ཟླ་འདིའི་ཕྱི་ཚེས་ ༢༢ ཉིན་ཨ་རིའི་ནེའུ་ཡོག་ཡུག་བྷི་ཨེ་སི་རྩེད་རའི་ནང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་བྱང་ཨ་རིའི་བོད་རིགས་གཙོས་དད་ལྡན་སེར་སྐྱ་མང་ཚོགས་ཀྱིས་བརྟན་བཞུགས་བསྟར་འབུལ་ཞུ་གཏན་ཁེལ་འདུག
ཟླ་འདིའི་ཚེས་ ༢༢ ཉིན་གྱི་སྔ་དྲོའི་ཆུ་ཚོད་ ༩ ནས་ ༡༠ བར་ཨ་རིའི་ནེའུ་ཡོག་ཁུལ་ཡུག་བྷི་ཨེ་སི་ཨ་རེ་ནཱ་རྩེད་རའི(UBS ARENA) ནང་དུ། བྱང་ཨ་རིའི་བོད་རིགས་ཡོངས་དང་། སོག་རིགས། ཧི་མ་ལ་ཡའི་རི་རྒྱུད་ཁུལ་གྱི་མི་མང་ཡོངས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཚོན་དོན་བརྟན་བཞུགས་བསྟར་འབུལ་ཞུ་གཏན་འཁེལ་ཡོད་འདུག
ཡུག་བྷི་ཨེ་སི་ཨ་རེ་ནཱ་རྩེད་ར་ནི་ཕྱི་ལོ་ ༢༠༢༡ ལོར་ཨ་རིའི་ནེའུ་ཡོག་དང་ཨེལ་མོན་ཌི་གྲོང་ཁྱེར་འབྲེལ་མཚམས་སུ་ཡོད་པའི་དམིགས་བསལ་རྩེད་ཐང་ཞིག་ཡིན་ཞིང་། དེ་ནི་ནེའུ་ཡོག་གླིང་ཕྲན་དང་འཁྱག་ཤུད་རྩེད་འགྲན་པ་རྣམས་ཀྱིས་རྒྱལ་ཡོངས་རྩེད་འགྲན་བྱེད་ས་གཙོ་བོ་ཞིག་ཡིན་འདུག རྩེད་ཐང་དུ་འཁྱགས་ཤུད་རྩེད་འགྲན་བྱེད་སྐབས་ལྟད་མོ་བར་ཞབས་བཀྱག་གྲངས་ ༡༧,༢༥༠ དང་། རོལ་དབྱངས་འཁྲབ་སྟོན་དང་དམིགས་བསལ་མཛད་སྒོ་ཁག་གི་སྐབས་སུ་ཞབས་བཀྱག་གྲངས་ ༡༩,༠༠༠ ལྷག་ཡོད་འདུག
དེ་བཞིན་ཉེ་ལམ་དགའ་ལྡན་ཕོ་བྲང་ཡིག་ཚང་གིས་༸གོང་ས་རྒྱལ་བ་རིན་པོ་ཆེའི་༸སྐུའི་འཕྲོད་བཞེས་དང་འབྲེལ་བའི་གསལ་བསྒྲགས་ཤིག་གནང་བའི་ནང་། ནེའུ་ཡོག་གི་དམིགས་བསལ་གཤག་བཅོས་སྨན་ཁང་ (Hospital for Special Surgery) གི་དར་མའི་ལུས་པོ་བསྐྱར་བཟོ་དང་རུས་ཚིགས་གཤག་བཅོས་ཚན་པའི་འགན་འཛིན་སྨན་པ་ཌེ་ཝིཌ་མེ་མེན་(Dr. David Mayman) བདུན་ཕྲག་སྔ་མའི་གཟའ་མཇུག་ཏུ་༸གོང་ས་རྒྱལ་བ་རིན་པོ་ཆེ་མཆོག་གི་སྐུ་མདུན་དུ་བཅར་ཏེ། ཞབས་པུས་ལ་བརྟག་དཔྱད་དང་། ཞབས་འགུལ་སྐྱོད་གནང་སྟངས་ལ་ཞིབ་འཇུག་གནང་རྗེས། སྨན་པ་ཁོང་གིས། ༸གོང་ས་མཆོག་གི་སྐུ་གཟུགས་དྭངས་སྐྱེད་ཡག་པོ་ཡོང་བཞིན་འདུག་ལ། ཞབས་པུས་འགུལ་སྐྱོད་སླར་གསོའི་སྦྱོང་བརྡར་ལ་འབད་བརྩོན་ཆེན་པོ་གནང་བཞིན་ཡོད་པ་ལྟར། ཡར་རྒྱས་ཆེན་པོ་ཡོང་བཞིན་འདུག ད་དུང་ཟླ་བ་དྲུག་ནས་བཅུ་གཉིས་བར་མུ་མཐུད་དེ་འདི་ལྟར་དྭངས་སྐྱེད་ཡག་པོ་ཡོང་བའི་འབད་བརྩོན་གནང་དགོས། ད་བར་༸གོང་ས་མཆོག་གི་སྐུ་ཁམས་ལ་ཡར་རྒྱས་ཆེན་པོ་བྱུང་ཡོད་པ་དང་། མུ་མཐུད་ལོ་གཅིག་ནང་ཡར་རྒྱས་ཡོང་བའི་རེ་བ་ཞུ་བཞིན་ཡོད། ཅེས་འཁོད་འདུག
དགའ་ལྡན་ཕོ་བྲང་ཡིག་ཚང་གི་དྲ་རྒྱར་གསལ་བའི་མཛད་འཆར་ལྟར་ན། ཕྱི་ཟླ་ ༩ ཚེས་ ༦ དང་༧ ཉིན་བཞུགས་སྒར་དྷ་རམ་ས་ལར་མོན་གྱི་དད་ལྡན་མི་མང་ལ་སྤྱན་རས་གཟིགས་ཀྱི་བཀའ་དབང་དང་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཟླ་ ༩ ཚེས་ ༡༢ དང་ ༡༣ ཉིན་གྲངས་གཉིས་རིང་ལྷོ་ཤར་ཨེ་ཤ་ཡའི་དད་ལྡན་རྣམས་ལ་ཆོས་འབྲེལ་དང་། ཕྱི་ཟླ་ ༩ ཚེས་ ༡༨ ཉིན་བོད་ཀྱི་བུད་མེད་ལྷན་ཚོགས་དང་། བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག ཌལ་ཧོར་སློབ་ཟུར་བཅས་ནས་བརྟན་བཞུགས་བསྟར་འབུལ། དེ་བཞིན་ཕྱི་ཟླ་ ༩ ཚེས་ ༣༠ ནས་ཉིན་གྲངས་གཉིས་རིང་ཐའེ་ཝན་གྱི་དད་ལྡན་ཆོས་ཞུ་བ་རྣམས་ལ་སྤྱོད་འཇུག་ཆེན་མོའི་ལེའུ་བརྒྱད་པའི་ཆོས་འབྲེལ་བསྩལ་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།
