ཟླ་འདིའི་ཕྱི་ཚེས་ ༢༦ ཉིན་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལྷོ་ཤར་ཨེ་ཤི་ཡའི་རྒྱལ་ཁབ་ཕི་ལི་པིན་ཁུལ་གྱི་གཞུང་འབྲེལ་ཕྱོགས་ཕེབས་མཇུག་བསྒྲིལ་འདུག
ཐེངས་འདིའི་ཕྱོགས་ཕེབས་སྐབས་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཧྥི་ལི་པིན་གྱི་གྲོས་ཚོགས་འཐུས་མི་སྐུ་ཞབས་ཨེ་ཌི་རི་ཡན་ (Adrian Amatong) ལགས་དང་ཐུག་འཕྲད་གནང་སྟེ། བོད་ནང་གི་ཛ་དྲག་གནས་སྟངས་དང་། བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པའི་ཕུགས་དམིགས་ཡིག་ཆའི་སྐོར་གསལ་བཤད་གནང་བ་དང་། ཉེ་ལམ་ཨ་རིའི་གཞུང་གིས་གཏན་འབེབས་གནང་བའི་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གི་འདྲ་བཤུས་ཕུལ་ཏེ། དེའི་ནང་དོན་ངོ་སྤྲོད་དང་འབྲེལ་ཧྥི་ལི་པིན་གྲོས་ཚོགས་ནས་ཀྱང་དེ་མཚུངས་ཀྱི་ཁྲིམས་ཡིག་གཏན་འབེབས་གནང་རྒྱུར་འབད་བརྩོན་གནང་བའི་འབོད་སྐུལ་ཞུས་ཡོད་འདུག
སྐབས་དེར་གྲོས་ཚོགས་འཐུས་མི་སྐུ་ཞབས་ཨེ་ཌི་རི་ཡན་ལགས་ཀྱིས། སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་ཐུག་འཕྲད་བྱུང་བར་དགའ་ཚོར་ཆེན་པོ་བྱུང་། ཧྥི་ལི་པིན་མི་མང་ནི་རང་དབང་དགའ་ཞེན་ཆེ་བའི་མི་མང་ཞིག་ཡིན་པར་བརྟེན། བོད་ཀྱི་གནད་དོན་ནི་འཚེ་མེད་ཞི་བ་དང་། དྲང་བདེན་གྱི་རང་དབང་འཐབ་རྩོད་ཅིག་ཡིན་པས། ཧྥི་ལི་པིན་མི་མང་མང་པོས་བོད་དོན་ལ་རྒྱབ་སྐྱོར་བྱེད་ཀྱི་ཡོད། ཅེས་དང་། བོད་རྒྱའི་རྩོད་རྙོག་ཞི་བའི་ཐོག་ནས་སེལ་ཐབས་སུ་རྒྱ་ནག་དང་གྲོས་མོལ་གནང་རྒྱུའི་འབད་བརྩོན་མུ་མཐུད་གནང་དགོས་སྐོར་སོགས་བརྗོད་འདུག
དེ་རྗེས་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཧྥི་ལི་པིན་དུ་ཡོད་པའི་ཐའེ་ཝན་དཔལ་འབྱོར་དང་རིག་གཞུང་ལས་ཁུངས་ཀྱི་སྐུ་ཚབ་ཝ་ལེ་སི་ (Wallace Chow) ལགས་དང་ཐུག་འཕྲད་ཀྱིས་བོད་དང་ཐའེ་ཝན། རྒྱ་ནག་བཅས་ཀྱི་གནས་སྟངས་སྐོར་གྲོས་བསྡུར་གནང་བ་མ་ཟད། རྒྱ་ནག་དང་དཀའ་རྙོག་སེལ་བར་རྒྱ་ནག་ནང་རང་དབང་དམངས་གཙོ་དར་འཕེལ་གཏང་རྒྱུ་གལ་ཆེན་ཡིན་པ་ངོས་འཛིན་པའི་ཐོག འཛམ་གླིང་ཡོངས་སུ་རང་དབང་དང་དམངས་གཙོ་དར་འཕེལ་ཡོང་བར་འབད་བརྩོན་གནང་རྒྱུའི་ཁས་ལེན་གནང་ཡོད་འདུག
ད་དུང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཧྥི་ལི་པིན་གཙུག་ལག་སློབ་གཉེར་ཁང་གི་རྒྱ་ཁྱབ་འཕྲིན་སྤེལ་ཚན་པར་གཟིགས་སྐོར་གནང་སྟེ། གཙུག་ལག་སློབ་ཁང་དེའི་སློབ་ཕྲུག་རྣམས་ལ་གསུང་བཤད་གནང་སྐབས། སྔ་མོའི་བོད་ཀྱི་བཙན་པོའི་མངའ་ཐང་དང་། ཕྱི་ལོ་ ༡༩༥༠ ལོར་རྒྱ་ནག་གིས་བོད་བཙན་འཛུལ་མ་བྱས་གོང་༧གོང་ས་ཏཱ་ལའི་བླ་མ་སྐུ་ཕྲེང་རིམ་བྱོན་གྱི་དབུ་ཁྲིད་འོག་བོད་མི་རྣམས་ཞི་བདེའི་ངང་གནས་ཡོད་པའི་སྐོར་དང་། རྒྱ་ནག་དམར་ཤོག་ཚོགས་པའི་མགོ་ཁྲིད་ཚོས་བོད་ལ་བདག་དབང་ཡོད་ཚུལ་གྱི་རྣམ་པ་སྟོན་སླད། ལོ་རྒྱུས་འཁྱོག་བཤད་བྱས་དང་བྱེད་མུས་ཡིན་པ་འགྲེལ་བརྗོད་གནང་བའི་ཐོག སློབ་ཕྲུག་རྣམས་ནས་རྒྱ་ནག་གི་དྲིལ་བསྒྲགས་དང་འཁྱོག་བཤད་ལ་ཡིད་གཟབ་བྱ་དགོས་པའི་ཉེན་བརྡ་བཏང་འདུག
གཞན་ཡང་ཁོང་ཉིད་སན་ཊ་མེ་ས་ (Santa Mesa) རུ་ཡོད་པའི་ཧྥི་ལི་པིན་དཔལ་ཡུལ་བོད་བརྒྱུད་ནང་བསྟན་ཆོས་ཚོགས་སུ་གཟིགས་སྐོར་གནང་ཞིང་། དགེ་འདུན་པ་རྣམས་དང་ཐུག་འཕྲད་ཀྱིས་ཁོང་ཧྥི་ལི་པིན་དུ་ཕེབས་དགོས་པའི་དམིགས་ཡུལ་དང་། བཙན་བྱོལ་བོད་མིའི་སྒྲིག་འཛུགས་ཀྱི་ལས་དོན་གསར་པ་ཁག བཀའ་ཤག་གི་ཕུགས་དམིགས་ཡིག་ཆའི་སྐོར་ངོ་སྤྲོད་གནང་ཡོད་འདུག ད་དུང་ར་མོན་མག་སེ་སེ་གཟེངས་རྟགས་ཐེབས་རྩའི་ཚོགས་གཙོ་ལྕམ་སུ་སུན་ (Susan Afan) ལགས་དང་དྲུང་ཆེ་ཇོའི་སི་ལིན་ (Joycelyn Joy) ལགས་རྣམ་གཉིས་ཀྱིས་སྐུ་ཚབ་དོན་གཅོད་དང་ཐུག་འཕྲད་གནང་སྟེ། བོད་དོན་དང་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་བགྲོ་གླེང་གནང་འདུག
ད་དུང་སྐུ་ཚབ་དོན་གཅོད་ཀྱིས་ཧྥི་ལི་པིན་གཙུག་ལག་སློབ་གྲྭ་ཆེན་མོའི་ཨེ་ཤ་ཡ་གླེང་སྟེགས་ (Asian Center Forum) དང་། ཌེལ་ལ་སལ་སེན་ཊི་བི་ནིལ་ཌེའི་ཕྱི་འབྲེལ་དང་འཛིན་སྐྱོང་སློབ་གྲྭ་ (Del La Salle Saint Benilde’s School of Diplomacy and Governance) གཉིས་སུ་དྲ་ཐོག་ནས་བོད་མིའི་འཐབ་རྩོད་དང་། རང་དབང་དང་དྲང་བདེན་འཚོལ་བའི་ལམ། དེ་བཞིན་ཧྥི་ལི་པིན་དང་བོད་ཀྱི་འབྲེལ་ལམ། མི་འདྲ་བའི་ཁྲོད་ནས་སྲ་བརྟན་གྱི་མཉམ་ལས་འཛུགས་སྐྲུན། ཞེས་པའི་བརྗོད་གཞིའི་ཐོག་གསུང་བཤད་གནང་སྐབས། ཧྥི་ལི་པིན་རྒྱལ་ཁབ་ཀྱིས་ཕྱི་ལོ་ ༡༩༥༠ ལོ་མགོར་བོད་དོན་ལ་རྒྱབ་སྐྱོར་གནང་བ་དང་། ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་ལ་སྙན་གྲགས་ཅན་གྱི་ར་མོན་མག་སེ་སེ་གཟེངས་རྟགས་ཕུལ་བར་ཧྥི་ལི་པིན་གཞུང་དམངས་གཉིས་ལ་ཐུགས་རྗེ་ཆེ་ཞུས་པ་དང་ཆབས་ཅིག ཧྥི་ལི་པིན་མི་མང་གི་སྙིང་སྟོབས་ཆེ་ཞིང་རང་དབང་ལ་དགའ་བའི་བསམ་བློར་བསྔགས་བརྗོད་ཞུས་ཤིང་། བོད་ནི་གནའ་སྔ་མོ་ནས་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། རྒྱ་ནག་དམར་ཤོག་ཚོགས་པས་བོད་བཙན་བཟུང་བྱས་པར་ཁྲིམས་མཐུན་གྱི་རྣམ་པ་བསྟན་ཆེད་ལོ་རྒྱུས་འཁྱོག་བཤད་བྱེད་བཞིན་པ་གསལ་བཤད་གནང་བའི་ཐོག རྒྱ་ནག་དམར་ཤོག་ཚོགས་པ་ནི་རྒྱ་ནག་དང་། ཨེ་ཤི་ཡ། འཛམ་གླིང་ལ་ཉེན་ཁ་ཆེ་བས། འཛམ་གླིང་ཁྱོན་ཡོངས་ཀྱི་རང་དབང་ལ་དགའ་བའི་རྒྱལ་ཁབ་ཁག་གིས་རྒྱ་ནག་དམར་ཤོག་ཚོགས་པའི་དབང་སྒྱུར་འོག་ནས་རྒྱ་ནག་ལ་རང་དབང་འཐོབ་པར་མཉམ་རུབ་ཀྱིས་ལས་འགུལ་སྤེལ་དགོས་སྐོར་གསུངས་འདུག
ཧྥི་ལི་པིན་ནི་ཕྱི་ལོ་ ༡༩༦༠ ལོའི་མགོ་སྟོད་དུ་མཉམ་འབྲེལ་རྒྱལ་ཚོགས་ནང་བོད་དོན་ལ་རྒྱབ་སྐྱོར་གནང་མཁན་གྱི་རྒྱལ་ཁབ་ཉུང་ཤས་ཤིག་གི་ཁྲོད་ནས་གཅིག་ཡིན་ཞིང་། དེས་རྒྱ་ནག་གིས་བོད་བཙན་བཟུང་བྱས་པར་སྐྱོན་བརྗོད་དང་བོད་བཅིངས་གྲོལ་ཟེར་བར་ངོས་ལེན་གནང་མེད་པའི་ཁར། ཧྥི་ལི་པིན་གྱི་སྙན་གྲགས་ཅན་གྱི་ར་མོན་མག་སེ་སེ་གཟེངས་རྟགས་དེ་ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་གིས་བོད་ཀྱི་ཆོས་དང་རིག་གཞུང་། ངོ་བོ་རྒྱུན་འཛིན་སྲུང་སྐྱོབ་སླད་མཛད་པ་བླ་མེད་བསྐྱངས་པའི་ངོས་འཛིན་དུ་ཕུལ་ཡོད་པ་རེད།
གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་རྒྱ་ལས་བཏུས།
