གཞུང་ཞབས་ཟུར་པ་རྣམ་པའི་ཆེ་བསྟོད་སྣེ་ལེན་གྱི་མཛད་སྒོ་དང་སྦྲགས་བོད་མིའི་སྒྲིག་འཛུགས་ཀྱི་མཛད་གཙོ་ལས་ཟུར་ཁག་ཅིག་གིས་སོ་སོའི་གཞུང་ཞབས་ཀྱི་མི་ཚེ་ཉམས་མྱོང་ཐོག་གཏམ་བཤད་གནང་།
ཁ་སང་ཕྱི་ཚེས་ ༡༡ ཉིན་གངས་སྐྱིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། བོད་མིའི་སྒྲིག་འཛུགས་ནས་གཞུང་ཞབས་ཟུར་པ་རྣམ་པར་ཆེ་བསྟོད་སྣེ་ལེན་གྱི་མཛད་སྒོ་ཅིག་འཚོགས་ཡོད་ཅིང་། ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག བོད་མིའི་སྒྲིག་འཛུགས་ཀྱི་མཛད་གཙོ་ལས་ཐོག་དང་ལས་ཟུར་རྣམ་པ། ལྷན་ཁང་ཁག་གི་དྲུང་ཆེ་ཆུང་སོགས་ཀྱི་ལས་ཐོག་ལས་ཟུར་རྣམས་ལྷན་འཛོམས་བྱུང་འདུག སྐབས་དེར་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་དང་། བཀའ་ཟུར་བཀྲ་ཤིས་དབང་འདུས་ལགས། བཀའ་ཟུར་སྟག་ལྷ་སྐལ་བཟང་དབྱངས་སྐྱིད་ལགས། བཀའ་ཟུར་བསྟན་པ་ཚེ་རིང་ལགས། ཁྲིམས་ཞིབ་པ་ཆེ་བ་ཟུར་པ་ངག་དབང་འཕེལ་རྒྱས་ལགས། ཁྲིམས་ཞིབ་པ་ཆེ་བ་ཟུར་བ་དྭགས་པོ་བསོད་ནམས་ནོར་བུ་ལགས་བཅས་ཀྱིས་སོ་སོའི་གཞུང་ཞབས་ཀྱི་ཉམས་མྱོང་ཐོག་གཏམ་བཤད་གནང་བྱུང་།
སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས། ད་ལྟ་བར་བོད་མིའི་སྒྲིག་འཛུགས་ཀྱི་འཛིན་སྐྱོང་སྲ་བརྟན་ཡོང་བར་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ཉག་གཅིག་དང་། བོད་ནང་གི་བོད་མི་ཚོས་སྲོག་ཀྱང་བློས་བཏང་སྟེ་ལྷག་བསམ་ཟོལ་མེད་ཀྱི་ཕྱག་ལས་གནང་བཞིན་ཡོད་ལ། ལོ་མང་པོའི་རིང་བོད་མིའི་སྒྲིག་འཛུགས་ནང་གཞུང་ཞབས་ཟུར་བ་ཚོས་སྐུ་ལས་བསྐྱོན་པ་ལ་བརྟེན་ནས་བྱུང་བ་ཞིག་ཡིན་པར་བསྟུན། ད་ལྟའི་བཀའ་ཤག་སྐབས་བཅུ་དྲུག་པའི་འཛིན་སྐྱོང་དང་། བོད་ཕྱི་ནང་གཉིས་ཀྱི་རྒྱ་ཆེ་མི་མང་གི་ཚབ་ཞུས་ནས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཅེས་གསུངས་སོང་།
བཀའ་ཟུར་སྟག་ལྷ་སྐལ་བཟང་དབྱངས་སྐྱིད་ལགས་ཀྱིས། ང་རང་ཐོག་མར་དྷ་རམ་ས་ལ་ཡོང་དུས་གངས་སྐྱིད་དུ་བུད་མེད་ཀྱི་གཞུང་ཞབས་མི་འདུག སྡོད་ཁང་ལ་དཀའ་ངལ་འཕྲད་དེ་བུ་གསོ་ཁང་གི་ཁང་མིག་ཆུང་ཆུང་ཞིག་ཏུ་བསྡད་པ་ཡིན། སྐབས་དེར་ནང་སྲིད་ལས་ཁུངས་ཀྱི་ལས་བྱེད་ཡིན་ཡང་། དབྱིན་སྐད་ཤེས་མཁན་ཧ་ཅང་དཀོན་པོ་ཡོད་པས། དགོང་མོ་བུ་གསོ་ཁང་དུ་ལོག་སྟེ་ལྷ་ལྕམ་དམ་པ་ཚེ་རིང་སྒྲོལ་མ་ལགས་ལ་དབྱིན་དྲུང་དང་སྐད་བསྒྱུར་ཞབས་ཞུ་བསྒྲུབ་པའི་གོ་སྐབས་བྱུང་བ་རེད། ཞེས་དང་། སྐབས་དེར་བུ་གསོ་ཁང་ལ་ཉལ་ཁྲི་འདང་གི་མེད་པས། མ་མ་རྣམས་ཀྱིས་རིའི་སྒང་ནས་ཐང་ཤིང་གི་རྩྭ་བཏུས་ནས་གདན་བཟོས་ཏེ་ཉལ་བཞིན་ཡོད། ལས་ཀ་བསྒྲུབ་པའི་མཐུན་རྐྱེན་གང་ཡང་མེད་ཀྱང་སེམས་ཤུགས་ཡོད་ཚེ། དམིགས་ཡུལ་གྱི་ཐོག་གང་འཚམ་སླེབས་ཐུབ་པའི་ཡིད་ཆེས་དང་སྤོབས་པ་སླེབས་ཡོང་གི་འདུག ཞེས་བརྗོད་སོང་།
ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་ཀྱིས། ལོ་ངོ་དྲུག་ཅུ་ལྷག་གི་རིང་༧གོང་ས་རྒྱལ་བ་རིན་པོ་ཆེ་མཆོག་གི་དབུ་ཁྲིད་འོག་གྲུབ་འབྲས་ག་འདྲ་སླེབས་མིན་ཐད་བསམ་ཚུལ་ཞིག་ཞུས་ཚེ། ལྷན་རྒྱས་ཚོས་ཐུགས་ལ་འབབ་མི་སྲིད་ཀྱང་། བཙན་བྱོལ་བོད་མིའི་སྒྲིག་འཛུགས་དང་། བཙན་བྱོལ་བོད་མི་མང་ལ་གྲུབ་འབྲས་ཆེན་པོ་ཐོབ་ཡོད། ངས་བལྟས་ན་ཚང་མས་མཁྱེན་ན་ཡག་པོ་ཡོད། སྤྱིར་ཕྱི་རྒྱལ་བས་བཙན་བྱོལ་གྱི་བོད་པ་རྣམས་བཙན་བྱོལ་ནང་ནས་མ་འདྲ་བ་རེད་ཟེར་གྱི་ཡོད། ཞིབ་ཚགས་ཀྱི་གཟིགས་མཁན་ཚོས་བཙན་བྱོལ་བོད་མིའི་སྒྲིག་འཛུགས་དང་། བོད་མི་མང་གིས་དཀའ་ལས་བརྒྱབ་པར་བསྟུན། རྒྱལ་ཁབ་མང་པོར་ཐོན་མ་ཐུབ་པའི་གྲུབ་འབྲས་ཤིག་ཐོབ་པའི་མཐོང་ཚུལ་འདུག ལྷག་པར་དུ་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་བཞེས་ཆེན་པོའི་ཐོག་བོད་ཀྱི་ངོ་བོ་དང་རིག་གཞུང་ཕྱི་རྒྱལ་ལ་ངོ་སྤྲོད་གནང་བ་རེད། ཕྱི་རྒྱལ་བའི་སྤྱི་ཚོགས་ཀྱི་བསམ་བློ་དེ་ཚན་རིག་དང་མཉམ་དུ་ཡར་རྒྱས་འགྲོ་སྐབས། བོད་ཀྱི་རིག་གཞུང་རྙིང་པ་ཡིན་ཡང་ད་ལྟའི་སྤྱི་ཚོགས་ནང་ཁ་གྲགས་ཐུབ་ཀྱི་ཡོད་པ་མ་ཟད། ཡར་རྒྱས་འགྲོ་བཞིན་པའི་རྒྱལ་ཁབ་ནང་དུ་རིན་ཐང་བརྩི་བའི་ངོ་སྤྲོད་གནང་ཐུབ་པ་དེ་ལས་ཀྱང་གྲུབ་འབྲས་ཆེན་པོ་རེད། ཅེས་བརྗོད་བྱུང་།
ཁྲིམས་ཞིབ་པ་ཆེ་བ་ཟུར་པ་ངག་དབང་འཕེལ་རྒྱས་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནས་དྲང་པོ་དྲང་བཞག་དང་། ལྷག་བསམ་རྣམ་དག རྒྱབ་མདུན་མེད་པའི་ལས་ཀ་བྱེད་དགོས་ཞེས་གསུངས་པ་དེའི་ངའི་མི་ཚེ་ནང་ལོ་བཞི་ཅུ་ཞེ་གྲངས་རིང་ཞབས་ཞུ་ཞུ་སྐབས་ཕན་ཐོགས་ཞེ་དྲགས་བྱུང་། ངས་ག་དུས་ཡིན་ཡང་བོད་མིའི་སྒྲིག་འཛུགས་ནང་ཞབས་ཞུ་ཞུ་རྒྱུ་བྱུང་བར། ཚེ་འདི་གཉིས་ལ་བསོད་ནམས་ཀྱི་གོ་སྐབས་ཆེན་པོ་རེད་བསམ་གྱི་འདུག དཀའ་ལས་ལ་གདོང་ལེན་མང་པོ་བྱ་དགོས། གལ་ཆེ་ཤོས་༧གོང་ས་མཆོག་གི་བཀའ་སློབ་ལམ་སྟོན་ཡང་ཡང་དྲན་ན་ཕན་ཐོགས་ཡོང་གི་འདུག ཅེས་བརྗོད་སོང་།
བཀའ་ཟུར་བསྟན་པ་ཚེ་རིང་ལགས་ཀྱིས། ང་ཚོའི་གཞུང་ལ་ང་ཚོའི་མི་མང་གི་རྒྱབ་སྐྱོར་དང་ཡིད་ཆེས་སྐྱེ་དགོས་ཚེ། ང་ཚོའི་ལས་བྱེད་རྣམས་ཀྱིས་དཀོན་མཆོག་དཔང་དུ་བཞག་སྟེ་ཕྱོགས་ལྷུང་མེད་པར་ཕྱག་ལས་གནང་དགོས་པ་བསམ་གྱི་འདུག གལ་སྲིད་ལས་བྱེད་ཚོས་ཕྱག་ལས་རྒྱབ་མདུན་ཡོད་པ་ཞིག་གནང་ན་མི་མང་གི་ཡིད་ཆེས་བརླག་པའི་ཉེན་ཁ་ཆེན་པོ་རེད། མི་མང་གི་ཡིད་ཆེས་བརླག་ཚེ་ཧ་ཅང་ཐབས་སྐྱོ་བོ་རེད། སྔོན་མ་ང་ཚོར་མཐུན་རྐྱེན་ཞེ་དྲགས་མེད་ཀྱང་། ལས་བྱེད་ཕན་ཚུན་བར་ཧ་ཅང་སེམས་ཐག་ཉེ་བོའི་ཐོག་བསྡད་ཀྱི་ཡོད། ལས་བྱེད་ཕན་ཚུན་བར་བསམ་ཚུལ་བརྗེ་ལེན་བྱས་ཏེ་ཕྱག་ལས་གནང་རྒྱུ་གལ་ཆེན་པོ་རེད། ཅེས་བརྗོད་སོང་།
ཁྲིམས་ཞིབ་པ་ཆེ་བ་ཟུར་བ་དྭགས་པོ་བསོད་ནམས་ནོར་བུ་ལགས་ཀྱིས། གཞུང་ཞབས་བྱེད་བཞིན་པའི་སྐབས་སུ་འདོད་པ་ཁེངས་ཤོས་གཅིག་ནི། ཕྱི་ལོ་ ༡༩༩༠ ནང་བཀའ་ཤག་དང་སྤྱི་འཐུས་ཀྱིས་གོ་བསྡུར་གནང་སྟེ། ༧གོང་ས་རྒྱལ་བ་རིན་པོ་ཆེ་མཆོག་གིས་འོས་བསྡུའི་ཚོགས་ཆུང་ཞིག་བསྐོ་བཞག་གནང་བ་རེད། ཚོགས་ཆུང་དེའི་ནང་དུ་བློ་བཟང་སྦྱིན་པ་ལགས་དང་། སེང་གེ་རབ་བརྟན་ལགས། ཤེལ་དཀར་གླིང་པ་ལགས། བློ་བཟང་བསྟན་འཛིན་ལགས། བསོད་ནམས་ནོར་བུ་ལགས། པདྨ་འབུམ་ལགས་བཅས་ཡོད། ང་ཚོས་འོས་བསྡུ་སྐབས་ཡི་གེ་མི་ཤེས་མཁན་དང་མིང་མི་ཤེས་བར་ག་འདྲ་བྱེད་དགོས་པའི་གོ་བསྡུར་བྱས་པ་ཡིན། སྤྱི་འཐུས་འོས་བསྡུ་སྐབས་མིང་མ་གཏོགས་མེད་ཀྱང་མཚོན་རྟགས་བལྟས་ཏེ་འོས་བླུགས་རྒྱུ་ཡོད་པ་ཞིག་བཟོས་པ་རེད། དེ་ནི་ང་ཚོའི་སྐབས་ནས་བཟུང་གསར་གཏོད་འདྲ་བོ་ཆགས་པ་རེད། ད་ལྟ་བར་དུ་མུ་མཐུད་དུ་འགྲོ་བཞིན་འདུག ཞེས་བརྗོད་སོང་།
བཀའ་ཟུར་བཀྲ་ཤིས་དབང་འདུས་ལགས་ཀྱིས། ངས་བཙན་བྱོལ་བོད་མིའི་སྒྲིག་འཛུགས་ཁྱིམ་ཚང་ཆེན་པོ་ཞིག་ལ་ངོས་འཛིན་བྱེད་བཞིན་ཡོད། དྷ་རམ་ས་ལར་བཅར་སྐབས་ཕྱག་ལས་གནང་བཞུགས་མཁན་རྣམས་ལ་མཇལ་བར་སེམས་སུ་སྤྲོ་སྣང་ཞིག་ཡོང་བསྡད་ཀྱི་འདུག ང་ཚོའི་འཐབ་རྩོད་ནི་མི་རབས་ནས་མི་རབས་བར་གྱི་འཐབ་རྩོད་རེད། ད་ལྟའི་དྲུང་ཆེ་ཁ་ཤས་མ་གཏོགས་ཚང་མ་གསར་བ་རེད། ང་ཚོས་བྱས་ཟིན་པ་སྐབས་དེའི་གནས་སྟངས་འོག་བྱུང་བ་རེད། དེའི་སྐབས་ཀྱི་གནས་སྟངས་བཤད་དགོས་ཚེ་མང་པོ་བཤད་རྒྱུ་ཡོད་པ་རེད། ང་རང་དྷ་སར་སླེབས་པ་དང་ནང་སྲིད་དབྱིན་དྲུང་དུ་ལས་ཀ་བྱས་པ་རེད། དྷ་ས་ནས་ཀུ་ལུ་བར་རྡོག་འཁྲིས་འཁུར་ནས་ལམ་ཁ་བཟོ་སར་འགྲོ་བཞིན་ཡོད། ཅེས་དང་། བོད་མིའི་སྒྲིག་འཛུགས་ནི་ཕྱི་གསལ་ནང་གསལ་རེད། ལས་ཀ་ཐམས་ཅད་ཀྱང་སྤྱི་བའི་ལས་ཀ་ཡིན་པས་གསང་བ་གང་ཡང་མེད། ཚང་མས་ལས་ཀ་བྱེད་སྟངས་ཤེས་ཚེ་ཡིད་ཆེས་རྙེད་ཡོང་གི་རེད། རང་འགན་རང་འཁུར་ཐོག་སོ་སོའི་ལས་ཀ་བྱེད་སྟངས་འགྲིག་མིན་ཐད་བརྟག་དཔྱད་བྱ་དགོས། ཞེས་བརྗོད་སོང་།
གསར་འགོད་པ། བྱམས་པ་ཚེ་རིང་།
