བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་ཨ་རུ་ན་ཅལ་དང་འབྲས་ལྗོངས་ཀྱི་སྤྱི་ཁྱབ་བློན་ཆེན་རྣམ་གཉིས་ལ་འོས་བསྡུའི་རྒྱལ་ཁ་ཐོབ་པར་འཚམས་འདྲི་དང་སྦྲགས་བོད་དོན་ཐད་མུ་མཐུད་རྒྱབ་སྐྱོར་གནང་དགོས་པའི་རེ་སྐུལ་ཞུས་འདུག
སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། ཨ་རུ་ན་ཅལ་དང་འབྲས་ལྗོངས་ཀྱི་སྤྱི་ཁྱབ་བློན་ཆེན་རྣམ་གཉིས། པར་དུས་བབ་ཀྱིས་བསྒྲིགས།
དེ་རིང་ཕྱི་ཚེས་ ༧ ཉིན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་། འབྲས་ལྗོངས་སྤྱི་ཁྱབ་བློན་ཆེན་པི་རིམ་སིང་རྟ་མང་མཆོག་རྣམ་གཉིས་ལ་མངའ་སྡེའི་གྲོས་ཚོགས་ཀྱི་འོས་བསྡུའི་རྒྱལ་ཁ་ཐོབ་པར་འཚམས་འདྲི་གནང་སྟེ། ཁོང་རྣམ་གཉིས་ཀྱིས་སྣེ་འཁྲིད་པའི་ཆབ་སྲིད་ཚོགས་པའི་ལས་དོན་ལམ་ལྷོངས་ཡོང་བའི་སྨོན་འདུན་ཞུས་འདུག
ཚོགས་གཞོན་མཆོག་གིས་སྐུ་ཞབས་པདྨ་མཁའ་འགྲོ་མཆོག་ལ་ཕུལ་བའི་འཚམས་འདྲིའི་ནང་། ད་ལན་འོས་བསྡུའི་ཁྲོད་རྒྱལ་ཁ་དེས་ཉིད་ཀྱི་མགོ་ཁྲིད་གནང་ཕྱོགས་ཀྱི་ནུས་པ་དང་། མི་མང་གིས་ཡིད་ཆེས་ཆེན་པོ་ཡོད་པ་གསལ་པོར་མཚོན་གྱི་ཡོད། སྐུ་ཉིད་ཀྱིས་རྒྱ་གར་དང་། ལྷག་པར་དུ་ཨ་རུ་ནཱ་ཅལ་མངའ་སྡེའི་ནང་རང་དོན་བློས་གཏོང་གིས་རླབས་ཆེན་གྱི་སྲི་ཞུ་བསྒྲུབས་པ་ནི་བསྔགས་འོས་པ་ཞིག་ཏུ་གྱུར་ཡོད། ཕྱི་ལོ་ ༢༠༢༢ ལོར་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཨ་རུ་ནཱ་ཅལ་མངའ་སྡེའི་ནང་ས་བགོས་ཕྱོགས་བསྐྱོད་ཕེབས་སྐབས། རྒྱ་གར་དབུས་དང་། མངའ་སྡེ་གཞུང་གཉིས་ནས་ད་བར་བོད་ཀྱི་བདེན་དོན་དང་། ས་གནས་བོད་མི་རྣམས་ལ་མཐུན་འགྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་སླད་སྐུ་ཉིད་མཆོག་མཇལ་འཕྲད་གནང་རྒྱུའི་གོ་སྐབས་བཟང་པོ་བྱུང་ཡོད། ཅེས་གསུངས་འདུག
ཡང་ཚོགས་གཞོན་མཆོག་གིས་འབྲས་ལྗོངས་ཀྱི་སྤྱི་ཁྱབ་བློན་ཆེན་པི་རིམ་སིང་རྟ་མང་མཆོག་ལ་ཕུལ་བའི་འཚམས་འདྲིའི་འཕྲིན་ཡིག་ནང་། ངས་བོད་མི་མང་སྤྱི་འཐུས་ལྷན་ཚོགས་དང་། འཛམ་གླིང་ས་ཕྱོགས་གང་སར་ཡོད་པའི་བོད་མི་རྣམས་ཀྱི་ཚབ་བྱས་ནས། སྐུ་ཉིད་དང་ཁྱེད་ཀྱི་ཆབ་སྲིད་ཚོགས་པར་འོས་བསྡུ་ལས་རྒྱལ་ཁ་ཐོབ་བར་རྟེན་འབྲེལ་ཞུ། སྐུ་ཉིད་ཀྱིས་རྒྱ་གར་དང་། ལྷག་པར་དུ་འབྲས་ལྗོངས་མངའ་སྡེའི་མི་མང་ཆེད་ལོ་མང་སྲི་ཞུ་བསྒྲུབ་ནས་རླབས་ཆེན་གྱི་ཕྱག་ལས་གནང་བར་བསྔགས་བརྗོད་ཞུ། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་རྒྱ་གར་གྱི་མངའ་སྡེ་ཁག་ནང་བོད་དོན་ཞུ་སྐུལ་གྱི་ལས་འགུལ་སྤེལ་སྐབས། སྐུ་ཉིད་མཆོག་དང་མཇལ་འཕྲད་གནང་རྒྱུའི་གོ་སྐབས་བཟང་པོ་བྱུང་བ་ཡོད་ཅིང་། སྐུ་ཉིད་ཀྱིས་ད་བར་བོད་དོན་ཐོག་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུ་རྒྱུ་དང་། འབྱུང་འགྱུར་ཡང་མུ་མཐུད་རྒྱབ་སྐྱོར་གནང་བའི་རེ་སྐུལ་ཞུ་རྒྱུ་ཡིན། ཞེས་གསུངས་འདུག
ཉེ་ལམ་བསྡུས་པའི་རྒྱ་གར་གྱི་འོས་བསྡུ་ལས། ཨ་རུ་ན་ཅལ་མངའ་སྡེའི་འོས་བསྡུའི་ནང་པདྨ་མཁའ་འགྲོ་མཆོག་གི་ཆབ་སྲིད་ཚོགས་པར་ཞབས་སྟེགས་ཁྱོན་ ༦༠ ནས་ ༤༦ ཐོབ་སྟེ་རྒྱལ་ཁ་ཆེན་པོ་ཐོབ་ཡོད་པ་དང་། འབྲས་ལྗོངས་ཀྱི་འོས་བསྡུའི་ཁྲོད་པི་རིམ་སིང་རྟ་མང་མཆོག་གི་ཆབ་སྲིད་ཚོགས་པར་ཞབས་སྟེགས་ཁྱོན་ ༣༢ ལས་ ༣༡ ཐོབ་སྟེ་རྒྱལ་ཁ་ཆེན་པོ་ཐོབ་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
