༧གོང་ས་རྒྱལ་བ་རིན་པོ་ཆེ་མཆོག་ནས་བོད་ཀྱི་ཆོས་དང་རིག་གཞུང་གིས་འཛམ་གླིང་སྤྱི་ལ་ཕན་ཐོགས་བྱེད་ཐུབ་པའི་སེམས་ཤུགས་དང་སྙིང་སྟོབས་བསྐྱེད་དེ་ཧུར་ཐག་བྱེད་དགོས་ཞེས་བཀའ་སློབ་བསྩལ་སོང་།
![](https://tibettimes.net/wp-content/uploads/2024/08/IMG_9537-scaled.jpeg)
དེ་རིང་ཨ་རིའི་ཞོགས་པའི་ཆུ་ཚོད་༩ ཐོག་ནིའུ་ཡོག་ཡུག་བྷི་ཨེ་སི་ཨ་རེ་ནཱ་རྩེད་རའི(UBS ARENA) ནང་དུ། བྱང་ཨ་རིའི་བོད་མི་དང་། སོག་རིགས། ཧི་མ་ལ་ཡའི་རི་རྒྱུད་ཁུལ་གྱི་དད་ལྡན་སེར་སྐྱ་མི་མང་སྟོང་ཕྲག་མང་པོས་༧གོང་ས་རྒྱལ་བ་རིན་པོ་ཆེ་མཆོག་ལ་མཚོན་དོན་བརྟན་བཞུགས་བསྟར་འབུལ་ཞུས་སོང་།
༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་འདིར་བོད་ཀྱི་མདོ་སྟོད་སྨད་དབུས་གཙང་སོགས་བོད་ཀྱི་ས་ཁུལ་ཡོངས་རྫོགས་ཀྱི་མི་སྣ་འཛོམས་ཡོད། འདིར་འཛོམས་པ་དེ་རྒྱུ་དངོས་ཐོག་ནས་འཛོམས་ཀྱི་མེད། བོད་རིགས་ཞེས་པའི་བསམ་ཚུལ་གྱི་ཐོག་ནས་ང་ཚོ་ཚང་མ་རྡོག་སྒྲིལ་ནས་ཡོང་གི་ཡོད། ང་ཚོ་བོད་པ་གཅིག་པུ་ཙམ་མིན་པར་བོད་ཀྱི་ཆོས་དང་རིག་གཞུང་ལ་ཤིན་ཏུ་མཁས་པའི་གྲོགས་པོ་མང་པོ་འདུས་ཡོད། བོད་ཀྱི་རིག་གཞུང་དེ་འཛམ་བུ་གླིང་སྤྱི་ལ་མཁོ་བའི་རིག་གཞུང་ཞིག་ཆགས་བསྡད་ཡོད། སངས་རྒྱས་བཅོམ་ལྡན་འདས་མངོན་པར་རྫོགས་པའི་སངས་རྒྱས་པའི་རྗེས་སུ། ཆོས་ཀྱི་འཁོར་ལོ་རིམ་པ་གསུམ་བསྐོར་བ་རེད། གང་ལྟར་སངས་རྒྱས་བཅོམ་ལྡན་མྱ་ངན་འདས་རྗེས་སངས་རྒྱས་ཀྱི་ཆོས་ལ་སྤུས་དག་པོའི་ཐོག་ཆ་ཚང་བདག་པོ་རྒྱག་མཁན་གཙོ་བོ་ཧི་མ་ལ་ཡའི་རི་རྒྱུད་ཀྱི་བོད་རིགས་རྣམས་རེད། དེང་སང་ང་ཚོས་མཐོང་ཆོས་སུ་ཡོད་བསྡད་པ་དེ་རེད། དངོས་གནས་དྲང་གནས་བོད་གངས་ཅན་ལྗོངས་ཀྱི་སློབ་གཉེར་དེ་ཚིག་ལ་འགྲེལ་བཤད་རྒྱག་རྒྱུ་ཡོད་པ་དང་དོན་དག་ལ་བསམ་བློ་གཏོང་རྒྱུ་ཡོད་པ།བསླབ་པ་གསུམ་གྱི་ཐོག་ལ་ཉམས་ལེན་བྱ་རྒྱུ་བཅས་ང་ཚོ་བོད་པར་ལོ་ངོ་སྟོང་ཕྲག་རིང་གོམས་ཏེ་སྤུས་དག་ཆགས་ཡོད། ངོས་རང་ལ་ཆ་བཞག་ན་ཆུང་ཆུང་ཡིན་པའི་སྐབས་ནས་བོད་གངས་ཅན་ལྗོངས་ཀྱི་མཁས་དབང་ཡོངས་འཛིན་རྣམ་པའི་ཐུགས་རྗེ་བཀའ་དྲིན་ལ་བརྟེན་ནས་དཔེ་ཆ་བལྟས་པ་རེད། ཆུང་དུས་དཔེ་ཆ་བལྟས་པ་དེ་ན་ཚོད་ཏོག་ཙམ་ལོན་པའི་སྐབས་སུ། དེ་དག་དངོས་གནས་ཚིག་བཟང་བ་དང་དོན་རྒྱ་ཆེན་པོ་ཡོད་པ་གཞི་ནས་ངོས་འཛིན་ཡོང་གི་འདུག བོད་གངས་ཅན་ལྗོངས་ཀྱི་དབུས་གཙང་མདོ་སྟོད་སྨད་ཀྱི་ས་ཁུལ་ཚང་མར་སྲོལ་རྒྱུན་ཐོག་སངས་རྒྱས་པའི་ཆོས་ལ་གོམས་གཤིས་དང་སློབ་གཉེར་ཡོད་པ་རེད། བར་སྐབས་རྐྱེན་ངན་མང་པོ་འཕྲད་ཡོད་ཀྱང་གཙོ་བོ་བོད་རྒྱ་ཆེའི་མི་མང་གི་སྙིང་སྟོབས་དང་ལྷག་བསམ་འགྱུར་བ་མེད་པར་བསྡད་པ་རེད། ངོས་ལ་༧རྒྱལ་བ་བསྟན་འཛིན་རྒྱ་མཚོ་ཞེས་བོད་རྒྱ་ཆེའི་མི་མང་གིས་རེ་བ་བཅོལ་ས་བྱེད་བསྡད་ཡོད། ད་ལྟ་བར་དུ་བོད་རྒྱ་ཆེ་མི་མང་གི་གནས་སྐབས་དང་མཐར་ཐུག་གི་རེ་འདུན་གང་ཡོད་ཀྱང་། ངོས་ཀྱིས་ཁ་ཞེ་གཉིས་མེད་སྟེང་རེ་འདུན་འགྲུབ་ཐུབ་པའི་སྨོན་ལམ་བརྒྱབ་ཡོད་པ་མ་ཟད། ལག་ལེན་གྱི་ཐོག་ནས་ཁ་ཡོད་ལག་ཡོད་ཆགས་ཐུབ་པར་འབད་བརྩོན་བྱས་བསྡད་ཡོད། ངོས་ཀྱིས་ཧུར་ཐག་འབད་ཐག་བྱས་ཡིན། ངོས་ཀྱི་མི་ཚེ་ད་དུང་ཡང་ལོ་བརྒྱ་ལྷག་རིང་བསྡད་ཀྱི་རེད། ངོས་ཀྱིས་བོད་རྒྱ་ཆེ་མི་མང་གི་རེ་འདུན་འགྲུབ་ཐུབ་པ་བྱ་རྒྱུ་ཡིན། ངོས་ཀྱི་རྨི་ལམ་ལ་དཔལ་ལྡན་ལྷ་མོ་ངོས་ཀྱི་མཇིང་པའི་སྟེང་དུ་ཕེབས་ཏེ། ལོ་བརྒྱ་དང་སུམ་ཅུ་སོ་གྲངས་ཤིག་འཚོ་ཡི་རེད་ཅེས་གསུངས་བྱུང་།
![](https://tibettimes.net/wp-content/uploads/2024/08/IMG_9538-scaled.jpeg)
ཡང་༧མགོན་པོ་གང་ཉིད་མཆོག་ནས། ད་ལྟ་བོད་ཆོལ་ཁ་གསུམ་གྱི་གཞིས་ལུས་རྒྱ་ཆེ་མི་མང་གི་སེམས་ཤུགས་ཧ་ལས་པ་རེད། བར་སྐབས་རྐྱེན་མང་པོ་འཕྲད་ཡོད་ཀྱང་། ཆོལ་ཁ་གསུམ་གྱི་བོད་རིགས་ཟེར་བ་བློ་ལ་གཡོ་བ་མེད་པར་དད་པ་རྩེ་གཅིག་ཡིན་པ་མངོན་གསལ་དོད་པོ་རེད། འཛམ་བུ་གླིང་དུ་བོད་ཀྱི་གནས་ཚུལ་གསལ་བོ་ཆགས་དུས། ནང་ཆོས་དང་འབྲེལ་བ་མེད་པའི་གྲོགས་པོ་མང་པོ་ཞིག་བོད་ཀྱི་ཆོས་དང་། རིག་གཞུང་། གོམས་གཤིས་སོགས་ལ་དགའ་མོས་བྱེད་བསྡད་ཀྱི་འདུག རྒྱ་མི་གུང་ཁྲན་གྱིས་བོད་པར་མཐོང་ཆུང་ཁྱད་གསོད་བྱས་བསྡད་ཡོད་ཀྱང་། རིམ་བཞིན་དུས་ཚོད་ཕྱིན་པའི་སྐབས་སུ་རྒྱ་རིགས་ནང་གི་དཔོན་རིགས་མང་པོ་ཞིག་གིས་ཀྱང་བོད་ཀྱི་གོམས་གཤིས་ལ་དགའ་མོས་བྱས་བསྡད་ཀྱི་འདུག དེ་ནི་ང་ཚོའི་ལྷག་བསམ་གྱི་སྟོབས་ཤུགས་རེད། ད་ལྟ་བར་དུ་ཚང་མས་ཧུར་ཐག་བྱས་པ་རེད། ད་དུང་ཡང་ཧུར་ཐག་བྱེད་རོགས། ཞེས་གསུངས་སོང་།
ཡང་མགོན་པོ་གང་ཉིད་མཆོག་ནས། བར་སྐབས་བསྟན་པར་ཧ་ཅང་ཉམས་ཆག་བྱུང་བ་རེད། ཡིན་ནའང་རྐྱེན་ངན་གྲོགས་སུ་ཤར་བ་བཞིན་འཛམ་གླིང་གི་ས་ཆ་གང་སར་བོད་ཀྱི་ཆོས་དང་རིག་གཞུང་ལ་དོ་སྣང་གསར་པ་ཞིག་བསླེབས་ཡོད་པ་དང་། བོད་མི་རྣམས་ལ་སྙིང་ནས་ཤ་ཚ་དང་རྒྱབ་སྐྱོར་ཡོང་བསྡད་ཀྱི་འདུག ངོས་ཀྱིས་དཔལ་ལྡན་ལྷ་མོའི་ལུང་བསྟན་བཞིན་ཧུར་ཐག་བྱས་ཡིན། ད་དུང་ཡང་ལོ་བཅུ་ཕྲག་ཁ་ཤས་མུ་མཐུད་ནས་འབད་བརྩོན་བྱེད་ཐུབ་ཀྱི་རེད། ཁྱེད་ཚོས་ཀྱང་བོད་ཀྱི་ཆོས་དང་རིག་གཞུང་གིས་འཛམ་གླིང་སྤྱི་ལ་ཕན་ཐོགས་བྱེད་ཐུབ་པའི་སེམས་ཤུགས་དང་སྙིང་སྟོབས་བསྐྱེད་དེ་ཧུར་ཐག་བྱེད་ཤོག མགོ་ཁྲིད་མཁན་མདོ་སྨད་པ་ལྷ་མོ་དོན་གྲུབ་རེད། ཚང་མས་ཧ་ཅང་དགའ་བོ་བྱེད་ཀྱི་འདུག བོད་ཆོལ་ཁ་གསུམ་གྱི་བོད་རིགས་ཡོངས་ཀྱིས་དངོས་གནས་དགའ་ཞེན་འགྱུར་བ་མེད་པ་ཧ་ཅང་ཡག་པོ་རེད། བོད་ཀྱི་ཉེ་འདབས་ཀྱི་ལ་དྭགས་སོགས་ནས༧གོང་ས་ཏཱ་ལའི་བླ་མ་ཞེས་སྙིང་ཁོངས་རུས་པའི་གཏིང་ནས་དགའ་མོས་ལ་འགྱུར་བ་མེད་པར་བསྡད་པ་རེད། དགའ་ཞེན་བྱེད་ས་དེ་བོད་ཀྱི་རིག་གཞུང་རེད། བོད་པའི་རིག་གཞུང་ལབ་དུས་སྤྱིར་བཏང་གི་ཡུལ་སྲོལ་གོམས་གཤིས་གཅིག་པུ་མ་རེད། སངས་རྒྱས་ཀྱི་ཆོས་རྒྱ་ཆེ་བ་ཡོད། བཀའ་འགྱུར་པོ་ཏི་བརྒྱ་དང་བསྟན་འགྱུར་པོ་ཏི་ཉིས་བརྒྱ་ཙམ་ཡོད་པ་དེ། བོད་པ་ཚོས་མི་རབས་མང་པོར་སྦྱངས་ཏེ་རྒྱུད་དང་འབྲེལ་བ་བྱས་ཡོད། ཕལ་ཆེར་བོད་གངས་ཅན་ལྗོངས་ན་ཡོད་པའི་སངས་རྒྱས་ཀྱི་ཆོས་དེ་རྒྱ་ཆེ་ཤོས་དང་ཟབ་ཤོས་དེ་རེད། བར་སྐབས་རྐྱེན་ངན་མང་པོ་བྱུང་ཡང་། ཕྱོགས་གཅིག་ནས་རྐྱེན་ངན་གྲོགས་ཤར་ལྟར་བོད་ཀྱི་ཆོས་དང་རིག་གཞུང་ལ་དོ་སྣང་གསར་པ་བསླེབས་ཡོད། བོད་རིགས་རྣམས་ལ་སེམས་ཤུགས་གསར་པ་བསྐྱེད་ཡོད་པ་རེད། བོད་མི་ཚོས་ད་ལྟ་བར་ཧུར་ཐག་འབད་ཐག་བྱས་སོང་། ད་དུང་མུ་མཐུད་བྱེད་རོགས། ང་ཚོས་ངོ་ཤེས་ཆོས་གྲོགས་ཚོས་ཀྱང་ཧུར་ཐག་འབད་ཐག་བྱས་པ་ཡག་པོ་རེད། བོད་པར་སྙིང་ནས་ཤ་ཚ་དང་ཞེན་ཁོག་འགྱུར་བ་མེད་པར་བསྡད་པ་རེད། ངོས་ཀྱིས་གྲོགས་པོ་ཚང་མར་བཀའ་དྲིན་ཆེ་ཞུ་རྒྱུ་ཡིན། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།