན་མི་ཆོག་པ་བཟོས་ཡོད།

དེ་ནས་བཟུང་ཨ་རིའི་མངའ་སྡེ་མང་བོའི་ནང་ཁྲིམས་ཀྱིས་གཏན་འབེབས་བགྱིས་པའི་ཐོབ་ཐང་ངམ་རང་དབང་དེ་མངའ་སྡེ་སོ་སོའི་རྩ་ཁྲིམས་ནང་དུའང་འགོད་ཐབས་བྱས་དང་བྱེད་མུས་ཡིན་འདུག ཧྥ་རན་སིའི་སྲིད་འཛིན་མ་ཥི་ཝོན་མཆོག་ནས་གསར་ཁང་ཁག་ལ་གསུངས་དོན་ལ་གཞིག་ན། ཕྱི་ཟླ་ ༣ ཚེས་ ༨ ཉིན་རྒྱལ་སྤྱིའི་བུད་མེད་ཀྱི་ཐོབ་ཐོང་གི་ཉིན་མོར་འཁེལ་བ་དང་སྟབས་བསྟུན་ཏེ། གོང་སྨོས་ཀྱི་བུད་མེད་ཚོའི་ཕྲུ་གུ་བཙའ་འདོད་ཡོད་མེད་རང་མོས་ཐོབ་ཐང་དེ་རྩ་ཁྲིམས་ནང་འཇུག་ཐུབ་པ་བྱུང་བར་གཞུང་འབྲེལ་མཛད་སྒོ་ཞིག་གོ་སྒྲིག་གནང་རྒྱུ་ཡིན་པ་དང་། ཉིན་མོ་དེར་དམིགས་བསལ་གྱིས་བུད་མེད་ཀྱི་གཞི་རྩའི་ཐོབ་ཐང་དེ་རྩ་ཁྲིམས་ནང་འཇུག་བྱས་ཚར་བའི་སྒོ་ལྕགས་བརྒྱབ་པའི་གསལ་བསྒྲགས་ཀྱི་སྟོན་མོ་བྱ་རྒྱུ་ཡིན་ཞེས་གསུངས་འདུག