ཐའེ་ཝན་གྱི་སྲིད་འཛིན་གསར་པར་འཚམས་འདྲི་མཛད།

༧གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་གྱི་སྲིད་འཛིན་གསར་པ་སྐུ་ཞབས་ལེ་ཆིན་ཏི་མཆོག་ལ་འཚམས་འདྲི་དང་སྦྲགས་ཐའེ་ཝན་མི་མང་གི་རེ་བ་དང་མངོན་འདོད་བསྒྲུབ་པར་འཕྲད་པའི་དཀའ་ངལ་ཡོངས་རྫོགས་ལ་གདོང་ལེན་གནང་ཐུབ་པའི་ཐུགས་སྨོན་མཛད་འདུག

ཁ་སང་ཕྱི་ཚེས་ ༢༠ ཉིན་ཐའེ་ཝན་གྱི་སྲིད་འཛིན་སྐུ་ཞབས་ལེ་ཆིན་ཏི་(賴清德) མཆོག་གིས་སྲིད་འཛིན་གྱི་ལས་ཁུར་དངོས་སུ་ཞུས་ཡོད་པ་ལྟར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སྲིད་འཛིན་ལེ་ཆིན་ཏི་མཆོག་ལ་འཚམས་འདྲིའི་གསུང་འཕྲིན་བསྩལ་འདུག

གསུང་འཕྲིན་ནང་། ཐའེ་ཝན་དུ་དམངས་གཙོ་དར་སྤེལ་འགྲོ་མུས་ཡིན་པ་ནི་ཆེས་དགའ་འོས་པ་ཞིག་རེད། ཐའེ་ཝན་གྱི་མི་མང་རྣམས་དམངས་གཙོའི་ལམ་ལུགས་དར་སྤེལ་ཕྱིན་པ་གཅིག་པུས་ཡར་སྐྱེད་ཡོང་བ་ཞིག་གཏན་ནས་མིན་པར། ཐའེ་ཝན་མི་མང་གིས་རང་གི་ཆེས་ཕྱུག་པའི་སྲོལ་རྒྱུན་རྒྱུན་འཛིན་དང་ལྷན་དུ་འཚོ་བ་ལའང་ཡར་རྒྱས་ཆེན་པོ་ཕྱིན་ཡོད་པ་རེད། ཅེས་དང་། ངོས་རང་གིས་སྐུ་ཉིད་ཀྱིས་འབྱུང་འགྱུར་ཐའེ་ཝན་མི་མང་གི་རེ་བ་དང་མངོན་འདོད་བསྒྲུབ་པར་འཕྲད་པའི་དཀའ་ངལ་ཡོངས་རྫོགས་ལ་གདོང་ལེན་གནང་ཐུབ་པའི་སྨོན་འདུན་ཡོད། ཅེས་གསུངས་འདུག

སྐུ་ཞབས་ལེ་ཆིན་ཏི་མཆོག་ནི་ཕྱི་ལོ་ ༡༩༥༩ ཟླ་ ༡༠ ཚེས་ ༦ ཉིན་ཐའེ་པའེ་རྫོང་གི་བྱང་ཁུལ་དུ་རྡོ་སོལ་སྔོག་འདོན་གྱི་བྱེད་མཁན་གྱི་ཁྱིམ་ཚང་ཕལ་བ་ཞིག་ཏུ་སྐྱེས་ཤིང་།  ཆུང་དུས་ཐའེ་པའེ་གྲོང་ཁྱེར་དུ་སློབ་གྲྭར་འགྲིམས་རྗེས། ཐའེ་ནན་ (Tainan) གྱི་རྒྱལ་ཡོངས་ཁྲིན་ཁུང་གཙུག་ལག་སློབ་ཆེན་(National Cheng Kung Univertsity) དུ་སློབ་སྦྱོང་གནང་། དེ་ནས་ཐའེ་པའེ་རུ་ཡོད་པའི་ཐའེ་ཝན་རྒྱལ་ཡོངས་མཐོ་རིམ་སློབ་གཉེར་ཁང་དུ་སློབ་སྦྱོང་གནང་རྗེས། ཧར་ཝར་ཌི་(Harvard) གཙུག་ལག་སློབ་ཆེན་དུ་མང་ཚོགས་ཀྱི་འཕྲོད་བསྟེན་ཐོག་ལ་གཙུག་ལག་རབ་འབྱམས་པའི་སློབ་སྦྱོང་གནང་། ཁོང་ནི་ཐའེ་ཝན་གྱི་སྲིད་དོན་པ་དང་། སྨན་པ་ཟུར་པ། དེ་བཞིན་ཐའེ་ཝན་གྱི་སྲིད་འཛིན་གཞོན་པ་ཟུར་བ་སོགས་ཡིན་པ་རེད།

གསར་འགོད་པ། དཔལ་ལྡན

རྩོམ་སྒྲིག་བྱེད་མཁན། པདྨ་མཚོ།