བོད་ཀྱི་ཁོར་ཡུག་སྲུང་སྐྱོབ་པ་ཀརྨ་བསམ་འགྲུབ་ལགས་ཀློད་འདུག

རྒྱ་ནག་གཞུང་གིས་མི་ལོ་ ༡༥ བཙོན་འཇུག་ཁྲིམས་ཐག་བཅད་པའི་བོད་ཀྱི་ཁོར་ཡུག་སྲུང་སྐྱོབ་པ་དང་གནའ་རྫས་བདག་གཉེར་བ་ཀརྨ་བསམ་འགྲུབ་ལགས་ཀློད་གྲོལ་བཏང་འདུག

འདི་ག་བོད་ཀྱི་དུས་བབ་གསར་ཁང་ལ་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་མི་ལོ་ ༡༥ བཙོན་འཇུག་ཁྲིམས་ཐག་བཅད་པའི་བོད་ཀྱི་ཁོར་ཡུག་སྲུང་སྐྱོབ་པ་དང་གནའ་རྫས་བདག་གཉེར་བ་ཀརྨ་བསམ་འགྲུབ་ལགས་ཀློད་གྲོལ་བཏང་ཡོད་འདུག་ལ། གནས་ཚུལ་མཁོ་སྤྲོད་པས་ཁོང་བཙོན་ཁང་གང་ནས་ཀློད་ཡོད་མེད་དང་སྐུ་གཟུགས་གནས་སྟངས། འགྲོ་འདུག་ལ་རང་དབང་ཡོད་མེད་སོགས་གསལ་པོ་ཤེས་རྟོགས་མ་བྱུང་ཡང་། ཕལ་ཆེར་ཁ་སང་ཀློད་ནས་དེ་རིང་ཁྱིམ་དུ་འབྱོར་ཡོད་ཚོད་འདུག་ཅེས་བརྗོད་བྱུང་།

ཕྱི་ལོ་ ༢༠༡༠ ཟླ་ ༦ ཚེས་ ༢༤ ཉིན་རྒྱ་ནག་ཤིན་ཅང་ཡན་ཆི་རྫོང་ཁྲིམས་ཁང་གིས་བོད་ཀྱི་ཁོར་ཡུག་སྲུང་སྐྱོབ་པ་ཀརྨ་བསམ་འགྲུབ་ལགས་ལ་ལོ་ ༡༥ ཡི་བཙོན་འཇུག་ཁྲིམས་ཆད་དང་། མི་ལོ་ ༥ རིང་ཆབ་སྲིད་ཀྱི་ཁེ་དབང་འཕྲོག རྒྱ་སྒོར་ ༡༠༠༠༠ ཉེས་ཆད་བཅས་བཅད་ཡོད་པ་རེད། སྐབས་དེར་ཀརྨ་བསམ་འགྲུབ་ལགས་ཀྱི་ཁྲིམས་རྩོད་པ་ཕུ་ཀྲི་ཆང་(Pu Zhiqiang)ལགས་ཀྱིས། ང་ཚོར་ཁྲིམས་ཁང་གི་ཡིག་ཆ་སྔོག་པ་དང་ཁོང་དཀར་འདོན་བྱེད་རྒྱུའི་ཁུངས་སྐྱེལ་ཡིག་ཆ་འཚོལ་རྒྱུར་དུས་ཚོད་ཀྱིས་འདང་མ་སོང་། ལྷག་པར་དུ་ཁོང་དང་ཐུག་འཕྲད་སྐབས་སུན་བཙིར་མང་བོ་བྱས་སོང་། ཞེས་དང་། ཀརྨ་བསམ་འགྲུབ་ལགས་སུ་ཁྲིམས་ཆད་ཧ་ཅང་ལྗིད་པོ་བཅད་ཡོད་སྐོར་འགྲེལ་བརྗོད་གནང་ཡོད་པ་རེད།

ཀརྨ་བསམ་འགྲུབ་ལགས་ཕྱི་ལོ་ ༢༠༡༠ ཟླ་ ༡ ཚེས་ ༣ ཉིན་འཛིན་བཟུང་བཙན་འཁྲིད་བྱས་ཡོད་ཅིང་། ཟླ་ཤས་རིང་ཤིན་ཅང་པཱ་ཀྲིག་ཟེར་བར་བཀག་ཉར་བྱས་ཏེ་སྡུག་སྦྱོང་མནར་གཅོད་དང་འདྲི་རྩད་བཙན་སྐུལ་བསམ་ཡུལ་ལས་འདས་པ་བྱས་རྗེས། ལོ་དེའི་ཕྱི་ཟླ་ ༦ ཚེས་ ༢༤ ཉིན་ཤིན་ཅང་ཡན་ཆི་རྫོང་ཁྲིམས་ཁང་གིས་ཁོང་ལ་དུར་ས་བསྔོགས་ཏེ་རིག་གཞུང་གི་ཤུལ་དངོས་བརྐུ་འཁྱེར་བྱས་ཡོད་པའི་ནག་ཉེས་བཙུགས་ཏེ་ཁྲིམས་ཐག་བཅད་ཡོད་འདུག སྤྱིར་བཏང་ཕྱི་ལོ་ ༡༩༩༨ ཙམ་ལ་ཞིན་ཅང་ནས་ཁོང་ལ་ནག་ཉེས་དེ་བཙུགས་ཡོད་ཀྱང་ཕྱིས་སུ་དཀར་འདོན་བྱས་ཟིན་པ་ཞིག་ཡིན་འདུག

ཀརྨ་བསམ་འགྲུབ་ལགས་ཀྱི་སྤུན་རིན་ཆེན་བསམ་གྲུབ་དང་འཆི་མེད་རྣམ་རྒྱལ་གཉིས་ཕྱི་ལོ་ ༢༠༠༩ ཟླ་ ༨ པའི་ནང་རྒྱ་ནག་གཞུང་གིས་འཛིན་བཟུང་བྱས་ཏེ། རྒྱལ་ཁབ་ཀྱི་བདེ་འཇགས་ལ་གནོད་པའི་ལས་ཀ་བྱས་པའི་ཉེས་མིང་འོག་རིན་ཆེན་བསམ་གྲུབ་ལགས་ལ་ལོ་ ༥ བཙོན་འཇུག་ཁྲིམས་ཐག་བཅད་དེ་ཕྱི་ལོ་ ༢༠༡༤ ཟླ་ ༨ ཚེས་ ༨ ཉིན་ལྷ་སའི་བཙོན་ཁང་ཞིག་ནས་ཀློད་ཡོད་པ་དང་། འཆི་མེད་རྣམ་རྒྱལ་ལགས་ལོ་གཅིག་དང་ལོ་ཕྱེད་ཙམ་རིང་ངལ་རྩོལ་བསྒྱུར་བཀོད་ཁང་དུ་བཅུག་ཡོད་པ་རེད།

ད་ལྟ་རང་ལོ་ ༥༦ ཙམ་ཡིན་པའི་ཀརྨ་བསམ་འགྲུབ་ལགས་ནི་བོད་གོ་འཇོ་རྫོང་བསམ་འཕེལ་ཡུལ་ཚོ་སྡོམ་པ་གྲོང་རྡལ་ནས་ཡིན་ལ། ཁོང་སྤུན་གསུམ་གྱིས་ཨ་ཆུང་སེང་གེ་གནམ་རྫོང་གི་དྭང་བླངས་ཁོར་ཡུག་སྲུང་སྐྱོབ་ཚོགས་པ་ཞེས་པ་ཞིག་ཆེད་འཛུགས་བྱས་ཤིང་། རིན་ཆེན་བསམ་འགྲུབ་དང་འཆི་མེད་རྣམ་རྒྱལ་གཉིས་ཀྱིས་རྒྱ་ནག་གི་ལས་བྱེད་ཚོས་ཡུལ་དེའི་རི་སྐྱེས་སྲོག་ཆགས་རྣམས་ལ་གནོད་འཚེ་གཏོང་གི་ཡོད་པའི་གནད་དོན་ཞུ་གཏུགས་བྱས་རྗེས།  རྒྱ་ནག་གཞུང་གིས་ཁྲིམས་འགལ་ཐོག་ནས་ཁོང་གཉིས་ཀྱིས་ཁོར་ཡུག་དང་འབྲེལ་བའི་གནས་ཚུལ་བསྡུ་རུབ་བྱས་ཤིང་། རྒྱལ་ཁབ་ཀྱི་བདེ་འཇགས་ལ་གནོད་པའི་ལས་ཀ་བྱས་ཚུལ་གྱི་ནག་ཉེས་བཙུགས་ཡོད་པ་རེད།

འབྲེལ་ཡོད་གནས་ཚུལ། ཀརྨ་བསམ་འགྲུབ་ལ་ལོ་ ༡༥ བཙོན་ཐག་བཅད་པ།

རྩོམ་སྒྲིག་བྱེད་མཁན། པདྨ་མཚོ།