༧གོང་ས་མཆོག་གིས་ནི་ཧོན་ཧེ་ཌན་ཡོ་ཚོགས་པར་ནོ་སྦེལ་ཞི་བདེ་གཟེངས་རྟགས་ཐོབ་པར་འཚམས་འདྲི་མཛད།

༧གོང་ས་མཆོག་གིས་ཉི་ཧོང་གི་ནི་ཧོན་ཧེ་ཌན་ཡོ་ཚོགས་པར་ནོ་སྦེལ་ཞི་བདེ་གཟེངས་རྟགས་ཐོབ་པར་འཚམས་འདྲི་གནང་བ་དང་སྦྲགས་གོ་མཚོན་མེད་པའི་འཛམ་གླིང་བསྐྲུན་ཐབས་ཐད་འབད་བརྩོན་གནང་བར་ཡི་རངས་བསྔགས་བརྗོད་ཡོད་ཅེས་གསུངས།

His Holiness the Dalai Lama along with fellow Nobel Laureates paying respect at the Hiroshima Peace Memorial in Hiroshima, Japan on November 14th, 2010. Photo/Taikan Usui

དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་འདི་ལོའི་ནོ་སྦེལ་ཞི་བདེ་གཟེངས་རྟགས་དེ་ཉི་ཧོང་གི་ནི་ཧོན་ཧེ་ཌན་ཡོ་ (Nihon Hidankyo) ཚོགས་པར་ཐོབ་པར་འཚམས་འདྲི་བསྩལ་བའི་ནང་། དེ་སྔ་ངོས་རང་ཉི་ཧོང་དུ་བསྐྱོད་སྐབས་ཁྱེད་ཚོ་ཁག་ཅིག་དང་ཐུག་རྒྱུའི་གོ་སྐབས་བྱུང། ངོས་ཀྱིས་ཁྱེད་རྣམ་པའི་ཕྱག་ལས་ལ་ཡི་རངས་བསྔགས་བརྗོད་ཞུ་ཡི་ཡོད། ནོར་ཝེའི་ནོ་སྦེལ་གཟེངས་རྟགས་ཚོགས་ཆུང་གི་ངོས་ནས་འདི་ལོའི་ནོ་སྦེལ་ཞི་བདེ་གཟེངས་རྟགས་དེ་ནི་ཧོན་ཧེ་ཌན་ཡོ་ཚོགས་པས་རྡུལ་ཕྲན་མཚོན་ཆ་མེད་པའི་འཛམ་གླིང་བསྐྲུན་ཐབས་དང་། རྡུལ་ཕྲན་མཚོན་ཆ་ནམ་ཡང་བེད་སྤྱོད་བྱ་མི་ཉན་པའི་ར་སྤྲོད་བྱེད་ཆེད་སྐུ་ལས་ཧུར་ཐག་བསྐྱོན་པར་ཆེ་མཐོང་གིས་ ༢༠༢༤ ལོའི་ནོ་སྦེལ་ཞི་བདེ་གཟེངས་རྟགས་དེ་ནི་ཧོན་ཧེ་ཌན་ཡོ་ཚོགས་པར་ཕུལ་བར་བསྔགས་བརྗོད་ཞུ་ཡི་ཡོད། ཅེས་གསུངས།

ཡང་༧མགོན་པོ་གང་ཉིད་ཀྱིས། དེ་སྔ་ངོས་རང་ཉི་ཧོང་གི་ཧི་རོ་ཤི་མ་ (Hiroshima) དང་ན་གྷ་ས་ཀི་ (Nagasaki) གྲོང་ཁྱེར་གཉིས་ཀར་ཕྱིན་པ་ཡིན་ལ། ཁུལ་དེར་གནོད་འཚེ་ཕོག་ཡུལ་གྱི་མི་རྣམས་ལ་སྡུག་བསྔལ་ཚད་མེད་མྱོང་བཞིན་ཡོད་པའི་སེམས་ཚོར་ཤུགས་ཆེན་བྱུང་། ནི་ཧོན་ཧེ་ཌན་ཡོ་ཚོགས་པ་དེ་གསར་འཛུགས་བྱེད་མཁན་རྣམས་ཀྱིས་ཉེན་ཚབས་ཆེ་བའི་རྡུལ་ཕྲན་མཚོན་ཆ་རྣམས་མེད་པ་བཟོ་རྒྱུ་གལ་ཆེན་པོ་ཇི་ཙམ་ཡིན་པ་མཚོན་ཐུབ་ཀྱི་ཡོད་པ་རེད། ངོས་རང་ལ་ཆ་མཚོན་ན་འཛམ་གླིང་འདིའི་སྟེང་རྡུལ་ཕྲན་མཚོན་ཆ་དང་དམག་མཚོན་སོགས་མེད་པ་བཟོ་དགོས་པའི་ཐོག་ལ་ཤུགས་རྒྱག་མཁན་ཞིག་ཡིན་པའི་ཆ་ནས། གཟེངས་རྟགས་དེས་འཛམ་གླིང་མཉམ་འབྲེལ་རྒྱལ་ཚོགས་དང་དེའི་ནང་གི་ཚོགས་མི་རྒྱལ་ཁབ་ཁག དེ་བཞིན་མི་མང་པོར་རྡུལ་ཕྲན་མཚོན་ཆ་དང་གོ་མཚོན་ལས་བྱུང་བའི་འཇིགས་སྣང་དེ་མེད་པ་བཟོ་རྒྱུའི་ཐད་ལ་ཕྱག་ལས་གནང་རྒྱུར་སེམས་ཤུགས་འཕར་མ་བསྐྲུན་ཡོད་པའི་ཡིད་ཆེས་བྱེད་ཀྱི་ཡོད། ཅེས་གསུངས།

མཇུག་ཏུ་༧གོང་ས་མཆོག་གིས། ང་ཚོ་འགྲོ་བ་མིའི་རིགས་ཀྱིས་འཛམ་གླིང་འདིའི་སྟེང་དཀའ་ངལ་མང་པོ་བཟོས་ཡོད། ང་ཚོ་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་ཤ་སྟག་ཡིན་པར་བརྟེན། ང་ཚོའི་ངོས་ནས་འགྲོ་བ་མིའི་རིགས་གཅིག་གྱུར་གྱི་འདུ་ཤེས་གོང་འཕེལ་གྱིས་ཁོང་ཁྲོ་དང་། ང་རྒྱལ་སོགས་མེད་པ་བཟོ་རྒྱུའི་ཐད་འབད་བརྩོན་ངེས་པར་དུ་བྱ་དགོས་ལ། ང་ཚོས་ཁ་ནས་ཞལ་འདོན་བསྐྱོར་བ་ཙམ་གྱིས་ཞི་བདེ་བསྐྲུན་མི་ཐུབ་པར་བརྟེན། གཙོ་བོ་དོན་དངོས་སུ་ལག་བསྟར་བྱ་རྒྱུ་དེ་གལ་ཆེན་པོ་རེད། ཅེས་གསུངས།

འདི་ལོར་ནོ་སྦེལ་ཞི་བདེ་གཟེངས་རྟགས་ཐོབ་པའི་ནེ་ཧོན་ཧེ་ཌན་ཡོ་ (Nihon Hidankyo) ཚོགས་པ་ནི། ཕྱི་ལོ་ ༡༩༥༦ ཟླ་ ༨ ཚེས་ ༡༠ ཉིན་ཉི་ཧོང་གི་གྲོང་ཁྱེར་ཧི་རོ་ཤི་མ་དང་། ན་ག་ས་ཀི་གཉིས་ལ་རྡུལ་ཕྲན་མཚོན་ཆས་གནོད་སྐྱོན་ཕོག་པའི་ཧེ་བྷ་ཀོ་ཤཱ་ (Hibakusha) མི་ཁག་ཅིག་གིས་གསར་འཛུགས་བྱས། ཚོགས་པ་དེས་ཉི་ཧོང་སྲིད་གཞུང་ལ་རྡུལ་ཕྲན་མཚོན་ཆས་གནོད་འཚེ་ཕོག་པའི་མི་མང་ལ་རོགས་སྐྱོར་ཇེ་ལེགས་སུ་གཏོང་བར་གནོན་ཤུགས་སྤྲོད་པ་དང་། ཉི་ཧོང་སྲིད་གཞུང་ནས་རྡུལ་ཕྲན་མཚོན་ཆ་རྩ་མེད་གཏོང་ཆེད་རྒྱལ་སྤྱིའི་སྲིད་གཞུང་ཁག་ལ་ཤུགས་རྐྱེན་སྤྲོད་པར་དམིགས་པའི་ཚོགས་པ་ཞིག་རེད། ཚོགས་པ་དེས་རྡུལ་ཕྲན་མཚོན་ཆ་བཀག་སྡོམ་ཡོང་སླད་སློབ་གསོ་དང་། ལས་འགུལ། ཞུ་གཏུགས། གྲོས་ཆོད་དང་མང་ཚོགས་སོགས་ལ་འབོད་སྐུལ་གཏོང་རྒྱུའི་མ་ཚད། མཉམ་འབྲེལ་རྒྱལ་ཚོགས་ཚུད་པའི་རྒྱལ་སྤྱིའི་སྒྲིག་འཛུགས་འདྲ་མིན་ལ་ལོ་རེར་སྐུ་ཚབ་མངགས་ཏེ་འཛམ་གླིང་སྟེང་རྡུལ་ཕྲན་མཚོན་ཆ་བཀག་སྡོམ་དགོས་སྐོར་ལ་གྲོས་མོལ་བྱེད་དུ་འཇུག་གི་ཡོད་འདུག་ལ། ཚོགས་པ་དེ་ཕྱི་ལོ་ ༡༩༨༥ དང་ ༡༩༩༤། ༢༠༡༥ ལོར་སུད་སི་རུ་རྟེན་གཞི་བྱས་པའི་རྒྱལ་སྤྱིའི་ཞི་བདེའི་གཞུང་ལས་ཁང་ (International Peace Bureau) གིས་རྒྱལ་སྤྱིའི་ཞི་བདེའི་ལྟེ་གནས་ཀྱི་འོས་མིར་བདམས་ཐོན་བྱུང་ཡོད་འདུག

གསར་འགོད་པ། བསྟན་འཛིན་ཕུར་བུ།