ཨ་རིའི་སྤྱི་འབངས་ཐོབ་ཐང་རྩོད་ལེན་པ་མར་ཊིན་ལུ་ཐར་ཀིང་གི་ནང་མིས་༧གོང་ས་མཆོག་ལ་མཇལ་ཁ་ཞུས།

དེ་རིང་སྔ་དྲོར་ཨ་རིའི་སྤྱི་འབངས་ཐོབ་ཐང་རྩོད་ལེན་པ་དང་དབུ་ཁྲིད་སྐུ་ཞབས་མར་ཊིན་ལུ་ཐར་ཀིང་ (Dr Martin Luther King) གི་ནང་མིས་༧གོང་ས་མཆོག་ལ་མཇལ་ཁ་ཞུས་ཏེ་འཚེ་མེད་ཞི་བའི་ཐབས་ལམ་སྤེལ་ཐབས་དང་ནང་སེམས་ཀྱི་ཞི་བདེ་གོང་མཐོར་གཏོང་སླད་བཀའ་སློབ་ལམ་སྟོན་ཞུས་གནང་ཡོད་འདུག

དེ་རིང་ཕྱི་ཟླ་ ༣ ཚེས་ ༡༨ ཉིན་ཨ་རིའི་སྤྱི་འབངས་ཐོབ་ཐང་རྩོད་ལེན་པ་དང་དབུ་ཁྲིད་སྐུ་ཞབས་མར་ཊིན་ལུ་ཐར་ཀིང་ (Dr Martin Luther King) མཆོག་གི་བུ་དང་ནང་མི་རྣམས་ཀྱིས་བཞུགས་སྒར་༧རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཡོད་ཅིང་། སྐབས་དེར་༧གོང་ས་མཆོག་གིས་འགྲོ་བ་གཅིག་གྱུར་གྱི་འདུ་ཤེས་ཀྱི་ཐོག་ནས་སྤྱི་ཚོགས་ཕན་བདེ་སྒྲུབ་དགོས་སྐོར་སོགས་བཀའ་སློབ་སྩལ་ཡོད་འདུག 

དེ་རིང་ཉིན་རྒྱབ་ཏུ་དཔལ་ལྡན་དགའ་ལྡན་ཕོ་བྲང་གིས་༧གོང་ས་མཆོག་གིས་ཁོང་རྣམས་ལ་མཇལ་ཁ་སྩལ་བའི་བརྙན་ཞིག་གི་ནང་༧གོང་ས་རྒྱལ་བ་རིན་པོ་ཆེ་མཆོག་གིས། ངོས་རང་གིས་ཐེར་འབུམ་བདུན་ནས་བརྒྱད་བར་ཡོད་པའི་མི་ཚང་མ་གཅིག་མཚུངས་སུ་ངོས་འཛིན་གནང་གི་ཡོད། ང་ཚོ་ཚང་མས་མི་སྒེར་གྱི་ནང་སེམས་ཀྱི་ཞི་བདེ་བརྒྱུད་ནས་འཛམ་གླིང་ཞི་བདེ་ཡོང་ཐབས་ལ་བསམ་བློ་གཏོང་རྒྱུ་དེ་ཧ་ཅང་གལ་ཆེན་རེད། ཆོས་ལུགས་དང་དབྱེ་འབྱེད་བྱེད་པ་ནི་མི་སྒེར་གྱི་གནད་དོན་ཞིག་ཡིན་པ་ལས། གཞི་རྩའི་ཆ་ནས་ང་ཚོ་ཚང་མ་གཅིག་མཚུངས་རེད། ང་ཚོའི་སྐྱེས་ཚུལ་གཅིག་པ་ཡིན་ལ། ནམ་ཞིག་གི་ཚེ་ང་ཚོའི་འཆི་ཚུལ་ཡང་གཅིག་མཚུངས་ཡིན་པས། ང་ཚོ་འཚོ་ཞིང་གནས་པའི་རིང་ལ་གཅེན་གཅུང་གི་འདུ་ཤེས་ཐོག་ནས་དོན་དམ་གྱི་མི་ཚེ་ཞིག་སྐྱེལ་དགོས། ཞེས་གསུངས་སོང་། 

ཡང་༧མགོན་པོ་གང་ཉིད་ཀྱིས་གཞོན་སྐྱེས་རྣམས་ལ་བཀའ་སློབ་སྩལ་བའི་ནང་། ངེས་པར་དུ་བློ་རིག་བེད་སྤྱད་ནས་ལྟ་ཞིབ་དགོས་ཏེ། འདས་སོང་གི་དཀའ་དག་མང་དག་ཅིག་ནི་ང་ཚོ་འགྲོ་བ་མི་རྣམས་ཀྱིས་ཆོས་ལུགས་དང་རིགས་རུས་མི་འདྲ་བ། ལོ་རྒྱུས་སོགས་ཀྱི་རྐྱེན་དུ་བཟོས་པ་ཤ་སྟག་ཡིན་པས། ད་ནི་འགྲོ་བ་མི་གཅིག་མཚུངས་དང་། འགྲོ་བ་མིའི་གཞི་རྩའི་ཐོབ་ཐང་བཅས་ཀྱི་ཐད་ལ་བསམ་བློ་གཏོང་རྒྱུ་གལ་ཆེན་རེད། ཅེས་གསུངས་སོང་། 

མཇལ་ཁ་གྲུབ་མཚམས་མར་ཊིན་ལུ་ཐར་ཀིང་གི་བུ་(Martin Luther King III)ཡིས་འདི་གའི་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་གིས་འཛམ་གླིང་མི་མང་གིས་རང་གི་མ་འོངས་པའི་བུ་ཕྲུག་དེ་དག་གི་ཆེད་ཇི་ལྟར་དོན་དང་ལྡན་པའི་འཇིག་རྟེན་ཞིག་མུ་མཐུད་དུ་བསྐྲུན་དགོས་པའི་དགོངས་ཚུལ་སྐོར་ལ་བཀའ་སློབ་སྩལ་སོང་ལ། ང་དང་ངའི་བཟའ་ཟླ། དེ་བཞིན་བུ་མོ་བཅས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ནས་བཀའ་མོལ་ཞུ་རྒྱུ་བྱུང་བར་དགའ་ཚོར་ཆེན་པོ་བྱུང་། ཞེས་བརྗོད་བྱུང་།

ཡང་ཁོང་གི་སྐུ་ཟླ་(Arndrea Waters King)ལགས་ཀྱིས། ང་ཚོ་དྷ་རམ་ས་ལར་ཡོང་ནས་༧གོང་ས་རྒྱལ་བ་རིན་པོ་ཆེ་མཆོག་གི་བཞུགས་སྒར་དུ་མཇལ་ཁ་ཞུ་རྒྱུ་བྱུང་བར་དགའ་ཚོར་ཆེན་པོ་བྱུང་། འདིར་ཡོད་བའི་བོད་མི་དང་སྣེ་ལེན་ཡག་པོ་གནང་བྱུང་བས་ཐུགས་རྗེ་ཆེ་ཞུ་རྒྱུ་ཡིན། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་ང་ཚོ་ཆོས་ལུགས་དང་། ཤ་མདོག་སོགས་ཀྱིས་དབྱེ་བ་ཕྱེ་ཡོད་པ་མཐོང་གི་ཡོད་ཀྱང་། དེ་དག་གི་གནད་དོན་ཞིག་གཏན་ནས་མིན་པར་ང་ཚོ་ཚང་མ་གཅིག་གྱུར་ཡིན་པའི་འདུ་ཤེས་དེ་གལ་གནད་ཡིན་པ་དང་། ཚང་མས་བྱམས་བརྩེ་ལྡན་པའི་འཇིག་རྟེན་ཞིག་གསར་སྐྲུན་བྱེད་དགོས་པའི་བཀའ་སྩལ་སོང་། ཞེས་བརྗོད་བྱུང་། 

གནད་དོན་དེ་དང་འབྲེལ་ནས་སྐུའི་གསུང་བསྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་ཀྱིས། ཁོང་ཅག་ད་ལན་བཞུགས་སྒར་དུ་ཕེབས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་དགོས་དོན་གཙོ་བོ་ནི། སྐུ་ཞབས་མར་ཊིན་ལུ་ཐར་ཀིང་གི་བསྟི་གནས་ཁང་དང་། ཁེ་ན་ཌའི་ཝན་ཁོ་བར་ཡོད་པའི་ཏཱ་ལའི་བླ་མའི་ལྟེ་གནས་ཁང་གཉིས་ཟུང་འབྲེལ་གྱི་ཐོག་ནས། འཛམ་གླིང་གཞོན་སྐྱེས་རྣམས་ལ་བཟང་སྤྱོད་གོང་མཐོར་གྱི་ཚོགས་འདུ་ཞིག་འཚོགས་ཀྱི་ཡོད་པ་དང་བསྟུན། ༧གོང་ས་རྒྱལ་བ་རིན་པོ་ཆེ་མཆོག་དང་མར་ཊིན་ལུ་ཐར་ཀིང་མཆོག་རྣམ་གཉིས་ཀྱི་འཚེ་མེད་ཞི་བའི་ཐབས་ལམ་སྤེལ་ཐབས་དང་། ༧གོང་ས་རྒྱལ་བ་རིན་པོ་ཆེ་མཆོག་གིས་ནང་སེམས་ཀྱི་ཞི་བདེ་ནང་ནས་འཚོལ་དགོས་པའི་སྐོར་ལ་གསུང་གིན་ཡོད་པ་དག་གོང་མཐོར་སླད་འདིར་ཕེབས་ཡོད་སྐོར་སོགས་གསུངས་བྱུང་། 

གསར་འགོད་པ། དོན་འགྲུབ་བཀྲ་ཤིས། དཔལ་ལྡན།