རྒྱ་གར་ནང་འོས་བསྡུ་བྱེད་བཞིན་པའི་སྐབས་འདིར་བྷི་ཇེ་ཕུའི་འོས་མི་ཀང་གྷ་ནཱ་སྤི་ཏི་ཁུལ་དུ་བསླེབས་སྐབས་ས་གནས་མི་མང་ཁག་ཅིག་གིས་ངོ་རྒོལ་བྱས་ཏེ་འོས་བསྡུའི་དྲིལ་བསྒྲགས་བྱེད་བཅུག་མེད་པ་རེད།
འདི་ལོའི་རྒྱ་གར་རྒྱལ་ཡོངས་འོས་བསྡུ་ཆེན་མོའི་ནང་ཧི་མ་ཅལ་མངའ་སྡེའི་མན་ཌི་ (Mandi) ས་ཁུལ་ནས་བྷི་ཇེ་ཕུ་ (BJP) ཆབ་སྲིད་ཚོགས་པའི་གྲོས་ཚོགས་འོག་མའི་འཐུས་མིར་ལངས་མུས་ཡིན་པའི་རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ཀང་གྷ་ནཱ་ (Kangana Ranaut) ཧི་མ་ལ་ཡའི་རི་རྒྱུད་སྤི་ཏི་ས་ཁུལ་དུ་འབྱོར་སྐབས། སྤི་ཏི་མི་མང་གིས་འཕྲེད་དར་ནག་པོ་འཕྱར་ནས་ཀང་གྷ་ནཱ་ལ་ངོས་ལེན་མེད་པའི་རྣམ་འགྱུར་ཤུགས་ཆེན་བསྟན་ཞིང་། ཀང་གྷ་ནཱ་ཡིས་ཀྱང་སྤི་ཏི་ས་ཁུལ་དུ་འོས་བསྡུའི་དྲིལ་བསྒྲགས་བྱེད་མ་ཐུབ་པར་ཕྱིར་ལོག་དགོས་བྱུང་བའི་གནས་ཚུལ་ཐོན་འདུག
དེ་འབྲེལ་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ཐེངས་འདིར་སྤི་ཏི་མི་མང་གིས་ཀང་གྷ་ནཱ་ལ་ངོ་རྒོལ་བྱེད་དགོས་དོན་གཙོ་བོ་ནི། འདས་ལོར་ཀང་གྷ་ནཱ་ཡིས་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་སྨད་ཞུས་པ་ལ་བརྟེན་ནས་བྱུང་སྐོར་བརྗོད་འདུག་ལ། ཁོང་ཚོས་ལག་ཏུ་འཕྲེད་དར་ནག་པོ་བཟུང་ནས་ཀང་གྷ་ནཱ་ཕར་ལོག་དགོས་ཞེས་ངོ་རྒོལ་སྐད་འབོད་བརྒྱབ་ཡོད་པ་རེད། འོན་ཀྱང་། བྷི་ཇེ་ཕུ་སྲིད་དོན་ཚོགས་པས། གནད་དོན་དེ་ནི་ཁ་གཏད་དམངས་གཙོ་སྲིད་དོན་ཚོགས་པས་འདྲ་མཉམ་གྱི་འོས་བསྡུའི་དྲིལ་བསྒྲགས་ཀྱི་སྡིངས་ཆར་ཆེད་དུ་གནོད་སྐྱོན་བཟོས་པའི་ངོས་འཛིན་འོག ཧི་མ་ཅལ་མངའ་སྡེའི་འོས་བསྡུའི་འགན་འཛིན་ནས་སྤི་ཏི་ཁུལ་གྱི་འོས་བསྡུའི་ལས་བྱེད་ཚོ་འཕོ་འགྱུར་གཏོང་དགོས་པའི་ཞུ་གཏུགས་དང་སྐྱོན་བརྗོད་གནང་ཡོད་པ་རེད།
དོན་རྐྱེན་དེ་དང་འབྲེལ་ནས་ཧི་མ་ཅལ་མངའ་སྡེའི་བྷི་ཇེ་ཕུ་སྲིད་དོན་ཚོགས་པའི་མགོ་ཁྲིད་ཇའེ་རམ་ཐ་ཀོར་ལགས་ཀྱིས། སྤི་ཏིའི་ཁུལ་དུ་ཆབ་སྲིད་ཚོགས་པ་གཉིས་ཀྱི་འོས་མིར་དྲིལ་བསྒྲགས་བྱེད་པའི་སྡིངས་ཆ་འདྲ་མཉམ་བསྐྲུན་ཡོད་ཀྱང་། དམངས་གཙོ་ཚོགས་པས་ད་སྔ་བར་བྱུང་མྱོང་མེད་པའི་བྱ་སྤྱོད་སྤེལ་ཏེ། བྷི་ཇེ་ཕུར་འོས་བསྡུའི་དྲིལ་བསྒྲགས་བྱེད་པའི་སྡིངས་ཆ་བཀག་འགོག་བྱས་པ་ནི་ཧ་ཅང་བློ་ཕམ་དགོས་པའི་གནས་ཤིག་ཡིན། ཞེས་དང་། གནས་སྟངས་དེའི་འོག་ནས་འོས་བསྡུའི་རང་དབང་དང་འདྲ་མཉམ་ལ་དོ་ཕོག་གཏོང་གི་ཡོད་པའི་སྐྱོན་བརྗོད་བྱས་ཡོད་འདུག
ལ་ཧོར་དང་སྤི་ཏིའི་སྤྱི་ཁྱབ་ཉེན་རྟོག་དཔོན་མཱ་ཡནྒ་ (Mayank Chowdhary) ཡིས། སྐབས་དེར་སྲིད་དོན་ཚོགས་པ་གཉིས་ཀྱི་རྒྱབ་སྐྱོར་བ་ས་ཁུལ་དེར་འཛོམས་ཡོད་ཀྱང་། ཕན་ཚུན་བར་གདོང་ཐུག་ཤོར་མེད། སྟབས་མ་ལེགས་པར་མི་ཞིག་གི་རྐང་ཚིགས་རྫོགས་ཡོད། ཅེས་བརྗོད་འདུག་ལ། དམངས་གཙོ་ཚོགས་པའི་འོས་མི་སིན་ (Vikramaditya Singh)གྱིས། ཀང་གྷ་ནཱ་ཡིས་༧གོང་ས་མཆོག་ལ་མཚན་སྨད་ཞུས་པར་སྤི་ཏིའི་མི་མང་གི་སེམས་སུ་རྨ་ཁ་ཆེན་པོ་བཟོས་འདུག ངས་བསམ་ན་ཀང་གྷ་ནཱ་ཡིས་ལྷག་བསམ་རྣམ་དག་གི་ཐོག་ནས་༧གོང་ས་མཆོག་ལ་དགོངས་སེལ་ཞུ་དགོས་ཀྱི་འདུག་ཅེས་བརྗོད་འདུག
སྤྱིར་འདས་ལོའི་ཕྱི་ཟླ་ ༤ པའི་ནང་༸གོང་ས་མཆོག་གི་བྱམས་བརྩེའི་མཛད་པར་གཞི་མེད་བསྙོན་འཛུགས་ཀྱིས་ཆེད་བཟོ་བྱས་པའི་བརྙན་ཐུང་ཞིག་དང་འབྲེལ་ཏེ། ཀང་གྷ་ནཱ་ཡིས་རང་ཉིད་ཀྱི་སྤྱི་ཚོགས་དྲ་ལམ་དུ། ༸གོང་ས་མཆོག་གི་སྐུ་པར་དང་བྷའེ་ཌན་(Joe Biden) གཉིས་སྒྲིག་སྦྱོར་བྱས་པ་ཞིག་འགྲེམས་སྤེལ་བྱས་ནས་ཟུར་ཟ་བྱས་ཡོད་པ་དང་། སྐབས་དེར་བོད་མི་རྣམས་གཙོ་བྱས་པའི་ཧི་མ་ལ་ཡའི་རི་རྒྱུད་པ་སོགས་འཛམ་གླིང་ཡུལ་གྲུ་གང་སར་གནས་པའི་ནང་པ་སོགས་མི་གྲངས་ས་ཡ་མང་པོས་ངོ་རྒོལ་ལས་འགུལ་སྤེལ་བའི་ཁྲོད། ཀང་གྷ་ནཱ་ལའང་ངོ་རྒོལ་བྱེད་མཁན་མང་པོ་བྱུང་ཡོད་ལ། སྐབས་དེར་ཁོང་མོས་རང་ཉིད་ཀྱི་ (Instagram) དྲ་ལམ་ཐོག་གསལ་བཤད་གནང་བའི་ནང་། རྩེད་མོ་དང་སྦྲགས་ནས་དེ་ལྟར་བྱས་པར་བསམ་ཤེས་གནང་རོགས་ཞེས་དང་། ཁོང་རང་ཉིད་སངས་རྒྱས་ཀྱི་གསུང་རབ་ལ་ཡིད་ཆེས་བྱེད་མཁན་ཞིག་ཡིན་པ་མ་ཟད། ༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གིས་སྐུ་ཚེ་ཧྲིལ་པོར་མི་མང་གི་བདེ་དོན་སླད་མཛད་འཁུར་བཞེས་ཡོད་ཅེས་དང་། ངས་སུ་ལ་ཡང་འཁོན་འཛིན་བྱས་མེད་ཅེས་འགྲེལ་བརྗོད་བྱས་ཡོད་པ་རེད།
དེ་བཞིན། ཕྱི་ཟླ་ ༤ ཚེས་ ༡༥ ཉིན་གློག་བརྙན་འཁྲབ་སྟོན་མ་གྲགས་ཅན་ཀང་གྷ་ནཱ་ (Kangana Ranaut) དང་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་རྗེ་རམ་ (Jai Ram Thakur) ལགས་རྣམ་གཉིས་བཞུགས་སྒར་རྒྱལ་བའི་ཕོ་བྲང་དུ་ཆེད་བཅར་གྱིས། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཡོད་ལ། མཇལ་ཁ་གྲུབ་རྗེས་ཀང་གྷ་ནཱ་ཡིས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ལ་དངོས་སུ་མཇལ་བཅར་ཞུ་རྒྱུ་བྱུང་བར་དགའ་ཚོར་ཆེན་པོ་བྱུང་ལ། ངའི་མི་ཚེ་ནང་ཆེས་ཁྱད་པར་ཅན་གྱི་དུས་ཚེས་ཤིག་ཡིན། ཞེས་བརྗོད་ཡོད།
གསར་འགོད་པ། སྐལ་བཟང་སྦྱིན་པ།
