ཚེ་རིང་རྣམ་རྒྱལ་གྱིས་བསྒྱུར།
བོད་ཀྱི་བུད་མེད་སྐལ་བཟང་དཔལ་སྒྲོན་ལགས་ཀྱིས་རྒྱ་ནག་བཅིངས་འགྲོལ་དམག་ནང་ལྕགས་ཁྲབ་འཐབ་འཁོར་དང་དམག་གི་གྲུ་གཟིངས་བཏང་མྱོང་ཡོད་པ་མ་ཟད། མེ་ཤུགས་འཕུར་མདའི་ལས་དོན་ཚན་པའི་ནང་དུའང་ལས་ཀ་བྱེད་མྱོང་ཡོད་འདུག ད་ལྟའི་ཆར་ཁོང་མོ་རྒྱ་ནག་བཅིངས་གྲོལ་མཁའ་དམག་གི་འཐབ་འཁྲུག་གནམ་གྲུའི་ཁ་ལོ་བ་ཞིག་ཡིན་འདུག
རང་ལོ་ ༢༣ ལྷག་ལས་སོན་མེད་པའི་སྐལ་བཟང་དཔལ་སྒྲོན་ལགས་ནི་ཕྱི་ལོ་ ༢༠༠༠ ལོར་བོད་རང་སྐྱོང་ལྗོངས་ལྷོ་ཁ་གྲོང་ཁྱེར་ནང་སྐྱེས་ཤིང་ཆུང་དུས་ས་གནས་སུ་སློབ་ཆུང་འགྲིམས། དམའ་འབྲིང་གི་སྐབས་སུ་ཕ་ཡུལ་བོད་ནས་རྒྱ་ནག་པེ་ཅིན་དུ་ཕྱིན། དེ་ཡང་ཕྱི་ལོ་ ༡༩༨༤ ལོ་ཙམ་ནས་བཟུང་རྒྱ་ནག་གཞུང་གིས་པེ་ཅིན་དང་ཐེན་ཅིན། ཧྲང་ཧེ། ཧུའུ་པེ། ལོའུ་ལིན། ཅང་སུའུ། ཀྲི་ཅང་། ཧྥུ་ཅན། ཧྲན་ཏུང་། ཧའེ་ནན། ཧུའུ་ནན། ཧུའུ་པའེ། ཀང་ཏུང་། སི་ཁྲོན། ཧྲན་ཞི། ཁྲུང་ཆིན་སོགས་ཞིང་ཆེན་དང་གྲོང་ཁྱེར་ ༡༦ ཏུ་བོད་ལྗོངས་འཛིན་གྲྭའམ་སློབ་འབྲིང་ཞེས་པ་བཙུགས་ཏེ། བོད་ཁུལ་གྱི་བྱིས་པ་ཁྲི་ ༡༤ ལྷག་རྒྱ་ནག་གི་གྲོང་ཁྱེར་ཁག་ཏུ་ཁྲིད་ཕྱིན་ཡོད་པ་ལྟར། སྐལ་བཟང་དཔལ་སྒྲོན་ལགས་ཀྱང་བོད་མཐོ་སྒང་གི་གྲོང་ཁྱེར་ལྷོ་ཁ་ནས་པེ་ཅིན་བོད་ཀྱི་སློབ་འབྲིང་དུ་བཅུག་འདུག ཕྱི་ལོ་ ༢༠༡༧ ལོར་ཁོང་མོ་སློབ་འབྲིང་དེར་ཡོད་སྐབས། སློབ་ཕྲུག་རྒན་པ་ཁག་ཅིག་ལ་མཁའ་དམག་གནམ་གྲུའི་རིག་རྩལ་མཐོ་སློབ་ཏུ་སློབ་སྦྱོང་བྱེད་ཀྱི་ཡོད་པ་ཤེས་རྗེས། བུ་མོ་ཆུང་ཆུང་དེའི་སེམས་སུ་ནམ་ཡང་འགྲུབ་མི་ཐུབ་པ་ལྟ་བུའི་རྨི་ལམ་ཞིག་བྱུང་།
སྐལ་བཟང་ལགས་ཀྱིས། མཁའ་དམག་གནམ་གྲུའི་ཁ་ལོ་བ་ནི་རྒྱལ་ཁ་ཞིག་ཡིན་པ་དང་། ང་རང་མཁའ་དམག་གནམ་གྲུའི་ཁ་ལོ་བ་བྱེད་འདོད་ཡོད་ལ། ཕ་ཡུལ་གྱི་གནམ་སྔོན་པོའང་སྐྱོབ་ཐུབ། ཡིན་ནའང་ང་རང་བུ་མོ་དཀྱུས་མ་ཞིག་ཡིན་པའི་ཆ་ནས་རེ་བ་དེ་ནི་ཐག་རིང་གི་རྨི་ལམ་ལྟ་བུ་ཞིག་རེད། ཅེས་བརྗོད་འདུག་ལ། རྒྱ་ནག་གི་བུད་མེད་མཁའ་སྐྱོད་པ་ཐེངས་དང་པོར་གྲགས་པའི་ལིའུ་ཡང་ (Liu Yang) དང་ཝང་ཡ་ཕིང་ (Wang Yaping)གཉིས་ཀྱིས་ཁོ་མོའི་རྨི་ལམ་ལ་གསོན་ཤུགས་རྒྱས་སུ་བཅུག་པར་བཤད།
ཕྱི་ལོ་ ༢༠༡༩ ལོར་སྐལ་བཟང་དཔལ་སྒྲོན་གྱི་རྒན་ལགས་ཀྱིས། ཅི་ལིན་ཞིང་ཆེན་གྱི་ཁྲང་ཁྲུན་ (changchun) གྲོང་ཁྱེར་དུ་ཡོད་པའི་མཁའ་དམག་གནམ་གྲུའི་མཐོ་རིམ་སློབ་གཉེར་ཁང་གིས། བུད་མེད་མཁའ་དམག་གནམ་གྲུའི་ཁ་ལོ་བ་བསྡུ་བའི་གསལ་བསྒྲགས་ཤིག་ཡོད་སྐོར་བཤད་དེ། དོ་དབྱིངས་ཡོད་པའི་སློབ་ཕྲུག་རྣམས་ཀྱིས་ཐོ་འགོད་བྱ་དགོས་པའི་སྐུལ་མ་བཏང་། སྐབས་དེར་སྐལ་བཟང་དཔལ་སྒྲོན་ལགས་ཀྱིས་ལམ་སེང་ཕ་མ་གཉིས་ལ་དམག་སྦྱོང་དེའི་ནང་ཞུགས་ན་ཆོག་མིན་དྲིས་པར་ཕ་མ་གཉིས་ཀྱིས་མོས་མཐུན་གནང་བ་མ་ཟད། མཉམ་ཞུགས་བྱེད་དགོས་པའི་སྐུལ་མ་གནང་། སྐལ་བཟང་ལགས་དགའ་ཐག་ཆོད་དེ་རྒན་ལགས་ཀྱི་སར་ཕྱིན་ནས་ཐོ་འགོད་བྱ་རྒྱུ་ཡིན་ལ། སྔོན་འགྲོའི་ཡིག་རྒྱུགས་ལ་གྲ་སྒྲིག་བྱ་རྒྱུ་ཡིན་པའི་སྐོར་ཡང་བཤད།
ལོ་དེའི་འདེམས་རྒྱུགས་ཁྲོད་རྒྱ་ནག་རྒྱལ་ཡོངས་ཀྱི་གཞོན་སྐྱེས་སློབ་མ་བུ་མོ་ ༢༠༠ ལྷག་མཉམ་ཞུགས་བྱས་ཡོད་པའི་ཁྲོད་ནས་བུ་མོ་ ༤༠ འདེམས་སྒྲུག་བྱས་ཡོད་པ་དང་། སྐལ་བཟང་དཔལ་སྒྲོན་ལགས་ཀྱིས་དེ་རུ་ཡིག་རྒྱུགས་ཆ་ཚང་འཕྲོད་པ་མ་ཟད། རྒྱལ་སྤྱིའི་མཐོ་སློབ་ཀྱི་འཛུལ་ཞུགས་ཡིག་རྒྱུགས་ནང་དུའང་ཨང་རིམ་མཐོ་བོ་བླངས་ཏེ། ཕྱི་ལོ་ ༢༠༡༩ ཟླ་ ༨ ཚེས་ ༡ ཉིན་སྐལ་བཟང་ལགས་དམག་དོན་གནམ་གྲུའི་མཐོ་སློབ་ཏུ་ཚུད།
སྐལ་བཟང་དཔལ་སྒྲོན་ལགས་ཀྱིས། ད་ལྟ་ང་རང་ལ་གཤོག་པ་ཡོད། མཁའ་དམག་གནམ་གྲུའི་ཁ་ལོ་བའི་ཡིག་རྒྱུགས་འཕྲོད་དེ། ཉིན་གཅིག་ང་རང་མཁའ་དམག་གནམ་གྲུའི་ཁ་ལོ་བ་ཆགས་རྒྱུའི་ཕུགས་འདུན་འགྲུབ་པར་ཐག་ཉེ་རུ་ཕྱིན་སོང་། ཞེས་བརྗོད་འདུག་ལ། ཁོང་མོ་ནི་རྒྱ་ནག་གི་མཁའ་དམག་གནམ་གྲུའི་སྐོར་སློབ་སྦྱོང་བྱེད་མཁན་བོད་རིགས་བུད་མེད་དང་པོ་དེ་ཆགས་ཡོད་པ་རེད།
བཙན་བྱོལ་བོད་མིའི་ཁྲོད་ཕྱི་རྒྱལ་གྱི་ཡུལ་ལུང་ག་གེ་མོའི་གནམ་གྲུའི་ཁ་ལོ་བ་དང་ལག་རོགས། ཞབས་ཕྱི་བ་སོགས་གནང་མཁན་གང་ཙམ་རེ་ཡོད་སྐོར་གོ་ཐོས་བྱུང་ཡང་། འཛམ་གླིང་གི་མི་འབོར་མང་ཤོས་གཉིས་པ་དང་གྲངས་ཉུང་མི་རིགས་ཞེས་དམའ་འབེབ་དང་མཐོང་ཆུང་བྱེད་སའི་བོད་ཀྱི་བུ་མོ་ཞིག་རྒྱའི་མཁའ་དམག་གནམ་གྲུའི་ཁ་ལོ་བ་ཞིག་ཏུ་གྱུར་བ་ནི་བོད་མི་རིགས་ཀྱི་སྤོབས་པ་ཡིན་ཆོག་ངེས་རེད།
