ཕྱི་ལོ་ ༢༠༢༤ ལོའི་རྒྱ་ནག་རྒྱལ་ཡོངས་ཀྱི་མཆོང་རྒྱུག་འཕེན་གསུམ་གྱི་རྟིང་རྩོད་འགྲན་སྡུར་ཁྲོད་བོད་ཀྱི་ལུས་རྩལ་པར་གསེར་གྱི་རྟགས་མ་ཐོབ་འདུག
ཕྱི་ཟླ་ ༦ ཚེས་ ༢༨ ནས་ ༣༠ ཉིན་གྲངས་གསུམ་རིང་རྒྱ་ནག་ཧྲན་ཏུང་ཞིང་ཆེན་རི་ཀྲའོ་གྲོང་ཁྱེར་དུ། ཕྱི་ལོ་ ༢༠༢༤ ལོའི་རྒྱ་ནག་རྒྱལ་ཡོངས་ཀྱི་མཆོང་རྒྱུག་འཕེན་གསུམ་གྱི་རྟིང་རྩོད་འགྲན་སྡུར་འཚོགས་ཡོད་ཅིང་། ཐེངས་འདིའི་རྩེད་འགྲན་ནང་རྒྱ་ནག་རྒྱལ་ཡོངས་ཀྱི་ལུས་རྩལ་པ་གྲངས་ ༩༠༠ ལྷག་གིས་འགྲན་སྡུར་བྱས་ཡོད་པའི་ཁྲོད། བོད་ཀྱི་ལུས་རྩལ་པ་ཚེ་རིང་མཚོ་མོས་བུད་མེད་ཀྱི་འགྲན་རྒྱུག་སྨི་ ༥༠༠༠ ལས་སྐར་མ་ ༡༥ དང་སྐར་ཆ་ ༣༨ ། གྲངས་ཆུང་ ༧༢ ཀྱི་གྲུབ་འབྲས་བླངས་ཏེ་གསེར་གྱི་རྟགས་མ་ཐོབ་ཡོད་འདུག
སྐབས་དེར་བོད་ཀྱི་ལུས་རྩལ་པ་ཚེ་རིང་མཚོ་མོ་ལགས་ཀྱིས། ཐེངས་འདིའི་འགྲན་ཁུལ་དུ་ངས་ན་ནིང་འགྲན་རྒྱུག་འགྲན་སྡུར་བྱས་པ་ཡིན། ད་ལན་ཡང་འགྲན་སྡུར་བྱེད་པའི་གོ་སྐབས་ཐོབ་པ་རང་ཉིད་ཀྱི་དམིགས་ཡུལ་ཆེད་དུ་ཡིན། འགྲན་སྡུར་ནང་བདམས་ཐོན་བྱུང་རྗེས་གྲ་སྒྲིག་ཀྱི་དུས་ཡུན་བདུན་ཕྲག་གཉིས་ལས་མི་འདུག བདུན་ཕྲག་གཅིག་རིང་སྦྱོང་བརྡར་བྱས་ཏེ་འགྲན་རྒྱུག་བྱས་པ་རེད། ལོ་ཁ་ཤས་རིང་སྨི་ ༥༠༠༠ གི་འགྲན་རྒྱུག་བྱས་མྱོང་མེད་པས་ཐེངས་འདིར་རྒྱལ་ཁ་ཐོབ་མིན་མ་ཤེས་ཀྱང་། འགྲན་ཞུགས་བྱེད་རྒྱུ་ནི་རང་ཉིད་ཀྱི་དམིགས་ཡུལ་ཡིན། འགྲན་སྡུར་སྐབས་སུ་ངའི་རྒྱབ་མདུན་ཀྱི་ལུས་རྩལ་པ་རྣམས་འགྲན་རྒྱུག་བྱས་པ་ཁྱད་པར་དུ་འཕགས་པ་ཞིག་རེད་ལ། ངས་ཀྱང་ཧུར་ཐག་འབད་ཐག་བྱས་པའི་མཐའ་མར་རྒྱལ་ཁ་ཐོབ་སོང་། འགྲན་སྡུར་ཁྲོད་ནས་རང་ཉིད་ལ་མ་འོངས་བའི་སྤོབས་པ་སྤྲད་ཀྱི་འདུག ལུས་རྩལ་པ་རྣམས་ལ་ཨོ་ལིམ་ཕིག་རྩེད་འགྲན་སོགས་སུ་འགྲན་ཞུགས་བྱེད་འདོད་པའི་ཕུགས་བསམ་ཡོད་པ་རེད། ངས་ཀྱང་མུ་མཐུད་འབད་བརྩོན་བྱ་རྒྱུ་ཡིན། ཞེས་བརྗོད་སོང་།
དེ་བཞིན་འདི་ལོའི་ཕྱི་ཟླ་ ༤ ཚེས་ ༡༣ ཉིན་ནས་ཉིན་གཉིས་རིང་རྒྱ་ནག་ཀྲེ་ཅང་ཧང་ཀྲོའུ་གྲོང་ཁྱེར་དུ། རྒྱ་ནག་རྒྱལ་ཡོངས་ཀྱི་མཆོང་རྒྱུག་འཕེན་གསུམ་གྱི་བྱ་དགའ་ཆེན་མོའི་འགྲན་སྡུར་ནང་། རྒྱ་ནག་གི་ཞིང་ཆེན་དང་གྲོང་ཁྱེར་ ༣༡ ནས་ཡོང་བའི་ཆེད་ལས་ལུས་རྩལ་པ་ ༡༠༠༠ ལྷག་འགྲན་ཞུགས་བྱས་ཡོད་པའི་ཁྲོད། བོད་རང་སྐྱོང་ལྗོངས་ཟེར་བ་ནས་ལུས་རྩལ་པ་ ༡༩ འགྲན་ཞུགས་ཡོད་ཅིང་། སྐབས་དེའི་སྐྱེས་པའི་སྨི་ ༣༠༠༠ གི་འགོག་རྐྱེན་འགྲན་བསྡུར་ནང་བོད་ཀྱི་ལུས་རྩལ་པ་བཀྲ་ཤིས་ཚེ་རིང་གིས་སྐར་མ་ ༨ དང་སྐར་ཆ་ ༤༢ ། གྲངས་ཆུང་ ༥༤ ཡི་གྲུབ་འབྲས་ཐོབ་སྟེ་གསེར་གྱི་རྟགས་མ་དང་། སྐྱེས་པའི་སྨི་ ༡༠༠༠༠ གི་འགྲན་བསྡུར་ནང་སྐར་མ་ ༢༩ དང་སྐར་ཆ་ ༢ ། གྲངས་ཆུང་ ༢༡ གི་གྲུབ་འབྲས་བླངས་ཏེ་དངུལ་གྱི་རྟགས་མ་ཐོབ་འདུག དེ་བཞིན་བོད་ཀྱི་ལུས་རྩལ་པ་ཚེ་རིང་མཚོ་མོས་བུད་མེད་ཀྱི་སྨི་ ༡༠༠༠༠ གི་འགྲན་བསྡུར་ནང་སྐར་མ་༣༢ དང་སྐར་ཆ་ ༤༥ ། གྲངས་ཆུང་ ༤༩ གྲུབ་འབྲས་བླངས་ཏེ་ཨང་གཉིས་པ་ཐོབ་ཡོད་འདུག
བོད་ཀྱི་ལུས་རྩལ་པ་ཚེ་རིང་མཚོ་མོ་ནི་ཕྱི་ལོ་ ༡༩༩༧ ལོར་བོད་གཞིས་ཀ་རྩེ་གྲོང་ཁྱེར་རྣམ་གླིང་རྫོང་དུ་སྐྱེས་ཡོད་ཅིང་། ཕྱི་ལོ་ ༢༠༡༡ ལོར་བོད་རང་སྐྱོང་ལྗོངས་ཟེར་བའི་ལུས་རྩལ་ལག་རྩལ་སློབ་གླིང་གི་རྒྱང་རྒྱུག་འབྲིང་བའི་སྡེ་ཁག་ནས་སྦྱོང་བརྡར་བྱས་ཏེ། ཁུལ་དེའི་འབྲིང་རྒྱུག་རུ་ཁག་གི་རྐང་འཛིན་པ་དང་བུད་མེད་རུ་ཁག་གི་རུ་དཔོན་གྱི་འགན་འཁུར་ཡོད་ཅིང་། བུད་མེད་རྒྱང་རྒྱུག་སྨི་ ༥༠༠༠ དང་སྨི་ ༡༠༠༠༠ ཡི་ཟིན་ཐོ་འཁོད་འདུག ཕྱི་ལོ་ ༢༠༡༧ ལོར་རྒྱ་ནག་རྒྱལ་ཡོངས་མཆོང་རྒྱུག་འཕེན་གསུམ་གྱི་བུད་མེད་ཀྱི་རྒྱང་རྒྱུག་སྨི་ ༥༠༠༠ གི་འགྲན་སྡུར་ནང་སྐར་མ་ ༡༦ དང་སྐར་ཆ་ ༣༦ ། གྲངས་ཆུང་ ༨༣ གྲུབ་འབྲས་བླངས་ཏེ་རྒྱལ་ཁ་ཐོབ་ཡོད་འདུག
གསར་འགོད་པ། བྱམས་པ་ཚེ་རིང་།
