འཇིགས་མེད་རིན་པོ་ཆེ་མཆོག་ལ་བྱང་ཆུབ་ཆེན་མོའི་ཆོས་ཚོགས་ཀྱི་འཐུས་མིའི་ཆེ་བསྟོད་གཟེངས་རྟགས་ཕུལ།

གདུང་སྲས་དགྱེས་སྤྲུལ་འཇིགས་མེད་རིན་པོ་ཆེ་མཆོག་ལ་བྱང་ཆུབ་ཆེན་མོའི་ཆོས་ཚོགས་ཀྱི་འཐུས་མིའི་ཆེ་བསྟོད་གཟེངས་རྟགས་ཕུལ་འདུག་ལ། ཆེ་བསྟོད་གཟེངས་འདི་ནི་དེ་སྔ་༸གོང་ས་མཆོག་དང་ཀརྨ་པ་རྣམ་གཉིས་ལ་ཕུལ་མྱོང་ཡོད་པ་རེད།

དེ་རིང་ཕྱི་ཚེས་ ༡༥ དང་བོད་ཟླ་ ༩ ཚེས་ ༡༥ ཉིན་ཝར་ན་(Mulagandha Kuti Vihar) གནས་ཁང་དུ་ལོ་རེར་སངས་རྒྱས་ཀྱི་རིང་བསྲེལ་མི་མང་ལ་མཆོད་མཇལ་གཏོང་སྲོལ་ཡོད་པའི་དུས་ཆེན་ཁྱད་པར་ཅན་དང་བསྟུན། གནས་དེར་བྱང་ཆུབ་ཆེན་མོའི་ཆོས་ཚོགས་ཀྱི་གོ་སྒྲིག་འོག་སྔ་འགྱུར་རྙིང་མའི་གདུང་སྲས་དགྱེས་སྤྲུལ་འཇིགས་མེད་རིན་པོ་ཆེ་མཆོག་ལ་བྱང་ཆུབ་ཆེན་མོའི་ཆོས་ཚོགས་ཀྱི་འཐུས་མིའི་ཆེ་བསྟོད་གཟེངས་རྟགས་ཕུལ་བའི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་སྟེང་ཨུ་ཊར་མངའ་སྡེའི་བློན་ཆེན་གཞོན་པ་མཆོག་དང་བྱང་ཆུབ་ཆེན་མོའི་ཆོས་ཚོགས་ཀྱི་ཚོགས་གཙོ་གཞོན་རྣམ་བཅས་ཀྱིས་འཇིགས་མེད་རིན་པོ་ཆེར་ཆེ་བསྟོད་གཟེངས་རྟགས་ཕུལ་བ་དང་། གཞན་ཡང་མཛད་སྒོའི་སྟེང་འཛམ་གླིང་ས་ཕྱོགས་འདྲ་མིན་ནས་ཕེབས་པའི་ནང་པའི་དབུ་བླ་དང་དགེ་བཤེས་མཁན་པོ། དེ་བཞིན་སློབ་ཕྲུག་བཅས་འཛོམས་ཡོད་འདུག

ཁ་སང་ཝར་ན་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་སློབ་གཉེར་བའི་བདེ་དོན་ལྷན་ཚོགས་ཀྱི་གོ་སྒྲིག་འོག ་གདུང་སྲས་དགྱེས་སྤྲུལ་འཇིགས་མེད་རིན་པོ་ཆེ་མཆོག་ལ་ཇི་ལྟར་གསོལ་འདེབས་ཞུས་པ་བཞིན་ནང་ཆོས་ལ་སློབ་བཞིན་པའི་སྤྱི་ཚོགས་ལ་ཞབས་འདེགས་ཞུ་ཚུལ་གྱི་ཐབས་ལམ་ཞེས་པའི་བརྗོད་གཞིའི་ཐོག་བཀའ་སློབ་སྩལ་གནང་ཞིང་། ཝར་ན་ཆེས་མཐོའི་སློབ་གླིང་དབུ་བརྙེས་པ་ནས་ད་བར་སློབ་ཕྲུག་མང་དག་ཅིག་སྐྱེད་བསྲིང་གནང་སྟེ། ད་ལྟའི་ཆར་གཞུང་ཞབས་ཀྱི་གཙོས་བོད་པའི་སྤྱི་ཚོགས་ནང་ཆེད་ལས་འདྲ་མིན་གྱི་ཐོག་ནས་ཞབས་འདེགས་སྒྲུབ་བཞིན་པ་ནི་རྗེས་སུ་ཡི་རངས་བྱེད་ཡུལ་ཞིག་ཏུ་གྱུར་ཡོད་ཅིང་། དེང་སྐབས་སློབ་གླིང་ནང་བོད་པའི་སློབ་ཕྲུག་ཉུང་ཉུང་ཡིན་ཡང་རིག་གཞུང་གཅིག་པའི་ཧི་མ་ལ་ཡའི་རི་རྒྱུད་ཀྱི་སློབ་མ་མང་པོས་བོད་པའི་རིག་གཞུང་ལ་སྦྱང་བརྩོན་བྱས་ཏེ་རྒྱུན་འཛིན་བྱེད་བཞིན་པར་དགའ་སྤོབས་ཆེན་པོ་བྱུང་ཡོད་སྐོར་སོགས་གསུངས་ཡོད་འདུག

གདུང་སྲས་དགྱེས་སྤྲུལ་འཇིགས་མེད་རིན་པོ་ཆེ་ནི། ཡབ་རི་བླའི་གདུང་འཛིན་ནམ་མཁའ་དྲི་མེད་རབ་འབྱམས་རིན་པོ་ཆེ་དང༌། ཡུམ་རིགས་ལྡན་འཆི་མེད་སྒྲོལ་དཀར་གཉིས་ཀྱི་སྲས་སུ་སྤྱི་ལོ་ ༡༩༦༨ རབ་བྱུང་ ༡༦ པའི་ས་སྤྲེལ་ལོར་ངོ་མཚར་བའི་ལྟས་དང་བཅས་ཏེ་སྐུ་འཁྲུངས། ཆུང་དུས་ནས་སྔོན་གནས་རྗེས་དྲན་གྱིས་བག་ཆགས་བཟང་པོས་ངོས་འཛིན་གནང་བ་ལྟར་༧རྒྱལ་ དབང་པདྨའི་གདུང་འཚོབ་༧སྐྱབས་རྗེ་བདུད་འཇོམས་རིན་པོ་ཆེ་འཇིགས་བྲལ་ཡེ་ཤེས་རྡོ་རྗེ་མཆོག་ནས། སྦས་གནས་པདྨ་བཀོད་ཀྱི་གཏེར་ཆེན་པདྨ་གླིང་པའི་ཆོས་དང་རིགས་ཀྱི་བརྒྱུད་འཛིན་དགྱེས་གླིང་ཨོ་རྒྱན་སྨིན་གྲོལ་གླིང་གི་གནས་འཛིན་བླ་མ་པདྨ་ཡོན་ཏན་ལྷུན་གྲུབ་རྒྱ་མཚོའི་ཡང་སྲིད་དུ་ངོས་དགུང་གྲངས་ལྔ་ལ་ཕེབས་པ་སྤྱི་ འཛིན་དང་འབྲེལ་འཇིགས་མེད་ནོར་བུ་ཞེས་པའི་མཚན་གསོལ། དགུང་གྲངས་ལྔ་ལ་ཕེབས་པ་སྤྱི་ལོ་ ༡༩༧༢ ལོར་སྐུ་གོང་མའི་ཞལ་སློབ་དང་ཡོན་བདག་རྣམས་ཀྱིས་རི་དགོན་ཐུབ་བསྟན་སྨིན་གྲོལ་གླིང་གི་གདན་སར་གསེར་ཁྲིར་མངའ་གསོལ་ཞུས་ཤིང༌། དགུང་གྲངས་ ༧ པའི་ཐོག་ཨོ་རི་སའི་གཞི་རིམ་སློབ་གྲྭར་ཕེབས་པ་དང༌། དེ་རྗེས་རྡོ་རྗེ་གླིང་གཏན་སློབ་ཏུ་འཛིན་གྲྭ་བཅུ་པའི་བར་སློབ་གཉེར་གནང་ཞིང་མཁྱེན་རབ་ཀྱི་རྩལ་སུས་ཀྱང་འགྲན་ཟླ་མེད་པ་མངའ་བས་རིག་གནས་དང་སྐད་ཡིག་ཐམས་ཅད་ཚེགས་མེད་པར་ཐུགས་སུ་ཆུད་པ་དང༌། དགུང་གྲངས་ ༡༧ ནས་བལ་ཡུལ་དུ་མཁས་བཙུན་བཟང་པོ་རིན་པོ་ཆེས་ཕྱག་བཏབ་གནང་བའི་སྔ་འགྱུར་འདོད་འཇོ་གླིང་གི་བཤད་གྲྭར་ཕེབས་ཤིང་མདོ་སྔགས་གཞུང་ལུགས་རྒྱ་མཚོར་གསན་བསམ་མཛད་ཅིང༌། བར་སྐབས་ཅི་རིགས་པར་༸གོང་ས་༸སྐྱབས་མགོན་ཆེན་པོ་མཆོག་དང་༧སྐྱབས་རྗེ་བདུད་འཇོམས་འཇིགས་བྲལ་ཡེ་ཤེས་རྡོ་རྗེ། དིལ་འགོ་མཁྱེན་བརྩེ་རིན་པོ་ཆེ་འགྱུར་མེད་ཐེག་མཆོག་བསྟན་པའི་རྒྱལ་མཚན། ༧སྐྱབས་མགོན་འབྲུག་ཆེན་རིན་པོ་ཆེ་འཇིགས་མེད་པདྨ་དབང་ཆེན། ཆགས་མེད་རིན་པོ་ཆེ་ཀརྨ་ཐུབ་བསྟན་སྒྲོན་མེ། བྱ་བྲལ་རིན་པོ་ཆེ་སངས་རྒྱས་རྡོ་རྗེ། ཞྭ་དེའུ་འཁྲུལ་ཞིག་རིན་པོ་ཆེ། སྟག་ལུང་རྩེ་སྤྲུལ་རིན་པོ་ཆེ། གདུང་སྲས་ཕྲིན་ལས་ནོར་བུ་རིན་པོ་ཆེ། མཁས་བཙུན་བཟང་པོ་རིན་པོ་ཆེ། ཉག་རོང་བླ་མ་རིག་འཛིན་རྒྱ་མཚོ་སོགས་སྐྱེས་ཆེན་དམ་པ་མང་པོའི་ཞབས་ལ་བཏུད་དེ་སྔ་འགྱུར་བཀའ་གཏེར་གཙོ་བོར་གྱུར་པའི་ཟབ་ཆོས་བདུད་རྩི་ཅི་རིགས་གསན་བཞེས་དང༌། ཁྱད་པར་དུའང་ཡབ་རྗེ་གཏེར་སྟོན་ནམ་མཁའ་དྲི་མེད་རབ་འབྱམས་རིན་པོ་ཆེའི་ཞལ་སྔ་ནས་གཏེར་ཆེན་སྟག་ཤམ་ནུས་ལྡན་རྡོ་རྗེའི་ཟབ་གཏེར་གྱི་ཆོས་སྐོར་ཡོངས་རྫོགས་དང༌། རྗེ་ཉིད་ཀྱི་དགོངས་གཏེར་གེ་སར་ཞི་དྲག་གི་ཆོས་སྐོར་གཙོ་བོར་གྱུར་པའི་རྩ་གསུམ་ཆོས་སྐྱོང་དང་བཅས་པའི་སྒྲུབ་ཐབས་ཟབ་དྲིལ་དུ་མ་ཞིག་བཞུགས་པ་རྣམས་ཀྱི་དབང་ལུང་གསན་ཞུས་དང༌། སྟག་ཤམ་ཡི་དམ་དགོངས་རང་ལུགས་ཆོ་གའི་ཆིངས་ཕྱག་ལེན་རྣམས་རིག་འཛིན་བརྒྱུད་པའི་ཕྱག་བཞེས་ཉམས་མེད་སློབ་འཁྲིད་ཞུས་པ་མ་ཟད། དུས་རྒྱུན་དུ་རྩ་བའི་བླ་མ་དང་སངས་རྒྱས་དངོས་ལས་ཡབ་སྲས་ཀྱི་འདུ་ཤེས་རིང་དུ་སྤངས་ཏེ་སྒོ་གསུམ་གུས་པ་ཆེན་པོས་བསྙེན་བཀུར་དང་ཅི་གསུངས་བཀའ་བཞིན་སྒྲུབ་པའི་ཞབས་ཏོག་ལས་ནམ་ཡང་འདའ་བ་མེད་པས། རྗེ་བླ་མའི་ཐུགས་ཟིན་གྱི་སློབ་མའི་གཙོ་བོར་གྱུར་ཅིང་་དབང་ལུས་ཁྲིད་གསུམ་གྱི་རྒྱུན་གང་བཞུགས་ཐམས་ཅད་བུམ་པ་གང་བྱོའི་ཚུལ་དུ་སྩལ་ཏེ་རང་གི་རྒྱལ་ཚབ་ཏུ་མངའ་གསོལ་མཛད།

དགུང་གྲངས་ ༢༣ ནས་ཡུ་རོབ་ཁུལ་གཙོ་བོར་གྱུར་བའི་ཨ་རི་དང་ཉི་ཧོང་སོགས་ཕྱི་རྒྱལ་ཡུལ་གྲུ་ཁག་དུ་མར་ཆིབས་བསྒྱུར་བསྐྱངས་ཏེ་དད་ལྡན་གྱི་གདུལ་བྱ་རྣམས་ལ་རང་རང་གི་མོས་པ་དང་འཚམས་པའི་ཟབ་རྒྱས་ཆོས་ཀྱི་སྒོ་དབྱེ་བར་མཛད་པ་ནས་བཟུང་ཡོ་རོབ་ཁུལ་སུད་སི་དང་། ཧྥ་རན་སི། འཇར་མན། སི་པན། ལུག་སུམ་སྦུག སྦེལ་ཇམམ། ཨིང་ལེན། ཉི་ཧོང་བཅས་ཀྱི་ནང་པདྨ་གླིང་ཞེས་པའི་ཆོས་ཚོགས་གསར་འཛུགས་གནང་ཞིང་། རྒྱལ་བསྟན་འཛིན་སྐྱོང་སྤེལ་བའི་བསྟི་གནས་བལ་ཡུལ་རི་དགོན་བཀྲ་ཤིས་ཆོས་གླིང་དང་ཨོ་རི་སར་རི་དགོན་ཐུབ་བསྟན་སྨིན་གྲོལ་གླིང་བཅས་ཀྱི་གཙུག་ལག་ཁང་རྟེན་དང་བརྟེན་པར་བཅས་པ་གསར་བཞེངས་གནང་བ་སོགས་ཀྱིས་སྒོ་གང་ས་ནས་རྒྱལ་བའི་བསྟན་པ་ལ་ཞབས་འདེགས་དང༌། འདས་པའི་ལོ་ཉི་ཤུ་ལྷག་གི་རིང་མི་མང་རྣམས་ལ་ཐུགས་བརྩེ་བ་ཆེན་པོས་སྐུ་ངལ་འཛེམས་མེད་ཀྱིས་གཞིས་གྲོང་ཁག་སོ་སོར་འཐུང་ཆུ་གཙང་མ་གསར་འཛུགས་གནང་བ་དང་། སློབ་ཕྲུག་རྣམས་ལ་སློབ་ཡོན་སྦྱིན་བདག་འཚོལ་གཟིགས། ནད་པ་དང་རྒས་གཅོང་སོགས་ལ་སྨན་རིན་དང་འཚོ་དོད་རོགས་རམ་གནང་བ། ཚོགས་པ་སྐྱིད་སྡུག་ཁག་ལ་ཚོགས་ཁང་གསར་རྒྱག་སོགས་པ་རོགས་རམ། དགོན་པ་ཁག་ལ་ཉམས་གསོ་དང་གསར་བཞེངས་ཀྱི་རོགས་རམ་དང་སློབ་སྟོན་གནང་བ། མ་ལེ་རི་ཡའི་ནད་གཞི་སྔོན་འགོག་གི་ལས་དང་ཁོར་ཡུག་སྲུང་སྐྱོབ་ཀྱི་ལས་གཞི་སྤེལ་བ། ཉེ་འཁོར་གྱི་རྒྱ་གར་ཡུལ་མིའི་གྲོང་ཚོ་རྣམས་ལའང་གོང་ལྟར་འཐུང་ཆུའི་རོགས་རམ་དང་ལྷ་ཁང་གསར་བཞེངས། སློབ་ཕྲུག་ཉི་ཤུ་རྩ་བདུན་སྐོར་ལ་འཚོ་དོད་རོགས་རམ་རྒྱུན་ཆགས་སུ་གནང་བཞིན་པ་སོགས་སྤྱི་ཚོགས་ཞབས་ཞུའི་ཕྱག་ལས་རྒྱ་ཆེ་ལ་རྒྱུན་རིང་བ་ཀུན་གྱིས་མིག་དཔར་འོས་པ་དུ་མ་གནང་བ་ལ་བརྟེན་ནས། ལྷ་མིའི་རྣམ་འདྲེན་ ༧གོང་ས་༧སྐྱབས་མགོན་ཆེན་པོ་མཆོག་གི་ཞལ་སྔ་ནས་ཀྱང་དགྱེས་བརྩེ་ཆེན་པོས་བསྟོད་བསྔགས་ཡང་ཡང་གནང་བ་དང་། བཀའ་ཤག་གཙོས་པའི་བཙན་བྱོལ་བོད་མིའི་སྒྲིག་འཛུགས་ཀྱི་འབྲེལ་ཡོད་ལས་ཁང་ཁག་ནས་ཀྱང་གཟེངས་བསྟོད་ཀྱི་ཕྱག་ཁྱེར་སོགས་ཕུལ་བ་དང༌། རྒྱུན་དུའང་རིན་པོ་ཆེ་མཆོག་གི་ཞལ་སྔ་ནས་ཁོང་ཉིད་༼སྤྱི་ཚོགས་ཞབས་འདེགས་ཞུ་མཁན་གྱི་ནང་པ་༽ཞིག་ཡིན་ཞེས་གསུང་གི་ཡོད་ཅིང་། དུས་ཕྱིས་བལ་ཡུལ་ཡང་ལེ་ཤོད་དུ་ལོ་རེ་རེའི་སྐུ་མཚམས་བཅད་རྒྱར་སྔ་རྗེས་ཐེངས་གཉིས་སུ་བཞུགས་པས་ཐུགས་དམ་ཉམས་ལེན་གོང་འཕེལ་དུ་གྱུར་པ་སོགས། མདོར་ན་རིས་སུ་མ་ཆད་པའི་སྐྱེ་འགྲོ་མཐའ་དག་གནས་སྐབས་དང་མཐར་ཐུག་གི་ཕན་བདེ་ལ་སྦྱོར་བའི་ཐུགས་བསྐྱེད་དང་དགོངས་གཞི་བླ་ན་མེད་པའི་ངང་ནས་བསྟན་འགྲོར་སྨན་པའི་མཛད་ཕྲིན་དབྱར་མཚོ་ལྟར་རྒྱས་དང་རྒྱས་བཞིན་ཡིན་འདུག

གསར་འགོད་པ། སྐལ་བཟང་སྦྱིན་པ།