དགའ་ལྡན་ཐེག་ཆེན་གླིང་གིས་ཇི་ལྟར་གསོལ་འདེབས་ཞུས་པ་ལྟར་༧སྐྱབས་རྗེ་བྱ་དོ་རིན་པོ་ཆེ་མཆོག་གིས་སོག་ཡུལ་གྱི་རྒྱལ་ས་ཨུ་ལམ་བྷ་དར་གྱི་དགའ་ལྡན་ཐེག་ཆེན་གླིང་དུ་དུས་འཁོར་དབང་ཆེན་གནང་བཞིན་འདུག
ཟླ་འདིའི་ཕྱི་ཚེས་ ༡༢ ནས་ ༢༡ བར་ཉིན་གྲངས་བཅུའི་རིང་སོག་ཡུལ་གྱི་རྒྱལ་ས་ཨུ་ལམ་བྷ་དར་གྱི་དགའ་ལྡན་ཐེག་ཆེན་གླིང་དུ། དགའ་ལྡན་ཐེག་ཆེན་གླིང་གིས་ཇི་ལྟར་གསོལ་འདེབས་ཞུས་པ་ལྟར། ༧སྐྱབས་རྗེ་བྱ་དོ་རིན་པོ་ཆེ་མཆོག་གིས་དུས་འཁོར་དབང་ཆེན་གྱི་བཀའ་དབང་གནང་བཞིན་ཡོད་ཅིང་། ཐེངས་འདིའི་དུས་འཁོར་དབང་ཆེན་ནང་སོག་ཡུལ་གྱི་དད་ལྡན་སེར་སྐྱ་མི་མང་དང་། ཨུ་རུ་སུ། སིངྒ་པུར། ཐའེ་ཝན། ཉི་ཧོང་སོགས་་ཕྱོགས་མཐའ་ཁག་ནས་དད་ལྡན་དོན་གཉེར་བ་སྟོང་ཕྲག་མང་པོ་འཛོམས་ཡོད་འདུག ཁ་སང་ཕྱི་ཚེས་ ༡༢ ཉིན་ནས་བཟུང་སོག་ཡུལ་དགའ་ལྡན་གླིང་དུ་དུས་དབང་གི་སྔོན་འགྲོ་གསུང་ཆོས་ལམ་གཙོ་རྣམ་གསུམ་དང་རྒྱལ་སྲས་ལག་ལེན་སོ་བདུན་མ་དབུ་བཙུགས་གནང་ཡོད་ཅིང་། ཟླ་འདིའི་ཕྱི་ཚེས་ ༡༧ ཉིན་དུས་དབང་གི་སྟ་གོན་དང་། ཕྱི་ཚེས་ ༢༡ ཉིན་དུས་འཁོར་དབང་ཆེན་ཡོངས་སུ་འགྲུབ་རྒྱུ་དང་། ཕྱི་ཚེས་ ༢༢ ཉིན་བྱ་དོ་རིན་པ་ཆེ་མཆོག་ལ་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་འདུག
འདི་གའི་གསར་འགོད་པས་རུ་སོག་དོན་གཅོད་ཏེ་ལོ་རིན་པོ་ཆེ་མཆོག་ལ་དེའི་སྐོར་བཀའ་འདྲི་ཞུས་པར་ཁོང་གིས། སྔོན་མ་སོག་ཡུལ་ནང་༧གོང་ས་རྒྱལ་བ་རིན་པོ་ཆེ་མཆོག་ནས་དུས་འཁོར་དབང་ཆེན་ཐེངས་གཅིག་བསྩལ་གནང་ཡོད་པ་རེད། ཐེངས་འདིར་བྱ་དོ་རིན་པོ་མཆོག་གིས་ཡུལ་འདིར་དུས་འཁོར་དབང་ཆེན་གནང་བ་ཐེངས་དང་པོ་ཆགས་ཀྱི་ཡོད། ཐེངས་འདིའི་དུས་འཁོར་དབང་ཆེན་ནི་ཕྱི་ལོ་ ༢༠༢༢ ལོར་སོག་ཡུལ་ནང་གི་མ་དགོན་དགའ་ལྡན་ཐེག་ཆེན་གླིང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་དུས་འཁོར་དབང་ཆེན་དང་བདེ་མཆོག་ལཱུ་ཨི་པའི་བཀའ་དབང་གི་གསོལ་འདེབས་ཞུས་པ་ལྟར། དྷ་རམ་ས་ལར་༧གོང་ས་མཆོག་ནས་བདེ་མཆོག་ལཱུ་ཨི་པའི་བཀའ་དབང་གནང་གྲུབ་ཡོད་པ་དང་། དུས་འཁོར་དབང་ཆེན་འདི་༧གོང་ས་མཆོག་ནས་བཀའ་ཕེབས་པ་ལྟར་བྱ་དོ་རིན་པོ་ཆེ་མཆོག་གིས་གནང་བཞིན་ཡོད་པ་རེད་ཅེས་གསུངས་བྱུང་།
སོག་ཡུལ་དུ་དུས་འཁོར་དབང་ཆེན་གནང་གལ་ཆེ་བའི་སྐོར་ལ་ཁོང་གིས། འདིར་དུས་འཁོར་དབང་ཆེན་གནང་གལ་ཆེན་པོ་ཆགས་ཡོད། སོག་ཡུལ་ནང་དམར་ཤོག་ཚོགས་པ་བསླེབས་ཏེ་ལོ་སུམ་ཅུ་སོ་གྲངས་འགྲོ་བཞིན་ཡོད་ཀྱང་། སོག་ཡུལ་གྱི་ནང་པའི་དགོན་སྡེ་སོགས་སླར་གསོ་བྱ་རྒྱུ་མང་པོ་ལྷག་བསྡད་ཡོད། ཕྱི་ལོ་ ༡༩༩༠ ནང་ནས་བཟུང་སོག་ཡུལ་དུ་བྱ་དོ་རིན་པོ་ཆེ་མཆོག་གིས་ཆོས་ཕྱོགས་ཀྱི་ཕྱག་ལས་མང་པོ་མཛད་མགོ་ཚུགས་ཡོད་ཅིང་། ཕལ་ཆེར་བྱ་དོ་རིན་པོ་ཆེ་མཆོག་གིས་སོག་ཡུལ་གྱི་གྲོང་གསེབ་ཁག་ཏུ་ཕེབས་མ་མྱོང་ས་ཡོད་ས་མ་རེད། བྱ་དོ་རིན་པོ་ཆེ་མཆོག་གིས་ལོ་མང་པོའི་རིང་སྐུ་ལས་བསྐྱོན་ནས་སོག་ཡུལ་དུ་དབང་ལུང་མན་ངག་སླར་གསོ་མཛད་ཡོད་པར་བརྟེན། སོག་ཡུལ་ནང་ཆོས་ཕྱོགས་ཀྱི་མཛད་པ་ཤུགས་ཆེན་དར་བཞིན་ཡོད་ལ། ཐེངས་འདིར་༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་གནང་བ་བཞིན་དུས་འཁོར་དབང་ཆེན་གནང་བ་མཛད་པ་ཆེན་པོ་ཞིག་རེད། ཅེས་གསུངས་བྱུང་།
སོག་ཡུལ་དགའ་ལྡན་ཐེག་ཆེན་གླིང་གི་སྐོར་ལ་ཁོང་གིས། དུས་རབས་ཤིག་གི་གོང་དུ་སོག་ཡུལ་གྱི་མ་དགོན་དགའ་ལྡན་ཐེག་ཆེན་གླིང་དུ་མཚམས་པ་མང་པོ་ཡོད་འདུག དེ་བཞིན་མཚན་ཉིད་དང་། དུས་འཁོར། རྩིས་ཀྱི་གྲྭ་ཚང་སོགས་སློབ་སྦྱོང་བྱེད་སའི་ཁྱབ་ཁོངས་དང་ཡན་ལག་མང་པོ་ཡོད་ཀྱང་། ད་ལྟའི་ཆར་རྒྱུད་པ་གྲྭ་ཚང་དང་། དུས་འཁོར་གྲྭ་ཚང་། ཀུན་མཁྱེན་འཇམ་དབྱངས་བཞད་པའི་ཡིག་ཆ་དང་། རྗེ་བཙུན་པའི་ཡིག་ཆ། པཎ་ཆེན་ཡིག་ཆ་བཅས་སློབ་གཉེར་བྱེད་སའི་གྲྭ་ཚང་གཙོ་བོ་ལྔ་མ་གཏོགས་མི་འདུག དེའི་ཁྲོད་ནས་དུས་འཁོར་གྲྭ་ཚང་གི་ཆོ་ག་ཕྱག་ལེན་གྱི་ལུགས་སྲོལ་སོགས་གང་འཚམ་སྲུང་སྐྱོབ་བྱས་ཐུབ་ཡོད་པ་མ་ཟད། སོག་ཡུལ་དགའ་ལྡན་ཐེག་ཆེན་གླིང་ནས་རྒྱ་གར་གྱི་བཞུགས་སྒར་དྷ་རམ་ས་ལའི་རྣམ་རྒྱལ་གྲྭ་ཚང་དུ་སློབ་གཉེར་བྱེད་མཁན་བྱུང་ཡོད་པ་རེད་ལ། དེ་བཞིན་དྷ་ས་རྣམ་རྒྱལ་གྲྭ་ཚང་ནས་དགེ་བཤེས་རྒྱ་མཚོ་ལགས་སོག་ཡུལ་དུ་ཕེབས་ཏེ་དུས་འཁོར་གྱི་ཆོ་གའི་འགྲོ་ལུགས་སོགས་ཀྱི་ཐོག་བསླབ་པ་ཆ་ཚང་གནང་ཡོད་པ་རེད་ཅེས་གསུངས་བྱུང་།
༸སྐྱབས་རྗེ་བྱ་དོ་སྤྲུལ་སྐུ་བསྟན་འཛིན་འབྱུང་གནས་རིན་པོ་ཆེ་མཆོག་ནི་རྒྱ་གར་ལྷོ་ཕྱོགས་ཀྱི་སེར་བྱེས་མཁས་སྙན་གྲྭ་ཚང་དུ་ཆོས་ཞུགས་ཀྱིས་དགེ་བཤེས་ལྷ་རམས་པའི་མཚན་གནས་བཞེས་ཡོད་ཅིང་། ཕྱི་ལོ་ ༢༠༡༣ ལོ་ནས་དཔལ་ལྡན་རྒྱུད་སྟོད་གྲྭ་ཚང་གི་བླ་མ་དབུ་མཛད་དང་མཁན་རིན་པོ་ཆེའི་མཛད་འཁུར་རིམ་པར་བཞེས་ཡོད་འདུག དེའི་རྗེས་༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་ཕེབས་པ་ལྟར་སྐུ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་མཁན་རབས་ལྔ་པར་བསྐོ་གཞག་གནང་འདུག དེ་བཞིན་ལོ་མང་རིང་སོག་ཡུལ་གཙོས་དད་ལྡན་སེར་སྐྱ་མི་མང་ལ་གསུང་ཆོས་དང་དབང་ལུང་གནང་བའི་བསྟན་པའི་ཞབས་འདེགས་རྒྱ་ཆེ་ཞུས་ཡོད་སྟབས། ཕྱི་ལོ་ ༢༠༡༩ ཟླ་ ༧ ནང་བྷུར་ཡ་ཐི་གཞུང་གིས་༧སྐྱབས་རྗེ་བྱ་དོ་རིན་པོ་ཆེ་མཆོག་ལ་བྷུར་ཡ་ཐའི་གཟེངས་བསྟོད་དང་། ཌི་ཛ་ཡའི་ནང་པའི་ཆེས་མཐོའི་གཙུག་ལག་སློབ་གཉེར་ཁང་གིས་འབུམ་རམས་པའི་མཚན་གནས་ཕུལ་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།
