ཉེ་ལམ་རྒྱ་ནག་གཞུང་གིས་རྒྱ་གར་
ཉེ་སྔོན་ཕྱི་ཟླ ༣ ཚེས་ ༣༠ ཉིན་རྒྱ་ནག་དམངས་སྲིད་ལྷན་ཁང་(Ministry of Civil Affairs) གིས་བོད་ལྷོ་རྒྱུད་ཁུལ་གྱི་ས་ཁུལ་ཁག་ཅིག་ལ་མིང་གསར་པ་བཏགས་ནས་ཁ་གསབ་བྱས་ཡོད་ལུགས་ཀྱི་ཐོ་གཞུང་ཞིག་ཕྱིར་བསྒྲགས་བྱས་ཡོད་པའི་ནང་། རྒྱ་གར་ཨ་རུ་ནཱ་ཅལ་ཁུལ་གྱི་རི་ ༡༢ དང་། རྒྱུག་ཆུ་ ༤། མཚེའུ་ ༡། ལ་ཆུང་ ༡ དང་མི་མང་གནས་སྡོད་བྱ་ཡུལ་ ༡༡ བཅས་སུ་བོད་ཡིག་དང་རྒྱ་ཡིག་ཕིན་ཡེན་ཡོད་པའི་མིང་གསར་པ་བཏགས་ཏེ། རྒྱ་ནག་གི་མངའ་ཁུལ་ཡིན་པའི་ཧམ་བཤད་བྱས་པར་བརྟེན། རྒྱ་གར་གཞུང་གིས་མིང་གསར་པ་བཏགས་པ་ཙམ་གྱིས་མངའ་དབང་ལ་འགྱུར་བ་གཏོང་མི་ཐུབ་པའི་རྒོལ་གཏམ་བསྒྲགས་འདུག
གནད་དོན་དེའི་ཐད་རྒྱ་གར་ཕྱི་སྲིད་བློན་ཆེན་སྐུ་ཞབས་ཇའེ་ཤན་ཁར (Subrahmanyam Jaishankar) མཆོག་གིས། ངས་དེ་རིང་ཁང་པ་ཞིག་གི་མིང་བསྒྱུར་ན། ཁང་པ་དེ་ངའི་ཡིན་ནམ། ཨ་རུ་ནཱ་ཅལ་ནི་གནའ་ནས་རྒྱ་གར་གྱི་མངའ་སྡེ་ཞིག་ཡིན་པས། མིང་གསར་པ་བཏགས་པ་ཙམ་གྱིས་འགྱུར་བ་གཏན་ནས་གཏོང་མི་ཐུབ། ཅེས་གསུངས་འདུག
རྒྱ་གཞུང་གིས་རྒྱ་གར་ཨ་རུ་ནཱ་ཅལ་མངའ་སྡེ་ནི་བོད་ཀྱི་ལྷོ་མོན་ས་ཁུལ་ཡིན་པས་རྒྱ་ནག་གི་མངའ་ཁུངས་ཡིན་ལུགས་ཀྱི་འཁྱོག་བརྗོད་ལན་མང་བྱས་ཡོད་པ་མ་ཟད། འདས་པའི་ལོ་ཤས་རིང་ཨ་རུ་ནཱ་ཅལ་གྱི་ས་གནས་མང་དག་ཅིག་ལ་མིང་གསར་པ་ཐེངས་བཞི་ལ་བཏགས་ནས། ཁུལ་དེའི་རི་ཆུ་ནགས་གསུམ་གྱི་མིང་བསྒྱུར་ཐབས་བྱས་ཡོད་ཅིང་། ད་ལན་ཧ་དོང་ལ་ཟེར་བ་དང་། ཁྲི་ལམ་ཚོ། འབེ་རྩེ་གླིང་། མཁར་མང་ཆུ། མག་སྒོ། རླི་ཚོ། འཁྱགས་བཏུམ་རི། འབྲས་སྤྲུངས་རི། མཐོ་ལྕོག་རི། བདེ་པོ་རི། ཅི་ལོ། མཐོ་པོ་ལ། ཨ་ཤིང་རྩེ་ལ། སྤྲིན་དཀར་ལ། སྤང་སྒོར། མོ་ཤིང་། ཀུན་རིན། རིན་རྐང་། རྟ་སྒ་ལ། གཡང་བཟང་ཆུ། ཉ་མོ་རི་ཆུ། ཆུ་སྒང་། རྡོ་རི། ལུང་འགོ་ཁ་ལ། སྤང་ཁུག་ཆུ་འཛོམས། སོ་ལྟ་མཚོ། ད་བུ་ཧོ་གོང་། ཟླ་བ་སྒང་། གཉའ་ཨ་ཤ་བི་ལ་ཆུ། སྟ་ཀ་ཤིང་ཟེར་བ་སོགས་ལ་མིང་གསར་པ་བཏགས་ཡོད་འདུག
འདས་ལོའི་ཕྱི་ཟླ ༤ ནང་རྒྱ་ནག་རྒྱལ་སྲིད་སྤྱི་ཁྱབ་ཁང་ས་མིང་དོ་དམ་ལྷན་ཁང་ཟེར་བས་བོད་ལྷོ་རྒྱུད་ཁུལ་གྱི་ས་ཁུལ་ཁག་ཅིག་ལ་མིང་བཏགས་ཡོད་ལུགས་ཀྱི་ཐོ་གཞུང་ཞིག་ཕྱིར་བསྒྲགས་བྱས་པའི་ནང་། བོད་མེ་ཏོག་རྫོང་ཁོངས་སུ་མ་ནི་སྒང་དང་། གུ་མིང་ཤིང་རྩེ་རི། གཤེན་གཡོག་མོ་ཆུ། ཏུ་ཏིང་། མིག་ཕན། རྟ་གདོང་། ཆེན་པོ་རི། མདུང་རྩེ་རི་བཅས་དང་། རྫ་ཡུལ་རྫོང་ཁོངས་སུ་མགོ་གླིང་དང་། གཏམས་པ། ཏུ་ལན་ཆུ། དགེ་སྡེའུ་ཆུ། མགོ་ཡུལ་ཐང་། ཉི་མ་སྒང་། དེ་བཞིན་ལྷུན་རྩེ་རྫོང་ཁོངས་སུ་མེ་ལྕག་དང་། ལྕུག་སྨྱུག་རྩེ་གངས་རི། མཚོ་སྣ་རྫོང་ཁོངས་སུ་སེངྒེ་རྫོང་དང་། སྟག་ལུང་རྫོང་། གཟེ་ལ། ཝ་མོ་རི། མདེའུ་རི། ལྷུན་གྲུབ་རི། སྤང་ཆེན། རྒྱང་མཁར་རྫོང་། ལོ་གཟུགས་རི། གཏེ་པོ་རི་བཅས་ཁ་གསབ་བྱས་ཡོད་ལུགས་བརྗོད་དེ། རྒྱ་གར་བྱང་ཤར་ཁུལ་གྱི་ས་གནས་མང་པོ་ཞིག་བོད་མཚོ་སྣ་རྫོང་དང་ལྷུན་རྩེ་རྫོང་། རྫ་ཡུལ་རྫོང་། མེ་ཏོག་རྫོང་བཅས་ཀྱི་ཁོངས་སུ་བཅུག་ཡོད་ལ། དེ་བཞིན་ཕྱི་ལོ་ ༢༠༡༧ ཟླ་ ༤ ཚེས་ ༡༩ ཉིན་རྒྱ་ནག་གཞུང་གིས་ཨ་རུ་ནཱ་ཅལ་ཁུལ་གྱི་ཨོ་རྒྱན་གླིང་དང་མི་ལ་རི། མཆོད་རྟེན་དཀར་པོ་རི། སྨན་ཆུ་ཁ། པུས་མོའི་ལ། ནམ་མཁའ་ཕུབ་རི་བཅས་ཀྱང་རྒྱ་ནག་གི་མངའ་ཁོངས་ཡིན་ལུགས་ཀྱི་དྲིལ་བསྒྲགས་བྱས་ཡོད་པ་མ་ཟད། གྷོ་གྷུལ་ (Google) སོགས་སུའང་ནང་འཇུག་བྱས་འདུག
སྤྱིར་འདས་པའི་ལོ་ཤས་རིང་བོད་ཧིན་མཐའ་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་ལན་མང་བྱུང་ནས་ཕྱོགས་གཉིས་ཀྱི་དམག་དོན་གྱི་འབྲེལ་ལམ་ཇེ་ཞན་དུ་འགྲོ་མུས་ཡིན་པའི་ཁར། ཕྱི་ལོ་ ༢༠༢༢ ལོའི་ཟླ ༡༢ ནང་རྒྱ་གར་གྱི་ཨ་རུ་ནཱ་ཅལ་མངའ་སྡེའི་ཤར་ཕྱོགས་ཡང་རྩེ་ས་ཁུལ་དུ། རྒྱ་དཀར་ནག་གཉིས་ཀྱི་དམག་མི་གདོང་ཐུག་བྱུང་བའི་ཁྲོད། རྒྱ་གར་གྱི་དམག་མི་ ༦ དང་རྒྱ་ནག་གི་དམག་མི་ ༩ ཙམ་རྨས་སྐྱོན་ཕོག་པའི་གནས་ཚུལ་ཐོན་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
མིང་བཏགས་པ་ཡག་པོ་རེད། མ་འོང་པ་བོད་ཀྱི་ས་ཆ་རེད། ད་ལྟ་རྒྱ་མིས་ས་ཆ་གང་མང་བཟའ་ཐུབ་ན་མ་འོང་པ་བོད་ལ་ཁེ་སོང་རག་བ་རེད། རྒྱ་གར་ལ་མགོ་མཏགས་ཕྲག་ན་སྐྱོན་ཡོད་རོད་ད།