བོད་ཀྱི་ཆོས་དད་རང་དབང་ལ་སྔར་ལྷག་གིས་དམ་དྲག་བྱེད་བཞིན་པའི་སྙན་ཐོ་བཏོན།

རྒྱ་ནག་གཞུང་གིས་བོད་དང་ཤར་ཊུ་ཀི་སི་ཐན། ཧོང་ཀོང་། རྒྱ་རིགས་ཆོས་འཁོར་རྩ་རླུང་སྒོམ་སྒྲུབ་པ་སོགས་ཀྱི་ཆོས་དད་རང་དབང་ལ་སྔར་ལྷག་གིས་དམ་དྲག་བྱེད་བཞིན་ཡོད་པ་ཨ་རིའི་ཕྱི་སྲིད་ལྷན་ཁང་གིས་ཐེར་འདོན་གནང་འདུག

ཟླ་འདིའི་ཕྱི་ཚེས་ ༢༦ ཉིན་ཨ་རིའི་ཕྱི་སྲིད་ལས་ཁུངས་ཀྱིས། ཕྱི་ལོ་ ༢༠༢༣ ལོའི་རྒྱལ་སྤྱིའི་ཆོས་དད་རང་དབང་སྐོར་གྱི་སྙན་ཐོ་ཞིག་འདོན་སྤེལ་གནང་འདུག་པ་དང་། སྙན་ཐོའི་ནང་རྒྱ་ནག་གཞུང་གིས་བོད་དང་ཤར་ཊུ་ཀི་སི་ཐན། ཧོང་ཀོང་། རྒྱ་རིགས་ཆོས་འཁོར་རྩ་རླུང་སྒོམ་སྒྲུབ་ཉམས་ལེན་པ་སོགས་ཀྱི་ཆོས་དད་རང་དབང་ལ་སྔར་ལྷག་གིས་དམ་དྲག་བྱེད་བཞིན་ཡོད་པ་ཐེར་འདོན་གནང་འདུག

དེ་འབྲེལ་སྙན་ཐོའི་ནང་། འདས་ལོའི་ཕྱི་ཟླ་ ༩ བར་ནང་པའི་གནས་ཆེན་རྒྱ་ནག་རི་བོ་རྩེ་ལྔར་རྒྱ་ནག་གཞུང་གིས། རྒྱ་ནག་རྒྱལ་ཡོངས་ཀྱི་ནང་པའི་དབུ་ཁྲིད་བརྒྱ་འབོད་འགུག་གིས། ཞི་ཅིན་ཕིན་གྱི་དུས་རབས་གསར་བའི་སྤྱི་ཚོགས་རིང་ལུགས་ཀྱི་དགོངས་པ་ཟེར་བ་གཙོ་བོར་བཟུང་སྟེ། རྒྱ་ནག་གི་ནང་པ་ཚོས་དམར་ཤོག་ཚོགས་པར་དབུ་འོག་དཔུང་འདེགས་བྱས་ནས་ཞབས་ཞུ་སྒྲུབ་གལ་ཆེ་བ་དང་། བོད་བརྒྱུད་ནང་བསྟན་གཙོ་བྱས་པའི་ནང་པའི་གཞུང་ལུགས་ཁག་རྒྱ་ཅན་དུ་བསྒྱུར་བར་ཤུགས་སྣོན་རྒྱག་དགོས་པ་མ་ཟད། དམར་ཤོག་ཚོགས་པས་ཆོས་ལུགས་ཀྱི་ལྟ་གྲུབ་བཅོས་སྒྱུར་དང་ཆོས་ལུགས་དང་འབྲེལ་བའི་དགོན་པ་དང་སྒྲིག་འཛུགས་ཐོག་དམ་དྲག་བྱས་ཏེ། ཐར་བའི་ལམ་དུ་བགྲོད་པར་བྱེད་པའི་ནང་ཆོས་ཀྱི་སྙིང་བོ་རྩ་བརླག་ཏུ་གཏོང་ཐབས་བྱེད་བཞིན་ཡོད་འདུག

དེ་བཞིན། འདས་ལོའི་ཕྱི་ཟླ་བཅུ་བར་བོད་རང་སྐྱོང་ལྗོངས་ཟེར་བའི་ལོ་འཁོར་དུས་དྲན་ཞིག་གི་སྟེང་རྒྱ་ནག་ཆབ་སྲིད་འཐུས་མི་ལྷན་ཁང་གི་རྒྱུན་ལས་འཐུས་མི་དང་རྒྱ་ནག་མི་དམངས་སྲིད་གྲོས་ཀྱི་འཐུས་མི་ཝང་ཧུ་ནི་ཡིས། ཆབ་སྲིད་ཀྱི་ཐོག་ནས་ཡིད་ཆེས་འཕེར་བའི་ནང་པའི་དགེ་རྒན་གསོ་སྐྱོང་བྱེད་དགོས་པའི་འབོད་སྐུལ་བྱས་པ་དང་། ནང་པའི་སྤྱི་ཚོགས་ཀྱིས་ངེས་པར་དུ་ཆོས་ལུགས་ཀྱི་རྗེས་འཇུག་པ་ཚོར་མེས་རྒྱལ་དང་།  རྒྱ་ནག་རྒྱལ་ཁབ་དང་།  རྒྱ་ནག་གི་རིག་གཞུང་།  རྒྱ་ནག་དམར་ཤོག་ཚོགས་པ།  རྒྱ་ནག་གི་མཚན་ཉིད་ལྡན་པའི་སྤྱི་ཚོགས་རིང་ལུགས་བཅས་ཀྱི་འདུ་ཤེས་མུ་མཐུད་གོང་མཐོར་གཏོང་དགོས་པའི་ལམ་སྟོན་བྱེད་དགོས་ལུགས་བརྗོད་ཡོད་སྐོར་གསལ་འདུག

ཨ་རིའི་ཕྱི་སྲིད་ལྷན་ཁང་གི་སྙན་ཐོ་ལྟར་ན། རྒྱ་ནག་གཞུང་གིས་ནང་པ་དང་ཁ་ཆེ་ཆོས་ལུགས། ཏུའུ་ཆོས་ལུགས། ཡེ་ཤུ་ཆོས་ལུགས་ཀྱི་(Protestantism/Catholicism) བཅས་ཆོས་ལུགས་རིགས་མི་འདྲ་བ་ལྔར་རྒྱལ་ཞེན་ལྡན་པའི་ཆོས་ལུགས་ཀྱི་ཚོགས་སྡེ་ལྔ་ཞེས་འབོད་པ་དང་། ཆོས་སྡེ་དེ་དག་གི་ལྷ་ཁང་དང་དགོན་པ། ཆོས་ཁང་ཁྱོན་ ༡༤༤༠༠༠ ཙམ་རྒྱ་ནག་གཞུང་ལ་ཐོ་འགོད་བྱས་ཡོད་པ་དང་། དེའི་ཁྲོད་ནང་པའི་དགོན་སྡེ་ ༣༣༥༠༠ ཡོད་པ་ལས་བོད་ཀྱི་དགོན་སྡེ་ ༣༨༠༠ དང་རྒྱའི་ནང་པའི་དགོན་སྡེ་ ༢༨༠༠༠ ཡོད་པ་རྒྱ་ནག་གཞུང་འབྲེལ་གྱིས་བསྒྲགས་ཡོད་ཅིང་། རྒྱ་ནག་གཞུང་གི་ཐོ་འགོད་འོག་མེད་ཅིང་དམར་ཤོག་ཚོགས་པའི་བཀོད་མངག་ལ་མི་ཉན་མཁན་གྱི་ཆོས་ལུགས་ཀྱི་ཚོགས་སྡེ་དག་ནག་ཚོགས་ལ་ངོས་འཛིན་བྱེད་པ་དང་། ཚོགས་སྡེ་དེ་དག་གི་དགེ་འདུན་པ་དང་ཆོས་དཔོན། ཆོས་པ་དང་ཉམས་ལེན་པ་སོགས་ནས་ཆོས་ལུགས་ཀྱི་བྱེད་སྒོ་སྤེལ་བར་དངོས་ཤུགས་བརྒྱུད་གསུམ་གྱི་ཐོག་ནས་དྲག་གནོན་དང་དངུལ་ཆད། བཙོན་འཇུག་སོགས་གང་འདོད་དུ་བྱེད་བཞིན་པ་རེད་ལ། བོད་པ་དང་ཁ་ཆེ།  ཡེ་ཤུ། ནང་པ།  རྒྱ་རིགས་ཆོས་འཁོར་རྩ་རླུང་སྒོམ་ཉམས་ལེན་པ་བཅས་ལ་ལས་ཀ་དང་སྡོད་གནས།  ཚོང་ལས་སོགས་ཀྱི་གོ་སྐབས་དབུ་འབྱེད་བྱེད་བཞིན་ཡོད་པ་མ་ཟད། ད་དུང་ཤར་ཊུ་ཀེ་སི་ཐན་ཁ་ཆེ་བ་དང་།  བོད་པ།  དེ་བཞིན་ཆོས་ལུགས་གཞན་གྱི་གྲངས་ཉུང་མི་རིགས་ཀྱི་ཚོགས་མི་ཚོ་འགྲུལ་བཞུད་བྱེད་སྐབས་སུའང་སྡོད་གནས་རག་རྒྱུར་དཀའ་ངལ་མུ་མཐུད་འཕྲད་ཀྱི་ཡོད་པ་རེད།

ཡང་སྙན་ཐོའི་ནང་། རྒྱ་ནག་གཞུང་གིས་བལ་ཡུལ་གཞུང་ལ་མཐའ་མཚམས་འཛིན་སྐྱོང་གི་གྲོས་མཐུན་གཞིར་བཞག་ཐོག་ཕན་ཚུན་ཁྲིམས་ཐོག་ནས་རོགས་རམ་བྱེད་པའི་ཆིངས་ཡིག་ལག་བསྟར་བྱེད་དགོས་པའི་གནོན་ཤུགས་མུ་མཐུད་སྤྲོད་ཀྱིན་ཡོད་པ་དང་།  ཆིངས་ཡིག་དེའི་རྐྱེན་གྱིས་བོད་མི་བཙན་བྱོལ་བ་རྣམས་རྒྱ་ནག་ལ་ཕྱིར་སློག་བྱེད་སྲིད་པར་མ་ཟད།  བོད་མི་བཙན་བྱོལ་བ་རྣམས་ལ་བལ་ཡུལ་ནང་གནས་སྡོད་ཆོག་པའི་ཡིག་ཆ་མཁོ་སྤྲོད་བྱེད་རྒྱུ་ཡང་མཚམས་འཇོག་བྱས་ཡོད་ཅིང་། ཕྱི་ལོ་ ༡༩༩༥ ལོར་བལ་ཡུལ་གྱིས་བོད་མི་བཙན་བྱོལ་བ་རྣམས་ལ་སྐྱབས་བཅོལ་བའི་ཐོ་འགོད་མཐའ་མ་དེ་བྱས་ཏེ་ད་བར་བོད་མི་ཚོར་སྐྱབས་བཅོལ་ལག་དེབ་སྤྲད་མེད་པའང་གསལ་འདུག

དེ་བཞིན་སྙན་ཐོའི་ནང་། ཨ་རིའི་ཕྱི་སྲིད་ལྷན་ཁང་གིས་འདས་ལོ་གཅིག་པུར་རྒྱ་ནག་གི་དཔོན་རིགས་དང་ཐུག་འཕྲད་ནམ་བྱུང་གི་སྐབས་སུ་བོད་དང་ཤར་ཊུ་ཀི་སི་ཐན། ཧོང་ཀོང་། རྒྱ་རིགས་ནང་པ། ཆོས་འཁོར་རྩ་རླུང་སྒོམ་སྒྲུབ་ཉམས་ལེན་ཚོགས་པ་སོགས་ཀྱི་གནད་དོན་གླེང་བྱས་ཡོད་པ་མ་ཟད། སྟོབས་ཆེན་རྒྱལ་ཁབ་བདུན་གཙོས་རྒྱལ་སྤྱིའི་རང་བཞིན་གྱི་ཚོགས་ཆེན་གང་མང་གི་སྟེང་རྒྱ་ནག་གི་དྲག་གནོན་འོག་གནས་པའི་བོད་དང་ཡུ་གུར་སོགས་གྲངས་ཉུང་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་བཅས་ཀྱི་སྐོར་ལ་གླེང་སློང་བྱས་ཡོད་པ་གསལ་འདུག

གསར་འགོད་པ། སྐལ་བཟང་སྦྱིན་པ།