རྒྱ་གར་ནང་མཚན་སྙན་ཡོད་པའི་ཁོར་ཡུག་སྲུང་སྐྱོབ་པ་དང་མཉམ་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེ་ཧྲིལ་པོར་ཁོར་ཡུག་སྲུང་སྐྱོབ་ལ་བཅངས་པའི་ཐུགས་རེ་མཚོན་པའི་བགྲོ་གླེང་ཞིག་འཚོགས་སོང་།
ཕྱི་ཟླ་ ༢ ཚེས་ ༢༣ ཉིན་གྱི་ཕྱི་དྲོའི་ཆུ་ཚོད་ ༢ པའི་ཐོག་གངས་སྐྱིད་སྲིད་སྐྱོང་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་དང་བོད་མིའི་སྒྲིག་འཛུགས་ཀྱི་གོ་སྟོན་ཚོགས་ཆུང་གཉིས་ཀྱི་གོ་སྒྲིག་འོག གོ་ལ་དང་འགྲོ་བ་མི། སྙིང་རྗེ། གོ་ལ་ཧྲིལ་པོའི་འགན་འཁྲི་མཉམ་སྤྱོད་ལ་བརྟེན་ནས་ཁོར་ཡུག་སྲུང་སྐྱོབ་མདུན་སྐྱོད་བྱེད་པ་ཞེས་པའི་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེ་ཧྲིལ་པོར་ཁོར་ཡུག་སྲུང་སྐྱོབ་ལ་བཅངས་པའི་ཐུགས་རེ་མཚོན་པའི་བགྲོ་གླེང་ཚོགས་འདུ་འཚོགས་ཡོད་ཅིང་། ཚོགས་ཐོག་ཏུ་རྒྱ་གར་གྱི་ཁོར་ཡུག་སྲུང་སྐྱོབ་དང་ཉམས་ཞིབ་པ་མཱ་རི་མུ་ཐུ་ཡོ་གྷ་ནྷ་ཐཱན་(Marimuthu Yoganathan ) ལགས་དང་། མཱ་ཧན་ཅན་ཌི་ར་ཁན་ཌི་པཱལ་(Mohan Chandra kandpal) ལགས། རཱ་ཅཱན་ཁོ་ཌི་རུ་(Rajan Kotru) ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་དང་། རྒྱལ་སྤྱིའི་བོད་དོན་འབྲེལ་མཐུད་ཁང་གི་ཉམས་ཞིབ་པ་བློ་བཟང་དབྱངས་མཚོ་ལགས། དེ་བཞིན་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་མཉམ་ཞུགས་གནང་སོང་།
ཐེངས་འདིའི་བགྲོ་གླེང་སྐོར་ལ་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས་འདི་གའི་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་ནས་དུས་དང་རྣམ་པ་ཀུན་དུ་ཁོར་ཡུག་སྲུང་སྐྱོབ་ཐོག་ཐུགས་དགོངས་ཡོད་པ་བཞིན་བགྲོ་གླེང་ཚོགས་འདུ་འཚོགས་པ་ཞིག་ཡིན། དེ་རིང་གི་བགྲོ་གླེང་ཐོག་གཏམ་བཤད་གནང་མཁན་ནམ་རྒྱུན་ས་གནས་སུ་ཁོར་ཡུག་ཐོག་མི་མང་ལ་ཞབས་འདེགས་ཞུ་མཁན་ཆགས་ཡོད་ཅིང་། དེའི་ཁྲོད་ཀྱི་མཱ་རི་མུ་ཐུ་ཡོ་གྷ་ནྷ་ཐཱན་ལགས་ལ་མཚོན་ན་རྒྱ་གར་གྱི་ཤིང་མི་ཞེས་ས་གནས་གང་སར་ཤིང་སྡོང་བཙུགས་ཏེ་བྱ་བ་རླབས་ཆེན་བསྒྲུབས་ཡོད་པའི་མཚན་སྙན་གྲགས་ཅན་གྱི་མི་སྣ་ཞིག་ཡིན་ལ། མཱ་ཧན་ཅན་ཌི་ར་ཁན་ཌི་པཱལ་ལགས་ནི་ཨུ་ཌར་ཁན་མངའ་སྡེ་ནས་ཡིན་པ་དང་། ས་གནས་དེ་རུ་ཆུའི་དཀའ་ངལ་ཆེན་པོ་ཡོད་དུས། ཆུའི་དཀའ་ངལ་སེལ་ཆེད་ཁྲོན་པ་བསྐྱར་གསོ་དང་། རི་སྟེང་དུ་ཁྲོན་པ་འཛུགས་སྐྲུན། ཆར་ཆུ་གསོག་འཇོག་སོགས་མི་མང་ལ་ཕན་ཐོགས་པའི་བྱ་བ་རླབས་ཆེན་བསྒྲུབས་ཡོད། ཕྱི་ལོ་ ༢༠༢༤ ལོར་རྒྱ་གར་གཞུང་ནས་ཆུའི་སྲུང་སྐྱོབ་བྱེད་མཁན་ཡག་ཤོས་ཀྱི་བྱ་དགའ་སྤྲད་ཡོད། དེ་བཞིན་རཱ་ཅཱན་ཁོ་ཌི་རུ་ལགས་ནི་རིའི་སྟེང་དུ་གནས་པའི་ཡུལ་མི་རྣམས་སྲུང་སྐྱོབ་བྱེད་པའི་ལས་ཀ་ཤུགས་ཆེན་བྱེད་མཁན་ཞིག་ཡིན། འབུམ་རམས་པ་བློ་བཟང་དབྱངས་མཚོ་ལགས་ནི་བོད་ཀྱི་ཁོར་ཡུག་ཐོག་རྒྱལ་སྤྱིའི་སྟེང་ལས་འགུལ་སྤེལ་མཁན་བཅས་ཡིན། ཐེངས་འདིའི་ཚོགས་འདུའི་དམིགས་ཡུལ་ནི་ཁོར་ཡུག་སྲུང་སྐྱོབ་པ་རྣམས་ཀྱིས་ཕྱག་ལས་གནང་བའི་བརྒྱུད་རིམ་ཁྲོད་ནས་མི་མང་ལ་ཁོར་ཡུག་སྲུང་སྐྱོབ་ཀྱི་ཐབས་ལམ་དང་འདུན་པ་བསླེབ་པའི་ཆེད་ཡིན་ལ། ངའི་བརྗོད་གཞི་ནི་༧གོང་ས་རྒྱལ་བ་རིན་པོ་ཆེ་མཆོག་ནས་ཁོར་ཡུག་སྲུང་སྐྱོབ་ཐོག་ཐུགས་བསྐྱེད་མཛད་པ་དང་ཤུགས་རྐྱེན་སོགས་ཀྱི་ཐོག་ཡིན། ཞེས་འགྲེལ་བརྗོད་གནང་བྱུང་།
རྒྱལ་སྤྱིའི་བོད་དོན་འབྲེལ་མཐུད་ཁང་གི་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས་འདི་གའི་གསར་འགོད་པར། བོད་ནང་དུ་ཁོར་ཡུག་སྲུང་སྐྱོབ་ཐོག་ལས་ཀ་བྱེད་མཁན་རྣམས་ཀྱི་དཀའ་ངལ་ཆེ་ཤོས་ཤིག་ནི་རྒྱ་ནག་གཞུང་གིས་དམ་དྲག་ཤུགས་ཆེན་བྱེད་བཞིན་པ་དེ་རེད། རྒྱ་གཞུང་གིས་དམ་དྲག་བྱེད་བཞིན་ཡོད་ཀྱང་ཁོར་ཡུག་སྲུང་སྐྱོབ་བྱེད་མཁན་གྱི་བོད་མི་མང་པོ་ཐོན་ཡོང་གི་ཡོད། ཡིན་ནའང་བོད་ནང་གི་ཁོར་ཡུག་སྲུང་སྐྱོབ་ཀྱི་གནད་དོན་མང་པོ་ཞིག་ང་ཚོས་ཤེས་ཐུབ་ཀྱི་མེད་པ་རེད། བོད་ནང་གི་ཀརྨ་བསམ་གྲུབ་ལགས་དང་། ཨ་ཉག་སང་སྒྲ་ལགས། མཚོ་སྔོན་ཚེ་རིང་ལགས་བཅས་ཀྱིས་ཁོར་ཡུག་སྲུང་སྐྱོབ་ཐོག་ཕྱག་ལས་གནང་སྟེ་བཙོན་ཁང་དུ་བཅུག་ནས་ད་ལྟ་ཀློད་གྲོལ་བཏང་ཡོད་པའི་གནས་སྟངས་ཤིག་ཆགས་ཡོད། དེ་བཞིན་བོད་ནང་གི་མི་སྒེར་དང་། ཚོགས་པ་ཁག མི་མང་བཅས་ཀྱིས་ཁོར་ཡུག་སྲུང་སྐྱོབ་ཐོག་ཤིང་སྡོང་འདེབས་པ་དང་གད་སྙིགས་གཙང་བཟོ་སོགས་ཀྱི་ལས་གཞི་མང་པོ་བརྩམས་ཡོད། ཕྱི་ལོ་ ༢༠༡༥ ལོར་རང་ལོ་ ༢༧ ཡིན་པའི་བསོད་ནམས་སྟོབས་རྒྱལ་ལགས་ཀྱིས་བོད་ནང་གི་ཁོར་ཡུག་གི་དཀའ་ངལ་ཆེད་དུ་རང་ལུས་མེར་སྲེག་བཏང་བའི་གནས་སྟངས་ཆགས་ཡོད། ད་ལྟའི་ཆར་རྒྱ་ནག་གཞུང་གིས་བོད་ནང་གི་ཁོར་ཡུག་ཐོག་དམ་དྲག་བྱས་ཏེ་ཛ་དྲག་གནས་སྟངས་ཤིག་ཆགས་ཡོད། ཅེས་བརྗོད་བྱུང་།
ཡང་ཁོང་མོས། ཕྱི་ལོ་ ༡༩༩༢ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁོར་ཡུག་གི་ཚོགས་ཆེན་ཐེངས་དང་པོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ནས་བོད་ནང་གི་ཁོར་ཡུག་གི་གནས་སྟངས་ཐོག་བཀའ་སློབ་སྩལ་ཡོད་ཅིང་། སྐབས་དེར་རྒྱལ་སྤྱིའི་ཐོག་ནས་བོད་ནང་གི་ཁོར་ཡུག་ཐོག་དོ་སྣང་བྱུང་ཡོད་ལ། བཙན་བྱོལ་ནང་གི་ཚོགས་པ་འདྲ་མིན་གྱིས་བོད་ནང་གི་ཁོར་ཡུག་སྲུང་སྐྱོབ་ཀྱི་གནས་སྟངས་ཐོག་ཞུ་གཏུགས་བྱས་ཡོད། ཕྱི་ལོ་ ༢༠༢༣ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་དམིགས་བསལ་འགྲོ་བ་མིའི་ཐོབ་ཐང་དང་ཁོར་ཡུག་གི་ཐོག་སྙན་ཐོ་བཏོན་ཡོད་ལ། ཕྱི་ལོ་ ༢༠༢༥ ལོར་མཚོ་སྔོན་ཚེ་རིང་གི་ཁོར་ཡུག་སྲུང་སྐྱོབ་དང་འབྲེལ་བའི་ཐོག་སྙན་ཐོ་ཞིག་བཏོན་ཡོད། སྙན་ཐོ་འདི་དག་ལ་བརྟེན་ནས་རྒྱལ་སྤྱིའི་ཐོག་ནས་བོད་ཀྱི་ཁོར་ཡུག་ཐོག་ཤེས་རྟོགས་བྱུང་ཡོད་པ་མ་ཟད། བོད་ཀྱི་ཁོར་ཡུག་གི་གནད་དོན་དེ་རྒྱ་ནག་ནང་སྦས་མ་ཐུབ་པའི་གལ་གནད་ཅིག་ཆགས་ཡོད། བོད་ནང་གི་ཁོར་ཡུག་གི་གནས་སྟངས་ཤེས་པའི་ཐོག་བཙན་བྱོལ་ནང་གི་གཞོན་སྐྱེས་རྣམས་ཀྱིས་རྒྱལ་སྤྱིའི་ཐོག་ཞུ་གཏུགས་བྱ་རྒྱུ་གལ་ཆེན་པོ་རེད། ཅེས་བརྗོད་བྱུང་།
ཐེངས་འདིའི་བགྲོ་གླེང་ཐོག་མཱ་རི་མུ་ཐུ་ཡོ་གྷ་ནྷ་ཐཱན་ལགས་ཀྱིས་ཤིང་སྡོང་འཛུགས་པའི་གལ་གནད་དང་། དེའི་མིའི་བདེ་ཐང་ལ་ཕན་ཐོགས་གང་ཡོད་མེད། ཁོར་ཡུག་སྲུང་སྐྱོབ་ཀྱི་བྱ་བ་གང་ནས་མགོ་འཛུགས་དགོས་པའི་སྐོར། མཱ་ཧན་ཅན་ཌི་ར་ཁན་ཌི་པཱལ་ལགས་ཀྱིས་ཆུ་བེད་སྤྱོད་བྱེད་ཕྱོགས་ཀྱི་གལ་གནད་དང་དེའི་མིའི་བདེ་ཐང་ལ་ཕན་ཐོགས་པའི་སྐོར། རཱ་ཅཱན་ཁོ་ཌི་རུ་ལགས་ཀྱིས་གནས་རྩ་ཆེན་གྱི་གལ་གནད་དང་དེའི་ཁོར་ཡུག་སྲུང་སྐྱོབ་ཁྲོད་ཀྱི་ནུས་པའི་སྐོར། བློ་བཟང་དབྱངས་མཚོ་ལགས་ཀྱིས་བོད་ནང་གི་ཁོར་ཡུག་སྲུང་སྐྱོབ་དང་བཙན་བྱོལ་ནང་གི་ཞུ་གཏུགས་སྐོར། དེ་བཞིན་ཛམ་ལྷ་བསྟན་པ་རྒྱལ་མཚན་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་ཁོར་ཡུག་སྲུང་སྐྱོབ་ཀྱི་ཐུགས་དགོངས་སྐོར་གཏམ་བཤད་གནང་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
