༧གོང་ས་མཆོག་ནས་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་དང་མི་ཉམས་གོང་འཕེལ་གཏོང་བའི་ཡིད་ཆེས་ཡོད་པ་མ་ཟད། བོད་དང་རྒྱ་ནག་མི་མང་དང་བཅས་པར་སངས་རྒྱས་བསྟན་པའི་ཐོག་ནས་ཞབས་འདེགས་ཞུ་རྒྱུ་ཡིན་གསུངས་སོང་།
དེ་རིང་ཕྱི་ཚེས་ ༡༨ ཉིན་གྱི་སྔ་དྲོའི་ཆུ་ཚོད་༨།༣༠ ཙམ་ལ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་ཀྱི་བུད་མེད་ལྷན་ཚོགས་དང་། བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག ཌལ་ཧོར་སློབ་ཟུར་བཅས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་སོང་།
༧གོང་ས་རྒྱལ་བ་རིན་པོ་ཆེ་མཆོག་ནས། ༧རྒྱལ་བ་བསྟན་འཛིན་རྒྱ་མཚོ་ཞེས་པའི་ལས་དང་སྨོན་ལམ་གྱི་ཐོག་ནས་བོད་བསྟན་སྲིད་དང་། ཆོལ་ཁ་གསུམ་གྱི་གནས་སྟངས་དང་བཅས་པར་ཕན་ཐོགས་བྱེད་ཐུབ་རྒྱུ་ཆགས་ཡོད། ཁྱེད་ཚོས་རྒྱལ་དབང་སྐུ་ཚེ་ཞབས་པད་བརྟན་པར་སྨོན་ལམ་བརྒྱབ་པ་དེ་བོད་བསྟན་སྲིད་ཀྱི་དོན་དག་ལ་འབྲེལ་བ་ཆགས་ཡོད། ངོས་རང་ལ་ཆ་བཞག་ན་ཚེ་རབས་མང་པོའི་ལས་བསགས་ཏེ། ད་ལྟའི་དུས་ཚོད་ཁག་པོ་འདིའི་སྐབས་སུ། ངོས་ལས་དང་སྨོན་ལམ་གྱི་སྟོབས་ཀྱིས་བོད་བསྟན་སྲིད་ཀྱི་དོན་བྱེད་མཁན་གྱི་སྐྱེ་གནས་ཤིག་བླངས་ཡོད། ནང་པའི་ཆོས་ལ་འགྲེལ་བཤད་དང་། སེམས་ཁམས་རིག་པའི་ཐོག་ནས་ཚན་རིག་པ་དང་མཉམ་དུ་བགྲོ་གླེང་ཡག་པོ་བྱེད་ཐུབ་པ་ཞིག་ཆགས་ཡོད། ལས་དང་སྨོན་ལམ་གྱིས་མདོ་སྨད་པ་ལྷ་མོ་དོན་གྲུབ་ཞེས་པ་མི་གོ་ཆོད་མཁན་ཞིག་ཆགས་ཡོད། ངོས་ཀྱིས་ད་ལྟའི་བར་དུ་བོད་བསྟན་སྲིད་ཀྱི་དོན་དུ་གང་ཡོང་ཅི་ཡོང་བྱས་པ་ཡིན་ལ། གང་ལྟར་ངོས་ཀྱི་མི་ཚེ་འདིར་བོད་བསྟན་སྲིད་ལ་ཕན་ཐོགས་ངེས་ཅན་ཞིག་བྱུང་ཡོད། ཅེས་གསུངས་སོང་།
མགོན་པོ་གང་ཉིད་མཆོག་ནས། དེང་སང་རྒྱ་ནག་ནང་དུ་འགྱུར་བ་འགྲོ་བཞིན་ཡོད་ཅིང་། ངོས་ཀྱི་བསམ་བློའི་ཐོག་ལའང་རྒྱ་ནག་ནང་དུའང་རིམ་བཞིན་དོ་སྣང་ཆེན་པོ་ཞིག་ཡོང་བཞིན་འདུག དེ་བཞིན་རྒྱ་ནག་ནང་དུ་ནང་པའི་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད་པ་རེད། ངོས་ཀྱི་ལས་དང་སྨོན་ལམ་ཐོག་ནས་བོད་བསྟན་སྲིད་ཙམ་དུ་མ་ཟད་། རྒྱ་ནག་གི་མི་མང་ལའང་ཕན་ཐོགས་ཀྱི་ཡོད་པ་གསལ་ཡོང་གི་འདུག ངོས་ཀྱིས་ད་ལྟ་བར་དུ་ཧུར་ཐག་བྱས་པ་ཡིན་ལ། ད་དུང་ཡང་སངས་རྒྱས་བཅོམ་ལྡན་འདས་ཀྱི་དགོངས་པ་དང་མཐུན་པའི་ཐོག་ནས་ཧུར་ཐག་བྱ་རྒྱུ་ཡིན། བོད་རྒྱ་ཆེ་མི་མང་གི་ལྷག་བསམ་དང་སྙིང་སྟོབས་ལ་ཞུམ་པ་མེད་པར་ད་ལྟའི་བར་དུ་ཧུར་ཐག་བྱས་ཡོད་ལ། ད་དུང་ཡང་མུ་མཐུད་དུ་ཧུར་ཐག་བྱེད་རོགས་ཞུ་རྒྱུ་ཡིན། ཞེས་གསུངས་སོང་།
ཡང་མགོན་པོ་གང་ཉིད་མཆོག་ནས། ངོས་རང་འདིར་ལས་དང་སྨོན་ལམ་གྱི་དབང་གི་སྐྱེས་ཏེ། བོད་ཆོལ་ཁ་གསུམ་གྱི་རྒྱ་ཆེ་མི་མང་དང་། དཔལ་ནཱ་ལེནྡྲ་ནས་བརྒྱུད་པའི་བོད་ཀྱི་སངས་རྒྱས་པའི་བསྟན་པར་རྒྱུད་འཛིན་ཐུབ་པའི་ལས་སྨོན་གྱི་འབྲེལ་བ་ཆགས་ཡོད། ངོས་ཀྱིས་ད་ལྟ་བར་དུ་ཧུར་ཐག་བྱས་ཡོད། ད་དུང་ཡང་བོད་རྒྱ་ཆེའི་མི་མང་དང་། རྒྱ་ནག་མི་མང་དང་བཅས་པར་སངས་རྒྱས་ཀྱི་བསྟན་པའི་ཐོག་ནས་ཞབས་འདེགས་གང་འཚམ་བསྒྲུབ་ཐུབ་པའི་བཟོ་ལྟ་ཆགས་ཡོང་གི་འདུག དེ་བཞིན་རྒྱ་ནག་ནང་དུ་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག ངོས་ཀྱིས་སྤྱིར་སངས་རྒྱས་ཀྱི་བསྟན་པ་དང་། ཡང་སྒོས་བོད་གངས་ཅན་ལྗོངས་ཀྱི་ཆོས་དང་རིག་གཞུང་གཏིང་ཟབ་ཡོད་པ་དེར། ཉམས་པ་སོར་ཆུད་དང་མི་ཉམས་གོང་འཕེལ་ཡག་པོ་ཡོང་བར་སྨོན་ལམ་ཞུ་བཞིན་ཡོད་པ་མ་ཟད། འདི་འདྲ་ཞིག་ཡོང་ཐུབ་པའི་ཡིད་ཆེས་ཡོད། དེ་བཞིན་ཚང་མར་ཐུགས་རྗེ་ཆེ། བཀྲ་ཤིས་བདེ་ལེགས། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
