རྩོམ་པ་པོ། རོ་བྷར་ཌི་ཝན་ཝེ། Robert Vanwey
བོད་སྒྱུར་བ། ཚེ་རིང་རྣམ་རྒྱལ། 
རོ་བྷར་ཌི་ཝན་ཝེ་ (Robert Vanwey) ཡིས། ང་ཚོས་ལོ་རྒྱུས་ཀྱི་འཕེལ་རིམ་ལ་འགྱུར་བ་བཏང་མི་ཐུབ་ནའང་། དེའི་ཤུགས་རྐྱེན་ཆེས་ངན་པ་རྣམས་ཇེ་ཉུང་དུ་གཏོང་ཐུབ་ཀྱི་ཡོད་པར་བརྟེན། ། བོད་ཀྱི་མ་འོངས་པ་དང་། བོད་ཀྱི་རིག་གཞུང་། བོད་བརྒྱུད་ནང་བསྟན་ལ་སེམས་ཁྲལ་བྱེད་མཁན་གྱི་མཁས་པ་རྣམས་ཀྱིས་འགན་འཁུར་བའི་ཐོག་ནས་མཉམ་རུབ་ཀྱིས་སྤྱི་ཚོགས་ཡོངས་ལ་རྒྱབ་སྐྱོར་བྱེད་ཀྱི་ཡོད་པ་རེད།
དེ་སྔ་ཕྱི་ཟླ་དྲུག་པའི་ནང་སློབ་དཔོན་ཆེན་མོ་བསྟན་འཛིན་རྡོ་རྗེ་ལགས་ཀྱིས་ཅིའི་ཕྱིར་བོད་ནི་གནད་འགག་ཆེན་པོ་ཡིན་པའི་སྐོར་ལ་ཚོར་ཤུགས་ཆེན་པོའི་ཐོག་ནས་རྩོད་གླེང་གནང་ཡོད། https://www.tibetanreview.net/why-tibet-matters/]སློབ་དཔོན་ཆེན་མོ་ཁོང་གིས། བོད་ཀྱི་དཀའ་ངལ་ནི་འཛམ་གླིང་ཡོངས་ཀྱི་དཀའ་ངལ་ཞིག་ལ་ངོས་འཛིན་གྱི་ཡོད། དེ་ཡང་། བོད་ནི་འཛམ་གླིང་གི་ཡང་རྩེ་དང་། ཨེ་ཤེ་ཡའི་ཆུའི་འབྱུང་ཁུངས་གཙོ་བོ། འཛམ་གླིང་གི་སྣེ་གསུམ་པ་ཡིན་ཞིང་། བོད་ནི་སའི་གོ་ལའི་སྟེང་གི་ཁོར་ཡུག་ཉེན་ཁ་ཆེ་ཤོས་ཀྱི་ས་ཁུལ་ཞིག་ཏུ་ཆགས་ཡོད། བོད་སྲུང་སྐྱོབ་བྱེད་པ་ནི་འཛམ་གླིང་སྐྱོབ་པ་དང་གཅིག་མཚུངས་ཡིན། བོད་ནང་གི་་འགྲོ་བ་མིའི་ཐོབ་ཐང་གི་གནས་སྟངས་ནི་རྒྱལ་སྤྱིའི་སྤྱི་ཚོགས་ཐོག་ཤུགས་རྐྱེན་ཆེན་པོ་ཐེབས་ཀྱི་ཡོད། ཆོས་ལུགས་ཉམས་ལེན་བྱེད་པར་དམ་དྲག་བྱེད་ཀྱི་ཡོད། བཙན་དབང་གི་ཐོག་ནས་བོད་ཀྱི་སྐད་ཡིག་ལ་དམ་དྲག་དང་། བོད་ཀྱི་སྐད་ཡིག་ཉམས་རྒུད་གཏོང་གི་ཡོད་པ་རེད། བོད་མིའི་ཆོས་ལུགས་ཉམས་ལེན་བྱེད་པར་དམ་དྲག་དང་། རང་གི་སྐད་ཡིག་བེད་སྤྱོད་གཏོང་བར་བཀག་སྡོམ་གྱིས་ཉུང་མཐར་ལོ་ངོ་སྟོང་ཕྲག་གཅིག་རིང་གནས་པའི་བོད་ཀྱི་ཆོས་དང་རིག་གཞུང་རྣམས་རྩ་མེད་བཟོ་ཐབས་བྱེད་ཀྱི་ཡོད། སྲིད་ཇུས་དེ་དག་གིས་འཛམ་གླིང་ཡོངས་ལ་ཁྱབ་པའི་ནང་ཆོས་བོད་བརྒྱུད་ནང་བསྟན་ལ་ཉེན་ཁ་བཟོ་ཡི་ཡོད།
སློབ་དཔོན་ཆེན་མོ་རྡོ་རྗེ་ལགས་ཀྱིས་ནན་ཏན་གྱིས་བརྗོད་པ་ལྟར་ན། ཐག་གཅོད་གཏན་འབེབ་བྱས་པ་དེ་དག་བོད་མི་ཁོ་ནའི་ཁོངས་སུ་གཏོགས་ཀྱི་མེད། རང་ཉིད་ལ་ཐད་ཀར་ཤུགས་རྐྱེན་མ་ཐེབས་པར་འདོད་མཁན་ལ་བརྟེན་ནས་སྣང་མེད་ཀྱིས་མི་སུ་རུང་ཞིག་ལོ་རྒྱུས་ཀྱི་ཐལ་རྡུལ་ཁྲོད་ཡལ་འགྲོ་མི་ཉན། འགྲོ་བ་མིའི་རིགས་ཡར་རྒྱས་གོང་འཕེལ་དུ་འགྲོ་བར་མི་ཚང་མས་སྣ་མང་གི་རང་བཞིན་དང་། རྩལ་སྟོབས། སྙིང་སྟོབས་ལ་ཞབས་འདེགས་ཞུ་དགོས་པའི་འོས་འགན་ཡོད། ཆེད་ལས་སྣ་ཚོགས་ཀྱི་ཐོག་ནས་མི་སྒེར་གྱི་ནུས་པ་ལས་མཉམ་རུབ་ཀྱི་ནུས་པ་དེ་བླ་ན་མེད་པ་ཞིག་ཡིན། བོད་མི་ཚོས་རང་གི་རིག་གཞུང་སྲུང་སྐྱོབ་བྱེད་པར་མཉམ་རུབ་བྱས་ན་ཕན་ཐོགས་འབྱུང་ངེས་རེད།
ངས་ཧི་མ་ལ་ཡའི་ཁུལ་དུ་ལས་ཀ་བྱས་པའི་ཉམས་མྱོང་ལས་ཤེས་རྟོགས་བྱུང་བ་ཞིག་ནི། ཁོར་ཡུག་གི་རྐྱེན་ངན་དེ་དག་ལ་ཁ་གཏད་འཇོག་ཐབས་ཀྱི་ཁེ་ཕན་མང་ཆེ་བ་དེ་དང་འབྲེལ་བའི་མཉམ་ཞུགས་བྱས་པ་ཡིན། ས་གཞིའི་སྟེང་དུ་མི་རྣམས་འཚོ་གནས་བྱེད་ཀྱི་ཡོད་པ་དང་། མི་རབས་ནས་མི་རབས་བར་གནས་པའི་མི་དེ་དག་གིས་ས་གཞི་དེ་ཡུན་གནས་ཇི་ལྟར་བྱ་དགོས་པ་ལེགས་ཤོས་ཤེས་ཀྱི་ཡོད་པ་རེད། གང་མགྱོགས་ཀྱིས་འགྱུར་བ་འགྲོ་བའི་ཁོར་ཡུག་གི་གནས་སྟངས་ཀྱིས་དཀའ་ངལ་གསར་པ་མང་པོ་ཡོང་གི་ཡོད་ཅིང་། མི་རབས་ནས་མི་རབས་བར་ས་གཞིའི་ཤེས་ཡོན་ཡོད་པའི་མི་རྣམས་ལའང་དཀའ་ངལ་ཡོང་གི་ཡོད། ཚན་རིག་པ་ཚོས་གནམ་གཤིས་འགྱུར་ལྡོག་རྐྱེན་གྱིས་སའི་གོ་ལ་རྩ་གཏོར་དུ་གཏོང་བའི་ཤུགས་རྐྱེན་རྣམས་ཇེ་ཉུང་དུ་གཏོང་བར་ས་ཁུལ་གྱི་ཤེས་ཡོན་དེ་དག་གིས་ཁ་སྣོན་དེ་ཙམ་བྱེད་ཀྱི་མེད། འོན་ཀྱང་། འདི་ནི་དེའི་ཆ་ཤས་ཙམ་ཞིག་རེད།
བོད་ནང་གི་འགྲོ་བ་མིའི་ཐོབ་ཐང་ལ་དྲག་གནོན་བྱེད་མཁན་ཚོར་ཡོངས་གྲགས་ཀྱི་ཞུ་གཏུག་བྱ་རྒྱུ་ནི་ཤེས་ཡོན་ལ་རག་ལས་ཡོད། ད་ལྟའི་བོད་ཀྱི་གནས་སྟངས་འདི་ཇི་ལྟར་བྱུང་བའི་ལོ་རྒྱུས་ཀྱི་ཞིབ་ཆའི་ཐད་ལ་ཤེས་ཡོན་ཅན་གྱི་སྐུ་ཚབ་དང་། ཆབ་སྲིད་པ། ཁྲིམས་རྩོད་པ་ལྟ་བུ་བོད་ཀྱི་ལོ་རྒྱུས་ལ་མཁས་པ་ཞིག་དགོས། ད་ལྟའི་ས་གནས་ཀྱི་གནས་སྟངས་ལ་ཤེས་རྟོགས་ཡང་དག་ཅིག་དགོས་པ་ནི་དགོས་གལ་ཆེན་པོ་ཡིན། གཞི་རྒྱ་ཆེ་བའི་ཐོག་ནས་བོད་ཀྱི་རིག་གཞུང་གཏོར་བཤིག་གཏོང་མཁན་གྱི་གདུག་རྩུབ་ཅན་གྱི་སྲིད་ཇུས་དེ་ལོ་རྒྱུས་མིན་པའི་རྒྱས་བཤད་ནང་དུ་སྦས་སྐུང་བྱས་ཡོད་པ་དང་། བོད་ཀྱི་སྤྱི་དམངས་མིན་པའི་མི་སྣར་རྒྱབ་ལྗོངས་ལྡན་པའི་ཐོག་ནས་རྒོལ་ལན་སློག་མཁན་ཧ་ཅང་ཉུང་། བོད་ཀྱི་རིག་གཞུང་ལ་རིམ་པ་མང་པོའི་སྒོ་ནས་གཏོར་བཤིག་གཏོང་བཞིན་པར་ཁ་གཏད་གཅོག་སླད། ཡོངས་གྲགས་སུ་ཞུ་གཏུག་གི་ལས་འགུལ་ཡར་རྒྱས་གཏོང་བར་དངོས་ཡོད་ཀྱི་ལོ་རྒྱུས་དང་འབྲེལ་བའི་ཤེས་ཡོན་གྱི་གོ་རྟོགས་སྤེལ་དགོས་པ་ལས། རྒྱ་ནག་གི་ཡིག་ཆ་ཁོ་ན་ལས་བྱུང་བའི་ལོ་རྒྱུས་མིན་པར། བོད་དང་སོག་པོ། ཧིན་རྡི། བལ་ཡུལ། ཨུ་རུ་སུ་ཡང་ཡིན།
ནུབ་ཕྱོགས་ཀྱི་རྒྱལ་ཁབ་ཚོས་བོད་བརྒྱུད་ནང་བསྟན་ལ་ཤུགས་ཆེན་པོས་དང་ལེན་བྱས་ཡོད་པར་བརྟེན། བོད་བརྒྱུད་ནང་བསྟན་ཉམས་རྒུད་དུ་འགྲོ་བར་འགོག་རྒོལ་བྱེད་པར་དཀའ་ངལ་གཞན་དག་ལས་སླ་བ་ཞིག་ཏུ་སྣང་། ལེགས་སྦྱར་ནས་བསྒྱུར་བའི་བོད་ཀྱི་རྩོམ་རིག་སྲོལ་རྒྱུན་གྱི་གསུང་རབས་ནི་ཧ་ཅང་ཆེན་པོ་ཞིག་ཡིན་ཡང་། བོད་བརྒྱུད་ནང་བསྟན་གྱི་གཞུང་རྣམས་ནུབ་ཕྱོགས་ཀྱི་སྐད་ཡིག་ནང་དུ་བསྒྱུར་བའི་ཆ་ཤས་ཆུང་ངུ་ཞིག་ལས་མེད། བོད་མི་ཚོས་ལོ་ངོ་བརྒྱ་ཕྲག་མང་པོར་ལེགས་སྦྱར་མཁས་པ་དང་ལྷན་དུ་ཕྱག་ལས་གནང་བ་ལྟར། ནུབ་ཕྱོགས་ཀྱི་ལོ་ཙཱ་བ་ཚོར་ཡང་ཁོང་ཚོའི་སྲོལ་རྒྱུན་ལ་སློབ་སྦྱོང་ཆ་ཚང་བ་ཐོབ་པར་བོད་མི་ཚོས་ལམ་སྟོན་བྱེད་དགོས། སློབ་སྦྱོང་ཆ་ཚང་བ་ཐོབ་པའི་བོད་མི་མེད་ན། ནུབ་ཕྱོགས་ཀྱི་སྐད་ཡིག་གི་བསྒྱུར་རྣམས་ཆ་ཚང་བ་ཞིག་མི་ཡོང་ཞིང་། དེ་ལ་བརྟེན་ནས་ནང་བསྟན་ལ་གནོད་སྐྱོན་འབྱུང་རྒྱུ་རེད།
འཛམ་གླིང་གི་ནོར་བུ་རིན་པོ་ཆེ་ཁྱད་དུ་འཕགས་པ་ཞིག་སྲུང་སྐྱོབ་བྱེད་པར་ཤེས་བྱ་སྣ་ཚོགས་ཀྱི་ཐབས་ལམ་དགོས་ཀྱི་ཡོད། རྒྱུ་མཚན་དེ་ལ་བརྟེན་ནས་ངས་ཆེད་ལས་མི་འདྲ་བའི་མཁས་པ་མང་པོ་འདུས་པའི་ཚོགས་པ་ཞིག་རྒྱ་སྐྱེད་གཏོང་བའི་ལས་དོན་སྒྲུབ་བཞིན་ཡོད། ཚོགས་པ་དེའི་འགོ་ཁྲིད་ནི་བོད་བརྒྱུད་ནང་བསྟན་གྱི་གསུང་རབ་རྣམས་སྐད་སྒྱུར་བྱེད་མཁན་གྱི་མཁས་པ་གཉིས་ཡིན་ལ། ཚོགས་མི་གཉིས་ནི་འཕྲུལ་ལས་རིག་པའི་ཆེད་མཁས་པ་ཡིན་པ་དང་། འདི་ནི་དུས་རབས་ཉེར་གཅིག་པའི་ནང་དུ་གལ་ཆེན་ཡིན་པའི་རིག་རྩལ་ཞིག་དང་། ལྷག་པར་དུ་རྒྱ་ཆེའི་ཀློག་པ་པོ་རྣམས་ལ་འབྲེལ་འདྲིས་བྱེད་པར་དགོས་ངེས་ཤིག་ཡིན། ང་རང་ལ་ཧི་མ་ལ་ཡའི་ཁུལ་གྱི་ཁོར་ཡུག་སྲུང་སྐྱོབ་ཀྱི་ཞིབ་འཇུག་གི་ཉམས་མྱོང་རྒྱ་ཆེན་ཞིག་ཡོད་པ་མ་ཟད། བོད་ཀྱི་ལོ་རྒྱུས་ལ་སྦྱོང་བརྡར་ཐོབ་པའི་ལོ་རྒྱུས་སྨྲ་བ་ཞིག་ཀྱང་ཡིན། ཁྲིམས་རྩོད་པ་ཞིག་གི་ངོས་ནས་ཀྱང་ཤེས་ཡོན་སློབ་སྦྱོང་བྱས་ཡོད། ང་ཚོའི་ཆེད་མཁས་པ་གཞན་ཞིག་ནི་སྐད་ཡིག་གི་སྒྱུར་སྦྱོང་མཐོ་ཤོས་དེ་མ་བྱས་པའི་སྔོན་དུ་ཁྲིམས་རྩོད་པའི་ཉམས་མྱོང་ཡོད་པ་ཞིག་ཡིན། ང་ཚོས་བོད་ཀྱི་སློབ་སྦྱོང་གི་བསླབ་གཞིའི་ནང་དུ་ཉམས་མྱོང་སྣ་མང་འདི་དག་འདོན་གྱི་ཡོད།
ང་ཚོས་གང་བྱེད་ཐུབ་ཞེ་ན། སོ་སོའི་ཆེད་ལས་ཕུད་པའི་ང་རང་གི་ཚོགས་པ་དང་མཚུངས་པའི་ཚོགས་པ་གཞན་མང་དག་ཅིག་གི་སྐོར་ལ་སྐད་ཆ་ཁྱབ་སྤེལ་གཏོང་རྒྱུ་དེ་རེད། ཐབས་ལ་མཁས་པའི་ཞུ་གཏུག་པ་ཚོས་ཕུལ་བའི་ལེགས་སྐྱེས་རྣམས་བེད་སྤྱོད་ལེགས་པོ་ཡོང་བར། ང་ཚོས་ཁོ་ཚོར་ལས་དོན་སྒྲུབ་པའི་མཐུན་རྐྱེན་སྦྱོར་བར་རོགས་རམ་བྱ་དགོས། གསར་འགྱུར་གྱི་དུས་འཁོར་ཞིག་ལ་སྐར་མ་ལྟར་གནས་པའི་འཛམ་གླིང་ཁྲོད། བོད་ཀྱི་གནད་དོན་ནི་ཆུ་ཐིགས་ཙམ་ཡང་གླེང་རྒྱུ་མེད་པ་དང་། འདི་ནི་གནད་དོན་དེ་འབྲེལ་མེད་དམ་གལ་ཆེན་མིན་པའི་རྒྱུ་མཚན་ཞིག་མིན་པར། ད་ལྟའི་འཛམ་གླིང་གི་བྱེད་ཐབས་ཀྱི་ལག་ཆ་ཙམ་ཞིག་ཡིན། བོད་ཀྱི་མ་འོངས་པ་དང་། བོད་ཀྱི་རིག་གཞུང་། བོད་བརྒྱུད་ནང་བསྟན་གྱི་ཆེད་དུ་སེམས་ཁྲལ་བྱེད་མཁན་ཚོར་སྤྱི་ཚོགས་ཧྲིལ་པོ་ལ་རྒྱབ་སྐྱོར་དང་མཉམ་རུབ་བྱེད་པའི་འགན་འཁྲི་ཞིག་ཡོད། གཅིག་བྱས་ན། ང་ཚོས་ལོ་རྒྱུས་ཀྱི་འཕེལ་ཕྱོགས་ལ་འགྱུར་བ་གཏོང་མི་ཐུབ་ཀྱང་། ང་ཚོས་དེའི་ཤུགས་རྐྱེན་ངན་པ་རྣམས་ཉུང་དུ་གཏོང་ཐུབ།
མ་རྩོམ་གྱི་འབྲེལ་ཐག https://www.tibetanreview.net/fighting-for-tibet-must-be-a-team-effort/
