བདུན་ཕྲག་གཅིག་རིང་ལ་དྭགས་གར་གིལ་དུ་བོད་ཡིག་འབྲི་ཀློག་གི་ཟབ་སྦྱོང་འཚོག་གི་འདུག

ཟླ་འདིའི་ཕྱི་ཚེས་ ༡༧ ཉིན་ནས་བདུན་ཕྲག་གཅིག་རིང་ལ་དྭགས་གར་གིལ་རྫོང་དུ་གཞོན་སྐྱེས་གཙོ་བོར་གྱུར་བའི་ཡུལ་མི་ ༡༠༠ ཙམ་ལ་བོད་ཡིག་འབྲི་ཀློག་གི་ཟབ་སྦྱོང་ཐེངས་གསུམ་པ་དེ་འཚོག་བཞིན་འདུག

ཟླ་འདིའི་ཕྱི་ཚེས་ ༡༧ ནས་ ༢༣ བར་ཉིན་གྲངས་བདུན་རིང་ལ་དྭགས་གར་གིལ་རྫོང་བཟོ་དང་ཤེས་རིག སྐད་ཡིག་གི་ལས་སྡེ་དང་། ཧི་མ་ལ་ཡའི་རིག་གཞུང་རྒྱུན་འཛིན་ཁང་གཉིས་ཀྱི་གོ་སྒྲིག་འོག གར་གིལ་གྱི་ཡུལ་མི་རྣམས་ལ་ཡི་གེ་ཀློག་རྩལ་དང་འབྲི་རྩལ་གྱི་ཟབ་སྦྱོང་ཞིག་འཚོག་བཞིན་འདུག་ལ། ཐེངས་འདིའི་ཟབ་སྦྱོང་ནང་གར་གིལ་གྱི་ཡུལ་མི་ ༡༠༠ ཙམ་མཉམ་ཞུགས་བྱས་འདུག་ལ། མང་ཆེ་བ་གཞོན་སྐྱེས་རེད་འདུག

འདི་ག་བོད་ཀྱི་དུས་བབ་གསར་ཁང་ལ་ཧི་མ་ལ་ཡའི་རིག་གཞུང་རྒྱུན་འཛིན་ཁང་གི་འགན་འཛིན་དགེ་བཤེས་དཀོན་མཆོག་དབང་འདུས་ལགས་ཀྱིས། ལ་དྭགས་སུ་གླེ་རྫོང་དང་གར་གིལ་རྫོང་གཉིས་ཡོད། གར་གིལ་རྫོང་ཁོངས་ནང་མང་ཤོས་ཁ་ཆེ་ཆོས་ལུགས་དང་ཤཱིན་ཆོས་ལུགས་ལ་དད་པ་བྱེད་མཁན་ཆགས་ཡོད། སྤྱིར་ཡུལ་མི་རྣམས་ཀྱི་སྐད་ཀྱི་སྒྲ་གདངས་ནི་བོད་ཡིག་གི་རྨང་གཞི་བཞིན་སྒྲ་གདངས་ཧ་ཅང་གསལ་བོ་ཡོད། དཔེར་ན། དྲི་མ་ལ་དི་རི་མ་དང་། གྲི་ལ་གི་རི། འབྲི་ལ་འབི་རི་སོགས་སྒྲ་གདངས་ཧ་ཅང་གསལ་བོ་ཡོད། ཁོང་ཚོས་ཡི་གེ་སློབ་རྒྱུའང་ཧ་ཅང་ལས་སླ་བོ་རེད། ད་ལྟ་བར་ཁོང་ཚོའི་སྐད་ལ་ཉམས་ཆག་བྱུང་མེད་ཀྱང་། ཡིག་ཐོག་གི་སློབ་སྦྱོང་སྤྲོད་རྒྱུ་ཏོག་ཙམ་འཐུས་ཤོར་ཕྱིན་འདུག ད་ལན་ཁོང་ཚོས་རེ་སྐུལ་ཞུས་པ་བཞིན་ཡུལ་མི་བརྒྱ་ཙམ་ལ་ཟབ་སྦྱོང་སྤྲོད་བཞིན་ཡོད། ཅེས་འགྲེལ་བརྗོད་གནང་བྱུང།

ཡང་ཁོང་གིས། ཐེངས་འདིའི་ཟབ་སྦྱོང་གི་རྨང་གཞི་ཡག་པོ་ཆགས་པ་ཡིན་ཚེ། མ་འོངས་པར་མཉམ་ཞུགས་གནང་མཁན་ཁྲོད་ཀྱི་སློབ་སྦྱོང་ཡག་པོ་ཐོན་པ་རྣམས་གཞི་རིམ་གོང་མའི་སློབ་སྦྱོང་ཆེད་གླེ་དང་དྷ་རམ་ས་ལར་གཏོང་འཆར་ཡོད། གཙོ་བོ་ཁོང་ཚོས་བོད་ཡིག་སློབ་སྦྱོང་ཐོག་དོ་སྣང་ཡོང་དགོས་པ་རེད། སྔོན་མ་བོད་ཡིག་ཟེར་དུས་ཁོང་ཚོའི་བསམ་བློའི་ནང་དུ་ནང་ཆོས་གཅིག་པོ་འཁོར་འདུག ཡི་གེ་དང་ཆོས་ལུགས་གཉིས་ལོགས་ཀ་བྱས་ཏེ་ལོ་ཁ་ཤས་རིང་སློབ་སྦྱོང་བྱས་པ་རེད། ཁ་ཆེ་ཆོས་ལུགས་ཀྱི་གཞུང་བོད་ཡིག་ནང་དུ་བསྒྱུར་ཚེ་མི་མང་པོས་ཤེས་ཐུབ་པས་ཡག་པོ་ཡོད་པ་རེད་ཅེས་ལབ་མྱོང་ཡོད། ད་ལྟ་ཁ་ཆེ་ཆོས་དེ་བོད་ཡིག་ནང་དུ་བསྒྱུར་ཡོད་པ་རེད།  དེའི་ཐོག་ནས་བོད་ཡིག་ཐོག་ཏུ་དོ་སྣང་ཤུགས་ཆེན་ཡོང་གི་འདུག  སྦལ་ཏི་སི་ཐན་གྱི་ཡུལ་མི་རྣམས་ལྷ་སར་ཕྱིན་ཏེ་བོད་ཡིག་སྦྱངས་ཡོད་པ་མ་ཟད། ཁོང་ཚོས་ཁྱིམ་དང་ཚོང་ཁང་གི་སྒོ་བྱང་སོགས་ཀྱང་བོད་ཡིག་ཐོག་ནས་བྲིས་ཡོད། དེའི་ཤུགས་རྐྱེན་གྱིས་གར་གིལ་གྱི་ཡུལ་མི་ཚོས་ཀྱང་བོད་ཡིག་ཐོག་དོ་སྣང་བྱུང་འདུག ཕྱི་ལོ་ ༢༠༡༨ ལོ་ནས་བཟུང་ང་ཚོས་བོད་ཡིག་ཐོག་གོ་རྟོགས་སྤེལ་བའི་ལས་འགུལ་མགོ་བརྩམས་པ་རེད། ད་ལན་ལས་འགུལ་ཐེངས་གསུམ་པ་དེ་ཆགས་ཡོད། མ་འོངས་པར་ཁོང་ཚོས་བོད་ཡིག་སློབ་སྦྱོང་ཡག་པོ་ཐོན་ཚེ་ཚགས་པར་པར་སྐྲུན་བྱ་རྒྱུ་ཡིན་ལ། ཁོང་ཚོར་སྙན་ངག་གྱེར་འདོན་བྱེད་པའི་ལས་འགུལ་དེ་འདྲ་འདུག  ཡིན་ནའང་བོད་ཡིག་ཐོག་ཕབ་མ་ཐུབ་པར་ཨར་བྷི་ནང་འབྲི་བཞིན་འདུག ད་ལན་ང་ཚོས་བོད་ཡིག་ནང་དུ་འབྲི་ཐུབ་པ་ངོ་སྤྲོད་ཞུས་ཡོད། ཁོང་ཚོའི་སྐད་ཀྱི་སྒྲ་གདངས་དག་པོ་ཡོད་པས་ལམ་སེང་འབྲི་ཐུབ་པ་མ་ཟད་ཚད་ཀྱང་མཐོན་པོ་ཆགས་ཀྱི་འདུག ཅེས་འགྲེལ་བརྗོད་གནང་བྱུང་།

ཐེངས་འདིའི་ཟབ་སྦྱོང་སྐོར་ལ་གར་གིལ་རྫོང་གི་རིག་གཞུང་སྡེ་ཚན་གྱི་དྲུང་གཞོན་ན་ཟིར་ཧུ་སེན་ལགས་ཀྱིས། བོད་ཡིག་ནི་ང་ཚོའི་ཕ་སྐད་རེད། སྟབས་མ་ལེགས་པ་ཞིག་ལ་ང་ཚོས་སྐད་བཤད་ཀྱི་ཡོད་པ་མ་གཏོགས་ཡི་གེ་འབྲི་ཤེས་ཀྱི་ཡོད་པ་མ་རེད། ང་ཚོས་དབྱིན་སྐད་དང་། ཨ་རབ་སྐད་སོགས་སློབ་སྦྱོང་བྱས་ཏེ་ཤེས་ཀྱི་ཡོད་པ་རེད། དེས་ན་རང་ཉིད་ཀྱི་སྐད་ཡིག་འབྲི་ཀློག་མི་སྦྱོང་བའི་རྒྱུ་མཚན་མེད་པ་རེད། སྐད་ཡིག་ལ་ཆོས་ལུགས་དང་ལུང་ཚན་གྱི་སྐད་ཆ་གང་ཡང་ཡོད་པ་མ་རེད། རྒྱ་གར་བྷི་ཧར་མངའ་སྡེའི་ནང་དུ་ཧིན་དྷིའི་སྐད་ཡིག་ཐོག་ནས་ཤེས་ཡོན་སྦྱོང་གི་ཡོད་ཅིང་། རྒྱ་གར་ལྷོ་ཕྱོགས་སུ་ཏཱ་མིལ་སྐད་ཡིག་སོགས་ཀྱི་ཐོག་ནས་སློབ་སྦྱོང་བྱེད་ཀྱི་ཡོད། དེ་བཞིན་འཇར་མན་དུ་འཇར་མན་སྐད་ཡིག་ཐོག་སྦྱོང་བཞིན་ཡོད། མ་འོངས་པའི་གར་གིལ་གྱི་མི་རབས་གསར་པའི་ཆེད་དུ་རང་ཉིད་ཀྱི་སྐད་ཡིག་ཟབ་སྦྱོང་ཞིག་སྤྲད་ན་བཀའ་དྲིན་ཆེ་ཞུ་རྒྱུ་ཡིན། ཞེས་བརྗོད་གནང་བྱུང་།

གར་གིལ་ནི་ལ་དྭགས་རང་སྐྱོང་མངའ་སྡེའི་ནང་གི་རྒྱལ་ས་གཉིས་པ་དེ་ཡིན་ཞིང་། ཕྱི་ལོ་ ༡༩༧༩ ལོར་ཇཱ་མུ་དང་ཀ་ཤི་མུར་མངའ་སྡེའི་ཁོངས་ཀྱི་རྫོང་ཞིག་ཏུ་ཆགས་ཡོད་འདུག རྒྱུན་སྤྱོད་སྐད་ཡིག་ནི་ལ་དྭགས་སྐད་དང་ཨུར་ཌུ། པར་གེ། ཨར་བྷི་སོགས་ཡིན་འདུག་ལ། ཝེ་ཀེ་རིག་མཛོད་ཀྱི་ཕྱི་ལོ་ ༢༠༡༡ ལོའི་གྲངས་ཐོ་ལྟར་ན། རྫོང་ཡོངས་སུ་མི་འབོར་ ༡༦༣༣༨ ལྷག་ཡོད་པའི་ཁྲོད་བརྒྱ་ཆ་ ༩༢ ཤཱིན་ཁ་ཆེ་ཆོས་ལུགས་པ་དང་། བརྒྱ་ཆ་ ༧།༨ ཙམ་ནང་པ་ཡིན་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་བྱེད་མཁན། པདྨ་མཚོ།