རྒྱ་ནག་ནང་གི་ན་གཞོན་ལས་མེད་མང་དུ་འགྲོ་བཞིན་པ་དང་རྒྱལ་ཁབ་ཀྱི་དཔལ་འབྱོར་གྱི་གནད་དོན།

མགོ་ལོག་ལྕགས་མོས་རྒྱ་ཡིག་ནས་བསྒྱུར།

རྒྱ་ནག་གཞུང་གི་སྡོམ་རྩིས་ལས་ཁུངས་ཀྱིས་ཐེངས་གཉིས་པར་ཕྱིར་བསྒྲགས་བྱས་པའི་གཞོན་སྐྱེས་ལས་མེད་ཀྱི་གྲངས་ཐོ་ནི་ལོ་16 ནས་24 བར་གྱི་སློབ་གྲྭར་འགྲོ་བཞིན་པའི་སློབ་མ་མ་ཚུད་པའི་ན་གཞོན་ལས་ཤོར་ཚད་གཞི་ནི་ 15.3% ཡིན་པ་དང་། དེ་ནི་ཐེངས་དང་པོར་ཕྱིར་བསྒྲགས་བྱས་པའི་གྲངས་ཐོ་ལས་བརྒྱ་ཆ་ ༠.༤% འཕར་ཡོད་པ་གཞུང་ངོས་ནས་ཕྱིར་བསྒྲགས་བྱས་ཡོད།

རྒྱ་ནག་གཞུང་གི་སྡོམ་རྩིས་ལས་ཁུངས་ཀྱིས་གསལ་བསྒྲགས་དེ་ལ་གཞོན་སྐྱེས་མང་པོས་དྲ་ཐོག་ནས་ཟུར་ཟ་དང་། འཕྱ་སྨོད་བྱས་ཡོད་པ་དང་། གྲངས་འབོར་དེ་ནི་དོན་དངོས་དང་མི་མཐུན་པ་ཞིག་ཡིན་ཚུལ་བརྗོད་འདུག སྲིད་དོན་དབྱེ་ཞིབ་པ་ཚོས་རྒྱ་ནག་གི་དཔལ་འབྱོར་བསྐྱར་གསོ་བྱས་པ་གཞུང་གི་རེ་བ་ལྟར་མ་བྱུང་བ་དང་། གཞུང་འབྲེལ་གྱི་སྒྲིག་གཞི་དང་གྲངས་ཐོ་ཇི་ལྟར་བསྒྱུར་བཅོས་བྱས་ཀྱང་། གཞོན་སྐྱེས་ལས་མེད་ཀྱི་བརྒྱ་ཆ་མཐོ་རུ་འགྲོ་བཞིན་པའི་དཀའ་ངལ་དེ་སྦས་ཐབས་མེད་པ་བརྗོད་ཡོད། ཕྱི་ཟླ་ ༣ ཚེས་ ༢༠ ཉིན་རྒྱ་ནག་རྒྱལ་ཡོངས་སྒྲིག་གཞི་ལྟ་ཞིབ་ཁང་གིས་ཟླ་ ༢ པའི་རྒྱལ་ཡོངས་གྲོང་ཁྱེར་ཁུལ་དུ་སློབ་གྲྭར་འགྲོ་བཞིན་པའི་སློབ་མ་ལོ་ ༡༦ ནས་ ༢༤ བར་མ་ཚུད་པའི་གཞོན་སྐྱེས་ལས་མེད་བརྒྱ་ཆ་ ༡༥.༣% ཡིན་པ་ཕྱིར་བསྒྲགས་བྱས་ཡོད། གྲངས་ཐོ་དེ་རྒྱལ་ཡོངས་གྲོང་ཁྱེར་ཁུལ་གྱི་གཞོན་སྐྱེས་ལས་མེད་ཀྱི་བརྒྱ་ཆ་ ༥.༣% དང་བསྡུར་ན། གཞོན་སྐྱེས་ལས་མེད་ཀྱི་དཀའ་ངལ་ཛ་དྲག་ཆེ་རུ་འགྲོ་བཞིན་པ་མངོན་གསལ་དོད་པོ་བྱུང་ཡོད།

མི་དམངས་ཀྱི་འཚོ་གནས་དང་འབྲེལ་བ་ཆེ་བའི་ལས་མེད་ཀྱི་བརྒྱ་ཆའི་སྐོར་ལ་རྒྱ་གཞུང་སྡོམ་རྩིས་ལས་ཁུངས་ཀྱི་གསར་འགོད་གསལ་བསྒྲགས་དང་། དཔལ་འབྱོར་རིག་པ་བ་གཙོ་བོ་ལིའུ་ཨའེ་ཧྭ་(刘爱华)ཡིས་གསུང་དོན། བྱ་བའི་ལས་གནས་བརྟན་པོ་ཡོང་བར་ཕན་ཐོགས་པའི་རྒྱུ་རྐྱེན་མང་དུ་འཕེལ་བཞིན་པ་དང་། གཞོན་སྐྱེས་ཚོར་ལས་ཀ་སྤྲོད་པའི་སྲིད་ཇུས་ཤུགས་ཆེ་རུ་གཏོང་བ། ལས་ཀ་དང་ཚོང་ལས་གསར་འཛུགས་ཀྱི་ལམ་སྟོན་ཞབས་ཞུ་ཇེ་ལེགས་སུ་གཏོང་བ་བཅས་བྱེད་བཞིན་ཡོད་སྐོར་བརྗོད་འདུག གཞུང་འབྲེལ་ཐོག་བྱ་བའི་ལས་གནས་ཡག་ཏུ་འགྲོ་བཞིན་པའི་གསལ་བསྒྲགས་ཤིག་སྤྱི་ཚོགས་དྲ་རྒྱ་微博ལ་སོགས་པའི་བརྒྱུད་ལམ་ཁག་ཏུ་མི་མང་པོས་མོས་མཐུན་མེད་པའི་རྣམ་པ་ཤུགས་ཆེན་བསྟན་ཡོད། མི་ཁ་ཤས་ཀྱིས་བཤད་རྒྱུར ”གཞོན་སྐྱེས་ལས་མེད་ཀྱི་བརྒྱ་ཆ་ནི་ལས་མེད་དུ་ཆགས་རྗེས་ཐོ་འགོད་བྱས་པ་རྣམས་བརྩིས་ཡོད་པ་རེད། ཐོ་འགོད་མ་བྱས་པའི་གཞོན་སྐྱེས་རྣམས་རྩིས་ཡོད་པ་མ་རེད། དེ་གཉིས་ལ་ཁྱད་པར་ཏན་ཏན་ཡོད་པ་རེད། དངོས་ཡོད་ཀྱི་གཞོན་སྐྱེས་ལས་མེད་ཀྱི་བརྒྱ་ཆ་ག་ཚོད་མཐོ་པོ་ཡིན་པ་ཚོད་དཔག་བྱས་ན་ཤེས་ཐུབ། གཞུང་གིས་ཕྱིར་བསྒྲགས་བྱས་པའི་གཞོན་སྐྱེས་གྲངས་ཐོ་ལ་ཕན་ཐོགས་མི་འདུག རྒྱུ་མཚན་ནི་དངོས་གནས་ལས་མེད་དུ་གྱུར་པ་རྣམས་རྩིས་མི་འདུག གྲངས་ཐོ་བལྟས་ན་དོན་སྙིང་མི་འདུག རང་གི་ཉེ་འཁོར་གྱི་འབྱུང་བཞིན་པའི་ན་གཞོན་ལས་མེད་ཀྱི་གནས་སྟངས་ལ་བལྟས་ན་ཤེས་པ་རེད་ཟེར། ཡར་ལངས་ན་འགྲོ་ས་མེད། ས་བསྡད་ན་འདུག་ས་མེད་པའི་རྒྱ་ནག་གི་ན་གཞོན་ཚོའི་མདུན་ལམ་ལ་ཁ་ཕྱོགས་མེད་པ་དང་། རྒྱ་གཞུང་གིས་ཕྱིར་བསྒྲགས་བྱས་པའི་གྲངས་ཐོས་ན་གཞོན་ཚོའི་འཚོ་གནས་དངོས་གསལ་བཤད་བྱེད་མི་ཐུབ། ལོ་སྔོན་མའི་ཟླ་ ༦ པར་སློབ་མཐར་ཕྱིན་པའི་ཧྲང་ཧའེ་གྲོང་ཁྱེར་ནས་ཡིན་པའི་ན་གཞོན་ཀྲང་ཁྲེང་(张承)ཡིས་ཨ་རིའི་རླུང་འཕྲིན་ཁང་ལ་བཤད་རྒྱུར། ད་བར་དུ་ཁོ་རང་གིས་འདོད་པ་ཁེངས་པའི་གཏན་འཇགས་ལས་ཀ་ཞིག་རྙེད་མ་ཐུབ་པར་བརྟེན། ད་ལྟ་”ལས་ཀ་རག་ཚད་”བྱས་ནས་འཚོ་བ་སྐྱེལ་བཞིན་ཡོད། ཅེས་བརྗོད། ཁོང་གིས་བློ་ཕམ་དང་བཅས་བརྗོད་དོན། ཁོ་རང་ན་གཞོན་ལས་མེད་ཀྱི་གྲངས་ཐོའི་ནང་དུ་འཇོག་འོས་པ་ཞིག་ཡིན་ནའང་། གལ་ཏེ་ང་ལྟ་བུའི་མི་ཚང་མ་ལས་མེད་ན་གཞོན་གྱི་ཁོངས་སུ་བརྩིས་ན། རྒྱ་ནག་གཞུང་གི་མིང་གྲགས་ལ་གནོད་པས་ང་རང་ལས་མེད་ན་གཞོན་གྱི་གྲངས་ཐོ་ནང་དུ་མེད། ཀྲང་ལགས་ཀྱིས་བཤད་རྒྱུར་ན་གཞོན་ལས་མེད་ཀྱི་གྲངས་ཐོ་བསྡུ་ལེན་བྱེད་སྟངས་ག་འདྲ་ཞིག་ཡིན་རུང་། ལས་མེད་ཀྱི་གྲངས་ཐོ་ག་འདྲ་བཟོ་བཅོས་བྱས་ཀྱང་། དངོས་ཡོད་གནས་སྟངས་ནི་རྒྱ་ནག་ནང་གི་ན་གཞོན་ཚོས་རང་གི་འདོད་པ་དང་མཐུན་པའི་ལས་ཀ་རྙེད་ཐུབ་ཀྱི་མེད་པས། “སེམས་ཤི”ནས་སྡོད་པ་དང་། “བཅུ་མེད་ན་གཞོན་” (十不青年) གྱི་འཚོ་བ་སྐྱེལ་བཞིན་ཡོད། རྒྱ་ནང་གི་ན་གཞོན་ཚོ་མ་འོངས་པར་ཡིད་ཆད་པའི་རྐྱེན་གྱིས་ཉེ་ཆར་སྐད་འཕྲིན་ནང་དུ་ “བཅུ་མེད་ན་གཞོན་”ཞེས་པའི་རྩོམ་ཡིག་ཅིག་ཁྱབ་གདལ་ཆེན་པོ་བྱུང་ཡོད་པ་དེའི་ནང་དུ་ཁྲག་སྦྱིན་མི་བྱེད། ཞལ་འདེབས་མི་བྱེད། གཉེན་སྒྲིག་མི་བྱེད། བུ་ཕྲུག་མི་བཙས། ཁང་པ་མི་ཉོ། རྒྱན་ཤོག་མི་ཉོ། མ་རྐང་མི་འཇོག ཐེབས་རྩ་མི་ཉོ། རྒས་ཁོག་མི་གཉོར། སེམས་འགུལ་མི་ཐེབས་ཞེས་ན་གཞོན་ཚོས་སེམས་པ་ཤི་ཚར་བ་བསྟན་ཡོད། ཀྲང་ལགས་ཀྱིས་རང་ཉིད་ལ་ཁྲེལ་དགོད་བྱེད་ཞོར་བརྗོད་དོན། རྒྱ་གཞུང་ནང་གི་དཔལ་འབྱོར་གྱི་འགྲོ་སྟངས་བརྟན་པོ་དང་། ཡར་རྒྱས་འགྲོ་བཞིན་པ་ནན་བཤད་བྱས་པ་ལ་བལྟས་ན་རྒྱ་ནང་གི་གཞོན་ཚོ་ནི་བརྟན་པོར་ལྷིང་འཇགས་ངང་འཚོ་བ་རོལ་ནས་ཡར་ལངས་འདོད་མེད་པ་”ཞིག་ཏུ་གྱུར་ཡོད། ཅེས་བཤད།

ཁོང་གིས་ད་དུང་འདི་ལྟར་གསུང་དོན། སློབ་གྲྭ་ཆེན་མོའི་སློབ་གྲོགས་འགའ་ཞིག་མཐོ་སློབ་མཐར་ཕྱིན་རྗེས་ལས་ཀ་རྙེད་དཀའ་བར་རྒྱུས་ལོན་བྱུང་རྗེས། མུ་མཐུད་དུ་ཞིབ་འཇུག་སློབ་གཉེར་བྱ་རྒྱུ་བདམས་ཡོད། འོན་ཀྱང་བྱ་ཐབས་དེ་ནི་དཀའ་ངལ་ལས་བྲོས་པ་ཙམ་ལས་མ་འདས། ལོ་གཉིས་ཀྱི་རྗེས་སུ་ལས་ཀའི་ཁོར་ཡུག་ཡག་ཏུ་འགྲོ་བར་སུས་འགན་ལེན་བྱེད་ཐུབ་བམ། ད་ལྟའི་གནས་སྟངས་ལ་བལྟས་ན། རྒན་པ་ཚོས་ལས་མཚམས་འཇོག་འདོད་མེད་ལ། སློབ་ཆེན་མཐར་ཕྱིན་པའི་སློབ་མ་མང་དུ་འགྲོ་བཞིན་ཡོད་པས། མ་འོངས་པའི་ལས་གནས་ཀྱི་གོ་སྐབས་ཉུང་དུ་འགྲོ་ངེས་རེད། རྒྱ་ནག་གི་ཤེས་ཡོན་ལྷན་ཁང་གི་གྲངས་ཐོ་ལྟར་ན། ཕྱི་ལོ་ ༢༠༢༤ ལོར་རྒྱ་ནག་གི་མཐོ་རིམ་སློབ་ཆེན་ཁག་གི་མཐར་ཕྱིན་སློབ་མའི་གྲངས་ཐོ་ས་ཡ་ ༡༡.༧༩ ལ་སླེབས་རྒྱུའི་རེ་བ་བྱེད་ཀྱིན་ཡོད་པ་དང་། མཐར་ཕྱིན་སློབ་མའི་གྲངས་ཐོ་མཐོ་ཤོས་ལ་སླེབས་ཡོད་པས་ད་ལོའི་དབྱར་ཁར་ལས་ཀའི་གནོན་ཤུགས་ཆེ་རུ་འགྲོ་བ་དངོས་ཡོད་ཡིན། ཞེས་བཤད།

དབྱིན་ཡུལ་གྱི་(Pantheon Macroeconomics) དཔལ་འབྱོར་སློབ་སྟོན་ཚོགས་པ་ (Pantheon Macroeconomics) རྒྱ་ནག་སྐོར་གྱི་དཔལ་འབྱོར་མཁས་དབང་རྒན་པ་ཀེལ་ཝིན་ལེམ་ (Kelvin Lam) ལགས་ཀྱིས་ཨ་རིའི་རླུང་འཕྲིན་ཁང་ལ་གསལ་བཤད་བྱས་དོན། རྒྱ་ནག་ནང་ཁུལ་དུ་ལོ་རེར་མཐོ་སློབ་མཐར་ཕྱིན་སློབ་མ་ས་ཡ་ ༡༠ ནས་ ༡༢ བར་ཡོད་པ་དང་། ཁོ་ཚོ་ལས་ཀའི་ཁྲོམ་རར་གསར་ཞུགས་བྱེད་བཞིན་ཡོད། སྔོན་མ་དཔལ་འབྱོར་གྱི་གནས་བབ་ཡག་པོ་ཡོད་པའི་སྐབས་སུ། སྒེར་གཉེར་དང་གཞུང་གཉེར་གྱི་ཚོང་ལས་ཁག་གིས་ཁོ་ཚོར་འདང་ངེས་ཀྱི་ལས་ཀའི་གོ་སྐབས་བསྐྲུན་ཐུབ་ཡོད། འོན་ཀྱང་ཉེ་བའི་ལོ་ཁ་ཤས་ནང་རྒྱ་ནག་གཞུང་གིས་ཚོང་ལས་ཁག་ལ་སྟངས་འཛིན་དང་གནོན་ཤུགས་ཆེ་རུ་བཏང་བ་དང་། དེ་བཞིན་རྒྱལ་ཁབ་སྤྱི་ཡོངས་ཀྱི་དཔལ་འབྱོར་གནས་སྟངས་ཉམས་རྒུད་དུ་ཕྱིན་པ་བཅས་ཀྱི་རྐྱེན་གྱིས་ལས་མི་གསར་ཞུགས་ཀྱི་གོ་སྐབས་ལ་དཀའ་ངལ་ཆེ་རུ་འགྲོ་བཞིན་ཡོད། རྒྱ་གཞུང་གིས་གཞོན་སྐྱེས་ལས་མེད་སྤྱི་སྡོམ་ཐབས་ལམ་ལ་འགྱུར་བ་བཏང་ཡང་། རྒྱ་ནག་གི་གཞོན་སྐྱེས་ལས་མེད་ཀྱི་བརྒྱ་ཆ་ཕྱི་ཟླ་ ༢ པར་མུ་མཐུད་ནས་འཕར་ཡོད་པ་དང། སྤྱི་སྡོམ་ཐབས་ལམ་ལེགས་བཅོས་རྗེས་སུའང་གཞོན་སྐྱེས་ལས་མེད་བརྒྱ་ཆ་སླར་ཡང་འཕར་བཞིན་ཡོད། རྒྱ་ནག་གི་གཞོན་སྐྱེས་ལས་མེད་བརྒྱ་ཆ་ནི་ན་ནིང་གི་ལོ་ཕྱེད་ཙམ་ནས་ཟླ་རེར་གྲངས་ཐོ་གསར་པ་ཐོན་བཞིན་ཡོད། ཕྱི་ཟླ་ ༦ པར་བརྒྱ་ཆ་ ༢༡.༣ བར་འཕར་ཡོད། རྗེས་སུ་རྒྱལ་ཁབ་སྡོམ་རྩིས་ལས་ཁུངས་ཀྱིས་གྲངས་ཐོ་དེ་གསལ་བསྒྲགས་བྱ་རྒྱུ་གནས་སྐབས་རིང་མཚམས་འཇོག་བྱས་པར་གཞུང་ངོས་ནས་དོན་དངོས་ ”སྦས་གསང་”བྱས་པའི་ནག་ཉེས་ལ་སྐྱོན་བརྗོད་ཕོག་ཡོད། ད་ལོའི་ཟླ་ ༡ པོར་གཞུང་ཕྱོགས་ནས་”ལེགས་བཅོས་”བྱས་པའི་གྲངས་ཐོ་གསར་པ་ཕྱིར་བསྒྲགས་བྱས་ཡོད་ཀྱང་། དེའི་ནང་དུ་སློབ་ཆེན་སློབ་མ་ཞོར་ལས་འཚོལ་མཁན་རྣམས་ཕྱིར་འཐེན་བྱས་ཡོད་པ་དང་།  སློབ་མཐར་ཕྱིན་རྗེས་སྤྱི་ཚོགས་ནང་དུ་ལས་ཀ་འཚོལ་བཞིན་པའི་གཞོན་སྐྱེས་ས་ཡ་ ༣༤ ལྷག་ཙམ་ལ་གཞི་བཞག་ནས་བརྩིས་ཡོད། འོན་ཀྱང་རྒྱལ་སྤྱིའི་ངལ་རྩོལ་ལྷན་ཚོགས་ཀྱི་བཤད་ཚུལ་ལྟར་ན། སློབ་མ་རྣམས་ལས་མེད་བརྒྱ་ཆའི་རྩིས་རྒྱག་ཁྱབ་ཁོངས་ནས་ཕྱིར་འབུད་བྱས་པ་དེ་ནི་ཚོགས་པ་དེས་གཏན་འབེབས་བྱས་པའི་སྒྲིག་གཞི་དང་མི་མཐུན་པ་ཞིག་རེད། གལ་ཏེ་སློབ་མ་ཞིག་གིས་རྒྱུན་དུ་ལས་ཀ་འཚོལ་བཞིན་ཡོད་ན། ཁོང་ཡང་གཞོན་སྐྱེས་ལས་མེད་ཀྱི་གྲངས་ཐོའི་ནང་དུ་འཇུག་དགོས་པ་ཡིན།རྒྱ་ནག་གི་གཞོན་སྐྱེས་གྲངས་ཐོ་ལེགས་བཅོས་བྱས་རྗེས། རྒྱ་ནག་གི་ན་གཞོན་ལས་མེད་ན་ནིང་ལོའི་ཟླ་ ༡༢ པའི་ནང་ལོ་ ༡༦ ནས་ ༢༤ བར་གྱི་ན་གཞོན་ལས་མེད་བརྒྱ་ཆ་ ༡༤.༩ བར་ཧ་ཅང་ཉུང་དུ་ཕྱིན་ཡོད་ལ། ད་ལོའི་ཟླ་ ༡ པོར་བརྒྱ་ཆ་ ༡༤.༦ བར་མུ་མཐུད་ནས་ཉུང་དུ་ཕྱིན་ཡོད། འོན་ཀྱང་ཟླ་ ༢ པར་སླར་ཡང་བརྒྱ་ཆ་ ༡༥.༣ བར་འཕར་ཡོད། ཐའེ་པེ་ཚན་རྩལ་སློབ་ཆེན་གྱི་རྒྱལ་སྤྱིའི་ཚོང་འབྲེལ་སྡེ་ཚན་གྱི་སློབ་དཔོན་ཆེན་མོ་ཀྲང་ཧོང་ཡིན་(张弘院 ) གྱིས་ཨ་རིའི་རླུང་འཕྲིན་ཁང་གི་བཅར་འདྲི་སྐབས་གསུང་རྒྱུར་རྒྱ་ནག་གཞུང་གིས་ན་གཞོན་ལས་མེད་སྡོམ་རྩིས་ཐབས་ལམ་བཅོས་བསྒྱུར་བྱས་ཏེ་གཞོན་སྐྱེས་ལས་མེད་ཀྱི་གྲངས་ཐོ་མངོན་གསལ་དོད་པོས་ཉུང་དུ་བཏང་ཡོད་ནའང་། གཞོན་སྐྱེས་ལས་མེད་ཀྱི་དངོས་ཡོད་གྲངས་ཐོ་དང་བསྡུར་ན་ལས་མེད་བརྒྱ་ཆ་ད་དུང་འཕར་བཞིན་པ་མཐོང་ཐུབ། གཞོན་སྐྱེས་ལས་མེད་བརྒྱ་ཆ་མཐོ་པོར་གྱུར་བའི་རྒྱུ་རྐྱེན་གཙོ་བོ་སེལ་ཐུབ་མེད་པ་ར་སྤྲོད་བྱེད་ཐུབ། ཀྲང་ཧོང་ཡོན་ལགས་ཀྱིས་མུ་མཐུད་དུ་གསུང་རྒྱུར་ཐེངས་འདིའི་ཞིབ་བཤེར་གྲངས་ཐོ་ནི་གྲོང་ཁྱེར་གྱི་གཞོན་སྐྱེས་ལ་དམིགས་པ་ཞིག་ཡིན་ལ། གྲོང་ཁྱེར་གྱི་དཔལ་འབྱོར་ཕལ་ཆེར་བ་ནི་ཕྱིར་འཚོང་ཁེ་ལས་ཁག་དང་། དངུལ་རྩའི་ཞབས་ཞུའི་ལས་རིགས། ཁང་ས་ཉོ་ཚོང་གི་ལས་རིགས།  སྔོན་ཆད་གཞོན་སྐྱེས་མང་པོས་ལས་རིགས་འདི་དག་གཉེར་བཞིན་ཡོད་ནའང་། ད་ལྟ་དཔལ་འབྱོར་ཉམས་རྒུད་ཀྱི་དཀའ་ངལ་འཕྲད་བཞིན་ཡོད་པས། ལས་མེད་བརྒྱ་ཆ་མཐོ་པོ་ཡོད་པ་ནི་ཧང་སངས་དགོས་པ་ཞིག་མིན་ལ། དོན་དངོས་གཞུང་འབྲེལ་གྱི་གྲངས་ཐོ་ནི་ད་ལྟའི་གཞོན་སྐྱེས་ལས་མེད་ཀྱི་གྲངས་ཐོ་ལས་ད་དུང་ཉུང་བ་ཡོང་མི་སྲིད་པ་མ་རེད།

ཀྲང་ཧོང་ཡོན་གྱིས་གསུང་རྒྱུར། ལས་མེད་བརྒྱ་ཆ་འཕར་བཞིན་པའི་རྒྱུ་མཚན་གཙོ་བོ་ནི་གཅིག་ནས་ཁོ་ཚོའི་ལས་རིགས་གཙོ་བོ་ཁག་ད་དུང་བསྐྱར་གསོ་བྱེད་ཐུབ་མེད་པ་མཚོན་པ་དང་། གཉིས་ནས་གྲོང་ཁྱེར་ནང་གི་གཞོན་སྐྱེས་ལས་མེད་ཀྱི་མི་འབོར་འཕར་བ། ལྷག་པར་དུ་གཞོན་སྐྱེས་ཚོའི་ནུས་པ་ད་དུང་བསྐྱར་གསོ་བྱས་ཐུབ་མེད་པ་མཚོན། ངས་ཚོད་དཔག་བྱས་ན་ཐེངས་འདིའི་གཞོན་སྐྱེས་ལས་མེད་ཀྱི་གྲངས་ཐོ་ནི་གཞུང་ངོས་ནས་ཉུང་དུ་བཏང་ཚར་རྗེས་ཀྱི་གྲངས་ཐོ་ཡིན། དངོས་ཡོད་ཀྱི་གཞོན་སྐྱེས་ལས་མེད་ཀྱི་གནས་སྟངས་ནི་བརྒྱ་ཆ་ ༡༦ ཡང་ན་ ༡༧ ཙམ་ཡིན་སྲིད། ཧྥ་རན་སིའི་ཞིང་ཡེ་དངུལ་ཁང་གི་རྒྱ་ནག་དཔལ་འབྱོར་ཆེད་མཁས་མ་ཡེ་ཁིལ་ལི་ (Michelle Lam) ལགས་ཀྱིས་གློག་འཕྲིན་བརྒྱུད་ནས་ཨ་རིའི་རླུང་འཕྲིན་ཁང་ལ་ལན་འདེབས་བྱས་པའི་ནང་དུ་ད་བར་དུ་རྒྱ་ནག་གི་དཔལ་འབྱོར་བསྐྱར་གསོའི་ཚད་རིམ་ནི་ཆ་མི་སྙོམས་པའི་ངང་འགྲོ་བཞིན་ཡོད་དང་། རྒྱ་ནག་ནང་དུ་གཞོན་སྐྱེས་ལས་མེད་ཀྱི་བརྒྱ་ཆ་འཕར་བཞིན་པའི་གནས་སྟངས་ཀྱིས་ཅི་ཞིག་འགྲེལ་བཤད་བརྒྱབ་པ་རེད་ཟེར་ན། རྒྱ་ནག་ནང་གི་ན་གཞོན་ཚོས་དཔལ་འབྱོར་བསྐྱར་གསོའི་ཁེ་ཕན་ལ་མྱོང་རོལ་མེད་པ་མཚོན་གྱི་ཡོད།

ཁོང་གིས་མུ་མཐུད་དུ་གསུང་རྒྱུར། དེང་སང་གི་ན་གཞོན་རྣམས་ཞབས་ཞུ་ལས་རིགས་ལ་དགའ་མོས་ཆེན་པོ་བྱེད་བཞིན་ཡོད་ནའང། ཕྱི་ལོ ༢༠༢༡ ལོ་ནས་བཟུང་བའི་དམ་དྲག་གི་གནོན་ཤུགས་འོག་ནས་ལས་གནས་སོགས་བསྐྱར་གསོ་བྱས་ཐུབ་མེད་པ་རེད།  གལ་ཏེ་གནས་སྟངས་འདི་མུ་མཐུད་དུ་སོང་ན་སྤྱི་ཡོངས་ཀྱི་དཔལ་འབྱོར་གནས་སྟངས་ཀྱི་དཀའ་ངལ་ཞིག་ཏུ་འགྱུར་སྲིད་པ་དང་། གནས་སྟངས་དེ་འདྲས་ལས་གནས་མཉམ་ཞུགས་ཀྱི་ཚད་གཞི་དང་། དཔལ་འབྱོར་འཕེལ་རྒྱས་ཀྱི་ནུས་པ་རྟག་ཏུ་ཉམས་རྒུད་དུ་འགྲོ་བར་ཤུགས་རྐྱེན་ཐེབས་སྲིད།  དབྱིན་ཡུལ་གྱི་དཔལ་འབྱོར་ཉམས་ཞིབ་སློབ་སྟོན་ཁང་གི་ཉམས་ཞིབ་པ་ལིན་ཧའོ་པོ་(林浩波) ལགས་ཀྱིས་བསམ་འཆར་བཏོན་པ་ལྟར་ན། རྒྱ་ནག་ནང་གི་ལས་མེད་བརྒྱ་ཆའི་སྡོམ་རྩིས་ཐབས་ལམ་གསར་པ་དེ་ལ་ད་དུང་རྒྱས་ལོན་གྱི་གནས་ཚུལ་འདང་ངེས་མེད་པས། རྒྱ་ནག་ནང་གི་མ་འོངས་པའི་དཔལ་འབྱོར་འཕོ་འགྱུར་ལ་དཔྱད་ཞིབ་བྱེད་རྒྱུ་ཁག་པོ་ཡིན། ཁོང་གིས་གསུང་པ་ལྟར་ན། གཞུང་གིས་རིམ་བཞིན་དཔལ་འབྱོར་བསྐྱར་གསོའི་ཐབས་ལམ་དང་། དཔལ་འབྱོར་གོང་འཕེལ། བཟོ་ལས་རིམ་པ་མཐོ་རུ་གཏོང་བའི་སྐུལ་འདེད་བྱས་པ་དང་བསྟུན། ཡང་བསྐྱར་གཞོན་སྐྱེས་ཀྱི་ལས་མེད་བརྒྱ་ཆ་ཉུང་དུ་གཏོང་སྲིད་པ་ཡིན། འོན་ཀྱང་ད་ལྟའི་ཆར་དུས་ཚོད་ངེས་ཅན་ཞིག་གི་ནང་དུ་འགྱུར་བ་འགྲོ་བ་ཚོད་དཔག་བྱ་ཐུབ་ཀྱི་མི་འདུག ལོ་ ༣༥ ལོན་པའི་ཕོ་ཧྲེང་དང་མོ་ཧྲེང་ཚོ་ལ་དཔལ་འབྱོར་ཉམས་རྒུད་ཀྱི་དཀའ་ངལ་མཉམ་འཕྲད་བྱས་པ།  རྒྱ་ནག་གི་ན་ཚོད་རྒན་པའི་མི་རྣམས་ཀྱི་ལས་ཀའི་དཀའ་ངལ། མི་སྒེར་གྱི་ཚོང་ལས་ཁང་ཁག་གིས་གཞོན་སྐྱེས་ལས་མི་འདེམས་བསྐོ་བྱས་པའི་རྐྱེན་གྱིས་ལོ་ན་རྒས་པའི་ལས་མི་དང་། ལས་མི་རྒན་པ་རྣམས་ལས་ཀ་གནས་དབྱུང་བཏང་བ། གཞོན་སྐྱེས་ལས་མེད་ཀྱི་བརྒྱ་ཆ་མཐོན་པོར་གནས་པ་དེ་ད་ཆ་གཞོན་སྐྱེས་ཁོ་ནའི་དཀའ་ངལ་མ་ཡིན་པར། ལས་ཁུངས་ག་གེ་མོའི་ནང་དུ་ལོ་མང་རིང་ལས་ཀ་བྱས་པའི་ལས་བྱེད་པ་འགའ་ཤས་ལ་ཤུགས་རྐྱེན་ཆེན་པོ་ཐེབས་སྲིད་པ་རེད།

ཧྲེན་ཀྲེན་(深圳) དུ་འཚོ་སྡོད་བྱེད་མཁན་དྲ་རྒྱའི་ཚོང་ལས་ཁང་དུ་ལས་ཀ་བྱེད་མཁན་མཱ་ཡེ་(Mia)  ལགས་ཀྱིས་གསུང་དོན། དེང་སང་མི་སྒེར་གྱིས་གཉེར་བའི་ཚོང་ལས་ཁང་ཆེན་པོ་ཚོས་ཀྱང་”སྤྱི་ཚོགས་ཀྱི་འགན་འཁྲི”ཟེར་བ་དེ་ཕྲག་པར་ལྷུང་ཡོད་པ་དང་། འགན་ཁུར་སྟངས་དེས་ལོ་ན་རྒས་པའི་ལས་བྱེད་རྣམས་གནས་དབྱུང་བཏང་རྗེས་སློབ་མཐར་ཕྱིན་མ་ཐག་པའི་སློབ་མ་རྣམས་ལ་ལས་ཀའི་གོ་སྐབས་སྤྲོད་རྒྱུ་དེ་རེད། དེའི་དམིགས་ཡུལ་ནི་གཞོན་སྐྱེས་ཀྱི་ལས་མེད་ཀྱི་བརྒྱ་ཆའི་གྲངས་ཐོ་སྤྱི་ཚོགས་ནང་དུ་མདོག་ཧ་ཅང་ཉེས་པོ་མི་ཡོང་པའི་ཆེད་དུ་ཡིན་པ་གསལ་པོ་རེད།

མཱ་ཡེ་ལགས་ཀྱིས་ཨ་རིའི་རླུང་འཕྲིན་ཁང་ལ་གསུང་དོན། “ང་ཚོ་ལ་རྒྱུན་དུ་ཧྲེན་ཀྲེན་གྲོང་ཁྱེར་སྲིད་གཞུང་གི་བརྡ་ཐོ་དང་ཡིག་ཆ་འདྲ་མིན་འབྱོར་བཞིན་ཡོད། དཔེར་ན་ད་ལོ་ཧྲེན་ཀྲེན་གྲོང་ཁྱེར་ནས་མཐར་ཕྱིན་སློབ་མ་ག་ཚོད་ཡོད་མེད་སོགས་ཀྱི་གྲངས་ཐོའི་སྐོར་རེད། ཁེ་ལས་ཁང་ཆེན་པོ་ཚོའི་མི་ཤུགས་ཐོན་ཁུངས་(HR)ཀྱི་ལས་ཁུངས་ཚང་མར་སྲིད་གཞུང་གི་དགོས་འདུན་གྱི་ཡེ་གེ་འབྱོར་བཞིན་ཡོད། ཡི་གེའི་ནང་དུ་ཁྱེད་ཚོས་ངེས་པར་དུ་སློབ་གྲྭ་ནས་ཐོན་མ་ཐག་པའི་སློབ་མ་རྣམས་ལ་ལས་ཀའི་གོ་སྐབས་འབོར་ཚད་ངེས་ཅན་ཞིག་སྤྲོད་དགོས་ཞེས་འཁོད་ཡོད། ཞའོ་ཧོང་ཧྲི་ (小红书)  སྤྱི་ཚོགས་དྲ་ལམ་ལས་རིགས་འཆར་འགོད་པ་ལུག་ཁ་ (Lucca ) ལགས་ཀྱིས་གསུང་དོན། ད་ལྟའི་ཆར་སྲིད་གཞུང་གི་དགོས་འདུན་ཧ་ཅང་མངོན་གསལ་རེད། གཞོན་སྐྱེས་རྣམས་སྲུང་སྐྱོབ་བྱ་རྒྱུ་དང་། ལོ་ན་རྒས་པ་རྣམས་རྩ་དོར་བྱ་རྒྱུ་རེད། ཅེས་བཤད་བྱུང་།

དམིགས་ཡུལ་དེ་འདྲའི་རྐྱེན་གྱིས་ཁེ་ལས་གཉེར་མཁན་ཚོས་ལོ ༣༥ ཡན་གྱི་ལས་ཀའི་ས་མིག་ཉུང་དུ་བཏང་དང། གཞོན་སྐྱེས་ཚོར་གོ་སྐབས་སྤྲོད་བཞིན་ཡོད། རྒྱ་ནང་གི་ལོ་ ༣༥ ཡན་གྱི་མི་རྣམས་ལ་ཁང་བ་དང་རླངས་འཁོར་གྱི་བུ་ལོན་ཆ་ཚང་ཡོད་ནའང་། ལས་ཀ་ཤོར་བའི་རྐྱེན་ཀྱིས་བུ་ལོན་ལེན་ཆོག་པའི་ཚད་གཞི་རྫོགས་ཟིན་པ་རེད། དེ་བཞིན་ཁོ་ཚོས་གསར་བསྐྲུན་ཐུབ་པའི་ཁྲོམ་རའི་གོ་སྐབས་ཀྱང་རང་བཞིན་གྱིས་ཉུང་དུ་ཕྱིན་ཡོད།  གཞོན་སྐྱེས་ཚོའི་གནས་སྟངས་དེ་དང་མི་འདྲ་སྟེ། ལས་ཀ་ཡོད་ཚེ་བུ་ལོན་ལེན་པའི་དུས་ཚོད་ངེས་ཅན་ཡོད་པས།  འཚོ་བ་ལ་དགོས་མཁོ་བསྐྲུན་ཐུབ་པ་དང་། སྤྱི་ཡོངས་ཀྱི་དཔལ་འབྱོར་གནས་བབ་ལ་ཡག་ཕྱོགས་ནས་འགྱུར་བ་གཏོང་ཐུབ།

མཱ་ཡེ་ལགས་ཀྱི་བསམ་ཚུལ་ཡིན་ན། ཁེ་ལས་པ་ཚོས་གཞོན་སྐྱེས་ཚོར་གླ་ཕོགས་ཉུང་ཉུང་སྤྲད་པའི་ཁེ་ཕན་ཡོད་ནའང་། གཞོན་སྐྱེས་ཚོའི་ཤེས་ཚད་མི་འདྲ་བ་དང་། ལས་ཀའི་གནས་སྟངས་བརྟན་པོ་མེད་པའི་སྐྱོན་ཡོད་པ་རེད། འོན་ཀྱང་། སྲིད་གཞུང་གིས་མངོན་གསལ་དོད་པོས་མི་སྒེར་གྱི་ཚོང་ལས་གཉེར་མཁན་ཚོའི་ལས་དོན་ལ་གྲུབ་འབྲས་ལྡན་པའི་དམིགས་ཡུལ་བཟུང་ཡོད། གཞུང་ངོས་ཀྱི་མཐའ་མའི་ཐག་གཅོད་བྱེད་སྟངས་ནི་སྒེར་གྱི་ཚོང་ལས་ཁང་ནང་ཁུལ་དུ་ངེས་པར་དུ་གཞོན་སྐྱེས་ཚོར་ལས་གནས་སྤྲོད་རྒྱུ་རེད་འདུག ལོ་འགའི་རྗེས་སུ་ད་ལོ་གོ་སྐབས་སྤྲད་པའི་གཞོན་སྐྱེས་དེ་ཚོ་ཕྱིར་འབུད་བྱས་རྗེས་གཞོན་སྐྱེས་གསར་པ་ཚོ་ལ་གོ་སྐབས་སྤྲད་རྒྱུ་ཡིན་འདུག བྱེད་ཐབས་དེ་ལྟར་ཡང་ཡང་བསྐྱར་ཟློས་བྱས་ནས་སྲིད་གཞུང་གིས་ན་གཞོན་ལས་མེད་བརྒྱ་ཆ་མར་བཅག་པར་རམ་འདེགས་བྱེད་བཞིན་ཡོད།