བཙན་བྱོལ་བོད་མིའི་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གི་ལྷན་ཚོགས་ཐེངས་བཅུ་གཅིག་པའི་ཐོག་གྲོས་གཞི་དོན་ཚན་བཅུ་གསུམ་ལ་གྲོས་ཆོད་གཏན་འབེབས་བྱུང་ཡོད་འདུག
ཁ་སང་དང་དེ་རིང་ཉིན་གྲངས་གཉིས་
འདི་གའི་གསར་འགོད་པས་ཤེས་ཡོན་ལྷན་ཚོགས་ཀྱི་འགན་འཛིན་བསྟན་འཛིན་པདྨ་ལགས་སུ་ཤེས་ཡོན་ལྷན་ཚོགས་ཀྱི་ཚོགས་མི་ཇི་ཙམ་ཡོད་སྐོར་དྲིས་པར་ཁོང་མོས། ཤེས་ཡོན་ལྷན་ཚོགས་ལ་ཚོགས་མི་བཅུ་ཡོད་ཅིང་། དེའི་ཁོངས་སུ་ཚོགས་མི་ལྔ་བཀའ་ཤག་གིས་དམིགས་བསལ་བསྐོ་བཞག་བྱེད་ཀྱི་རེད། དེ་དག་ནི་ཤེས་ཡོན་ལྷན་ཚོགས་ཀྱི་ཚོགས་གཙོ་དགེ་བཤེས་ལྷག་རྡོར་ལགས་དང་། ཚོགས་མི་གསུམ་ནི་གཞུང་ཁོངས་མིན་པའི་ཤེས་ཡོན་ཐོག་ཁྱད་ལས་པ་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་རིག་གནས་སློབ་དཔོན་ལྷག་པ་ཚེ་རིང་ལགས་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་སྤྱི་ཟུར་བསོད་ནམས་རྒྱལ་མཚན་ལགས། སྒང་ཏོག་དཔལ་ཁང་སློབ་གཉེར་ཁང་གི་སློབ་སྤྱི་སྤྱི་ཟུར་དཔལ་ཁང་ཉི་མ་དོན་གྲུབ་ལགས་བཅས་ཡིན། ཤེས་ཡོན་ལྷན་ཚོགས་ཀྱི་འགན་འཛིན་ཡང་བཀའ་ཤག་ནས་བསྐོ་བཞག་བྱེད་ཀྱི་ཡོད། ཚོགས་མི་གཞན་ལྔ་ནི་དྷ་ས་བོད་ཕྲུག་ཁྱིམ་སྡེའི་སྤྱི་ཁྱབ་ཤེས་ཡོན་ངེས་སྟོན་པ་བསྟན་འཛིན་མཚན་ལེགས་ལགས། མ་སུ་རི་བོད་ཁྱིམ་གྱི་སྤྱི་ཁྱབ་ཤེས་ཡོན་འགན་འཛིན་པ་སངས་དོན་གྲུབ་ལགས། སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས། བལ་ཡུལ་གངས་ཅན་བདེ་རྩའི་སྤྱི་ཁྱབ་ཤེས་ཡོན་འགན་འཛིན་བསྟན་འཛིན་རབ་རྒྱས་ལགས། ཤེས་རིག་ལས་ཁུངས་ཀྱི་སྐུ་ཚབ་དེང་རབས་དང་སྲོལ་རྒྱུན་ཤེས་ཡོན་ཚན་པའི་འགན་འཛིན་དྲུང་འཕར་བསྟན་འཛིན་རྡོ་རྗེ་ལགས་བཅས་ཡིན། ཞེས་འགྲེལ་བརྗོད་གནང་བྱུང་།
ཤེས་ཡོན་ལྷན་ཚོགས་ཐོག་གྲོས་ཆོད་གཏན་འབེབས་བྱས་པ་ཁག་ལག་བསྟར་བྱེད་ཕྱོགས་ཐད་ཁོང་མོས། ཚོགས་འདུ་འདི་ནི་ཤེས་རིག་ལས་ཁུངས་ཀྱི་ཁྱབ་ཁོངས་སུ་ཡོད་པའི་ཤེས་ཡོན་ལྷན་ཚོགས་ཡིག་ཚང་གིས་གོ་སྒྲིག་བྱེད་བཞིན་ཡོད། གྲོས་ཆོད་ཆ་ཚང་གཏན་འབེབས་བྱུང་ཚེ། ཤེས་ཡོན་ལྷན་ཚོགས་ཀྱི་ཡིག་ཚང་གིས་ལག་བསྟར་བྱེད་མཁན་སུ་ཡིན་ནམ་དབྱེ་བསལ་བྱ་རྒྱུ་རེད། དེའི་ཁྲོད་རིགས་གཅིག་ཤེས་རིག་ལས་ཁུངས་ཀྱིས་གནང་དགོས་ཀྱི་ཡོད་ཅིང་། རིགས་གཅིག་ཤེས་རིག་ལས་ཁུངས་ཀྱི་ཁྱབ་ཁོངས་ཤེས་ཡོན་ལྷན་ཚོགས་ཡིག་ཚང་ཁྱབ་ཁོངས་ནས་གནང་དགོས་ཀྱི་ཡོད་པ་རེད། ཁག་ཅིག་སློབ་སྡེའི་ཁོངས་ཀྱི་སམ་བྷོ་ཊ་སྤྱི་ཁྱབ་ཡིག་ཚང་དང་། དྷ་ས་བོད་ཁྱིམ་སྤྱི་ཁྱབ་ཡིག་ཚང་སོགས་ཀྱིས་གནང་དགོས་པ་རེད། དེ་བཞིན་རིགས་གཅིག་སྒྲིག་འཛུགས་ཀྱི་ལྷན་ཁང་གཞན་པར་གཞེན་སྐུལ་ཞུ་དགོས། གྲོས་ཆོད་ལག་བསྟར་གྱི་ཆེད་དུ་གྲོས་ཆོད་ག་ཚོད་བྱུང་བ་དབྱེ་བ་ཕྱེས་ཏེ། ལག་བསྟར་བྱེད་མཁན་གྱི་རེའུ་མིག་བཟོས་ནས་ཕུལ་གྱི་ཡོད། ལོ་གཅིག་གི་ནང་ལག་བསྟར་ཆ་ཚང་བྱས་རྗེས། ལོ་རྗེས་མའི་ནང་གྲོས་ཆོད་ལག་བསྟར་ཕུལ་བ་བཞིན་ལག་བསྟར་གྲུབ་འབྲས་གང་འདྲ་བྱུང་ཡོད་མེད་སྙན་སྒྲོན་ཞུ་དགོས་ཀྱི་ཡོད་པ་རེད། ཅེས་འགྲེལ་བརྗོད་གནང་བྱུང་།
ཤེས་ཡོན་ལྷན་ཚོགས་ཀྱི་ཚོགས་འདུའི་གལ་གནད་སྐོར་ལ་ཁོང་མོས། ལྷན་ཚོགས་འདི་ནི་ཧ་ཅང་གལ་གནད་ཅིག་ཆགས་ཡོད། ལྷག་པར་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་ཇུས་ནང་དུ་གསལ་བ་བཞིན། ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གཉིས་བཙན་བྱོལ་བོད་མིའི་ཤེས་ཡོན་ཡར་རྒྱས་གཏོང་ཕྱོགས་ཐད་ལས་འགན་གལ་ཆེ་ཤོས་ཆགས་ཡོད། ད་ལྟའི་བར་ཤེས་ཡོན་ལྷན་ཚོགས་ཀྱི་ཚོགས་འདུ་འཚོགས་པ་ཙམ་མིན་པར་བཙན་བྱོལ་སློབ་གྲྭ་ཁག་གི་གནས་སྟངས་ཇི་མ་ཇི་བཞིན་གཞིར་བཟུང་བའི་ཐོག་ནས་གྲོས་གཞི་ཁག་བཏོན་གྱི་ཡོད་ལ། བཙན་བྱོལ་གྱི་ཤེས་ཡོན་ཡར་རྒྱས་གོང་སྤེལ་གཏོང་ཕྱོགས་དང་། འཐུས་ཤོར་ངོས་འཛིན་བྱེད་ཕྱོགས། ལེགས་སྤེལ་ཉེས་འགོག་སོགས་ལམ་སྟོན་གནང་གི་ཡོད། ཅེས་འགྲེལ་བརྗོད་གནང་བྱུང་།
འདི་གའི་གསར་འགོད་པས་ཤེས་ཡོན་ལྷན་ཚོགས་ཀྱི་ཚོགས་གཙོ་དགེ་བཤེས་ལྷག་རྡོར་ལགས་ལ་ཚོགས་འདུ་འདིའི་སྐོར་དྲིས་པར་ཁོང་གིས། ཐེངས་འདིའི་ལྷན་ཚོགས་ནང་དུ་གྲོས་གཞི་དོན་ཚན་བཅུ་གསུམ་འཁྱེར་ཡོད་ཅིང་། གྲོས་གཞི་ཆ་ཚང་ལ་བགྲོ་གླེང་བྱས་ཏེ་གྲོས་ཆོད་གཏན་འབེབས་བྱེད་བཞིན་ཡོད། རྒྱལ་ཁབ་གང་ཡིན་རུང་ཤེས་ཡོན་སྲིད་ཇུས་དེ་ཤེས་ཡོན་ལྷན་ཚོགས་ཀྱིས་བཟོ་བཞིན་ཡོད་དུས། ཤེས་ཡོན་ལྷན་ཚོགས་ཀྱི་ཚོགས་འདུ་ཧ་ཅང་གལ་གནད་ཆེན་པོ་རེད། ཅེས་གསུངས་སོང་།
ཁ་སང་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། དེང་སྐབས་སློབ་གྲྭ་དང་དགོན་སྡེ་ཁག་ཏུ་བོད་པའི་སློབ་ཕྲུག་དང་གྲྭ་བཙུན་གྱི་གྲངས་འབོར་ཉུང་དུ་འགྲོ་བཞིན་ཡོད་པར་བསྟུན། མ་འོངས་པར་གནས་སྟངས་དེ་དང་འཚམ་པའི་ལས་འཆར་བཟོ་དགོས་པའི་སྐོར། དེ་དག་གི་གྲངས་ཐོ་ཚད་ལྡན་ཞིག་བསྡུ་རུབ་བྱེད་དགོས་གལ་སྐོར་ནན་བཤད་གནང་བ་དང་། རྒྱ་གར་གཞུང་གི་སྒྲིག་གཞི་དང་མཐུན་པའི་སྒྲོམ་གཞི་ལེགས་བཅོས་གནང་དགོས་གལ་དང་། གཟའ་མཇུག་སློབ་གྲྭ་ཚོགས་དཀའ་བའི་ས་ཁུལ་དུ་དྲྭ་ཐོག་སློབ་ཁྲིད་བྱ་དགོས་སྐོར་སོགས་གསུངས་འདུག
དེ་བཞིན་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས། ཐོག་མར་ཤེས་ཡོན་ལྷན་ཚོགས་ཀྱི་ཚོགས་གཙོ་གཙོས་པའི་ཚོགས་མི་ཡོངས་ཀྱིས་འདས་པའི་ལོ་གཉིས་རིང་སློབ་གྲྭ་ཁག་ཏུ་ཕེབས་ཏེ། འཛིན་ཁང་ནང་གཟིགས་སྐོར་དང་། ཕྲུ་གུ། དགེ་རྒན། ཕ་མ་བཅས་དང་ལྷན་བཀའ་མོལ་གནང་བས་ཡི་རངས་བསྔགས་བརྗོད་གནང་བ་དང་། ཤེས་རིག་ལས་ཁུངས་ཀྱི་ངོས་ནས་ཕྱི་ལོ་ ༢༠༢༣ ནང་མ་སུ་རི་དང་། གོ་པལ་པུར། ཀ་སྦུག ལུགས་བསམ་བཅས་སློབ་གྲྭ་ཁག་ཏུ་ཤེས་ཡོན་འདུ་འཛོམས་གོ་སྒྲིག་ལེགས་གྲུབ་བྱུང་ཡོད་ལུགས་དང་། སྦེལ་ཇམ་དང་། ཨོ་གླིང་། སུད་སི་བཅས་ཀྱི་གཟའ་མཇུག་སློབ་གྲྭའི་དགེ་རྒན་རྣམས་ལ་དྲྭ་ཐོག་སློབ་ཁྲིད་གནང་ནས་གྲུབ་འབྲས་ཡག་པོ་ཐོན་ཡོད་པའི་སྐོར་དང་། དེ་བཞིན་ཤེས་རིག་ལས་ཁུངས་ནས་སློབ་གྲྭ་ཁག་གི་འཛིན་རིམ་ ༥ པ་དང་ ༨ པའི་སྤྱི་རྒྱུགས་ (Common Examination) གཏན་འབེབས་བྱ་རྒྱུ་ཡིན་སྐོར་གསུངས་འདུག
ཐེངས་འདིའི་ཤེས་ཡོན་ལྷན་ཚོགས་ཐོག་འདས་ལོའི་གྲོས་ཆོད་བསྐྱར་ཞིབ་དང་། ཤེས་ཡོན་ལྷན་ཚོགས་ཀྱིས་སློབ་སྡེ་ཁག་གི་ལས་བསྡོམས་སྙིང་བསྡུས་སྙན་སྒྲོན་ཞུས་ཡོད་པ་མ་ཟད། ཤེས་ཡོན་སློབ་སྟོན་ཚོགས་ཆུང་གི་ཚོགས་མི་རྣམས་བོད་པའི་སློབ་གྲྭ་ཁག་ཅིག་ལ་རྟོག་ཞིབ་བྱས་པར་ལེགས་སྤེལ་ཉེས་འགོག་གནང་ཕྱོགས་དང་། གཞི་རིམ་སློབ་གྲྭའི་འཛིན་གྲྭ་བཞི་པ་ནས་བརྒྱད་པ་བར་གྱི་གློག་ཀླད་སློབ་ཚན་གྱི་སློབ་ཁྲིད་རྩ་འཛིན་བསྐྱར་ཞིབ་དང་གཏན་འབེབས་གནང་ཕྱོགས་སྐོར། རྒྱ་གར་ནང་ཡོད་པའི་བོད་པའི་སློབ་གྲྭ་ཡོངས་ཀྱི་འཛིན་གྲྭ་ ༥ དང་ ༨ པར་སྤྱི་རྒྱུགས་ཡིག་ཚད་མགོ་འཛུགས་རྒྱུའི་སྐོར། བཙན་བྱོལ་ནང་མི་འབོར་ཉུང་དུ་འགྲོ་བའི་ཚབས་ཆེའི་དཀའ་ངལ་སེལ་ཐབས་སྐོར། བོད་མིའི་སྤྱི་ཚོགས་ནང་བོད་ཀྱི་སྐད་ཡིག་གི་ཆུ་ཚད་མཐོ་པོ་ཡོད་པའི་བོད་མི་གསོ་སྐྱོང་གནང་ཐབས་དང་། ཕ་མ་ཚོས་ནང་དུ་ཕྲུ་གུར་ཡ་རབས་བཟང་སྤྱོད་དང་། བོད་སྐད་གཙང་མ་བསྐྱོན་རྒྱུར་སློབ་སྟོན་དང་ཐབས་ལམ་སྟོན་ཕྱོགས་སྐོར། བོད་པའི་སློབ་གྲྭ་ཁག་གི་སྤྱི་ཡོངས་ཀྱི་ཤེས་ཡོན་གནས་སྟངས་རྟོག་ཞིབ་དང་དེ་འབྲེལ་ལེགས་བཅོས་ཐབས་ལམ་ཡོང་སླད་དྷ་ས་བོད་ཁྱིམ་དང༌། མ་སུ་རི་བོད་ཁྱིམ། སཾ་བྷོ་ཊ་བོད་སློབ་ཚོགས་པ་བཅས་ནས་གྲུབ་པའི་ལོ་འཁོར་རྟོག་ཞིབ་ཚོགས་ཆུང་བཙུགས་ཏེ་སློབ་གྲྭ་ཁག་ཏུ་རྟོག་ཞིབ་སོགས་ཀྱི་གྲོས་གཞི་དོན་ཚན་བཅུ་གསུམ་ལ་གྲོས་ཆོད་གཏན་འབེབས་བྱུང་ཡོད་འདུག
གསར་འགོད་པ། བྱམས་པ་ཚེ་རིང་།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
