༧གོང་ས་མཆོག་ནས་འཛམ་གླིང་འདིར་གོ་མཚོན་གྱིས་མི་མང་པོར་སྡུག་བསྔལ་སྤྲོད་པ་ལས་གྲུབ་འབྲས་གང་ཡང་བྱུང་མེད་པས། ཆགས་སྡང་གི་བློ་བཞག་སྟེ་ཀུན་ལ་ཕན་སེམས་ཀྱི་བློ་ཡག་པོ་བསྐྱེད་དགོས་པ་གལ་ཆེན་པོ་ཡིན་སྐོར་བཀའ་སློབ་བསྩལ།
དེ་རིང་ཕྱི་ཚེས་ ༣༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཐའེ་ཝན་གྱི་དད་ལྡན་པ་རྣམས་ཀྱིས་ཇི་ལྟར་གསོལ་འདེབས་ཞུས་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ནས་རྗེ་རིན་པོ་ཆེ་མཆོག་གི་མཛད་པའི་ལམ་གཙོ་རྣམ་གསུམ་གྱི་བཀའ་ཆོས་གནང་སྐབས། དེ་རིང་འདིར་ལམ་གཙོ་རྣམ་གསུམ་གྱི་ཆོས་འགྲེལ་བྱེད་ཀྱི་ཡོད་པ་རེད། རྗེ་རིན་པོ་ཆེའི་འཁྲུངས་ས་དང་ངོས་ཀྱི་སྐྱེས་ས་གཉིས་ཐག་ཧ་ཅང་ཉེ་བོ་རེད། ངོས་ཀྱི་བསམ་བློ་གཏོང་སྟངས་རྗེ་རིན་པོ་ཆེ་དང་འདྲ་བོ་ཡོད་པ་ཞིག་མཐོང་གི་འདུག རྗེ་རིན་པོ་ཆེས་སྤྱིར་སངས་རྒྱས་ཀྱི་ཆོས་དང་ཡང་སྒོས་གངས་ཅན་ལྗོངས་ཀྱི་བསྟན་པའི་དོན་དུ་སྲིད་པ་བཟུང་བ་གསལ་བོ་རེད། ངོས་ཀྱིས་ཀྱང་རྗེ་རིན་པོ་ཆེ་བཞིན་དུ་བསམ་བཞིན་སྲིད་པ་བཟུང་བའི་ཁུལ་རེད། ངོས་ཀྱིས་གཟབ་གཟབ་མ་བྱས་ཚེ་རྗེ་རིན་པོ་ཆེ་ཨ་མདོ་ནས་ཡིན་པས། ངོས་ཀྱིས་ཨ་མདོའི་ཞབས་འདྲེན་ཞུ་ཡི་ཡོད་པ་རེད། རྗེ་རིན་པོ་ཆེ་བློ་བཟང་གྲགས་པ་ཞེས་མཚན་སྙན་ས་གསུམ་དུ་ཁྱབ་ཡོད། ངོས་རང་ཆུང་ཆུང་ནས་རྗེ་བློ་བཟང་གྲགས་པར་སེམས་ཐག་ཉེ་པོ་དང་སེམས་འདྲེས་བསྡད་ཡོད། ང་ཚོ་བཙན་བྱོལ་བ་ཆགས་ཀྱང་སངས་རྒྱས་ཀྱི་ཆོས་ཉམས་ལེན་བྱེད་པར་ཡིན་གཅིག་ལུང་པ་གཅིག་དགོས་ཀྱི་མི་འདུག ད་ལྟའི་ཆར་སངས་རྒྱས་ཀྱི་ཆོས་འཛམ་གླིང་དུ་ཁྱབ་བཞིན་ཡོད། ངོས་རང་གིས་སྤྱིར་སངས་རྒྱས་ཀྱི་ཆོས་དང་། འཇམ་མགོན་བླ་མའི་བསྟན་པར་ཉམས་ལེན་བྱས་ཏེ་མི་རྣམས་ལ་གང་ཐུབ་གསལ་བཤད་བྱེད་བཞིན་ཡོད། ངོས་རང་བོད་ནས་གནས་སྤོས་ཏེ་དྷ་རམ་ས་ལར་གཞིས་ཆགས་པ་རེད། ངོས་ཀྱིས་ཉམས་ལེན་གཙོ་བོ་རྗེ་རིན་པོ་ཆེའི་གསུང་པོ་ཏི་བཅོ་བརྒྱད་ཡིན། ཆོས་རྗེ་བློ་བཟང་གྲགས་པ་ཞེས་པ་སེམས་ནང་མ་འདྲ་བ་ཞིག་ཡོང་གི་འདུག དེ་རིང་དྷ་རམ་ས་ལར་རྗེ་རིན་པོ་ཆེའི་ལམ་གཙོ་རྣམ་གསུམ་གྱི་ཞལ་ལུང་མདོར་བསྡུས་ཤིག་ཞུ་རྒྱུ་ཡིན། ཞེས་གསུངས་སོང་།
ཡང་༧གོང་ས་མཆོག་ནས། བོད་པ་བཙན་བྱོལ་བ་ཆགས་པའི་ལོ་འདི་དག་གི་རིང་བོད་ཀྱི་བླ་སྲོག་ནི་སངས་རྒྱས་ཀྱི་ཆོས་རེད། དངོས་གནས་དྲང་གནས་སངས་རྒྱས་ཆོས་ཀྱི་འགྲོ་སྟངས་དང་ཆོས་དད་དམ་དུ་བཟུང་ནས་བསྡད་པ་རེད། འཛམ་གླིང་དུ་བོད་ཀྱི་ནང་པའི་ཆོས་དང་རི་བོ་དགེ་ལུགས་པའི་བཤད་སྒྲུབ་གཉིས་ཀྱི་བསྟན་པ་འཛིན་སྟངས་ཐོག་ཆོས་དད་ཡོད་མཁན་མང་པོས་དོ་སྣང་བྱེད་བཞིན་འདུག ངོས་ཀྱང་ཆུང་དུས་ནས་སྤྱིར་སངས་རྒྱས་ཀྱི་བསྟན་པ་དང་། ཡང་སྒོས་འཇམ་མགོན་བླ་མའི་བསྟན་པར་འཛིན་སྐྱོང་སྤེལ་གསུམ་བྱེད་པར་ལས་སྨོན་འབྲེལ་ཡོད་པ་ཧ་ཅང་གསལ་བོ་རེད།
ང་ཚོས་བསྟན་པ་བྱང་ནས་བྱང་དུ་དར་ཡོང་ཞེས་བཤད་སྲོལ་ཡོད་པ་ལྟར་ཕལ་ཆེར་རེད། བཅོམ་ལྡན་འདས་ཀྱིས་རྒྱ་གར་དུ་བདེན་བཞིའི་ཆོས་ཀྱི་འཁོར་ལོ་བསྐོར་བ་དང་། དེ་ནས་བོད་སོག་ནང་དུ་རིམ་བཞིན་དར་ཁྱབ་ཤུགས་ཆེན་བྱུང་། ད་ལྟ་བར་རྒྱ་གུང་ཁྲན་གྱིས་བོད་ནང་བཙན་དབང་དང་དམ་དྲག་བྱས་ཡོད་ཀྱང་། བོད་པའི་ཆོས་དད་འགྱུར་བ་ཁྱོན་ནས་མེད་པར་བསྡད་པ་རེད། རྒྱ་གར་ནང་དུའང་སྐྱ་སེར་ཚང་མས་ཆོས་དད་ཤུགས་ཆེན་ཟིན་བསྡད་ཡོད་པར་ཧ་ཅང་ཡག་པོ་རེད། འཛམ་གླིང་དུ་ནང་པའི་ཆོས་ལ་དོ་སྣང་ཡོང་སྐབས་བོད་པ་ཚོས་ཀྱང་ཆོས་ལ་དོ་སྣང་བྱས་ཏེ་དམིགས་བསལ་བདག་པོ་རྒྱག་གི་འདུག ཅེས་གསུངས་སོང་།
༧མགོན་པོ་གང་ཉིད་མཆོག་ནས། དེང་སང་འཛམ་གླིང་གང་སར་ནང་པའི་ཆོས་ལ་དོ་སྣང་ཆེ་རུ་འགྲོ་བའི་སྲོལ་ཞིག་འདུག ནང་ཆོས་དེ་རྣམ་དཔྱོད་དང་ཤེས་རབ་ཀྱིས་བསམ་བློ་གཏོང་རྒྱུ་ཡོད་པ་ཞིག་ཆགས་ཡོད་པས། ཤེས་ཡོན་ཅན་དང་བསམ་བློ་གཏིང་ཟབ་གཏོང་མཁན་རྣམས་ཀྱིས་དམིགས་བསལ་དོ་སྣང་དང་དགའ་བ་བྱེད་ཀྱི་འདུག ང་ཚོས་འདོན་པ་འདོན་རྒྱུ་རྐྱང་རྐྱང་མ་ཡིན་པར་དཔེ་ཆ་བལྟ་རྒྱུ་གལ་ཆེན་པོ་རེད། ཅེས་དང་། ད་ལྟའི་གནས་སྐབས་སུ་ང་ཚོ་རང་ཉིད་ཀྱི་ལུང་པར་ཁ་བྲལ་ཡོད་པ་དང་། འཛམ་གླིང་འདིར་འཁྲུག་པ་མང་པོ་རྒྱག་པའི་དུས་སྐབས་ཤིག་ཆགས་ཡོད། འཛམ་གླིང་ལྷོ་བྱང་གང་དུ་བལྟས་ཀྱང་གོ་མཚོན་ལ་དང་དོད་བྱེད་ཀྱི་ཡོད། དེ་ལྟར་མ་ཡིན་པར་འཛམ་བུ་གླིང་འདིར་བྱམས་བརྩེ་ངང་འཚོ་ཐུབ་པ་ཞིག་བྱུང་དགོས། དེ་མ་འགྲུབ་པ་གང་ཡང་མ་རེད། གོ་མཚོན་གྱིས་མི་མང་པོ་ཞིག་ཕྱི་མ་འགྲོ་བའི་སྡུག་བསྔལ་མྱོང་བ་ལས་རྩོད་པ་བྱས་པ་དེས་གྲུབ་འབྲས་གང་ཡང་བྱུང་མེད། ཆགས་སྡང་གི་བློ་བཞག་སྟེ་ཀུན་ལ་ཕན་སེམས་ཀྱི་བློ་ཡག་པོ་ཞིག་བསྐྱེད་ཚེ། ཀུན་ལ་ཕན་ཐོགས་ཀྱི་ཡོད་པས། ང་ཚོ་ཚང་མས་སེམས་བསྐྱེད་བཟང་པོ་ཞིག་བསྐྱེད་པ་གལ་ཆེན་པོ་རེད། དེ་རིང་འདིར་འདུས་ཡོད་པའི་ཆོས་པ་རྣམས་ཀྱིས་ཀྱང་སེམས་བཟང་པོའི་ཐོག་སེམས་ཤུགས་བསྐྱེད་ཤོག ཅེས་གསུངས་སོང་།
མཇུག་ཏུ་ཐའེ་ཝན་དད་ལྡན་ཁག་ཅིག་ནས་བྱང་ཆུབ་སེམས་ཀྱི་སྐོར་ལ་བཀའ་འདྲི་བྱས་པར་༧མགོན་པོ་གང་ཉིད་མཆོག་ནས། མངོན་མཐོའི་གོ་འཕངས་ཐོབ་པའི་རྒྱུ་གཙོ་བོ་ནི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་རེད། ངོས་རང་ལ་ཆ་བཞག་ཚེ། ཞོགས་པར་ཡར་ལངས་པ་དང་མཉམ་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་སྒོམ་བཞིན་ཡོད། དེ་ནི་མངོན་མཐོ་བསྒྲུབ་བྱེད་ཀྱི་རྒྱུ་གཙོ་བོ་ཆགས་བསྡད་ཡོད། ཅེས་བཀའ་སློབ་སྩལ།
གསར་འགོད་པ། བྱམས་པ་ཚེ་རིང་།
