ཕྱི་ལོ་ ༢༠༢༣ ལོར་རྒྱ་གར་དང་བལ་ཡུལ་གྱི་བཙུན་དགོན་གསུམ་ནས་ཁྱོན་སྔགས་རམས་དགེ་བཤེས་མ་བཅུ་བསླབ་པ་མཐར་སོན་བྱུང་ཡོད་འདུག
དེ་རིང་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་སྔགས་རམས་དགེ་བཤེས་མ་བཅུ་ལ་མཇལ་ཁ་བསྩལ་ཡོད་ཅིང་། དེའི་ཁྲོད་བལ་ཡུལ་ཀོ་པན་དགོན་པ་ནས་དགེ་བཤེས་མ་བཞི་དང་། མོན་གྷོ་ཌི་བྱང་ཆུབ་ཆོས་གླིང་ནས་དགེ་བཤེས་མ་བཞི། དྷ་ས་དགའ་ལྡན་ཆོས་གླིང་ནས་དགེ་བཤེས་མ་གཉིས་བཅས་ཡོད་འདུག
འདི་གའི་གསར་འགོད་པས་བཙུན་མའི་ལས་འཆར་ཁང་གི་འགན་འཛིན་སྣང་ས་ཆོས་སྒྲོན་ལགས་སུ་དགེ་བཤེས་མའི་བསླབ་པ་མཐར་སོན་སྐོར་ལ་དྲིས་པར་ཁོང་མོས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་མཁན་གྱི་དགེ་བཤེས་མ་རྣམས་དགེ་བཤེས་མ་བསླབ་པ་མཐར་སོན་རྗེས་གསང་སྔགས་ཀྱི་ཐོག་ལོ་གཅིག་རིང་སློབ་སྦྱོང་ཐོན་མཁན་ཡིན། སྤྱིར་དགེ་བཤེས་མའི་བསླབ་པ་མཐར་སོན་སྐོར་ལ་འགྲོ་ལུགས་ཆེན་པོ་ཡོད། དགེ་བཤེས་མའི་རྒྱུགས་སྤྲོད་ལ་ཞུགས་པར་ལོ་བཅུ་བདུན་རིང་སློབ་སྦྱོང་བྱེད་དགོས་ཤིང་། དེའི་རྗེས་སུ་དགེ་བཤེས་མའི་རྒྱུགས་སྤྲོད་ལ་ཞུགས་ཆོག་གི་ཡོད་པ་རེད། དགེ་བཤེས་མའི་ནང་ཚུད་རྗེས་ལོ་རིམ་དང་པོ་ནས་ལོ་རིམ་བཞི་པའི་བར་ལོ་བཞི་རིང་སློབ་གཉེར་བྱས་ཏེ་དགེ་བཤེས་མའི་ལག་འཁྱེར་ཐོབ་ཀྱི་ཡོད་པ་རེད། ཅེས་འགྲེལ་བརྗོད་གནང་བྱུང་།
དགེ་བཤེས་མའི་རྒྱུགས་སྤྲོད་སྐོར་ལ་ཁོང་མོས། དགེ་བཤེས་མའི་རྒྱུགས་སྤྲོད་ཀྱི་ཆ་རྐྱེན་ཚང་བ་ཡིན་ཚེ། ལོ་ལྟར་ཕྱི་ཟླ་བརྒྱད་པའི་ནང་དགེ་བཤེས་མའི་ལོ་རིམ་དང་པོ་ནས་ལོ་རིམ་བཞི་པའི་བར་རྒྱུགས་སྤྲོད་གཏོང་ཆོག་གི་ཡོད། ད་ལྟ་བར་དུ་དྷ་སའི་དགའ་ལྡན་ཆོས་གླིང་དང་། འཇམ་དབྱངས་ཆོས་གླིང་། སྒྲོལ་མ་གླིང་། བལ་ཡུལ་ཀོ་པན་དགོན་པ། བལ་ཡུལ་ཐུགས་རྗེ་ཆོས་གླིང་། མོན་གྷོ་བྱང་ཆུབ་ཆོས་གླིང་བཅས་མཉམ་ཞུགས་གནང་བཞིན་ཡོད། རྒྱུགས་སྤྲོད་ཀྱི་དོ་དམ་གནང་མཁན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་དང་། དགེ་བཤེས་མའི་རྒྱུགས་སྤྲོད་དོ་དམ་ཚོགས་ཆུང་། བཙུན་མའི་ལས་འཆར་ཁང་གི་ཚོགས་མི་སོགས་ཡོད། ལོ་བཞིའི་མཚམས་སུ་དགེ་བཤེས་མ་ཐོན་བཞིན་ཡོད། དེའི་རྗེས་སུ་ལོ་གཅིག་རིང་རྒྱུད་སྟོད་དགོན་པར་གསང་སྔགས་ཐོག་སློབ་སྦྱོང་གནང་གི་ཡོད། རྒྱུགས་སྤྲོད་ཀྱི་འགྲོ་གྲོན་ཐད་ཁག་ཅིག་ཆོས་རིག་ལས་ཁུངས་དང་། ཕལ་ཆེ་བ་བཙུན་མའི་ལས་འཆར་ཁང་གིས་འགྲོ་གྲོན་གཏོང་བཞིན་ཡོད། བཙུན་མའི་ལས་འཆར་ཁང་གི་འཛིན་སྐྱོང་འོག་ཏུ་ཡོད་པའི་བཙུན་དགོན་ཁག་ནང་བོད་རིགས་དང་ཧི་མ་ལ་ཡར་དབྱེ་བ་མེད་པའི་ཐོག་ནས་གཟིགས་སྐྱོང་གནང་བཞིན་ཡོད། ཅེས་འགྲེལ་བརྗོད་གནང་བྱུང་།
བཙུན་མའི་ལས་འཆར་ཁང་ནི་ཕྱི་ལོ་ ༡༩༨༧ ལོར་ཐོག་མར་མགོ་འཛུགས་ཏེ། འདས་པའི་ལོ་ངོ་ ༣༦ རིང་བཙུན་མ་རྣམས་ཀྱི་ཤེས་ཡོན་གྱི་ཐོག་ལ་རོགས་འདེགས་གནང་གི་ཡོད་པ་དང་། ད་ལྟའི་ཆར་ལས་འཆར་ཁང་དེས་འཛིན་སྐྱོང་འོག་ཏུ་ཡོད་པའི་རྒྱ་གར་གྱི་བཙུན་དགོན་ཁག་ནང་བཙུན་མ་ ༨༠༠ ལྷག་ལ་སློབ་ཡོན་དང་འཚོ་སྣོན་གྱི་རོགས་སྐྱོར་གནང་བཞིན་ཡོད་འདུག
ཕྱི་ལོ་༡༩༩༥ ལོ་ནས་བཟུང་༧གོང་ས་རྒྱལ་བ་རིན་པོ་ཆེ་མཆོག་ནས་དགེ་བཤེས་མ་གཏོང་དགོས་པའི་བཀའ་སློབ་རབ་དང་རིམ་པ་བསྩལ་བར་བརྟེན་ནས། ཕྱི་ལོ་ ༢༠༡༢ ལོའི་ཟླ་ ༥ བའི་ནང་དགེ་བཤེས་མ་གཏོང་ཕྱོགས་ཀྱི་ལམ་སྲོལ་གཏན་འབེབས་བྱས་ཏེ་ལག་བསྟར་བྱས་ཡོད་ཅིང་། ཕྱི་ལོ་ ༢༠༡༦ ཟླ་ ༡༢ ཚེས་ ༢༢ ཉིན་རྒྱ་གར་ལྷོ་ཕྱོགས་འབྲས་སྤུངས་ཚོགས་ཆེན་གྱི་འདུ་ཁང་དུ། ལོ་རྒྱུས་ནང་ཐོག་མར་བོད་ཀྱི་བཙུན་མ་ ༢༠ དགེ་བཤེས་མའི་བསླབ་པ་མཐར་སོན་གྱི་མཛད་སྒོ་འཚོགས་ཡོད་པ་དང་། ཕྱི་ལོ་ ༢༠༡༩ ལོར་དཔལ་ལྡན་རྒྱུད་སྟོད་གྲྭ་ཚང་དུ་ཆེས་ཐོག་མར་སྔགས་རམས་དགེ་བཤེས་མའི་བསླབ་པ་མཐར་སོན་གྱི་མཛད་སྒོ་འཚོགས་ཡོད་འདུག ད་ལྟའི་བར་དགེ་བཤེས་མ་ཁྱོན་ ༦༠ དང་སྔགས་རམས་དགེ་བཤེས་མ་ཁྱོན་ ༤༨ བཅས་བྱུང་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
ཚེ་དཔག་རིག་འཛིན།
ཧ་ཅང་གཏམ་བཟང་རེད། ལོ་རྒྱུས་རང་བཞིན་ཅན་ཞིག་ཆགས་པ་རེད། བཙུན་མ་དགེ་བཤེས་དང་། བཙུན་མ་སྔགས་རམས་པའི་བསླབ་པ་མཐར་སོན་པ་རྣམས་ལ་སླར་ཡང་འཚམས་འདྲིའི་བཀྲ་ཤིས་བདེ་ལེགས་ཞུ། འདིར་ཡང་སྐྱར་ཞུ་འདོད་པ་ཞིག་ནི། བཙུན་མ་བསླབ་པ་མཐར་སོན་པ་ཚོར་དགེ་བཤེས་མ་དང་། སྔགས་རམས་མ་ཞུ་དགོས་པ་འདི་ལོ་རྒྱུས་ནང་། སྔ་དུས་ཀྱི་ཕོ་མཆོག་མོ་དམན་དང་། ཕོ་མོ་དབྱེ་འབྱེད་ཀྱི་སྲོལ་ངན་ཆག་སྒོ་ཆེན་པོ་ཞིག་གི་རྒྱུན་ཡིན་པས། སྦེད་དེ་མ་འགྲིགས་པ་རེད་སྙམ། འཛམ་གླིང་སྤྱི་ཡོངས་ཀྱི་ནང་། ཤེས་ཡོན་གྱི་སྒྲོམ་གཞིའི་བསྟི་གནས་གཙུག་ལག་མ་ལག་དང་། སྡེ་ཚན་གང་འདྲ་ཞིག་གི་ནང་ལ་ཡིན་ན་ཡང་། སློབ་མ་གང་ཞིག་གིས་ཐེག་པ་རིམ་འཛེགས་ཀྱིས་བསླབ་པ་མཐར་སོན་ནས། གོ་ས་ཕྱག་འཁྱེར་བཞེས་ཡོད་ན། གོ་ཐོབ་ཕྱག་འཁྱེར་རྩ་འཛིན་དེ་དག་ལ་ཕོ་མོའི་མིང་བརྡ་ཁྱད་མེད་ཡིན་དགོས་པ་སྨོས་མེད་རེད། ། དཔེར་ན། སྨན་རམས་པ་ཟེར་བ་ལས་སྨན་རམས་མ་དང་། སྨན་རམས་ཕ་སོགས་ནམ་ཡང་ཟེར་སྲོལ་མེད། དེ་བཞིན་དུ་ Ph.D Male དང་ Ph.D Female ཟེར་སྲོལ་ཡང་མེད། འོན་ཀྱང་། ཁས་བླངས་པའི་བསླབ་སྡོམ་བཞེས་སྐབས། དགེ་ཚུལ་ཕ་མ་དང་། དགེ་སློང་ཕ་མ་ཟེར་སྲོལ་ཡོད་པས། དེ་ནི་གནད་དོན་སྦད་དེ་ཁག་ཁག་རེད། བཙུན་མ་དགེ་བཤེས་ཀྱི་བསླབ་པ་མཐར་སོན་པ་རྣམས་ལ་དགེ་བཤེས་མདང་། སྔགས་རམས་མ་ཞེས་མཚད་དོད་གནང་སྟངས་འདི་ལ་ངེས་པར་བསམ་གཞིགས་ཅིག་གནང་དགོས་པ་འདུག་སྙམ། དེ་མིན་མ་འོངས་པར་དུས་ནམ་ཞིག་གི་ཚེ། སྤྱི་ཚོགས་ནང་རྩོད་གཞི་དུག་ཅན་ཞིག་ཏུ་གྱུར་མི་སྲིད་པ་མིན་པས་འབྲེལ་ཡོད་ཚོས་དགོངས་པ་བཞེས་རོགས་གནང་། ལྷག་དོན་དུ། རང་རེའི་བོད་བརྒྱུད་ནང་པ་སངས་རྒྱས་པའི་སྲོལ་བཟང་ལའང་ཕོ་མོ་གཉིས་ཁྱད་མེད་འདྲ་མཉམ་ཡིན་པ་སྨོས་མི་དགོས་པས་གནད་དོན་འདི་གཅིག་པུར་བསམ་གཞིགས་གནང་ནའང་རྒྱུ་མཚན་མཁྱེན་ཐུབ་པ་ཞིག་ལོས་ཡིན། ཡ་ཡ། ད་མ་འོངས་པར་འདང་ཞིག་བརྒྱབ་ན། བཙུན་མ་སྔགས་རམས་པ་རྣམས་ཀྱང་། རི་བོ་དགེ་ལུགས་པའི་སྲོལ་བཟང་ལས། ཤར་བྱང་ཆོས་རྗེ་དང་། དགའ་ལྡན་ཁྲི་པར་ཡང་ཕེབས་ཆོག་པའི་ལམ་པོ་ཆེའི་སྲོལ་བཟང་ལོ་རྒྱུས་རང་བཞིན་ཅན་ཞིག་རང་ཤུགས་ཀྱིས་ཆགས་སོང་བ་རེད་སྙམ། གང་ལྟར། ལས་འཆར་འདི་ལ་དགའ་བསུ་ཚད་མེད་ཡོད། ༧རྒྱལ་བའི་དགོངས་པ་དང་མཛད་བཟང་བླ་ན་མེད་པ་ལོས་ཡིན། བཀྲིས།།