ཚོགས་པ་ཆེ་ཁག་བརྒྱད་ཀྱིས་སེང་གེ་ཟེར་བའི་མི་དེས་༧གོང་ས་མཆོག་ལ་མཚན་སྨད་དང་འཇིགས་སྐུལ་བྱས་པར་བརྟེན་རྒྱ་གར་དུ་འགྲིམ་འགྲུལ་བྱེད་པར་བཀག་སྡོམ་བྱེད་དགོས་པའི་འབོད་སྐུལ་ཞུས་ཡོད་འདུག
ཉེ་ཆར་ཨོ་གླིང་དུ་གནས་སྡོད་སེང་གེ་ཟེར་བའི་བོད་མི་ཞིག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་སྨད་དང་༧མགོན་པོ་གང་ཉིད་ཀྱི་སྐུ་སྲོག་ལ་འཇིགས་སྐུལ་བྱས་པར་བརྟེན། དེ་རིང་ཕྱི་ཚེས་ ༢༣ ཉིན་དྷ་ས་ས་གནས་མགོ་འཛིན་གྱི་ཚོགས་ཁང་དུ་གཞུང་འབྲེལ་མ་ཡིན་པའི་ཚོགས་པ་ཆེ་ཁག་བརྒྱད་ཀྱིས་ངོ་རྒོལ་བསྒྲགས་གཏམ་ཞིག་སྤེལ་སོང་།
བསྒྲགས་གཏམ་དང་འབྲེལ་ནས་དབུས་གཙང་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་ཟླ་བ་ཚེ་རིང་ལགས་ཀྱིས་འདི་གའི་གསར་འགོད་པར། ཨོ་གླིང་དུ་བོད་པའི་ཚོགས་པ་མང་པོ་ཞིག་ཡོད་པ་དེ་དག་གིས་ལས་འགུལ་དང་ཁྲིམས་གཏུགས་སོགས་བྱེད་སྐབས་ང་ཚོ་ཚོགས་པ་ཁག་བརྒྱད་ཀྱི་ངོས་ནས་མི་རྒྱུ་གཉིས་ཀའི་ཐོག་ནས་མཐུན་འགྱུར་བྱ་རྒྱུ་དང་། གྲོས་ཚོགས་ནང་གླེང་སློང་གནང་བ་ལྟར་བདེ་སྲུང་བཀའ་བློན་གྱིས་བྱ་སྤྱོད་དེ་ཁྲིམས་འགལ་ཡིན་ཞིང་ཁྲིམས་གཏུགས་བྱ་རྒྱུ་ཡིན་པའི་བཀའ་མོལ་གནང་བ་བཞིན་བོད་གཞུང་གཅིག་པུར་འགན་མ་བཞག་པར་ཚོགས་པ་ཁག་བརྒྱད་ཀྱི་མི་མང་ཡོངས་ཀྱིས་མཐུན་འགྱུར་གང་ཐུབ་བྱེད་ཀྱི་ཡིན། ཞེས་བརྗོད་བྱུང་།
རྒྱ་གར་ནང་ཡོང་བར་འགྲིམ་འགྲུལ་བཀག་སྡོམ་བྱ་རྒྱུ་དང་འབྲེལ་ནས་ཚོགས་གཙོ་ཟླ་བ་ཚེ་རིང་ལགས་ཀྱིས། བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་གཞུང་དང་འབྲེལ་ཡོད་ལས་ཁུངས་ལ་གནད་དོན་དེ་དང་འབྲེལ་ནས་མི་དེ་རྒྱ་གར་ནང་ཡོང་མི་ཆོག་པའི་སྐོར་ལ་སྙན་ཞུ་འབུལ་དགོས་པའི་འབོད་སྐུལ་ཞུ་རྒྱུ་ཡིན། དེ་ཡང་མི་དེ་དང་ཁོའི་འབྲེལ་ཡོད་མི་དེ་དག་རྒྱ་གར་དུ་ཡོང་ཚེ་སྐུ་ཕྱྭ་ལ་ཉེན་ཁ་ཡོད་པ་གསལ་པོ་ཡིན་པར་བརྟེན་མི་དེ་རྒྱ་གར་དུ་འགྲིམ་འགྲུལ་བྱེད་པར་བཀག་སྡོམ་བྱ་དགོས་ཀྱི་ཡོད་པ་རེད། ཅེས་འགྲེལ་བརྗོད་གནང་བྱུང་།
གནད་དོན་དེ་དང་འབྲེལ་ནས་མང་ཚོགས་ལ་ཞུ་རྒྱུ་གང་ཡོད་མེད་ཐད་ཁོང་གིས། ང་ཚོ་མི་མང་གིས་མི་ངན་དེ་ཚོའི་བྱ་སྤྱོད་ལ་མོས་མཐུན་མེད་པ་དང་རྣམ་འགྱུར་སྟོན་པ་སོགས་ལངས་ཕྱོགས་འཛིན་དགོས་གལ་ཆེ་སྐོར་དང་། ༧གོང་ས་རྒྱལ་བ་རིན་པོ་ཆེ་མཆོག་གིས་དུས་རྒྱུན་ནས་བྱམས་དང་སྙིང་རྗེ། འཚེ་བ་མེད་པ་སོགས་ཀྱི་བཀའ་སློབ་ལམ་སྟོན་གནང་བ་ལྟར། བོད་མི་སེམས་པ་བཟང་པོ་དང་སྙིང་རྗེ་ལྡན་པའི་ཁྱད་ཆོས་དང་མ་བརྒལ་བ་ཞིག་བྱེད་དགོས་ཀྱི་ཡོད་ལ། དེ་ལས་ལྡོག་པའི་བྱ་སྤྱོད་སྤེལ་བ་དེ་ཕན་ལས་གནོད་ཆེ་བ་ཡོད་སྐོར་དང་། ཁོའི་བྱ་སྤྱོད་ལ་ངོ་རྒོལ་བྱེད་དགོས་གལ་ཆེ་སྐོར་སོགས་བརྗོད་བྱུང་།
དེ་རིང་དབུས་བོད་ཀྱི་གཞོན་ནུ་ལྷན་ཚོགས་དང་། དབུས་བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་། དབུས་གཙང་དང་མདོ་སྟོད། མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་བཅས་ཀྱིས་ངོ་རྒོལ་བསྒྲགས་གཏམ་སྤེལ་བའི་ནང་། དང་པོ། ཉེ་ཆར་ཨོ་གླིང་ལྷོ་ཕྱོགས་ས་ཁུལ་ཨ་ཌེལ་ལེ་ཌེ་ (Adelaide) ཞེས་པར་གནས་སྡོད་དངོས་མིང་ལ་སེང་གེ་དང་། དྲ་མིང་གངས་སེང་ཟེར་མཁན་ཞིག་སྙིང་ཁམས་གདོན་གྱིས་བརླན་ཏེ། རང་ཅག་གངས་ཅན་པ་ཡོངས་ཀྱི་དཔྲལ་བའི་མིག་དང༌། ཁོག་པའི་སྙིང་ལྟ་བུ་༧གོང་ས་༧སྐྱབས་མགོན་རྒྱལ་བའི་དབང་པོ་མཆོག་ལ་ཚད་ལས་བརྒལ་བའི་མཚན་སྨད་དང༌། ༧མགོན་པོ་གང་གི་སྐུ་སྲོག་ལ་འཇིགས་སྐུལ་བྱས་པ་མ་ཟད། བཙན་བྱོལ་དབུས་བོད་མིའི་སྒྲིག་འཛུགས་ལ་དགྲ་བོའི་འདུ་ཤེས་བཟུང་སྟེ། བཙན་བྱོལ་བོད་མིའི་སྒྲིག་འཛུགས་གཏོར་བཤིག་གཏོང་བའི་བསམ་ངན་སྦྱོར་རྩུབ་ཀྱིས་བརྒྱུད་སྐུལ་བྱས་པར། གཞུང་འབྲེལ་མ་ཡིན་པའི་ཚོགས་པ་ཆེ་ཁག་བརྒྱད་ཀྱི་ཁྱབ་ཁོངས་རྒྱ་ཆེའི་མི་མང་ཡོངས་ནས་མཐའ་གཅིག་ཏུ་ངོ་རྒོལ་ཡོད། གཉིས་པ། སེང་གེ་ཟེར་བས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་སྲོག་ལ་དོ་ཕོག་གཏོང་སེམས་ཀྱིས་སྒྲ་གཟུགས་གཉིས་ཐོག་ནས་མཚན་སྨད་བསམ་ཡུལ་ལས་འདས་པ་བྱས་པར་བརྟེན། ཚོགས་པ་ཁག་བརྒྱད་ཀྱི་ངོས་ནས་མི་དེ་བོད་མི་རིགས་ཀྱི་ཆིག་སྒྲིལ་གཏོར་བཤིག་པ་དང་འཇིགས་སྐུལ་བར་ངོས་འཛིན་ཐོག་གནས་ཡུལ་རྒྱ་གར་གཞུང་དང༌། ས་གནས་ཀྱི་འབྲེལ་ཡོད་ལས་ཁུངས་ཁག་ལ། ཁོས་སྤྱི་ཚོགས་སུ་བཀྲམ་པའི་སྒྲ་གཟུགས་གཉིས་དང༌། ཁོའི་ལོ་རྒྱུས་སོགས་མཁོ་སྤྲོད་ཀྱིས་༧མགོན་པོ་གང་ཉིད་ཀྱི་༧སྐུའི་བདེ་འཇགས་དང་འབྲེལ་བའི་ཐོག རྒྱ་གར་ལ་ཡོང་མི་འཇུག་པའི་འབོད་སྐུལ་ཞུ་རྒྱུ་ཡིན། གསུམ་པ། འཇིགས་སྐུལ་བ་སེང་གེས་༧གོང་ས་མཆོག་ལ་འཇིགས་སྐུལ་བྱས་པའི་བྱ་སྤྱོད་འདི་འཛམ་གླིང་རྒྱལ་སྤྱི་དང༌། གནས་ཡུལ་རྒྱལ་ཁབ་ཀྱིས་འཇིགས་སྐུལ་བར་ངོས་འཛིན་གང་ཡོད་ལྟར། དབུས་བོད་མིའི་སྒྲིག་འཛུགས་གཙོས་འབྲེལ་ཡོད་ནས་ཁྲིམས་གཏུགས་ཞུ་དགོས་པའི་འབོད་སྐུལ་དང༌། ཁྲིམས་གཏུགས་སོགས་ལས་འགུལ་སྤེལ་སྐབས་གཞུང་འབྲེལ་མ་ཡིན་པའི་ཚོགས་པ་ཁག་བརྒྱད་ནས་ཕྱར་གྲུ་མཉམ་འདེགས་ཞུ་རྒྱུ་ཡིན། བཞི་པ། མིང་ལ་སེང་གེ་ཟེར་བའི་བཀའ་དྲིན་བསམ་མེད་ཀྱི་མི་དེའི་རྒྱབ་ལྗོངས་རྩད་གཅོད་དང་འབྲེལ་ཡོད་སུ་ཡོད། བདེ་སྲུང་གཙོས་འབྲེལ་ཡོད་ཁག་གིས་སེང་གེ་ཟེར་བའི་མི་དེའི་རྒྱབ་ལྗོངས་དང་འབྲེལ་ཡོད་སུ་ཡིན་མིན་རྩད་གཅོད་ཀྱིས་ཞིབ་དཔྱོད་ནན་འདྲོངས་དང༌། དེ་རིགས་རྒྱ་ཡན་དུ་མི་གཏོང་བར་འབོད་སྐུལ་ཞུ་རྒྱུ་ཡིན། ཞེས་འཁོད་འདུག
གསར་འགོད་པ། བསྟན་འཛིན་ཕུར་བུ།
༈ ཨོས་ཊོལི་ཡར་གནས་སྡོད་བོད་མི་བཀའ་དྲིན་བསམ་ཤེས་མེད་པའི་མི་ངན་སེང་གེ་དང་དྲྭ་མིང་གངས་སེང་ཅན་གྱི་བྱ་ངན་ཚིག་ཁ་ནས་ཀྱང་འདོན་དཀའ་བའི་གནད་དོན་སྐོར་ཚོགས་པ་བརྒྱད་ནས་དམ་དོན་གྱིས་གསུང་བཤད་གནང་འདུག་པར་ཐུགས་རྗེ་ཆེ་གནང་། དེ་བཞིན་ཞུ་འཆར་ཁག་ཀྱང་མགྱོགས་མྱུར་དམ་དོན་གནང་གཤའ།
དྲྭ་གནས་འདི་མ་མཇལ་གོང་ཨེ་ཤི་ཡ་རླུང་འཕྲིན་ཁང་གི་དྲྭ་མལ་ཐོག་གནས་མཇལ་བྱུང་སྐབས་བོད་ཀྱི་གཞོན་ནུ་ལྷན་ཚོགས་མཚན་འཁོད་མིན་འདུག རང་སེམས་ནང་ད་རེས་གཞོན་ལྷན་མཚན་མཇལ་རྒྱུ་མེད་པ་གང་ཡིན་ནམ། དུས་རྒྱུན་གཞོན་ལྷན་ནི་ལས་དོན་དེ་འདྲའི་ཐོག་འབད་བརྩོན་པ་ཐོག་མའམ་ཆད་དུ་མེད་པའི་རྒྱལ་གཅེས་པ་ཞིག་ཡིན། ཅི་བྱས། མི་བསམ་མེད་ཁོས་རང་བཙན་སྐོར་རྫུན་ཚིག་འགའ་སྨྲས་པ་ལས་ནི་ཡིན་མི་ཤེས་པ་ཞིག་ཡིན་དགོས། གང་ལྟར་ཡང་སེམས་ཚབ་ངང་ལུས། ཡིན་ཀྱང་དྲྭ་འདིའི་ནང་ཚོགས་བརྒྱད་མིང་དང་དེ་ཡང་གཞོན་ལྷན་དང་ཐོག་དེར་འཁོད་པའི་བློ་བདེ།
ཁོ་བ་དང་ཆོལ་ཁ་གཅིག་པའི་ཡུལ་མི་དང་། བཟའ་མི་བུ་ཕྲུག གྲོགས་གཉེན་སྤུན་ཚོས་ཀྱང་ཁོ་བ་ནོར་བའི་གསལ་བཤད་དམ་ངོ་བརྒོལ་མཚོན་པའི་བྱ་ལམ་བྱུང་ན་དེ་རེས་ཙམ་མིན་པའི་ཕྱི་བྱུང་ཡང་ཕན་ཐོག་དང་རྡོག་རྩ་གཅིག་སྒྲིལ་གྱི་ནུས་པ་ནི་དེ་བས་ཀྱང་ཆེར་གསལ།