རྒྱ་ནག་གཞུང་གིས་ཨ་ཚོགས་དགོན་བདེ་ཆེན་ཆོས་འཁོར་གླིང་གནས་སྤོར་བྱེད་མགོ་བརྩམས་འདུག

རྒྱ་ནག་གཞུང་གིས་རྨ་ཆུའི་རྒྱུད་དུ་ཆུ་གློག་ས་ཚིགས་རྒྱག་བཞིན་པ་དང་བསྟུན་ཨ་ཚོགས་དགོན་དངོས་སུ་གནས་སྤོར་བྱེད་མགོ་བཙུགས་ཡོད་པ་དང་ཐང་ནག་སྡེ་བ་སྟོད་སྨད་བར་གསུམ་གནས་སྤོར་བྱེད་པའི་བཙན་བཀའ་བཏང་ཡོད་འདུག

རྒྱ་ནག་གཞུང་གིས་བོད་མཚོ་ལྷོ་ཁུལ་བྲག་དཀར་རྫོང་ཁོངས་ཀྱི་དཀར་མོ་གཡས་འཁྱིལ་རྨ་ཆུའི་འགྲམ་བརྒྱུད་དུ་གཡང་འཁྱིལ་ཆུ་གློག་ས་ཚིགས་ཟེར་བ་ཞིག་རྒྱག་བཞིན་ཡོད་པའི་རྐྱེན་གྱིས། ཉེ་འགྲམ་དུ་ཆགས་པའི་ཨ་ཚོགས་དགོན་བདེ་ཆེན་ཆོས་འཁོར་གླིང་དཔལ་ཁ་གྲོང་རྡལ་ནས་སྤྱི་ལེ་གསུམ་བཞི་ཙམ་གྱི་མཚམས་སུ་ཡོད་པའི་ཁྱོ་དཀར་ནག་ལོ་ཞེས་པའི་རི་སྣ་ཞིག་ཡོད་པ་དེར་གནས་སྤོར་དགོས་པའི་བཀའ་བཏང་ཡོད་པ་ལྟར། ཉེ་ལམ་རྒྱ་གཞུང་གིས་རྨ་ཆུའི་གཡང་འཁྱིལ་ཆུ་གློག་ས་ཚིགས་བྲག་དཀར་རྫོང་ཨ་ཚོགས་དགོན་པ་གནས་སྤོར་བྱེད་པའི་བཟོ་སྐྲུན་མཛད་སྒོ་ཟེར་བ་ཞིག་བསྡུས་ཏེ། ཨ་ཚོགས་དགོན་པ་དངོས་སུ་གནས་སྤོར་མགོ་བརྩམས་ཡོད་པ་མ་ཟད། ཆུ་གློག་ས་ཚིགས་འཛུགས་སྐྲུན་དང་འབྲེལ་ནས་ཉེ་འཁྲིས་ཀྱི་ཐང་ནག་སྟོད་སྨད་བར་གསུམ་གྱི་ཁྱིམ་ཚང་ ༡༠༨༥ ཡི་མི་གྲངས་ ༤༥༥༤ གནས་སྤོར་བྱེད་དགོས་པའི་བཀའ་བཏང་ཡོད་འདུག

རྒྱ་ནག་གཞུང་གིས་ཨ་ཚོགས་དགོན་པ་རིག་དངོས་སྲུང་སྐྱོབ་སྡེ་ཚན་ཁོངས་ནས་རྩིས་མེད་བཏང་བའི་གསལ་བསྒྲགས་ཤིག་སྤེལ་བའི་ནང་དུ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རིག་དངོས་སྲུང་སྐྱོབ་བཅའ་ཁྲིམས་དང་རིག་དངོས་ངོས་འཛིན་དོ་དམ་གནས་སྐབས་ལག་བསྟར་བྱེད་ཐབས་ཀྱི་འབྲེལ་ཡོད་གཏན་འབེབས་ལྟར། ཆེད་མཁས་གདན་འདྲེན་ཞུས་ནས་ཡུལ་དངོས་ཞིབ་དཔྱད་དང་རྒྱུ་ཆ་ཀློག་པ། གྲྭ་བཙུན་དང་ཆོས་དད་མང་ཚོགས་ཁྲོད་སོང་ནས་འདྲི་རྩད་བྱེད་པ། འབྲེལ་ཡོད་ལས་ཁུངས་ལ་བསམ་འཆར་བསྡུ་ལེན། ཞིབ་དཔྱད་གྲོས་ཚོགས་ཚོགས་པ་བཅས་ཀྱི་བྱེད་ཐབས་སྤྱད་ནས་ཨ་ཚོགས་དགོན་ད་ཡོད་ཀྱི་ཚོགས་ཆེན་འདུ་ཁང་དང་བྱམས་ཁང་གཉིས་ནི་དེང་རབས་ཀྱི་གནའ་སྲོལ་ལད་བཟོས་ཡིན་ཞིང་། ངེས་པ་དོན་གྱི་རིག་དངོས་འཛུགས་སྐྲུན་དུ་ངོས་འཛིན་བྱེད་པའི་ཚད་གཞིར་ཐོན་མེད་པས། ཨ་ཚོགས་དགོན་གྱི་རྫོང་རིམ་པའི་རིག་དངོས་སྲུང་སྐྱོབ་སྡེ་ཚན་གྱི་ཐོབ་ཐང་རྩིས་མེད་གཏོང་བའི་གྲོས་གཞི་བཏོན། རྫོང་རིག་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུས་ཀྱིས་ཞིབ་འཇུག་བྱས་ཏེ་རྫོང་སྲིད་གཞུང་གི་ཐེངས་ ༢༢ པའི་རྒྱུན་ལས་གྲོས་ཚོགས་ལ་སྙན་ཞུ་ཞུས་ནས་གྲོས་འཆམ་བྱུང༌། བྲག་དཀར་རྫོང་ཨ་ཚོགས་དགོན་གྱི་རྫོང་རིམ་པའི་རིག་དངོས་སྲུང་སྐྱོབ་སྡེ་ཚན་རྩིས་མེད་གཏོང་རྒྱུ་ཡིན། ཞེས་འཁོད་འདུག

གཡང་འཁྱིལ་ཆུ་གློག་ས་ཚིགས་ཟེར་བ་དེ་ཕྱི་ལོ་ ༢༠༢༡ ཟླ་ ༡༢ བའི་ཚེས་ ༢༦ ཉིན་ནས་སྔ་རྗེས་སུ་རྟོག་ཞིབ་རུ་ཁག་བསླེབས་ནས་ཞིབ་འཇུག་དང་རྒྱུས་ལོན་བྱེད་འགོ་བཙུགས་ཡོད་པ་དང་། ཆུ་གློག་འཛུགས་སྐྲུན་གྱི་འགན་གཙོ་བོ་རྨ་ཆུ་ཀུང་སི་ཟེར་བ་ཞིག་གིས་འཁུར་ཡོད་འདུག  རྒྱ་ནག་གཞུང་ཕྱོགས་ནས་ལས་གཞི་དེ་ནི་རྒྱལ་ཁབ་འཕེལ་འགྱུར་ཨུ་ཡོན་ལྷན་ཁང་ཟེར་བ་དེས་ཆུ་གློག་ས་ཚུགས་ཀྱི་ལས་གཞི་དེར་ཆོག་མཆན་སྤྲད་ཡོད་ལུགས་དང་། ཕྱི་ལོ་ ༢༠༢༢ ནས་ ༢༠༢༣ བར་འཆར་གཞི་ལྟར་དུ་འཛུགས་སྐྲུན་ལེགས་འགྲུབ་བྱུང་དགོས་ལུགས་དྲིལ་བསྒྲགས་བྱས་འདུག

ཆུ་གློག་ས་ཚིགས་དེ་མཚོ་ལྷོ་ཁུལ་བྲག་དཀར་རྫོང་དང་མང་ར་རྫོང་གཉིས་མཚམས་ཀྱི་དཀར་མོ་གཡས་འཁྱིལ་ཞེས་པའི་ལུང་གཞོང་དུ་རྒྱུ་བའི་རྨ་ཆུའི་འགྲམ་རྒྱུད་དུ་འཛུགས་སྐུན་བྱེད་བཞིན་ཡོད་པ་དང་། རྒྱ་ནག་གཞུང་ཕྱོགས་ཀྱི་དྲིལ་བསྒྲགས་ནང་དུ། ཆུ་མཛོད་དེའི་ཤོངས་ཚད་སྟོང་ཝ་ཁྲི་ ༡༢༠  དང་། ཆུ་གློག་ས་ཚིགས་ལེགས་གྲུབ་བྱུང་རྗེས་ཆུ་ཚོད་རེ་སྟོང་ཝ་ཁྲི་ ༤༧།༣༢ གཏང་རྒྱུ་ཡིན་ལུགས་བརྗོད་འདུག

ཨ་ཚོགས་དགོན་བདེ་ཆེན་ཆོས་འཁོར་གླིང་ནི་མཚོ་ལྷོ་བྲག་དཀར་རྫོང་དཔལ་ཁ་གྲོང་རྡལ་དཀར་མོ་གཡས་འཁྱིལ་རྨ་ཆུའི་འགྲམ་དུ་ཆགས་ཡོད་པ་དང་། དགོན་པ་དེ་ནི་ཕྱི་ལོ་༡༨༨༩ ལོར་ཨ་ཚོགས་མཆོག་སྤྲུལ་དཀོན་མཆོག་ཆོས་དར་མཆོག་གིས་ཕྱག་བཏབ་པ་ཞིག་ཡིན་འདུག  ད་ལྟ་དགོན་པ་དེར་སློབ་གཉེར་གནང་མཁན་དགེ་འདུན་པ་ཞལ་གྲངས་ ༡༥༧ ལྷག་ཡོད་ཅིང་། ཕྱི་ལོ་༢༠༢༡ ལོའི་སྟོན་མཇུག་ནས་བཟུང་རྒྱ་གཞུང་གིས་རང་ལོ་༡༨ མ་ཟིན་པའི་དགེ་འདུན་པ་རྣམས་དགོན་པར་འཛུལ་ཞུགས་མི་ཆོག་པ་བཟོས་ཡོད་འདུག  ཕྱི་ལོ་༢༠༡༤ ནས་༢༠༡༧ བར་རྒྱ་གཞུང་གིས་དཀར་མོ་གཡས་འཁྱིལ་གྱི་ཟམ་ཆེན་བསྐྱར་དུ་འཛུགས་སྐྲུན་བྱས་ཏེ། མང་ཚོགས་ཀྱི་འགྲིམ་འགྲུལ་སྐྱེལ་འདྲེན་དང་དཔལ་འབྱོར་འདུ་འགོད་ལ་ཕན་ཐོགས་ཆེ་ལུགས་བཤད་དེ། ཟམ་པ་རྒྱ་ཆེ་རུ་བཏང་ཡོད་ནས་ཆུ་གློག་ས་ཚིགས་འཛུགས་སྐྲུན་ལ་སྟབས་བདེ་བསྐྲུན་ཡོད་འདུག

གསར་འགོད་པ། བྱམས་པ་ཚེ་རིང་།