པན་ཇབ་གཙུག་ལག་སློབ་གཉེར་ཁང་དུ་༧གོང་ས་མཆོག་གི་མཚན་གནས་རྗེས་འབྲེལ་གྱི་དམིགས་བསལ་ལས་རིམ་ཞིག་བསྒྲིགས་ཏེ། ༧གོང་ས་མཆོག་གི་འཚེ་བ་མེད་པ་དང་ཞི་བདེ། ཆོས་ལུགས་ལ་མ་བརྟེན་པའི་བཟང་སྤྱོད། གྷན་དྷིའི་ལྟ་གྲུབ་སོགས་གོང་འཕེལ་གཏོང་ཐབས་བྱ་རྒྱུ་ཡིན་འདུག
ཁ་སང་ཕྱི་ཚེས་ ༢༠ ཉིན་རྒྱ་གར་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། པན་ཇབ་གཙུག་ལག་སློབ་གཉེར་ཁང་དུ་༧གོང་ས་ཏཱ་ལའི་བླ་མའི་མཚན་གནས་རྗེས་འབྲེལ་གྱི་དམིགས་བསལ་ས་མིག་ཤིག་གསར་འཛུགས་བྱས་ཡོད་པ་དང་། པན་ཇབ་གཙུག་ལག་སློབ་གཉེར་ཁང་གིས་༧གོང་ས་རྒྱལ་བ་རིན་པོ་ཆེ་མཆོག་གཙོ་བོར་གྱུར་བའི་ནང་བསྟན་མཁས་པ་རྣམས་མགྲོན་འབོད་བྱས་ཏེ། ནང་པའི་ལྟ་གྲུབ་དང་བོད་ཡིག པ་ལིའི་ནང་པའི་གཞུང་། དཀའ་ངལ་འཕྲད་པའི་སྐབས་ནང་ཆོས་ཀྱི་ཐོག་ནས་གདོང་ལེན་ཇི་ལྟར་བྱ་དགོས་པ། ནང་པའི་སྒྱུ་རྩལ་དང་བཟོ་རིག་གོང་འཕེལ་གཏོང་བར་དམིགས་ཡོད་འདུག
༧གོང་ས་ཏཱ་ལའི་བླ་མའི་གོ་ལ་གཅིག་གྱུར་གྱི་འགན་འཁུར་ཐེབས་རྩ་ཁང་ (His Holiness Dalai Lama’s foundation For Universal Responsibility) དང་རྒྱ་གར་གྱི་པན་ཇབ་གཙུག་ལག་སློབ་གཉེར་ཁང་གཉིས་ཀྱི་བར་ལ་གྷན་དྷི་དང་ཞི་བདེའི་ཞིབ་འཇུག་ཚན་པའི་ནང་ཏཱ་ལའི་བླ་མའི་མཚན་གནས་རྗེས་འབྲེལ་གྱི་དམིགས་བསལ་ས་མིག་ཤིག་གསར་འཛུགས་བྱ་རྒྱུའི་གྲོས་མཐུན་ཡིག་ཆར་མཚན་རྟགས་བསྐྱོན་ཡོད་འདུག
དེ་འབྲེལ་པན་ཇབ་གཙུག་ལག་སློབ་གཉེར་ཁང་གི་ཉེ་བའི་རིགས་བདག་སློབ་དཔོན་རི་ནུ་ཝིག་ (Renu Vig) ལགས་ཀྱིས། དམིགས་བསལ་ས་མིག་གསར་འཛུགས་བྱས་པའི་དམིགས་ཡུལ་གཙོ་བོ་ནི་ལྟ་གྲུབ་དང་། ལོ་རྒྱུས། ཆོས་ལུགས་སློབ་གཉེར་ཁྱབ་སྤེལ་ཆེད་བོད་རྒྱའི་གནའ་བོའི་དཔལ་ཡོན་རྣམས་མི་ཉམས་རྒྱུན་འཛིན་དང་གོང་སྤེལ་གཏོང་རྒྱུ་ཡིན། ཞེས་བརྗོད་འདུག
ད་དུང་ཁོང་གིས། ལས་གཞི་དེའི་བརྒྱུད་༧གོང་ས་རྒྱལ་བ་རིན་པོ་ཆེ་མཆོག་གི་གསུང་ཆོས་དང་ལྟ་གྲུབ་ཁྱབ་སྤེལ་བྱ་རྒྱུ་དང་། སློབ་ཕྲུག་དང་། སློབ་དཔོན། རྒྱ་ཆེའི་མང་ཚོགས་ཁྲོད་དཔྱད་ཞིབ་ཀྱི་བསམ་བློ་གོང་འཕེལ་གཏོང་རྒྱུ། དམིགས་བསལ་གྱིས་ནང་པའི་གཞུང་ལུགས་ཀྱི་ཐབས་ལམ་བརྒྱུད་ནས་དེང་དུས་ཀྱི་དཀའ་ངལ་ཁག་སེལ་ཐབས་དང་། བོད་དང་པ་ལིའི་ནང་པའི་གཞུང་། ནང་པའི་སྒྱུ་རྩལ་དང་བཟོ་རིག ནང་པའི་ལྟ་གྲུབ་སོགས་གོང་སྤེལ་གཏོང་རྒྱུ་དེ་ཡིན། ཞེས་བརྗོད་འདུག
གྷན་དྷི་དང་ཞི་བདེའི་ཞིབ་འཇུག་ཚན་པའི་འགན་འཛིན་ཨ་ཤུ་ (Ashu Pasricha) ལགས་ཀྱིས། གྲོས་མཐུན་དེ་བརྒྱུད་༧གོང་ས་རྒྱལ་བ་རིན་པོ་ཆེ་མཆོག་གི་མཛད་རྗེས་ཁྲོད་འཚེ་བ་མེད་པ་དང་། ཞི་བདེ། ཆོས་ལུགས་ལ་མ་བརྟེན་པའི་བཟང་སྤྱོད། གྷན་དྷིའི་ལྟ་གྲུབ་སོགས་ཀྱི་ཐོག་ལ་ཞིབ་འཇུག་ཟབ་ཏུ་གཏོང་རྒྱུ་ཡིན་། ཞེས་བརྗོད་འདུག ༧གོང་ས་ཏཱ་ལའི་བླ་མའི་མཚན་གནས་རྗེས་འབྲེལ་གྱི་དམིགས་བསལ་ས་མིག་ལས་གཞིའི་བརྒྱུད་དེང་དུས་ཀྱི་གཞོན་སྐྱེས་དང་མཁས་པ་གང་མང་གདན་འདྲེན་ཞུ་རྒྱུ་ཡིན་འདུག ཕྱི་ལོ་ ༡༨༨༢ ལོར་ལ་ཧོར་ (Lahore) དུ་པན་ཇབ་གཙུག་ལག་སློབ་གཉེར་ཁང་གསར་འཛུགས་བྱས། ཕྱི་ལོ་ ༡༩༤༧ ལོར་རྒྱ་གར་གཞུང་གི་ཁོངས་སུ་བཅུག་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
