སེམས་བཟང་པོ་དང་མི་ལ་ཕན་ཐོགས་སྒྲུབ་པའི་ཐོག་ང་ཚོས་སྣོན་དགོས་རྒྱུ་གཅིག་ནི་བོད་མི་རིགས་ཀྱི་ཞེན་ཁོག་དེ་གལ་ཆེན་པོ་རེད་ཅེས་གསུངས།

༧གོང་ས་རྒྱལ་བ་རིན་པོ་ཆེ་མཆོག་ནས་ང་ཚོ་བཙན་བྱོལ་བ་ཆགས་ཏེ་བསྡད་པ་འདིས་མི་མང་པོ་ལ་འབྲེལ་བ་བྱེད་ཐུབ་པའི་ཕན་ཐོགས་ཆེན་པོ་བྱུང་ཡོད་ཅེས་བཀའ་སློབ་བསྩལ་སོང་།

ཟླ་འདིའི་ཕྱི་ཚེས་ ༡༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ཨ་རིའི་ནེའུ་ཡོག་མངའ་སྡེའི་ཨི་ཐ་ཁའི་(Ithaca)རྣམ་རྒྱལ་གྲྭ་ཚང་གི་ནང་ཆོས་སློབ་གཉེར་ཁང་དུ་ཆིབས་སྒྱུར་བསྐྱངས་ཏེ་ཆོས་འབྲེལ་བཀའ་སློབ་བསྩལ་ཡོད་ཅིང་། འདི་ནི་༧གོང་ས་མཆོག་གི་ཞབས་པུས་སྨན་བཅོས་ཀྱི་རྗེས་སུ་མི་མང་ལ་བཀའ་སློབ་བསྩལ་བ་ཐེངས་དང་པོ་དེ་ཡིན་པ་རེད།

༧གོང་ས་མཆོག་རྒྱལ་བ་རིན་པོ་ཆེ་མཆོག་ནས། ངོས་རང་བཙན་བྱོལ་བ་ཆགས་ནས་རྒྱ་གར་དུ་སྡོད་བཞིན་ཡོད་པ་རེད། རྒྱ་གར་གྱི་ས་གནས་དང་། མདོར་ན་མདོ་སྟོད་སྨད་དབུས་གཙང་བཅས་ས་ཁུལ་མང་པོར་གཞུང་གི་འགྲོ་སྟངས་ལྟར་༸རྒྱལ་བ་རིན་པོ་ཆེ་ཞེས་ཁྲི་མཐོན་པོ་ཞིག་གི་སྟེང་དུ་སྡོད་འདོད་མེད་པར་གང་ས་གང་དུ་སླེབས་ཐུབ་པའི་གོ་སྐབས་ཤིག་བྱུང་བ་རེད། དེ་ནི་དངོས་གནས་དྲང་གནས་མི་དང་མིའི་འབྲེལ་བ་ལ་ཕན་ཐོགས་ཆེན་པོ་ཡོད་པ་ཞིག་རེད། ངོས་རང་ལ་ཆ་བཞག་ན། ང་༸རྒྱལ་བ་རིན་པོ་ཆེ་ཡིན་བསམ་པ་བྱས་ཏེ་གཞན་དང་མ་འདྲ་བ་བྱས་ཏེ་སྡོད་པ་ལ་འདོད་པ་གང་ཡང་མེད། སྤྱིར་ང་ཚོ་མི་གཅིག་གྱུར་དང་ཡང་སྒོས་བོད་གངས་ཅན་པ་ཆོལ་ཁ་གསུམ་གྱི་བོད་རིགས་གཅིག་གྱུར་ཆགས་ཡོད། དེ་བཞིན་སངས་རྒྱས་པའི་ཆོས་པའང་གཅིག་གྱུར་ཆགས་ཡོད། དེ་ལྟ་བུའི་འདུ་ཤེས་ཀྱི་ཐོག་ནས་ངོས་རང་བོད་ཀྱི་མདོ་སྟོད་སྨད་སོགས་ཀྱི་ས་ཁུལ་མང་པོ་ལ་བསླེབས་པ་དང་། དངོས་གནས་དྲང་གནས་མི་དང་མིའི་བར་གྱི་བརྩེ་བ་དང་། བོད་རིགས་ནང་ཚགས་ཀྱི་བརྩེ་བ་མ་བོར་པའི་ཐོག་ནས་བསླེབས་ཡོད། ༸རྒྱལ་དབང་༧གོང་མ་ཚོ་༸རྒྱལ་དབང་གི་ཁྲིའི་སྟེང་དུ་བཞུགས་ཏེ་འདི་འདྲའི་འབྲེལ་བ་རྒྱ་ཆེན་པོ་ཕལ་ཆེར་ཁག་པོ་མེད་འགྲོ། ངོས་རང་ཕ་ཡུལ་མདོ་སྨད་དུ་སྐྱེས་ཤིང་། ཟི་ལིང་མཱ་ཀྲུའུ་ཞིའི་མི་སེར་ལྟ་བུ་རེད། མཱ་པུའུ་ཧྥང་གིས་ངོས་ལ་ཧ་ཅང་འཆམ་པོ་བྱས་རེད། མདོ་སྨད་དུ་ཡོད་པའི་སྐབས་དང་། ལྷག་པར་དུ་བཙན་བྱོལ་བ་ཆགས་ནས་བོད་རིགས་སྤྱི་བོ་གནམ་བསྟན་ཚང་མར་འབྲེལ་བ་ཆགས་ནས་སྤྱིར་སངས་རྒྱས་ཀྱི་བསྟན་པ་དང་། ཡང་སྒོས་བོད་གངས་ཅན་ལྗོངས་ཀྱི་ཆོས་ཚུལ་ཟབ་ཅིང་རྒྱ་ཆེ་བ་ཞིག་ཡོད་པ་འདི་འདྲ་ཡོད་པར་ངོས་ཀྱིས་གང་ས་གང་དུ་འབྲེལ་བ་བྱས་ཏེ་བསམ་ཚུལ་བཤད་ནས་ཧ་ཅང་ཕན་ཐོགས་བྱུང་། བཙན་བྱོལ་བ་ཆགས་ཏེ་བསྡད་པ་འདིས་མི་མང་པོ་ལ་འབྲེལ་བ་བྱེད་ཐུབ་པའི་ཕན་ཐོགས་ཆེན་པོ་བྱུང་བ་རེད། ཅེས་གསུངས་སོང་།

ཡང་མགོན་པོ་གང་ཉིད་མཆོག་གིས། དེ་རིང་སྐབས་སུ་བབ་པ་ཁྱོད་རང་ཚོར་ཐུག་པ་རེད། བཙན་བྱོལ་བ་ཆགས་མེད་ན་ངོས་རང་ལྷ་སའི་གཙུག་ལག་ཁང་དང་ནོར་བུ་གླིང་ཁར་བཞུགས་ཁྲི་མཐོ་པོ་ཞིག་གི་སྒང་དུ་བསྡད་ཡོད་པ་རེད། ང་ཚོ་བཙན་བྱོལ་བ་ཆགས་ནས་ཆེ་འདྲིས་ཆུང་འདྲིས་བྱས་ཏེ་ང་ཚོ་ཐུག་ཐུབ་པ་ཞིག་རེད། མ་གཞི་ངོས་རང་ཟི་ལིང་ས་ཁུལ་དུ་སྐྱེས་ནས་ཆུང་ཆུང་སྐབས་ནས་མི་དང་འབྲེལ་བ་ཧ་ཅང་ཡག་པོ་ཡོད། ད་ལྟ་ངོས་རང་ལོ་རྒས་ཡོང་དུས་ས་ཁུལ་གང་ས་གང་དུ་ཡོད་པའི་ང་ཚོ་བོད་མིའི་ཆོས་དང་རིག་གཞུང་གི་ཐོག་ལ་དོ་སྣང་ཡོད་མཁན་མང་པོ་ཞིག་གིས་དམིགས་བསལ་གྱིས་ཐུགས་སྣང་བྱས་ཏེ་ཧ་ཅང་དགའ་བོ་བྱེད་བཞིན་འདུག དེ་རིང་ས་ཆ་འདིར་ཆ་བཞག་ནའང་། ང་ཚོ་བོད་རིགས་གཅིག་གྱུར་གྱི་འདུ་ཤེས་ཀྱི་འོག་ནས་ཏཱ་ལའི་བླ་མ་ཟེར་དུས་སེམས་ཐག་ཉེ་བོ་དང་། སེམས་གཏིང་ནས་དགའ་པོ་བྱེད་པ་ཞིག་ཆགས་ཡོད་པ་རེད། ངོས་ལ་ཆ་བཞག་ནའང་བོད་ཆོལ་ཁ་གསུམ་གྱི་ས་ཁུལ་གང་ནས་བསླེབས་པ་ཡིན་ནའང་བོད་རིགས་གཅིག་གྱུར་གྱི་བསམ་ཚུལ་ཤུགས་ཆེན་པོ་བྱས་ཏེ་སྡོད་ཀྱི་ཡོད། ངོས་རང་བཙན་བྱོལ་བ་ཆགས་ནས་བསྡད་པ་རེད་དེ། གང་ལྟར་བོད་ཀྱི་ཆོས་དང་རིག་གཞུང་གི་ཐོག་ལ་ཞབས་འདེགས་གང་འཚམ་བསྒྲུབས་ཡོད། ད་དུང་ཡིན་ནའང་ཞབས་འདེགས་སྒྲུབ་ཀྱི་རེད། ཁྱོད་ཚོ་ཚང་མས་ཧུར་ཐག་འབད་ཐག་བྱོས། གཙོ་བོ་བོད་ཀྱི་ཆོས་དང་རིག་གཞུང་འདི་རྒྱ་མིའི་སྐད་ཆ་ལྟར་ན་རྨོངས་དད་མིན་པ་བྱས་ཏེ་རྒྱུ་མཚན་གྱི་ཐོག་ནས་དད་པ་བྱེད་རྒྱུ་ཡོད་པ་ལ་དོ་སྣང་བྱེད་དགོས། ང་ཚོས་དད་པ་བྱེད་པའི་རྒྱུ་མཚན་ག་རེ་རེད་དམ། འཕྲལ་དུ་ཉིན་རེའི་སེམས་ལྷོད་ལྷོད་ཆགས་པ་དང་། སེམས་ལྷོད་ལྷོད་ཆགས་པའི་ཐོག་ནས་གཟུགས་པོ་བདེ་ཐང་ཡོང་བ། ལོ་དང་ཟླ་བ་སྦྲེལ་ནས་སེམས་བདེ་ཡིན་པ་ཞིག་དང་། དངོས་གནས་དྲང་གནས་ཞི་བའི་མི་ཞིག་དགོས། བོད་གངས་ཅན་ལྗོངས་ཀྱི་སེམས་ཅན་ཚོ་འགྲོ་བ་མིའི་རིགས་གཞན་དང་འདྲིས་ཡོང་སྐབས་ང་ཚོ་ཞི་ཞིང་འདུལ་བ་ཞིག་ལ་ཕལ་ཆེར་མཐོང་གི་ཡོད་པ་རེད། ཚང་མས་ད་ལྟའི་བར་དུ་ཧུར་ཐག་བྱས་པ་རེད། ད་དུང་ཡང་ཧུར་ཐག་བྱེད་རོགས། 

བཙན་བྱོལ་བ་ཆགས་པ་དེས་ས་ཆ་ག་བ་གང་སར་བསླེབས་པ་དང་། ང་ཚོའི་གཞུང་གིས་འབྲེལ་བ་བྱས་པ་མིན་པར་༸གོང་ས་༸སྐྱབས་མགོན་ཆེན་པོ་ཞེས་གང་ས་གང་དུ་བསླེབས་ནས་ཕན་ཐོགས་ཡོང་ཐུབ་པ་ཞིག་འདུག ངོས་རང་གིས་བྱང་ཆུབ་སེམས་དཔའི་བསླབ་བྱ་སེམས་ལ་བཞག་ནས་ག་ཚོད་ཐུབ་ཐུབ་ཀྱིས་མི་ལ་ཕན་ཐོགས་པ་ཞིག་དང་། སྐབས་སུ་བབ་པ་ང་ཚོ་བོད་རིགས་གཅིག་གྱུར་གྱི་ཐོག་ནས་ནང་ཚགས་བྱེད་དགོས། གང་ལྟར་སེམས་པ་བཟང་པོ་བྱེད་པ་དང་། མི་ལ་ཕན་སེམས་བྱེད་པ། ང་ཚོས་སྣོན་དགོས་རྒྱུ་གཅིག་ནི་བོད་མི་རིགས་ཀྱི་ཞེན་ཁོག་དེ་གལ་ཆེན་པོ་རེད། ཚང་མས་ཧུར་ཐག་བྱེད་རོགས་ཞུ་རྒྱུ་ཡིན། ཞེས་བཀའ་སློབ་སྩལ་སོང་།

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།