རྒྱལ་གཅེས་དཔའ་བོ་དཔའ་མོ་རྗེས་དྲན་སིལ་སྤོལ་འགྲན་བསྡུར་གྱི་རྒྱལ་ཁ་དེ་བོད་དམག་དང་མུན་སེལ་རུ་ཁག་གཉིས་ལ་ཐོབ་སོང་།
དེ་རིང་ཕྱི་ཚེས་ ༣༠ ཉིན་གྱི་ཕྱི་དྲོར་བོད་ཀྱི་གཞོན་ནུ་ལྷན་ཚོགས་དང་ངྷ་ས་ས་གནས་གཞོན་ནུའི་གོ་སྒྲིག་བྱས་པའི་༼དཔའ་བོ་དཔའ་མོ་རྗེས་དྲན་སིལ་སྤོལ་འགྲན་བསྡུར།༽ གྱི་མཐའ་མའི་རྟིང་རྩོད་འགྲན་བསྡུར་ཁྲོད། སྐྱེས་པའི་བོད་དམག་རུ་ཁག་དང་། བུད་མེད་ཀྱི་མུན་སེལ་རུ་ཁག་གཉིས་ལ་རྒྱལ་ཁ་ཐོབ་སྟེ། ཧིན་སྒོར་ཁྲི་ལྔ་རེ་ཡི་བྱ་དགའ་ཐོབ་ཡོད་ཅིང་། སྐྱེས་པའི་རྩེད་འགྲན་པ་ཀུན་བཟང་ལྷུན་གྲུབ་ལགས་དང་དང་བུད་མེད་ཀྱི་བདེ་སྐྱིད་དཔལ་མོ་ལགས་གཉིས་ལ་རྩེད་འགྲན་པ་ཡག་ཤོས་ཀྱི་བྱ་དགའ་བཅས་ཐོབ་སོང་།
དེ་བཞིན་ཤེས་རབ་དགའ་ཚལ་གླིང་གི་རུ་ཁག་ལ་སྤྱོད་ལམ་ཡག་ཤོས་ཀྱི་རུ་ཁག་གི་བྱ་དགའ་ཐོབ་ཡོད་པ་མ་ཟད། མཐའ་མའི་རྟིང་རྩོད་འགྲན་ཚོགས་ལས་འགྲན་ཕམ་བྱུང་བའི་སྐྱེས་པའི་གངས་ཅན་པ་རུ་ཁག་དང་། བུད་མེད་ཀྱི་ང་དགུའི་རུ་ཁག་གཉིས་ལ་ཧིན་སྒོར་ཁྲི་གསུམ་རེ་ཐོབ་སོང་།
སྐབས་འདིའི་སིལ་སྤོལ་རྩེད་འགྲན་ཐེངས་ཉེར་གཅིག་པའི་ནང་། རྒྱ་གར་གྱི་ས་གནས་འདྲ་མིན་ནས་སྐྱེས་པའི་སིལ་སྤོལ་རུ་ཁག་ ༡༢ དང་བུད་མེད་རུ་ཁག་ ༤ བཅས་ཁྱོན་རུ་ཁག་ ༡༦ གིས་མཉམ་ཞུགས་གནང་ཡོད་ཅིང་། ངྷ་ས་ས་གནས་གཞོན་ནུའི་གོ་སྒྲིག་གནང་བཞིན་པའི་སིལ་སྤོལ་འགྲན་བསྡུར་དེ་ནི། སྤྱི་ལོ་ ༡༩༨༠ ལོ་ཡས་མས་སུ་རྩེད་མོའི་རྣམ་པའི་ཐོག་མགོ་འཛུགས་གནང་བ་ཞིག་ཡིན་པ་དང་། ༢༠༡༠ ལོར་ངྷ་ས་ས་གནས་གོ་སྒྲིག་འོག་ ༼དཔའ་བོ་དཔའ་མོ་རྗེས་དྲན་སིལ་སྤོལ་འགྲན་བསྡུར།༽ བསྒྱུར་རྗེས་དཔའ་བོའི་རྗེས་དྲན་དང་གཞོན་སྐྱེས་ཚོའི་མཐུན་ལམ་བཅས་ལ་དམིགས་ཏེ་མུ་མཐུད་རྒྱུན་སྐྱོང་བཞིན་ཡོད་འདུག
གསར་འགོད་པ། དཔལ་ལྡན།
