འཛམ་གླིང་གི་ཆོས་ལུགས་ཕན་ཚན་དབར་མཐུན་སྒྲིལ་དང་གོ་རྟོགས་སྤེལ་བའི་ཚོགས་ཆེན་ཐེངས་དང་པོ་འཚོགས།

༧སྐྱབས་རྗེ་གླིང་རིན་པོ་ཆེ་མཆོག་གིས་གོ་ལའི་ཐོག་འཁྲུག་རྩོད་ཆེ་བའི་དུས་ཚིགས་གཉན་འཕྲང་ཅན་འདིའི་སྐབས་སུ་ཆོས་ལུགས་མཐུན་སྒྲིལ་བྱ་རྒྱུ་གལ་ཆེན་པོ་རེད་ཅེས་པན་ཇབ་ཏུ་བསྡུས་པའི་འཛམ་གླིང་ཆོས་ལུགས་མཐུན་སྒྲིལ་གྱི་ལྷན་ཚོགས་ཐོག་བཀའ་སློབ་གནང་འདུག

༧སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་པན་ཇབ་ཏུ་བསྡུས་པའི་འཛམ་གླིང་ཆོས་ལུགས་མཐུན་སྒྲིལ་གྱི་ལྷན་ཚོགས་ཐོག་གསུང་བཤད་གནང་བཞིན་པ།

ཁ་སང་ཕྱི་ཚེས་ ༡༣ ཉིན་རྒྱ་གར་པན་ཇབ་ཀྱི་ལྟེ་གནས་གྲོང་ཁྱེར་ཨམ་རི་ཊི་སར་ (Amritsar) དུ། སིག་ཆོས་ལུགས་ཀྱི་སྲོལ་འབྱེད་པ་གྷུ་རུ་ནཱ་ཎག་ (Guru Nanak) གི་འཁྲུངས་སྐར་སྲུང་གཙི་ཐེངས་ ༥༥༥ པའི་དུས་ཆེན་སྲུང་གཙི་དང་བསྟུན། སིག་ཆོས་ལུགས་ཀྱི་ཨ་ཀལ་ཏག་ཊི་ (Akal Takht) དབུ་ཁྲིད་རྣམ་པའི་གོ་སྒྲིག་འོག གསེར་གྱི་ལྷ་ཁང་དང་བུ་ལན་དྷི་པུ་རི་ས་ཧིབ་ (Golden Temple and Bulandpuri Sahib) ཏུ་འཛམ་གླིང་ཆོས་ལུགས་ཕན་ཚུན་དབར་མཐུན་སྒྲིལ་དང་གོ་རྟོགས་སྤེལ་བའི་ཚོགས་ཆེན་ (Global Interfaith Summit) ཐེངས་དང་པོ་འཚོགས་ཡོད་ཅིང་། ཚོགས་འདུ་དེའི་ཐོག་༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་ཡོད་པ་མ་ཟད། རྒྱལ་ཁབ་ཁག་ ༣༥ ལྷག་གི་ཆོས་ལུགས་ཀྱི་དབུ་ཁྲིད་རྣམ་པ་དང་ཚོགས་བཅར་བ་ཁྱོན་སྟོང་ཕྲག་ལྷག་ལྷན་འཛོམས་གནང་ཡོད་འདུག

ཚོགས་ཆེན་ཐོག་སྐུ་མགྲོན་གཙོ་བོ་༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས། དེ་རིང་གྷུ་རུ་ནཱ་ཎག་མཆོག་གི་འཁྲུངས་སྐར་སྲུང་གཙིའི་དུས་ཚིགས་ཁྱད་པར་ཅན་འདིར་འདྲ་མཉམ་དང་ཞབས་ཞུ། དད་གུས་བཅས་ཀྱི་གཞི་རྩ་ལྡན་པའི་སིག་ཆོས་ལུགས་ཀྱི་གཞི་རྒྱ་ཆེ་བའི་དགེ་བའི་ལས་དོན་རྣམས་ལ་ཡི་རངས་བསྔགས་བརྗོད་ཞུ་རྒྱུ་ཡིན། ཞེས་དང་། བྱམས་སྙིང་རྗེ་དང་། ཕན་ཚུན་བཟོད་བསྲན། རང་གི་བསླབ་ཁྲིམས་སོགས་བླ་ན་མེད་པའི་འགྲོ་བ་མིའི་རིན་ཐང་སྐོར་འགྲེལ་བརྗོད་གནང་བ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞི་ལས་དང་པོ་ངོས་རང་འགྲོ་བ་མི་ཞིག་ཡིན་པའི་ཆ་ནས་འགྲོ་བ་མིའི་རྒྱུད་ཀྱི་བཟང་སྤྱོད་གོང་མཐོར་གཏོང་རྒྱུ་དང་། གཉིས་པ། ངོས་རང་ཆོས་པ་ཞིག་ཡིན་པའི་ཆ་ནས་ཆོས་ལུགས་ཕན་ཚུན་བར་མཐུན་འབྲེལ་གོང་མཐོར་གཏོང་རྒྱུ་ཡིན་ཞེས་གསུངས་ཡོད་པ་འགྲེལ་བརྗོད་གནང་སྟེ། ཆོས་ལུགས་འདྲ་མིན་ལ་ལྟ་བ་དང་གྲུབ་མཐའ་འདྲ་མིན་ཡོད་ཀྱང་། བྱམས་པ་དང་། བརྩེ་བ། བཟོད་སྒོམ། ཆོག་ཤེས། ཚུལ་ཁྲིམས་བཅས་ཀྱི་བསླབ་བྱ་ཉམས་སུ་ལེན་པར་ཆོས་ལུགས་ཚང་མ་གཅིག་མཚུངས་ཡིན་ཞིང་། མི་ཚེ་བདེ་སྐྱིད་ཀྱི་ལམ་དུ་ཁྲིད་པའི་ནུས་པའང་གཅིག་མཚུངས་ཡོད་སྐོར་སོགས་གསུངས་འདུག

ཡང་གླིང་མཆོག་སྤྲུལ་རིན་པོ་ཆེ་མཆོག་གིས། དེང་སང་འཛམ་གླིང་ནང་ཆོས་ལུགས་ཀྱི་མིང་ཐོག་ནས་འབྱུང་བཞིན་པའི་འཁྲུག་རྩོད་དང་དམག་འཁྲུག་རྣམས་ལ་སྣང་མེད་དུ་འཇོག་ཐབས་མེད་ཅིང་། འདས་པའི་ལོ་རྒྱུས་ཁྲོད་ཆོས་ལུགས་ཀྱི་ངོ་བོ་དེ་ཞི་བདེ་དང་ཕན་ཚུན་གོ་རྟོགས་ཀྱི་ལམ་ཞིག་ཏུ་འགྱུར་རྒྱུ་ལས་ལྡོག་སྟེ་དབྱེ་འབྱེད་ཀྱི་རྐྱེན་རྩར་འགྱུར་བ་དང་། དེང་སང་འཁྲུག་རྩོད་འདི་དག་མུ་མཐུད་དུ་རྣམ་པ་འདྲ་མིན་གྱི་སྒོ་ནས་མངོན་བཞིན་ཡོད་པའི་རྐྱེན་གྱིས་མི་སྒེར་དང་སྤྱི་ཚོགས་ཁྲོད་སྡུག་བསྔལ་ཚད་མེད་མྱོང་བཞིན་ཡོད། དེར་བརྟེན། དུས་ཚོད་གཉན་འཕྲང་ཅན་དེ་འདྲའི་སྐབས་སུ་ཆོས་ལུགས་མཐུན་སྒྲིལ་བྱ་རྒྱུ་ནི་གལ་འགངས་ཤིན་ཏུ་ཆེན་པོ་ཡིན་ལ། སྔར་ལས་ཀྱང་ཆོས་ལུགས་མཐུན་སྒྲིལ་ཡར་རྒྱས་གོང་འཕེལ་གཏོང་རྒྱུ་ནི་གལ་ཆེན་པོ་རེད། སིག་ཆོས་ལུགས་ཀྱི་དབུ་ཁྲིད་རྣམ་པས་གོ་སྒྲིག་ཞུས་པའི་ཚོགས་འདུ་འདི་ཡིས་མ་འོངས་པའི་མི་རབས་རྣམས་ལ་འཛམ་གླིང་ཞི་བདེ་དང་། ཆོས་ལུགས་ཕན་ཚུན་མཐུན་སྒྲིལ་ཡུན་གནས་ཐུབ་པའི་སྨོན་འདུན་ཞུ་ཡི་ཡོད། ཅེས་གསུངས།

པན་ཇབ་ཀྱི་ལྟེ་གནས་ཨམ་རི་ཊི་སར་དུ་སིག་ཆོས་ལུགས་ཀྱི་ཨ་ཀལ་ཏག་ཊི་ (Akal Takht) དབུ་ཁྲིད་རྣམ་པའི་གོ་སྒྲིག་ཞུས་པའི་འཛམ་གླིང་ཆོས་ལུགས་མཐུན་སྒྲིལ་གྱི་ཚོགས་ཆེན་འཚོགས། གླིང་རིན་པོ་ཆེ་མཆོག་གི་ངོ་དེབ་ནས་པར་བླངས། ༢༠༢༤།༡༡།༡༣

ཞི་བདེ་སྣེ་ཁྲིད་མཁན་ཞིག་ཏུ་འགྱུར་དགོས་སྐོར་དང་འབྲེལ་ནས་གླིང་མཆོག་སྤྲུལ་རིན་པོ་ཆེ་མཆོག་གིས། ཆོས་ལུགས་ཀྱི་དབུ་ཁྲིད་དང་སྐུ་ཚབ་ཞིག་ཡིན་པའི་ཆ་ནས། མཐུན་སྒྲིལ་དང་གྲོས་མོལ་གྱི་བསམ་བློ་སྤེལ་རྒྱུའི་འགན་འཁྲི་ཞིག་ཡོད་ལ། དབུ་ཁྲིད་རྣམས་ཀྱིས་ཆོས་ལུགས་ཕན་ཚུན་མཐུན་སྒྲིལ་དང་། གྲོས་མོལ། དེ་བཞིན་འཚེ་མེད་ཞི་བ་དང་ཁོར་ཡུག་ལ་གཅེས་སྤྲས་བྱེད་པའི་ཐོག་ནས་འགྲོ་བ་མི་གཙོས་སྲོག་ཆགས་ཡོངས་ལ་བརྩི་བཀུར་དང་། ཕན་ཚུན་མཉམ་རུབ་ཀྱི་ཐོག་ནས་འཛམ་གླིང་ཞི་བདེ་བསྐྲུན་རྒྱུའི་འབོད་སྐུལ་ཞུ་ཡི་ཡོད། ང་ཚོས་སྤྱི་ཚོགས་ཁྲོད་དུ་ཞི་བདེ་དང་བཟོད་བསྲན། འདུམ་སྒྲིག་བྱ་རྒྱུའི་སྐུལ་མ་གཏོང་དགོས་གལ་ཆེ་ཞིང་། ཚང་མས་མཉམ་རུབ་ཀྱི་ཐོག་ནས་གཞན་ལ་སེམས་འགུལ་ཐེབས་ཐུབ་པའི་ལས་དོན་སྤེལ་རྒྱུ་དང་། མི་རབས་མང་པོའི་རིང་ལ་ཕན་ཐོགས་ཡོད་པའི་བྱམས་བརྩེའི་གཤིས་རྒྱུད་བཟང་པོ་གོང་འཕེལ་གཏོང་རྒྱུ་གལ་ཆེན་པོ་རེད། ཅེས་གསུངས་འདུག

སིག་ཆོས་ལུགས་ཀྱི་སྲོལ་འབྱེད་པ་གྷུ་རུ་ནཱ་ཎག་ནི་ཕྱི་ལོ་ ༡༤༦༩ ཟླ་ ༤ ཚེས་ ༡༥ ཉིན་པན་ཇབ་མངའ་སྡེའི་ནཱ་ཀཱ་ས་ཧིབ་ (Nakana Sahib) གྲོང་ཁྱེར་དུ་འཁྲུངས། ནཱ་ཎག་ལ་བྷ་བྷ་ནཱ་ཎག་ (Bābā Nānak) ཀྱང་འབོད་ཅིང་། ཁོང་ནི་རྒྱ་གར་གྱི་ཆོས་ལུགས་སློབ་དཔོན་དང་། རྣལ་འབྱོར་པ། སྙན་ངག་པ་ཞིག་ཡིན་ལ། ཁོང་ནི་སིག་ཆོས་ལུགས་ཀྱི་སློབ་དཔོན་བཅུའི་ནང་ནས་དང་པོ་དེ་རེད། གྷུ་རུ་ནཱ་ཎག་གིས་ཨེ་ཤ་ཡའི་ཡུལ་གྲུ་གང་སར་ཕེབས་ནས་མི་རྣམས་ལ་དཀོན་མཆོག་གཅིག་ཁོ་ན་ལས་མེད་པའི་ལྟ་བ་དང་འབྲེལ་ནས་མང་ཚོགས་ལ་གཏམ་བཤད་གནང་ཡོད་ཅིང་། ལྟ་བ་དེ་གཞིར་བཟུང་འདྲ་མཉམ་དང་། སྤུན་ཟླའི་བརྩེ་དུང་། བཟང་པོ་དང་དགེ་བ་བཅས་ལ་གཞི་བཅོལ་བའི་ཐུན་མོང་མ་ཡིན་པའི་ཆོས་ཕྱོགས་དང་སྤྱི་ཚོགས། སྲིད་དོན་བཅས་ཀྱི་གཞི་རྟེན་ཞིག་འཛུགས་སྐྲུན་གནང་བར་མཛད་རྗེས་ཆེན་པོ་བཞག་ཡོད་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།