ཕྱི་ལོ་ ༢༠༠༨ ལོར་རྒྱ་ནག་གི་མེ་མདའ་སོགས་མཚོན་ཆ་ཐོགས་པའི་དམག་མི་གྲངས་ ༥༠༠ ཡིས་བོད་ཀྱི་གྲོང་གསེབ་རེ་བསྐོར་བར་ཉིན་གྲངས་བདུན་འགོར་གྱི་ཡོད། ཕྱི་ལོ་ ༢༠༢༠ ཟླ་ ༨ པའི་ནང་སྟེ། ལོ་ངོ་བཅུ་གཉིས་ཀྱི་རྗེས་སུ་རྒྱ་དམག་ ༥༠༠ ཡིས་བོད་པའི་གྲོང་གསེབ་རེ་བསྐོར་བར་ཆུ་ཚོད་བདུན་ལས་འགོར་གྱི་མེད་འདུག
ཉེ་ལམ་བོད་ཀྱི་དཔེ་མཛོད་ཁང་གི་གོ་སྒྲིག་འོག སྤྱི་ཚོགས་རིག་པའི་འབུམ་རམས་པ་དང་སློབ་དཔོན་ཆེན་མོ་ལྡོང་ཕྱིང་གུར་བ་རྒྱལ་ལོ་ལགས་ཀྱིས། བོད་ཀྱི་ད་ལྟའི་གནས་སྟངས་ལས། ཤེས་ཡོན་སློབ་གསོ་དང་མ་འོངས་པའི་བོད་ཀྱི་སྤྱི་ཚོགས་འཕོ་འགྱུར་ཞེས་པའི་བརྗོད་གཞིའི་ཐོག་གཏམ་བཤད་གནང་ཡོད་ཅིང་། སྐབས་དེར་ཁོང་གིས་ད་ལྟ་བོད་ཀྱི་མི་འབོར་ནི་ས་ཡ་དྲུག་མིན་པར་ས་ཡ་བརྒྱད་ལ་ཟིན་ཉེ་ཡོད་པ་སོགས་གསུངས་སོང་།
ཁོང་གི་གཏམ་བཤད་ཁྲོད། ལོ་ངོ་ ༤༧༠༠ གོང་ནས་ད་ལྟའི་བར་ང་ཚོའི་བཙན་པོ་རིམ་བྱུང་ནས་མི་རབས་གོང་མ་དག་གིས་ཤ་དང་ཁྲག་གི་འགྲོ་གྲོན་བཏང་ནས་ང་ཚོའི་མི་རབས་གསར་པ་ཚོར་བོད་ཀྱི་ས་ཁྱོན་ཆེན་པོ་ཞིག་རྩིས་སྤྲོད་གནང་ཡོད་མོད། ཕྱི་ལོ་ ༡༩༥༩ ལོར་བོད་རྒྱ་ལག་ཏུ་ཤོར་བ་དང་། བོད་ཀྱི་ས་དང་སྐད་ཡིག་རིག་གཞུང་སོགས་ལ་བདག་པོ་རྒྱག་པར་ཕྱི་ནང་གི་ཆ་རྐྱེན་མང་པོ་ཡོད་པ་ལས། བསྡོམས་བརྒྱབ་ན་མི་ལ་ཐུག་བསྡད་ཡོད་ཅིང་། མི་ནུས་པ་ཅན་ཞིག་གསོ་སྐྱོང་མ་ཐུབ་པ་ཡིན་ན་བོད་ཀྱི་ས་ཁྱོན་རིག་གནས་དང་བཅས་པར་བདག་པོ་རྒྱག་མི་ཐུབ་ལ། མི་ནུས་པ་ཅན་ཞིག་གསོ་སྐྱོང་བྱེད་པར་ཤེས་ཡོན་སློབ་གསོར་རག་ལས་ཡོད།
ཕྱི་ལོ་ ༡༩༨༠ ནང་བོད་ནང་དུ་སློབ་གྲྭ་མང་པོ་བཙུགས་ཏེ་བོད་ཡིག་ཤེས་མཁན་ཚང་མ་དགེ་རྒན་བྱས་ཤིང་། དེ་ལ་བརྟེན་ནས་ཤེས་ཡོན་སློབ་གསོའི་གཞི་རྩའི་སྤུས་ཀར་ཤུགས་རྐྱེན་ཐེབས་ཡོད་མོད། མི་རབས་རྒན་པ་ཚོས་ལྷག་བསམ་རྣམ་དག་གི་ཐོག་ནས་མི་མང་ལ་བྱིས་པ་ཚོ་སློབ་གྲྭར་བསྐྱལ་དགོས་པའི་བཀའ་སློབ་ལམ་སྟོན་གནང་ཡོད་ཀྱང་། སློབ་གྲྭ་ཁག་གི་བསླབ་གཞི་དང་བསླབ་དེབ་ཐོག་རྒྱ་ནག་གིས་ལྐོགས་ཇུས་ཅི་ཞིག་འཐེན་ཡོད་པ་ཧ་གོ་མེད། རྒྱ་ནག་གིས་ཇུས་བཤམས་ཏེ་བསླབ་གཞི་དང་བསླབ་དེབ་ལ་ཐོག་མ་ནས་སྟངས་འཛིན་བྱས་ཡོད། ཕྱི་ལོ་ ༡༩༩༥ ལོར་གཞི་ནས་བོད་པའི་སྤྱི་ཚོགས་ནང་རྒྱ་ནག་གི་ཇུས་ངན་དེ་མགོ་འཚོས་པ་དང་། སློབ་གྲྭ་གྲུབ་བྱེད་ཀྱི་ཁྱབ་ཁོངས་ནས་རྒྱ་ནག་གིས་བསླབ་གཞི་གོ་སྒྲིག་གི་དབང་ཆར་སྟངས་འཛིན་བྱེད་པ་ནི་གནད་འགོག་ཆེ་ཤོས་ཡིན། རྒྱ་ནག་གིས་བསླབ་གཞི་འདི་འཁྲིད་ཆོག་པ་དང་འདིའི་རིགས་འཁྲིད་མི་ཆོག་ཅེས་ཡིག་ཆ་གསལ་བོ་བཟོས་ཡོད་སྟབས། དེའི་ཐོག་ནས་གཞི་རྒྱ་ཆེ་བའི་གཞོན་སྐྱེས་རྣམས་ལ་བོད་རང་གི་སྲོལ་རྒྱུན་རིག་གཞུང་སློབ་པའི་སྒོ་བཀག་ཡོད། ལོ་རབས་བརྒྱད་ཅུ་བའི་ནང་སྲིད་ཇུས་ཆེས་ལེགས་པའི་སྐབས་སུ་བསླབ་གཞི་ཁག་ཏུ་རྒྱ་ནག་གི་བསླབ་གཞིའི་བརྒྱ་ཆ་ ༩༠ དང་བོད་རང་གི་བསླབ་གཞི་བརྒྱ་ཆ་ ༡༠ ཙམ་མ་གཏོགས་མེད། ཕྱི་ལོ་ ༢༠༡༨ རྗེས་ནས་བོད་ཡིག་གི་བསླབ་གཞི་ཚང་མ་མེད་པར་བཟོས་ཡོད།
སྔོན་ཆད་བོད་པའི་སློབ་གྲྭ་ཁག་ལ་བོད་མིས་བདག་པོ་རྒྱག་གི་ཡོད་ཀྱང་། ད་ལྟ་སློབ་གྲྭ་ཁག་ལ་རྒྱ་ནག་འཐབ་ཕྱོགས་གཅིག་གྱུར་ཁང་དང་སྤྱི་བདེ་ལས་ཁུངས། སློབ་གསོ་ལས་ཁུངས་བཅས་ཀྱིས་སྟངས་འཛིན་དང་དོ་དམ་བྱེད་བཞིན་ཡོད། རྒྱ་ནག་གི་ས་ཁུལ་གཞན་གྱི་སློབ་གྲྭ་ཁག་ཏུ་སྤྱི་བདེ་ལས་ཁུངས་དང་འཐབ་ཕྱོགས་གཅིག་གྱུར་ཁང་གཉིས་ཀྱིས་ཐེ་གཏོགས་བྱེད་ཀྱི་མེད། དེར་བརྟེན། བསླབ་པ་སློབ་གཉེར་བྱེད་སའི་ཁོར་ཡུག་དང་སྒྲིག་འཛུགས་ཀྱི་བདག་དབང་དང་དེའི་ནང་དུ་ག་རེ་འཁྲིད་ཆོག་མིན་སོགས་ལ་རྒྱ་ནག་གིས་སྟངས་འཛིན་བྱེད་ཀྱིན་ཡོད་པ་མ་ཟད། སློབ་ཚན་འཁྲིད་ཐབས་ཀྱི་སྐད་ཡིག་ལ་སྟངས་འཛིན་བྱས་དང་བྱེད་མུས་ཡིན། དེ་མཚུངས་བཞིན། བོད་ཀྱི་དགོན་སྡེ་ཁག་ཏུ་འཐབ་ཕྱོགས་གཅིག་གྱུར་ཁང་དང་ཆོས་ལུགས་དོ་དམ་ལས་ཁུངས། ཉེན་རྟོག་ལས་ཁུངས་སོགས་ཀྱིས་ལྟ་རྟོག་བྱེད་མགོ་བཙུགས་ཡོད་ལ། ད་ལོ་ནས་ཤུགས་ཆེ་རུ་འགྲོ་བཞིན་འདུག
པན་ཆེན་རིན་པོའི་ཆེའི་སྐབས་སུ། བོད་ནང་ནས་དགེ་འོས་སློབ་གྲྭ་ལྔ་བཙུགས་ཡོད་ཀྱང་། སློབ་གྲྭ་དེ་དག་གི་ནང་དུ་བོད་ཀྱི་སྐད་ཡིག་དང་རྩོམ་རིག་སྡེ་ཚན་ཞིག་བཙུགས་ཏེ། སློབ་ཚན་གཞན་ཆ་ཚང་རྒྱ་ཡིག་ནང་དུ་ཡོད་ཅིང་། བོད་ཡིག་ནང་རྩོམ་རིག་དང་སྐད་ཡིག་ཁོ་ན་མེད་པས། རྩོམ་རིག་དང་བརྡ་སྤྲོད་སྦྱངས་ནས་སློབ་མཐར་ཕྱིན་བོད་པའི་སློབ་མ་ཚོར་སྤྱི་ཚོགས་སྟེང་ནས་ལས་ཀའི་ཁོར་ཡུག་དང་གོ་སྐབས་མེད་པར་བརྟེན། དེང་སྐབས་ཁོ་ཚོས་ས་གནས་སྲིད་གཞུང་དང་རྒྱ་ནག་གི་གྲོང་ཁྱེར་སྲིད་གཞུང་ཁག་དང་མཉམ་འབྲེལ་གྱིས་བོད་མི་མང་པོ་རྒྱ་ནག་ཏུ་ཞོར་ལས་ལ་འཁྲིད་ཀྱི་ཡོད་ཅིང་། དེའི་ཁྲོད་ཀྱི་བོད་མི་ཁག་ཅིག་གི་དོན་ལྔ་སྣོད་དྲུག་ཡན་ཆད་རྐུ་འཁྱེར་བྱེད་བཞིན་པའི་གནས་ཚུལ་འབྱུང་གི་ཡོད།
དེ་བཞིན། བསླབ་དེབ་ཀྱི་ནང་དོན་ལ་སྟངས་འཛིན་བྱས་ཏེ་རྒྱ་བསྒྱུར་བྱེད་བཞིན་ཡོད་ལ། སྔོན་ཆད་བོད་རང་སྐྱོང་ལྗོངས་ཟེར་བ་དང་རང་སྐྱོང་ས་ཁུལ་དུ་བོད་ཡིག་གི་ལས་ཁུངས་ཁ་ཤས་ཡོད་མོད་ད་ལྟ་མེད་པར་བཟོས་ཟིན། རྒྱ་ནག་གིས་བཤད་བཞིན་པའི་སྐད་གཉིས་སློབ་གསོ་ཟེར་བ་དེ་ཚད་ལྡན་གྱི་སྐད་གཉིས་སློབ་གསོ་མིན་པ་དང་། ཕྱི་ལོ་ ༢༠༡༨ ནས་རྔ་བ་ཁུལ་དུ་སྐད་གཉིས་སྲིད་ཇུས་ཟེར་བ་མེད་པར་བཟོས་ཡོད་ལ། སྐབས་དེར་འབྱུང་འགྱུར་ལོ་བཞི་ལྔའི་ནང་བོད་ཡིག་གི་སློབ་ཚན་རྦད་དེ་མེད་པར་བཟོ་རྩིས་ཡིན་པ་ཤེས་རྟོགས་བྱུང་ཡོད། ཕྱི་ལོ་ ༢༠༡༣ ལོར་ལྷ་ས་ནས་སྐད་གཉིས་སྲིད་ཇུས་མཚམས་འཇོག་བྱས་པ་དང་མདོ་སྟོད་སྨད་གཉིས་ལས་ཁམས་ཕྱོགས་སུ་འདི་ལོ་ནས་མགོ་བཙུགས་ཡོད་པ་དང་ས་ཆ་འགར་འདས་ལོ་ནས་མགོ་བཙུགས་ཡོད།
འདི་ལོའི་ཕྱི་ཟླ་ ༧ ནང་རྭ་རྒྱ་ཤེས་རིག་སློབ་གླིང་སྒོ་བརྒྱབ་པ་དང་ད་ལྟ་བོད་ནང་གི་སྒེར་བཙུགས་སློབ་གྲྭ་ཕལ་ཆེ་བ་སྒོ་བརྒྱབ་ཟིན་ལ། ཕྱི་ལོ་ ༢༠༢༠ ཟླ་ ༩ ནང་ནས་མཐོ་སློབ་ཁག་ཏུ་ཡོད་པའི་བོད་ཡིག་སྡེ་ཚན་མེད་པར་བཟོས་ཏེ། སོག་པོ་དང་ཡུ་གུར། བོད་བཅས་གྲངས་ཉུང་མི་རིགས་ཀྱི་སྡེ་ཚན་ཞེས་པར་བསྒྱུར་ཡོད། དེ་དག་གི་ཁྲོད་དུ་ནུབ་བྱང་མི་རིགས་སློབ་གྲྭ་ཆེན་མོའི་བོད་སྐད་ཡིག་དང་རིག་གནས་སློབ་གླིང་དང་ལྷོ་ནུབ་མི་རིགས་སློབ་གྲྭ་ཆེན་མོའི་སྐད་ཡིག་དང་རིག་གནས་སློབ་གླིང་། ཀྲུང་དབྱངས་མི་རིགས་སློབ་གྲྭ་ཆེན་མོའི་བོད་སྐད་ཡིག་དང་རིག་གནས་སློབ་གླིང་། བོད་ལྗོངས་སློབ་གྲྭ་ཆེན་མོའི་བོད་སྐད་ཡིག་དང་རིག་གནས་སློབ་གླིང་། མཚོ་སྔོན་མི་རིགས་སློབ་གྲྭ་ཆེན་མོ། མཚོ་སྔོན་མི་རིགས་དགེ་ཐོན་སློབ་གྲྭ་ཆེན་མོ། སི་ཁྲོད་མི་རིགས་སློབ་གྲྭ་ཆེན་མོ། ཀན་སུའུ་མི་རིགས་སློབ་གྲྭ་ཆེན་མོ། རྔ་བ་དགེ་ཐོན་སློབ་གྲྭ་ཆེན་མོ་སོགས་ཡོད།
ཕྱི་ལོ་ ༢༠༡༦ ལོ་ནས་རྒྱ་ནག་གིས་སྔོན་འགྲོའི་བཅའ་སྡོད་སློབ་གྲྭའི་སྲིད་ཇུས་ལག་བསྟར་བྱས་ཏེ། ལོ་ ༤ ནས་ ༦ གྱི་ཕྲུ་གུ་ཚོ་སློབ་གྲྭར་ཉར་ཏེ་ཞག་བདུན་གྱི་ནང་ནས་ཞག་གཉིས་མ་གཏོགས་ཕ་མར་ཐུག་ཆོག་གི་མེད་པའི་གྲངས་འབོར་མང་དུ་ཕྱིན་པ་ལ་བརྟེན་ནས། ཕྲུ་གུ་དེའི་རིགས་ཟླ་གསུམ་གྱི་རྗེས་ནས་རང་ཁྱིམ་དུ་ལོག་ཚེ་མི་ཆ་མེད་ལྟ་བུར་གྱུར་ཡོད། ཕྱི་ལོ་ ༢༠༢༣ ལོར་རྩད་གཅོད་བྱས་པ་ལྟར་ན། ཕྱི་ལོ་ ༢༠༡༦ ལོར་སྔོན་འགྲོའི་བཅའ་སྡོད་སློབ་གྲྭར་ཕྱིན་པའི་ཕྲུ་གུ་དེ་ཚོས་རང་ཉིད་ཀྱི་ཕ་མ་ཚོས་ཅི་ཞིག་ལ་རྒྱ་སྐད་རྒྱག་མ་ཤེས་པ་རེད་དམ་ཞེས་གཞེ་གཞེ་གཏོང་གི་ཡོད་པའི་གནས་སྟངས་ཆགས་ཡོད།
ད་ལྟའི་གནས་སྟངས་ནི་ལོ་ངོ་དྲུག་ཅུ་རེ་ལྔ་ལྷག་གི་འབྲས་བུ་ཡིན། ད་ལྟ་བོད་ཕྱི་ནང་གཉིས་ཀྱི་གནས་སྟངས་དང་འབྲེལ་ནས་བོད་སྤྱིའི་གནས་སྟངས་དེ་གཉན་འཕྲེང་ཅན་གྱི་དུས་སྐབས་ཤིག་ཡིན། རྒྱ་ནག་གཞུང་གིས་བོད་ཀྱི་ཤེས་ཡོན་སློབ་གསོའི་ཐོག་ལག་བསྟར་བྱེད་བཞིན་པའི་གནས་སྟངས་ལ་བལྟས་ན། བོད་མི་རིགས་ཀྱི་སྐད་ཡིག་རིག་གནས་ལོ་ངོ་ཉི་ཤུ་སུམ་ཅུ་ཙམ་ལས་གསོན་མི་ཐུབ་པའི་ཉེན་ཁ་ཞིག་མཐོང་གི་འདུག ལོ་ངོ་སུམ་ཅུའི་རྗེས་ནས་བོད་སྐད་བཤད་མཁན་མེད་པ་དང་མ་ཎི་བགྲང་མི་ཤེས་མཁན། ཐ་ན་བོད་སྐད་བེད་སྤྱོད་གཏོང་བར་འདོད་མོས་མེད་པའི་གནས་སྟངས་ཤིག་གསལ་བོ་མཐོང་གི་འདུག ཕྱི་ལོ་ ༡༩༥༩ ལོར་རྒྱ་ནག་གིས་བོད་བཅིངས་གྲོལ་བཏང་ནས་བོད་མི་ཚོ་བོད་ཀྱི་བདག་པོར་བཟོས་ཡོད་ཟེར་བཞིན་ཡོད། འོན་ཀྱང་། ངས་རྒྱ་ནག་གིས་ཤེས་ཡོན་སློབ་གསོ་ལག་ཆར་བེད་སྤྱོད་བྱས་ཏེ་འདས་པའི་ལོ་ངོ་ ༦༥ རིང་བོད་ཀྱི་མི་རབས་བཞི་རྒྱ་ནག་གི་བྲན་གཡོག་ཏུ་བསྒྱུར་ཡོད་ཟེར་གྱིན་ཡོད། ཕྱི་ལོ་ ༢༠༠༨ ལོར་རྒྱ་ནག་གིས་མེ་མདའ་སོགས་མཚོན་ཆ་ཐོགས་པའི་དམག་མི་གྲངས་ ༥༠༠ ཡིས་བོད་ཀྱི་གྲོང་གསེབ་རེ་རེ་བསྐོར་བར་ཉིན་གྲངས་བདུན་འགོར་གྱི་ཡོད། ཕྱི་ལོ་ ༢༠༢༠ ཟླ་ ༨ པའི་ནང་སྟེ། ལོ་ངོ་བཅུ་གཉིས་ཀྱི་རྗེས་སུ་རྒྱ་དམག་ ༥༠༠ ཡིས་བོད་པའི་གྲོང་གསེབ་རེ་བསྐོར་བར་ཆུ་ཚོད་བདུན་ལས་འགོར་གྱི་མེད།
སྤྱི་ཚོགས་ཀྱི་མ་རྩ་གཙོ་བོ་དང་བདག་པོ་མི་ཡིན་པས། ང་ཚོར་ད་ལྟ་བོད་མི་གྲངས་ ༧༨༩༣༢༢༥༨ ཡོད་པ་དང་། དེའི་ནང་ནས་དབུས་གཙང་གི་མི་འབོར་བརྒྱ་ཆ་ ༧༧ ཡིག་རྨོངས་པ་ཡིན། བརྒྱ་ཆའི་ ༡༥ མཐོ་འབྲིང་མཐར་ཕྱིན་པ་དང་བརྒྱ་ཆའི་ ༨ མཐོ་སློབ་མཐར་ཕྱིན་ཞིང་། མཐོ་སློབ་འགྲིམས་པའི་ཁྲོད་ཀྱི་བརྒྱ་ཆ་ ༦༨ རྒྱ་ཡིག་གིས་རྐང་བཟུང་ཡོད། མདོ་སྟོད་སྨད་གཉིས་ཀྱི་མི་འབོར་གྱི་བརྒྱ་ཆ་ ༨༨ ཡིག་རྨོངས་པ་དང་། བརྒྱ་ཆ་ ༢༨ མཐོ་སློབ་མཐར་ཕྱིན་ཞིང་། དེ་ལས་བརྒྱ་ཆ་ ༡༨ བོད་ཡིག་ཡག་པོ་ཤེས་མཁན་ཡིན། ད་ལྟ་བོད་མི་ས་ཡ་བརྒྱད་ལ་ཟིན་གྲབས་ཡོད། ས་ཡ་དྲུག་མ་རེད། མི་འབོར་ཞིབ་བཤེར་ནང་བོད་སྐད་མི་ཤེས་པ་དག་རྩིས་བརྒྱབ་མེད། རྒྱུ་མཚན་སྤྱི་ཚོགས་གྲུབ་བྱེད་ཀྱི་བདག་བྱེད་ནི་སྐད་ཡིག་དང་རིག་གནས་ཡིན་པ་ལས་ཁོ་ཚོར་ཆ་རྐྱེན་དེ་ཚང་གི་མེད་པས་ཡིན།
ཕྱི་ལོ་ ༢༠༠༠ བར་བོད་མི་རྒྱ་བསྒྱུར་གྱི་སྲིད་ཇུས་ལ་འགྱུར་ལྡོག་ཚབས་ཆེན་བྱུང་མེད་པར་ང་ཚོའི་སྤྱི་ཚོགས་ཀྱི་མ་རྩ་བརྟན་པོར་གནས་ཡོད། དེ་ནི་གཞིས་ཀྱི་མི་རབས་གོང་མ་རྣམས་ཀྱིས་ཤེས་ཡོན་སློབ་གསོར་ཐུགས་འཁུར་དང་འབད་བརྩོན་གནང་བ་བརྟེན་ནས། བོད་པའི་སྐད་ཡིག་དང་རིག་གནས་བེད་སྤྱོད་བྱེད་སའི་ཁོར་ཡུག་སྲུང་སྐྱོབ་དང་རྒྱུན་སྐྱོང་བྱེད་ཐུབ་ཡོད། དེ་དག་གི་ཁྲོད་དུ་མི་མང་པོ་ཡོད་པ་ལས་དཔེ་མཚོན་འགའ་ནི། ཀུན་གཟིགས་པན་ཆེན་བཅུ་བ་མཆོག མཁས་པའི་གཙུག་རྒྱན་དམུ་དགེ་བསམ་གཏན་ཚང་དང་ཚེ་བརྟན་ཞབས་དྲུང་ཚང་། དུང་དཀར་བློ་བཟང་འཕྲིན་ལས་ཚང་། རྡོ་རྗེ་ཚེ་བརྟན་ཚང་། ཉན་ཤུལ་མཁྱེན་རབ་འོད་གསལ་ཚང་། སློབ་དཔོན་ཆེན་མོ་འཇམ་དཔལ་ཕུན་ཚོགས་ཚང་། གུང་ཐང་འཇམ་པའི་དབྱངས་སྐུ་ཕྲེང་དྲུག་པ་ཚང་། མཛོད་དགེ་ཉི་མ་ཚང་། ཨ་ཁུ་བཤད་སྒྲུབ་ཚང་། ཨ་ལགས་བསེ་ཚང་། གཞིས་བཞུགས་མཁས་དབང་དོར་ཞི་རིན་པོ་ཆེ་དང་དཔའ་རིས་སངས་རྒྱས་ཚང་སོགས་ཡོད། ཁོང་ཚོ་མེད་ཚེ་ང་ཚོའི་བོད་ཡིག་འདི་སྤྱི་ཚོགས་སྟེང་དར་ཁྱབ་ཕྱིན་མེད། རིག་གནས་གསར་བརྗེ་མཇུག་རྫོགས་པ་དང་མི་རབས་གོང་མ་དག་གི་ལས་འགན་ནི་རང་མི་རིགས་ཀྱི་སྐད་ཡིག་སྤྱི་ཚོགས་ཀྱི་འགྲོ་སྟངས་གཞིར་བཟུང་བསྐྱར་གསོ་གནང་བ་མ་ཟད། ཤེས་ཡོན་སློབ་གསོའི་ཐོག་ཤུགས་བསྐྱོན་ཡོད། ད་ལྟ་བོད་ནང་དུ་མཁས་དབང་དོར་ཞི་རིན་པོ་ཆེ་དང་དཔའ་རིས་སངས་རྒྱས་ཚང་གཉིས་མ་གཏོགས་མཁས་དབང་རྒན་པ་གཞན་བཞུགས་མེད།
༧གོང་ས་མཆོག་ནས་ཁོང་དགུང་ལོ་བརྒྱ་དང་བཅུ་གསུམ་ལྷག་བཞུགས་རྒྱུ་ཡིན་པར་གསུངས་པ་དེ་ནི་བོད་མི་རིགས་ལ་ཉེན་བརྡ་གཏོང་གི་ཡོད་པར་མཐོང་གི་འདུག ༧ཁོང་དགུང་ལོ་ ༡༡༣ རིང་བཞུགས་པ་ཡིན་ན། ད་ལྟ་ལོ་ངོ་ཉེར་གསུམ་འདུག ལོ་ངོ་ཉི་ཤུ་དང་སུམ་ཅུ་ནི་མི་རིགས་ཤིག་གི་འཆར་གཞིར་ཐུག་ན་དུས་ཡུན་ཐུང་ཐུང་ཞིག་རེད། ད་ལྟ་བོད་སྤྱིའི་གནས་སྟངས་ལ་བལྟས་ཡོང་དུས། བྲོ་འཁྲབ་ནས་གླིང་ག་གཏོང་བ་སོགས་རྣམ་གཡེང་བྱེད་པའི་དུས་ཚོད་ཅིག་རེད་མི་འདུག ང་ཚོ་བོད་མི་རིགས་ལ་སྤྱི་ལོ་དུས་རབས་བརྒྱད་པའི་སྐབས་སུ་སའི་གོ་ལའི་སྟེང་བཙན་པོའི་རྒྱལ་ཁབ་གསུམ་ཡོད་པའི་ནང་གི་གཅིག་བོད་མི་རིགས་ཡིན། ད་ལྟ་བོད་མི་རིགས་འདི་སའི་གོ་ལའི་སྟེང་ནས་བོར་བརླག་ཏུ་འགྲོ་གཞིའི་གནས་སྟངས་ཐོག་བསླེབས་ཡོད། ང་ཚོ་མེད་པར་འགྱུར་སྲིད་པའི་རྒྱུ་རྐྱེན་ཡང་ཤེས་ཡོན་སློབ་གསོ་ལ་རག་ལས་ཡོད་ལ། ང་ཚོས་ཤེས་ཡོན་སློབ་གསོའི་སྟེང་ནས་རྒྱལ་ཁབ་གཞན་ལག་ཏུ་ཤོར་བ་དང་ཤོས་ཡོན་སློབ་གསོའི་སྟེང་ནས་མི་རིགས་བརླག་ཉེན་འདུག་པས། ང་ཚོས་འདས་པའི་ལོ་ངོ་ ༦༥ རིང་ག་རེ་བྱས་ཡོད་པ་དང་རྒྱ་ནག་གིས་བོད་ནང་དུ་ཅི་ཞིག་བྱེད་བཞིན་པའི་གནས་སྟངས་དེ་ཚོ་ཤེས་རྒྱུ་གལ་ཆེན་ཡིན།
